Meelie mé Petúmí 21
21
Kuyɔɔk ku Póol Yelúsalɛm
1Tumɛɛlɛ́ na kuatukan nɔ posíósíó pá pálɛk wu Efɛ́s, tuɔkɔ́l sitíme tuasuŋɔn Koos. Kuépéli tuanyiám kí ilua kisiɛ́n ɛ́ɛ́ Lóót, tuatɔɔk kɔ́ɔk á kuakuá á pálɛk kisiɛ́n ɛ́ɛ́ Patala. 2Tuokóokí sitíme olotí umaáyuukan Fenisi tuamákat á wɔ́ tuayɔɔk. 3Tumɛɛlɛ́ tukɛɛ́nɛ́n Sípɛlɛ, tuɔkɔ́l iŋilí imbátɛ wu ilua tuasuŋɔn kiáyí kí Silí. Tuesel á kiŋindiŋindɛ kí pálɛk u Tíil ɛ́ɛ́ káaká sitíme meéselésí pimbikɛ piɛ́yí. 4Tuapáápɛt kɔ́ɔ́k sɔ́ndiɛ omoómí no popíónyí tumoókóókí kɔ́ɔk. Emfúnukufúúmɛ wétitikin pɔ́ ɛ́ɛ́ pátian Póole ɛ́ɛ́ utiyɔɔk Yelúsalɛm. 5Sɔ́ndiɛ mɛɛlɛ́ utápukan, tuasuŋɔn nɛ ɛŋɛnd. Popíónyí kitikit pényetútílíkín na pakányí pɔ́ɔp na paán, kuám aná tumaám á pálɛk tuesuk tunúú ó kupísókolonyi á kiŋindiŋindɛ kí mááŋ. 6É kélém akáánɛ tuokond ó kukóndosinyi nɔɔpɔ́ maná tuakand amákat é sitíme; peétépí pókond kuɔpɔ́. 7Tuayákɔn ɛŋɛnd wáásɔ á mááŋ kuatɔk Tíil kuaám Potolemayíis, tuenyepíkélítí peétépí pɛ́nyɛ́ kɔ́ɔk, tuapáapɔt iŋgúme í puɔ́si nɔɔpɔ́. 8Kúepéli tuapálukɔ á kuyuukɔ Sesalé. Akáaní tumanyápítɔ́ɔnn ku Filip pápílanɛ́ ɛ́ɛ́ oŋoyí niɔyi nindamdu, tuɔnyɔ́mbɛt kɔ́ɔk. Unyɛ ɛ́ pɛɛnd tumaáyɔ́ɔ́n pátíndatɔ́ neémue Yelúsalɛm á kuapa múkunya. 9Umapián pikuna píni pímɛɛ́lɛ́ pítimenyén pɛnúmɛndɔ, péemenyi mekélíe má Támbák. 10Tumɛɛlɛ́ tukani metúkú kusol kɔ́ɔk, eŋémímekélíe má Támbák kisiɛ́n ɛ́ɛ́ Akapúse ólinon Yúte waasiám. 11Woól ɛ́ kuɛsituɛ́n. Wɔkɔ́l kiamaám kí Póol wapíkúta ni imbɔk nɔ pikɔ́nd, wɔ́ ɛ́ɛ́: Indí, yá anɛ Emfúnukufúúmɛ ɔ́ɔ́yɔɔnɛ́ɛ: yá anɛ posíósio pɛ́ Pɛyúútɛn kaáníkúta muɛt kiamaám ekie Yelúsalɛm, pɛ́sɛm wɔ ɔ́ pɔsɔ́k pátiánípá Pɛyúútɛn. 12Tuɔ́pɔn nɔ́ɔ naasɔ́ na paandimán páasɔ́ pá kuátapa á pálɛk ukáánɛ́, tuokond ó kupísókólonyi Póole ɛ́ɛ́ utiyɔɔ́k. 13Wɔ unɔtɔ ɛ́ɛ́: «Kiákí nupaŋanɛ́, kiákí nuambanɛ́ɛ kukand ɔtɛ́m wámɛ; á kiámɛ kiáyí inyɛ ɛ́ɛ́ tɛ píiŋúta, tɛ píŋɔnɔ ɛ́ kisiɛ́n kí Ɔkɔ́n Yésus Yelúsalɛm.» 14Aná tumɛɛ́lɛ tutipiá kipán kí kuyooti wɔ, tuɛtɛ́kɛn kɛ́ ɛtɔ́ tukanyi ɛ́ɛ́: Ɛnyɛlɛ́ kuɔyɛt kú Ɔkɔ́n píɛl. 15Metúk mɛɛ́lɛ́ na kutápɔk nakisúmbɔ ne kikeli akáani Sesalé tuokond ɛ́ kupíɛyɛn, tuasuŋɔn Yelúsalɛm. 16Peétépí pá pálɛ́k u Sesalé pétutílikin ku mɔɔnd kisiɛ́n ɛ́ɛ́ Manásɔnɛ, mɔnɔ́ Sípɛl. Mɔɔnd ukáánɛ́ nyɛ eŋétépí insúá ni insúá, kuɛyí tumaápítɛm.
No Póol na Sáak mélumén
17Tumɛɛlɛ́ tuámán Yelúsalɛm, paandimán páásɔ́ pá kuátap pɔ́ɔtúkɔ́l peseé. 18Kuépéli Póole wayuukɔ naasɔ ku Sáak, kɔɔ́mɔ pɔkúnɔ́ peem pɔ́ ɔlɔŋ ú peétépí ú Yelúsalɛm maápíkúsíkán. 19Póole wepíkéliti pɔ́ waman kuɔyɔn pɔ́ puandá kitikit, na puandá Támbák mɛɛ́lɛ́ ó pusíó pú péépé pátiánípá Pɛyúútɛn utápukanɛn kɛ́ɛ́yɛ́. 20Pɛ́mɛɛlɛ́ na kuman ɔpítɔ́likɔnɔ, pókond ó kuómokosi Támbákɛ́ɛ; pɔ́ ó Póol ɛ́ɛ́: Andiman, ɛnɛ aná tukúnɔ́ asi tukúnɔ́ tú Pɛyúútɛn kanyɛ́ peétépí, pɔ́ peem ɔ́kɔŋɔn ó pikótí pi Moyiis. 21Pítɔ́líkínɛ puandá pɔ́ɔyɔnɛ́ káwɔ ó pusío: Ɔ́koónyonyi Pɛyúútɛn pányɛ́ ɛ́kikɛtɛ́kɛkɛ kí melukú ɛ́ patiandá kuɔ́n ó pikotí pí Moyíis, ɔyɔn pɔ́ ɛ́ɛ́ pátiandá kuansa paán, páyap pinɛ́m pí Pɛyúútɛn. 22Kiákí tuɛsikɛnɛɛ́ kuɛl? Pákana kuéndi pɔ́ɔp ɛ́ɛ́ anyɛ akɛ. 23Ɛlɛ́ aná tukuɔyɔnɛ́ tunyɛ nɛ pɛɛnd péni akɛ pánípíliíní Támbákɛ́ɛ. 24Kɔ́l niap nawɔ nɔɔ́pɔ́ kɔ́ ɔsukɔ́ óond ánam puandá kitikit púambanɛ́. Akáanɛ páányɛ pákumua pɔ́ ɛtɔ́. Pɛɛnd peem menyi nɔ: pɛ́ɛ́n ɛ́ɛ́ puónyi póleé pɔyɔ́ nyɛ kisupɔ́. Pɛ́kɛ́n ɛ́ɛ́ aŋúɛ kákawɔ ɔɔ́kɔŋɔn ó pikotí pí Moyíis. 25Tumɔɔ́ŋɛ́n pɔsɔ́k pátiányípá Pɛyúútɛn pákanyɛ́ peétépí tuatian pɔ́ puandá tú mányisɔmb. Nutipá nuɛsikɛnɛn kunyán maányi pásiápifunanɛn pifɛ́lɛfɛ́lɛ, tɛ manɔ́ŋ, tɛ puányi pɛ́siɛkɛl pétisikít, nutiɛndítɛ musɔm. 26Póole wayɔɔk ɔlɔŋ nɛ pɛɛnd pákáanɛ péni, kuépeli, wetúmin kɔ́ ɔsukɔ́ nɔɔpɔ́, maná waayɔɔk á kitamb. Kɔk umɔɔ́yɛt puɔ́si pékenyé kifunɔ́ kí siki mɔɔnd aká ɔsukɔ́ mananɛ́.
Pɛ́mɛ́tíkíni Póole á kitamb
27Metúk mɔ́ ɔsukɔ matindátɔ neémue mɛɛ́lɛ́ mákanyi ɛ́ mɛ́ɛsikɛn, Pɛyúútɛn pómoóliní Así pɛ́kɛɛ́n Póole á kitamb kí Támbák, pákanyɛ́ elikesi embúlu kitikit ɛ́ɛ́ pɛtikini Póole. 28Páansa pɔ́yɔ ɛ́ɛ́: «Panɔ́ pɛɛnd pí Ísilayɛl ánuasítútálínɛ́ ɔmbɔk! Wúwe, woónyonyé pɛɛndɛ́ ɛ́ɛ́ pénuenesi kitɔŋ kíásɔ́ no pikotí pí Moyíis, na kitamb kiásɔ́. Utitíín umépíkínyí pɛɛnd akɛ pátiányípá Pɛyúútɛn umɛ́ɛlɛ́ɛ pák kɔɔ́mɔ kásɔ́ kitɔ́k.» 29Aná pɛ́mɛɛ́n Póole ɔlɔŋ no Tolofíme u Efɛ́s á palɛk pápítáakɛt ɛ́ɛ́ Póol siepíkinyi wɔ́ á kitamb. 30Pálɛk kitikit wapuluŋɔnd kitɔɔt kí pɛɛnd kíasiám. Pɛ́kɛtikini Póole pékeémi wɔ, nɔ niɔ́kɔ́tɔ́n peefuk kitamb. 31Pɛɛnd amba kuɔ́n Póole, kiyɔkɔt kíanyámíní ɔkɔ́n u pasaŋtuliɔ́ŋ pó Lóma ɛ́ɛ́ kipuenyitenye nyɛ á pálɛ́k u Yelúsalɛm kitikit. 32Nɔniɔ́kɔ́tɔ́n wakúsikan pisimb na pasaŋtuliɔ́ŋ, wɔpínɔtikini embul, Pɛɛnd mɛɛ́lɛ́ pɛ́ɛnɛn pɔ́, páyap kukite Póole. 33Ɔkɔ́n u pɔkɔ́n pé pisimb wepísíit, wókówun pisimb ɛ́ɛ́ píɛtikini Póole píkutawɔ́ ni iŋgasɛ́ íyaandɛ́. Wokoówun kɔk ɛ́ɛ́. Mɔɔnd uníní ewe? Kiákí usiɛ́kɛl? 34Ké embúlu, epé kála imbótoké, epé kalá imbɛsɛkɛ. Aná umɛ́ɛlɛ́ utiɔ́pɔ́ ɛtɔ́ ú puónyi nɔ kiyɔkɔt kikáaní, wokówun ɛ́ɛ́ páyɔk no Póol kí ikáki í pisimb. 35Póol mɛɛlɛ́ waámán á muyáp mú ikak, pisimb píɛnyɛ́lɔn wɔ́ aná kiɔ́pɔ́ maápá kí lópoko. 36Kitɔŋ kitikit mɔɔŋɔ́n kɛ́ɛ́yɛ́ kíánsa kíɔ́yɔ ɛ́ɛ́: «ɛ́nyɛɛ́ túɔ́n wɔ.»
Iŋál i Póol ó pusíó púpɛyúútɛn
37Pɛ́mɛɛlɛ́ pákanyi ɛ́ɛ́ péepíkinyi wɔ́ kí ikak Póol kanyi kɔ́ ɔkɔ́n u pasatuliɔŋ ɛ́ɛ́: «Inyi ukukuɔyitini puónyi á?» Ɔ́kɔn u pisimb wokówunu wɔ́ ɛ́ɛ́: «Émenyen nú kɛlɛ́ka? 38Atipá aŋúɛ ɛnyɛ́ mɔnɔ́ Esípitɛn wónyól ne kipuenyitenye metúkú eme wayuukɔ na pasaŋsáŋ tukúnɔ túni ɔ kiɔ́ndiɔ́ á?» 39Póole kɛ́ɛ́yɛ́ ɛ́ɛ́: «niŋúɛ inyɛ Yúútɛn u pálɛ́k u Táls é Silisí. Inyi ɔtɔŋtɔ́ŋ u pálɛ́k u kúmené. Síkoli, íŋátápɛn ɛ́ɛ́ íŋálɛt ɔ́ kitɔŋ.» 40Ɔkɔ́n u pisimb wakaátap, Póole weetélimit á muyáp weketukenyi ɔmbɔk. Kitɔŋ kiélúŋ yeéw, Póole woond á kukála kɔ́ɔ́p ne nupeyúútɛnɛ. wɔ́ kɔ́ɔ́p ɛ́ɛ́:
ទើបបានជ្រើសរើសហើយ៖
Meelie mé Petúmí 21: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
