Isáaŋ 1
1
Yésus Kilíise, mekélíe móólinoné ku Támbák
1É nitúmín Mekélíe mapá mákanyi kɔ́ɔk.
Mekélíe mapá na Támbák, mɔ́ Támbákɛ́ɛ.
2Mámapá kɔ́ɔk é kutúm ne kutúm na Támbák.
3Maandá kitikit Támbák mɛɛ́lɛ́, umɛɛlɛ́ mɔ́ ne mekélíe;
epú ne epú umɛɛ́lɛ́ kati mɛ́ tipá.
4Kusɔ́t mapá é mekélíe,
kú kúmaápá kisie kíteekenyé punya pɛɛnduɛ.
5Kisie ápunya kí imbíne,
Tɛ ɛ́ɛ́ imbíne nyíin kisie.
6Támbákɛ́ɛ watɔ́m mɔɔnd kisiɛ́n ɛ́ɛ́ Isáaŋɛ.
7Umoól asɛ etétúny, é kuesitétúnyényí, ɛ́ɛ́ pɛɛnd peem píondonyi ɔtɛ́m ne kisie.
8Isáaŋ timapá kisie, umɛɛsíkɛ́nɛ́n ɛ́ɛ́ wásipá etétúnyí u kisie.
9Mɛɛ́tɛ mekélíe mámaápá kémuémue u kisie, ekí kímoól e kúúsí, é kuteekenyi mɔɔnd kitikit.
10Mekélíe mapá e kúúsí,
Mɔ́ Támbák maápundán kúúsí kɔ́ɔk,
tɛ nɔ́ punya pɛɛnduɛ péeleemit, tɛ kuand emenyi mɔ.
11Umoól ku pɔ́kúɔ́p,
pɔ́kúɔ́p tɛ pokóli wɔ.
12Maná, epé pómoókólí wɔ́ ne peseé, ne epé pópióndonyé ɔtɛ́m kɛ́ɛ́yɛ́ ɛ́ kisiɛ́n, umeekí pɔ́ pukaaka pú kúɛ́yɛ́ paán pá Támbák. 13Nupíén núɔ́p óólinon ɔ́ kuɔyɔ kú Támbák kúú na kúu, nútipá nuólinon tɛ á manɔ́ŋ tɛ ɔ́ kuɔyɔ kú akáandɔ́ nɛ ɛnúmɛndɔ́ tɛ kí iŋilí ilotí.
14Mekélíe mɛ́ɛ́kɛɛ́y mɔɔnd
mɔ́ɔkɔsinyɔ́mbɛ́t naasɔ́,
tuɛ́nɛn nuúmu núɛ́yɛ́,
nuúmu enú Támbákɛ́ɛ Síí éekenyé kinsuúŋulɛ kíɛ́yɛ́ kí Muɔ́nɔ́ kiwóónón ni imɛmɔ́ ne kémuémue.
15Isáaŋ kéme kɛ́ɛ́yɛ́ ó pusíó wɔɔyɔ ɛ́ɛ́:
«Índɛ́ ewú imɛɛ́l káánɔ́ ɛ́ɛ́: Mɔɔnd ɔ́kɔɔŋɔn káámɛ é kélém, unyɛ ɔkɔ́n naamɛ, á kiákí ɛ́ɛ́ pámapá pámanyi pétimbíén, wɔ́, umapá ukanyi kɔ́ɔk.»
16Kɛ́ɛ́yɛ́ kɔ́ ɔtɛ́m peseé ú kati iŋetíe pasɔ́ peem tuatáŋap níásɔ́ niap ní punɛ́m, tuatáŋap kipínúúne na pitál.
17Kí imbɔ́k sí Moyíis Támbák maátúfá pikotí; maná, nɔ ɔtɛ́m peseé ne kémuémue móokoólin é Yésus Kilíis.
18Mɔɔnd na mɔɔnd mapása utiɛ́n Támbákɛ́ɛ; maná kɔk kinsuúŋulɛ kíɛ́yɛ́ kí muɔ́nɔ́ kínyɛɛ́ Támbákɛ́ɛ, kínyɛɛ́ á masíá me Síí, kí kíɛlɛnɛ́ ɛ́ɛ́ tumenyi Támbákɛ́ɛ.
Isáaŋ etétúnyí
(Mat 3.1-12; Mál 1.2-8; Lúk 3.15-17)
19Pɔkɔ́n pɛ́ Pɛyúútɛn pé Yelúsalɛm páapílikɛn pafunɔ́fɔn ne pelééfit á kutɔ́m pómotí ku Isáaŋ. Páámána póowun Isáaŋɛ ɛ́ɛ́: «Aŋúɛ ɛnyɛɛ́ ɛ́nyɛ?» 20Isáaŋ timɛnɛmbin pɔ́ puandá, watíán pɔ́ kémuémue ɛ́ɛ́: «Indipá niŋúɛ inyɛɛ́ Kilíise.» 21Póokówun wɔ́ ɛ́ɛ́: «Aŋúɛ ɛnyɛɛ́ kɔk ɛ́nyɛ? Elí éé?» Wɔ́ ɛ́ɛ́: «Indipá Elí é wɔ.» pákanyi andíkɛ́k kɛ́ɛ́yɛ́ ɛ́ɛ́: «Aŋúɛ ɛnyɛ́ɛ eŋémímekélíe má Támbák tupéétenyíé á?» Woondinyi pɔ́ ɛ́ɛ́: «Puákó.» 22pákanyi and kɛ́ɛ́yɛ́ ɛ́ɛ́: «Aŋúɛ ɛnyɛɛ́ ɛ́nyɛ́ kɔk? Tuɛ́kɛɛsikɛnɛn kuondínyí pɔsɔ́k pásiátutɔm. Tútíán ewú ɛnyɛɛ́.» 23Isáaŋɛ woondinyi pɔ́ ɛ́ɛ́: «Inyɛ ekelú ú ewú ukémé ɔ́ kiɔsɔ́kɔlíɔ wɔyɔ ɛ́ɛ́: “Énutényíkénényí iŋilí ó pusíó pú Ɔkɔ́n!” Aná eŋémímekélíe má Támbák Esayí mɔɔ́yɛ́t.» 24Kɔ́ ɔlɔŋ ukáánɛ́ úmoól ku Isáaŋ, pómotí mapá Pafalisiɛ́ŋ. 25pákanyi kɛ́ɛ́yɛ́ ɛ́ɛ́: «Atipá Eli é, atipá Kilíise, atipá tɛ eŋémímekélíe má Támbák, kiákí etuenené pɛɛnd?» 26Isáaŋɛ kɔ́ɔ́p ɛ́ɛ́: «Niŋúɛ yeénútuenen no moomb, maná sɔ́k omotí nyɛ káánɔ́ ɛ́ kikɛtɛ́kɛtɛ́ɛ, nutiányípá numenyen wɔ. 27Sɔ́k ewú woóloné káámɛ é kélém ákindápukan, indipá yeeken wɔ́ tɛ kí ikéŋénye é kusulun tuolí tú pipɔ́kɔ́t píɛ́yɛ́.» 28Emeé kitikit matápúkán Petaní, nakúnɛ u kiílu kí Sulutɛ́ŋ, kɔɔ́mɔ Isáaŋ meétuénén pɛɛnd.
Yésuse, itúúmbɛ́túúmbɛ́ í Támbák
29Kuépéli, Isáaŋɛ wɛɛ́n Yésus ólon kɔɔ́mɔ umaápá. Ukany ɛ́ɛ́: «Wuúwe, Itúúmbɛ́túúmbɛ́ɛ í Támbák yeélenyé pifal pí pɛɛnd. 30Wuwú yɛ́niɛ́l káánɔ́ ɛ́ɛ́: “Mɔɔnd ɔ́kɔɔŋɔn káámɛ é kélém, maná unyɛ ɔkɔ́n káámɛ, á kiákí ɛ́ɛ́ umapá pámany pétimbíén.” 31Niŋúɛ kákámɛ indiémenyen ɛ́ɛ́ wuwu, imoól é kuesituénén pɛɛnd ɛ́ɛ́ nikúli níe Ísilayɛ́l meny wɔ.» 32Isáaŋ kanyiɛ́ etétunyenyi ɛ́ɛ́: «Insiɛ́n Emfúnukufúúmɛ ólinon mɛnɛ́mɛnɛ́ɛ ɛlɛɛ́ kipa kí selen ɔ́ kuɔsinyɔɔmbɛ́t kɛ́ɛ́yɛ́. 33Indiémenyen ɛ́ɛ́ wuwu, Támbákɛ́ɛ ewú umiíndɔ́m é kuesituénén pɛɛnd no moomb mɛɛl káámɛ ɛ́ɛ́: Ɛkɛɛ́n Emfúnukufúúmɛ selen ɔ́ kunyɔ́mbɛ́t á mɔɔnd. Sɔ́k wɛɛ́tɛ ukeénítuenen pɛɛnd ne Emfúnkufúumɛ. 34Yɛɛ́píɛ́nɛ́n ne eŋis yáámɛ, kúukɔ́ yɛɛlɛnɛ́ ɛ́ɛ́ mɔɔnd ukáánɛ́ unyɛɛ́ Muɔ́nɔ́ u Támbák.»
Popíónyí pé Yésus pákutúan
35Á Kuand epéli kúɛ́yɛ́, Isáaŋ maanda apá ɛ́ kɛɛ́tɛ kɔɔ́mɔ umeétuénén pɛɛnd no popíónyí pɛ́ɛ́yɛ́ pólotí páandɛ́. 36Aná umɛɛ́n Yésus tápukan ukanyi ɛ́ɛ́: «Itúúmbɛ́túúmbɛ́ɛ í Támbák eye.» 37Aná popíónyí pɛ́ɛ́yɛ́ pápáandíɛ mɔɔ́p nɔ́ pɔ́ɔŋ é Yésus. 38Yésuse wɛɛpíkɛkɛlɛt, wɛɛ́n ɛ́ɛ́ pɔ́ɔ́kɔŋɔn kɛ́ɛ́yɛ́, wɔ́ kɔ́ɔ́p ɛ́ɛ́: «kiákí nuambanɛ́ɛ?» Pɔ́ kɛ́ɛ́yɛ́ ɛ́ɛ́: «Lápi (anakáánɛ́ kúnyɛɛ́ ɛ́ɛ́ Oŋónyóonyi) naánɛ́ ɔnyɔ́mbitɔnɛ́ɛ?» 39Wɔ́ kɔ́ɔ́p ɛ́ɛ́: «Ónuóló, núpíɛ́nɛn!» Páayɔɔk, pɛ́ɛnyɛɛ́n kɔɔ́mɔ umɔɔ́nyɔmbitɔn, péeyuuki puɔ́s pukáánɛ́ nɛɛyɛ́. Púmapá púkanyí puandá pú pikulɛ́ píni pí kélém kú ɔtɛ́m puɔ́s. 40Omoómí á pápáandíɛ epe pɔ́mɔɔ́p puandá Isáaŋ mɔɔ́yɔ, pɔmɔɔ́ŋ é Yésus, mapá kisiɛ́n ɛ́ɛ́ Endelée, andimán Símun Píɛ́l. 41Waatúan kɔ́ɔ́p ku andimán wɛɛyɛ́ Símun, wɔ́ kɛ́ɛ́yɛ́ ɛ́ɛ́: «Tumɛ́ɛ́n Meesí» (anakáánɛ́ kunyɛɛ́ ɛ́ɛ́ Kilíise). 42Waayɔɔk nɛɛyɛ́ ku Yésus. Yésuse weepítípenyi Símune, wɔ́ kɛ́ɛ́yɛ́ ɛ́ɛ́: «Anyɛ Símune, muɔ́nɔ́ u Isáaŋ. Nínúan pákakupílan ɛ́ɛ́ Séfasɛ.» (Kisiɛ́n kikáánɛ́ ɔ́ɔ́kɔɔyɔ ɛ́ɛ́ Píɛlɛ.) 43Á kúand epéli kúɛ́yɛ́, Yésus kanyi ɛ́ɛ́ wóondin kiáyí kí Kalilée. Weelumen ne Fílip, ukanyi kɛ́ɛ́yɛ́ ɛ́ɛ́: «Ɔŋɔ́ káámɛ!» 44Fílip mapá mɔnɔ́ Pɛtisayíta, pálɛ́k omoómí ne Endelée ne Símun. 45Waayɔɔk ɛ́ kuɛ́n Natanayɛ́lɛ, wɔ́ kɛ́ɛ́yɛ́ ɛ́ɛ́: «Tuɛ́n sɔ́k ewú Moyíis mɛɛ́tɛɛ́tɛ́n kɛ́ɛ́yɛ́ á kálatɛ u pikotí, ewú peémímekélíé má Támbák mɛɛ́tɛɛ́tɛ́n wɔ́ kɔ́kɔ́ɔ́p. Yésuse u Násalɛt wɔ, muɔ́nɔ́ u Yúsɛp.» 46Natanayɛ́lɛ kɛ́ɛ́yɛ́ ɛ́ɛ́: «Kasí puandá puutámbɔ́ púnyɛɛ́ púkuólin Násalɛt?» Fílipe kɛ́ɛ́yɛ́ ɛ́ɛ́: «Óló ɛsípíɛ́nɛ́n.» 47Yésus mɛɛlɛ́ nɛ kuɛ́n Natanayɛ́lɛ óólinon wɔ́ ukanyi ɛ́ɛ́: «Índɛ́ kɔk imbíénepíéne yi Ísilayɛ́l eye. Unyɛ mɔɔnd u kémuémue.» 48Natanayɛ́lɛ kɛ́ɛ́yɛ́ ɛ́ɛ́: «naánɛ́ imenyenée?» Yésuse kɛ́ɛ́yɛ́ ɛ́ɛ́: «Insiɛkuɛ́n kí indín i fikié Fílipe kati kukupílikinɛ.» 49«Oŋónyóonyi, aŋúɛ ɛnyɛɛ́ Muɔ́nɔ́ u Támbák, aŋúɛ ɛnyɛɛ́ Efuŋ u Ísilayɛ́l!» 50Yésus kanyi kɛ́ɛ́yɛ́ ɛ́ɛ́: «Aná ímányikutíán ɛ́ɛ́ insiɛkuɛ́n kí indín i fikié kúúkɔ́ ámányiátáp á? Ɛkɛɛ́n piandákáand pí maandá kutápɔk makáánɛ́.» 51Ukanyi andá kɛ́ɛ́yɛ́ ɛ́ɛ́: «Yɔɔ́núɔ́yɔn kémuémue nukɛɛ́n mɛnɛ́mɛnɛ́ɛ ɔŋɔ́líkɔ́n, Peéŋele pá Támbák mákatan péselen ɔ́ Muɔ́nɔ́ u Mɔɔnd!»
ទើបបានជ្រើសរើសហើយ៖
Isáaŋ 1: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
