Meelie mé Petúmí 20
20
Póol máatɔk Efɛ́ɛs
1Kiyeéwe mɛl kímóond, Póole wakúsikan peétépí, ukála wákan pɔ ilúndɛ; é kélém kuɛ́yɛ wokóndi pɔ, Wɔkɔ́l iŋilí wayɔɔk Masetuáan. 2Wekíndimenyi kitɔŋ kikáánɛ, wól wónyonyí peétépí kutek, wákan pɔ ilúndɛ. Waniám ɔ́kitɔŋ kisiɛ́n ɛ́ɛ́ Kilɛ́ɛs, 3wɔlɔp kɔ́ɔk sióli itátɔ. Umɛl ukanyi ɛ́ɛ́ úmákat é sitíme ákuyɔɔk ɔ́ kitɔŋ pápílanɛ́ ɛ́ɛ́ Silí, péekésitenyi wɔ ɛ́ɛ́ Pɛyúútɛn ánukan wɔ ikɔ́n. Wasɔ́mb ɛ́ɛ́ wóondin kí iŋilí i Masetuáan. 4Pɛɛnd epé pémeétílíkén wɔ́: Sopatɛ́lɛ, kinɔ́k kí Pilús mɔnɔ́ Pélé, Alisitálak nɛɛyɛ́ ne Sekunútus pá Tesaloníik, Kayuse upɛ́ Tɛ́lɛ́ɛp, Timoté ne Tisíik no Tolofíim pe kiénsi kíkúsi kí Asíi. 5Pɔ póofook, peenietúpétényi á pálíkɛ kisiɛ́n ɛ́ɛ́ Tolowáas. 6Pasɔ́ tuɔkɔ́l sitíme, é kélém kúputɔ́mbí epú Pɛyúútɛn nyáanɛ́ pilɛ́ɛt kati kínyútukie, á pálɛk kisiɛ́n ɛ́ɛ́ Fílip; kátáanuɛ, tuɔniɔwɔɔ́kín pɔ́ Tolowáas. Tuɛkɛl ingúme í sɔ́ndiɛ kɔ́ɔk.
Póol méenyi kiɔmfɔ́ Tolowáas
7Ɛ́kisɛ́ndɛ kí kupéli puɔ́sɛ púkutúan pú sɔ́ndiɛ, tumapá papíkusá ákunyáan putit aná Ɔkɔ́n moótuonyonyi, Póol kála é peétépí. Aná pumaápá ɛ́ɛ́ wáyuukan nakinyám, wakála tééé kuám nɔtímputúk. 8Mulámba mapá táásɛ kínsumbiɛ í kiansi mɛnɛ́mɛnɛ́ɛ eyí tumaápá papíkusá. 9Kiɔmfɔ́ kímotí, kisiɛ́n ɛ́ɛ́ Etíke, mapá ɔnyɔ́l é fúnde; aná Póol mɔɔ́kɔ́ɔkɔ nukal, nunɔ́ nuɔkɔ́l wɔ. Wɛkɛfɔk é fúnde, kí iŋikɛ ikátátuɛ́ í kians, waakua túm; pétukenye, ukanyɛ ekuén. 10Póole wesel, wekutimitin kiɔmfɔ, wɛpínɛ́ɛ́kɛn kíɛ, wɔ́ ɛ́ɛ́: «Nutitúmen, unyɛ ɔ́ kusɔt!» 11É kélém kuɛ́yí Póole wakand amákat, wɛkɛɛ́nsi kilɛ́ɛt, wanya; umɛl úmáaman kuand akála tééé kuám nemfúnpálɛ, wayɔɔk. 12Kiɔmfɔ́, kɛ́, payɔɔk nakɛ kikɔ́si, púapa kiwokitio kikɔ́n o pusió pú pɛɛnd kitikit.
Póol máatɔ́k Tolowáas umániám Milɛ́ɛ
13Pasɔ́ tuofook ɔ́kuɔkɔ́l sitíme, waayɔɔk nasɔ Asós; kɔ́ɔkɔ tumɛɛ́sikɛnɛn kutélimit ɔ́ kukɔ́l Póole é sitíme. Yáaná umaásúmbɔ nɔ, á kiákí ɛ́ɛ́ umaambá ɛ́ɛ́ wɛ́ndɛn kí iŋilí kuám Asós. 14Umɛɛlɛ́ umɔ́ɔsituwɔɔkɛn Asos, tuɔkɔ́l wɔ é sitíme tuayɔɔk Mitilɛ́ɛn. 15Tuatɔk Mitilɛ́ɛn ésitíme tuayɔɔk; kuépeli, tuaniám mekúye no Kió; puɔ́sɛ pumɔɔ́ŋɔn tuaniám Samóos, puɔ́sɛ pumaánd kuɔŋɔn akáánɛ, kɔ́ɔk ɛ́ɛ́ tumɔ́piɔ́yɛt kɔɔ́mɔ papílanɛ́ ɛ́ɛ́ Tolokiliyɔ́ɔŋ#20.15 Pakálatɛ pinsua tipá nɛ kisiɛ́n kikáaní., tuanyám ápálɛ́k kisiɛ́n ɛ́ɛ́ Milɛ́ɛ. 16Punyi ɛ́ɛ́, Póol masúmbɔ ɛ́ɛ́ wɛ́fɛ́lɛ Efɛ́ɛs utitélímít kɔ́ɔk, á kiákí ɛ́ɛ́ utimaamba ɛ́ɛ́ únyimi kisikɛl ɔ́ kitɔŋ kí Asíi. Umɛpɛkɛtɛ ɛ́ɛ́, índɛ púnyɛ kupíɛl, wáam Yelúsalɛm puɔ́si pú paŋtekóot.
Póol mókóndi posiósió pé Efɛ́ɛs
17Póol mɛɛlɛ́ wɔ́ Milɛ́ɛ, wetúmenyi posiósió pɔ́ ɔlɔŋ ú peétépí pé Efɛ́ɛs insɔ́m ɛ́ɛ́ péesilumén. 18Pɛmɛl pasiáman kɔɔ́mɔ umaápá, wɔ́ kɔ́ɔ́p ɛ́ɛ́: Nuémenyen aná imɔ́nisɔ́tɔ́n nanɔ́ kuetúm puɔ́sɛ púkutúan imaásiám ɔ́ kitɔŋ kí Asíi. 19Imɔ́kɔtɔ́n Ɔkɔ́n iŋúɛ epíselésí, ni insíkíl ɛ́ kikɛtɛ́kɛtɛ́ɛ kí múɔ́pítíni múmoólónin á muukɔ́n Pɛyúútɛn maápá píinukan. 20Nuémenyen ɛ́ɛ́ indiɛ́nunɛmbɛn yandɛ́nd ínyɛ́ pɔ́kunúɔk; yénúkémen Mekélíe má Támbák kitikit yond yonuónyitonyi puandá kitikit, kéŋís yɛ́ pɛɛnd na kánɔ ápians. 21Yápilán Pɛyúútɛn neepé patiánipá Yúútɛn ɛ́ɛ́ papíkúŋɔn, pondin Támbákɛ́ɛ ɔ́ mɔɔyɔ́, póond ókupióndonyí ɔtɛm nɔ Ɔkɔ́n waasɔ́ Yésus. 22Nínúan kɔk, kuámɛ kuyɔɔk ekue Yelúsalɛm, Emfúnukufúúmɛ iŋutanɛ́ ɛ́ɛ́ iyɔɔk; indipá imenyen epú púmbétenyé kɔ́ɔk, 23yémenyen kɔ́ɔ́m ɛ́ɛ́ ésiki pálíkɛ́, Emfúnukufúúmɛ ɔ́kiŋɔyɔn ɛ́ɛ́ iŋɛɛ́nɛn muyu pond pindɔ́ɔt á kiansi kí imbíne. 24Maná, kusɔ́t kuámɛ tipá puandá kámɛ ké eŋis; epú punyɛ́ puandá, punyɛ́ ɛ́ɛ́: iman pusɔ́m puámɛ, yond íyákɔn puóli Ɔkɔ́n Yésus miímfá, punyɛ́ ɛ́ɛ́: iŋéme insɔ́m yi indámb yi ɔtɛ́m peseé u Támbák.
25Yɛɛ́ndɛ́ kuanɔ́ panɔ́ peem, yól ingémé Pufuŋ pú Támbák. Maná, nínúan yémenyen ɛ́ɛ́ tɛ mɔɔnd omoómí kánɔ́ kɔ́ ɔlɔŋ tiakand kuŋɛn. 26Puátakáánɛ puandá inuɔ́yɔnɛ́ ínanɔ ɛ́ɛ́: índɛ omoómí kánɔ kɔ́ ɔlɔŋ siatam, indipá na kikua kɔ́ɔk. 27Á kiákí ɛɛ yɔɔnuyitɛn nuketi nú Támbák kitikit, tɛ ɛɛ inunɛmbɛn yandɛnd. 28Anupikiika panumuɛt, nuond nukiika embul u melúk ewu Emfunkufuumɛ mɛɛnutɛk áwɔ asɛ pekiik. Ɛnukɛnkɛn nɔ ɔlɔŋ u peétépí Támbák anipɔt ne niku ní kinɔ́k kiɛyí. 29Yeemenyen ɛɛ iŋɛl imetum kélém, pɛɛnd pɛ́nyɛɛ́ itɛ́m kilɔk asɛ imbua siɛm si lafaninɛ kepikin káánɔ́ ɛ́ɛ́ kikɛtɛ́kɛtɛ́ɛ, pɛtiɛpimɛmɛt embul u melúk. 30Kaanɔ ɛ́ɛ́ kikɛtɛ́kɛtɛ́ɛ kipuɛt, pɔsɔ́k pómotí kɛɛyɛn pasupusɔp ɔ kukɔkɛt peétépí ɛɛ pɔɔŋ kɔ́ɔ́p. 31Anupa pɛɛnyɔ nuond nupitaaka ɛɛ ɔ tuɔŋ tutaatɔ, yaapa tɛ nɔ puɔsɛ tɛ ne putúk inusuŋa omoonyi ó moonye tɛ ɛɛ kuandɛ, kumoti na andilɛ ke eŋis. 32Ninuan kɔk imanuyapa á Támbák nɛ kɛɛyɛ é Mekelie me pesee. Mekelie makaanɛ nyɛ na pukaaka pu kuɛlɛ ɛɛ nusuŋuna na kupilundanɛn á kuátap, andíkɛ́k ɛɛ nutaŋapa maandá me pesee Támbák nɛkinɛnɛ epe kitikit pɛ́nyɛɛ́ pɛɛyɛ. 33Indiɔpilɔŋɛt tɛ muenyi, tɛ kóol tɛ indifunɔ si mɔɔnd. 34Panumuɛt nuemenyen ɛɛ yɔɔkɔtɔ ni imbɔk siamɛ ɛɛ naamɛ na pakuasɔ, omoti tipaŋɛt puandá. 35Yeenutiinyi á puandá kitikit ɛɛ yaanakaanɛ tuɛsikɛnɛnɛ kukɔtɔ ɛɛ tupia piɔkɛk ɔ kuɔkɔnɔkɔn pɔsukɔsukɔ, tupitaaka tukál tu Ɔkɔ́n Yésus, umɛɛl ɛɛ: Ewú ufaanɛ apian anyamɔ́ kutápɔk ewu upakunanɛ. 36Póol manan akala, wesuk tunu e kúúsí ɔlɔŋ nɔɔpɔ peem. 37Peem póond á kupaŋa, pɔkɔlɔn Póole kisas, pokondosi wɔ ku kusúkin. 38Pamapa sol sol ni insíkíl kí itɛ́m á kiákí ɛɛ Póol mɛɛlɛ kɔ́ɔ́p ɛɛ patiakand kuɛn wɔ. É kélém kuɛyɛ, peenietilikin wɔ kɔɔm é sitime.
ទើបបានជ្រើសរើសហើយ៖
Meelie mé Petúmí 20: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
