Meelie mé Petúmí 19
19
Póol mányáma Efɛs
1Apólos mɛ́ɛlɛ umanyi Kɔlɛ́ŋt Póole waasiám Efɛs watápukini ɔ́ kitɔŋ kí Así ikɛl maapá kutek wosikoókí kitáam kí popíónyí kɔ́ɔk. 2Wokoówunu pɔ́ ɛ́ɛ́: «púnyi akɛ numapiá efúnukufúúmɛ aká numaatap á? Pɔ́ kɛ́ɛ́yɛ́ ɛ́ɛ́ tumapása tutiɔ́p pɛ́tɛtɛn Emfúnukufúúmɛ. 3Póole woówun: Induén inín kɔk numaápiá? Pɔ́ kɛ́ɛ́yɛ́ ɛ́ɛ́ Induén yi Isáaŋ. 4Póole kɔ́ɔ́p ɛ́ɛ́: Isáaŋ metuénén epé pámaátap kupínúkun pilɔŋ píɔp wɔɔyɔn kitɔŋ kí Ísilayɛ́ɛl ɛ́ɛ́ kipíondonyi ɔtɛ́m ɔ́sɔ́k woóloné wɔŋɔnɛ́ kɛ́ɛ́yɛ́, anakáaní kunyɛɛ́ ɛ́ɛ́ Yésuse.» 5«Nakuman kuɔ́pɔn nɔ́ɔ, péetu pɔ́ ɛ́ɛ́ kisiɛ́n kí Ɔkɔ́n Yésus. 6Póole watála pɔ́ imbɔ́k páapia Emfúnukufúúmɛ, póond á kukála tukála pɛ́mɛ́ɛ́l pétimenyen, péémenyi Mekélié má Támbák. 7Pámapá ukuám páatá na páandɛ.»
Póol ékéme Efɛs
8Póol yuukan kisikɛl kitikit á kiansi kí imbísókólí kí Pɛyúútɛn, puandá pú siólí ítáatɔ́, ukéme pufuŋ pú Támbák upíkányikan ɛ́ kuɛlɛ ɛ́ɛ́ epé pɔ́mɔɔ́pítɔ́líkɔ́n wɔ́ átapan. 9Puólíkóli lúndesi itɛ́m pɔ́tiɔyɔ́ kuátap pásikan iŋilí yi Ɔkɔ́n á pikɔs. Póole wapíátɔn pɔ́ wayuukɔ no popíónyí ukála kɔ́ɔpɔ́ siki puɔ́síɛ é sekúle u mɔɔnd omotí kisiɛ́n ɛ́ɛ́ Tilanuse. 10Púmapítápúkán anakáaní tuɔŋ túandɛ. Peem epé pɔ́mɔɔ́sɔ́tɔ́n ɔ́ kitɔŋ kí Así, nɛ Pɛyúútɛn ne epé pátiánypá Pɛyúútɛn páapia kipán kíkuɔ́p mekélíe mɔ́ Ɔkɔ́n.
Pikumbɔ pí pinɔ́k pé Séfa
11Támbákɛ́ɛ weeki Póole pukaaka pú kuɛlɛ piandákand pí pisey. 12Pɛɛnd kɔ́lɔn piénsi pí insunú písiépíkíik Póole páasimányíkánán pɔsɔ́k pánúmánɛ́ pééŋuken, pilɔk pí piliínditíe ááman pípínɔnɔn. 13Pɛyúútɛn pómotí pámíipí pákúúŋá pilɔk pí piliínditíe páapímak kukɔl kisiɛ́n kí Ɔkɔ́n Yésus ɛ́ kuɛlɛn puólí kɔ́ɔk; pɔ́ɔyɔn pilɔk pí piliínditíe ɛ́ɛ́ Yɛpí káwɔ ɛ́ɛ́ ám ɛ́ kisiɛ́n kí Yésus ewú Póol kémené. 14Yáaná pinɔ́k pátíndatɔ neémue pí ɔkɔ́n u pafunɔ́fɔn pɛ Pɛyúútɛn, kisiɛ́n ɛ́ɛ́ Séfa, maápá pɛ́ɛlɛ. 15Epué puɔ́s, kilɔk kí kiliínditíé kíondinyi pɔ́ ɛ́ɛ́: «Yeémenyen Yésuse, yond imenyen ɛnyɛ́ unyɛ́ Póole, panɔ́ nunyɛ pɛɛnyɛ?» 16Mɔɔnd umaápá nɔ kilɔk kí kiliínditíé wapíkuun pɔ́ weekite pɔ́ á kiákí ɛ́ɛ́ umapíányín pɔ́ peem, waakan pɔ́ imféŋ nuɔ́l kitikit. 17Pɛɛnd pɔ́mɔɔ́nyɔmbitɔn Efɛ́s, nɛ Pɛyúútɛn ne epé pɛ́mɛɛ́lɛ́ pɛ́tiɛlɛ́ payúútɛn pɔ́kɔɔ́ɔp puónyi pukáanɛ puɛkɛl pɔ́ pumbíla; pókond á kuákan kisiɛ́n kí Ɔkɔ́n Yésus ɔ́niɔ́lɔ́. 18Puólíkóli pú peétépí ásipípalán pikua píɔ́p ké eŋis yɛ́ pɛɛnd. 19Puólíkóli pɛmɛɛ́lɛ́ maanyɛ óólon na pakálatɛ pɔ́ɔpɔ́ pá maanyɛ, pépikesi pɔ́ ké eŋis yɛ́ pɛɛnd peem; pakálatɛ pakáaní mɔŋunɔ́ muenyí kutek. 20Yáanakáaní á pukaaka pú Ɔkɔ́n mekélíe má Támbák maásalamand metinyeni imbekí yɛɛyɛ́.
Kipueŋitenye Efɛ́s
21Móónyí makaání mɛɛlɛ́ na kutápukɔ, Póole wasúmbɔ ɛ́ɛ́ wɛ́ndini ɔ́ pitɔŋ pí Masetuán na kiáyí kí Akáyi ó kuondo Yelúsalɛm. Wɔyɔ ɛ́ɛ́: «iŋɛ́l ímɔ́nyɔtɔ́l Yelúsalɛm, yɛ́kɛsikɛnɛn kuúpɔ á pálíkɛ́ u Lóma.» 22Watúmɔ ne Timoté na Elásɛt pinɛnɛ píɛ́yɛ́ piándɛ Masetuán. Maná wɔ́ muɛ́tí wakanda esiéne ɔ́ kitɔŋ kí Así. 23Ákisikili kikaánɛ́ kiandá kí kipuenyitenye mapá Efɛ́s. Ó pusíó pú iŋilí í Ɔkɔ́n pémeekeme. 24Mɔɔnd mapá kɔ́ɔk kisiɛ́nɛ ɛ́ɛ́ Temetiliuse utúúne mɛlɛŋ, utúúne tutambu támb tú Támbákɛ́ɛ wɔɔpɔ́ wakáandɔ kisiɛ́n ɛ́ɛ́ Alitenis nɛ tuɛyi, puólí ékenyi petúnyi muenyí puólíkóli. 25Wakúsikan petúnyí pakáanɛ nɔ pɔsɔ́k pɔ́kɔtɔnɛ́ɛ niaŋ niɔ́p. wɔ́ kɔ́ɔ́p ɛ́ɛ́: Tat nuémenyen ɛ́ɛ́ ɔfɔm wásɔ ókolinon ó puólí epue. 26Nuɛ́kɛ́nɛn kúnyánɛ nuɔ́kɔ́pɔn puandá púpítápukanɛ́: Póole ewe ɔ́kɔyɔ ɛ́ɛ́, pa Támbákɛ́ɛ paaluŋa ni imbɔ́k sí pɛɛnd tipá pa tambákɛ́, umóyotí pɛɛnd puólí akɛ, kútipá kɔ́m akɛ, ne Efɛ́s, nɔ kitɔŋ kí Así kitikit. 27Pútipá puóli no puólí puásɔ pákaányásikányí napúɔ, tɛ kitamb kíkiandá kí Támbákɛ́ɛ waasɔ́ wakaandɔ Alitemíse, pátíákandá kuákan kí ɔ́ niɔlɔ́, kínyímí nuúmu nuɛ́nyi kí ekí kúúsí kitikit na kisal kí Así kúmesíe.
28Pɛɛnd epé pɔ́mɔɔ́pɔ, péliŋ póókoond á kuánsa: «Alatemíse u Efɛ́s wɔ́ unyɛ́ kikaaka!» 29Kipuenyitenye kíasak pálíkɛ kitikit, pɛ́kɛtikini pekúl pó Póol Káyuse na Alisitálak pɔ́ kitɔŋ kí Masetuán, páyɔk nɔɔpɔ́ á kiansi kí mayan 30Póol mɔɔ́yɔ́ kuepítínyí ɔ́ kiɔ́p, peétépí pákány nɛɛyi. 31Piandá pí pɛɛnd pí ɔŋgɔ́munɛ u Así pímaápá pekul pɛ́ɛ́yɛ́, píatúmin wɔ́ insɔ́m ɛ́ɛ́ utipítínyí á kiansi kí mayan. 32Siki mɔɔndɛ wánsa kúɛ́yí kuansɛt, á kiákí ɛ́ɛ́ kipuenyitenyé mapá. Puólikóli timenyén epú pásiápíkúsikan apuɔ.
33Pɛɛnd pómotí pákasiámá ké embúlu pátían mɔɔnd kisiɛ́n ɛ́ɛ́ Alɛkɛsándɛlɛ ewú Pɛyúútɛn meétényíkényi ó pusíó, puandá púpítápukanɛ́. Weketukenyi ɔmbɔ́k ɛ́ɛ́ pɛɛnd luŋu úkálɛt. 34Aná pɔmɔɔ́pɔ́ ɛ́ɛ́ unyi mɔnɔ́ Yúútɛn, poondo á kusánsala ekelú ómoóm, puandá pú pikulí píandɛ peem ɔ́ɔ́yɔ ɛ́ɛ́: «Aliteníse u Efɛ́s kikaaka!» 35Oŋóŋí moónyi u pálɛk welúŋi kiɔ́p wɔ́ ɛ́ɛ́: «Panɔ́ pá palíkí u Efɛ́s, ɛnyɛ́ uleméne ɛ́ɛ́ pálɛk u Efɛ́s nyɛ palɛk ukíkanɛ́ kitamb, kí kikaaka Alitemís kiéyé kíɛ́yɛ́ kimaatúkɔɔ́n kíólinon mɛnɛ́mɛnɛ́ɛ. 36Aná mɔɔnd tiányipá kuáka imfɛ́l, nuɛ́kɛsikɛnɛn ɛ́ɛ́ núlúŋu yéwu nutiɛlɛ puandá ɛlɛɛ́ pɛɛnd pákati ituɛ; 37Numól akɛ nɛ pɛɛnd pɛ́siɛ́kɛl pétiép mandá á kitamb kí Támbákɛ́ɛ waasɔ́ tɛ insikɛ ó pusíó puɛ́yí. 38Índɛ Temetiliyuse ne petúnyí, ápian puónyi na mɔɔnd índɛ pɔ́sɔ́ɔ́mɔn pɔ: Pesúmbi pisɛn nyɛ kɔ́ɔk, mɔɔ́sí nyɛ kɔ́ɔk emé pásúmbanɛ́ pisɛn. 39Indi puandá púlotí púkuɔyɛt nyɛ kɔ́ɔk, nupɔ napuɔ ákikusɔ kíeyɛnɛ pisɛn pɛ́ɛyɛn. 40Panyi pɛ́kutúpɛn kɛ́ ɛtú kulal wásɔ épúpu pusiátúkúsikan ínanɔ. Tútipá ni ippán ítinyenyé puandá tuɛlɛnɛ́ akɛ, andíkíkɛ tutipá pɛ́kusɛkunin mɔɔnd puandá tuɛlɛnɛ́ akɛ. Umanana, wekúúki pɛɛnd.»
ទើបបានជ្រើសរើសហើយ៖
Meelie mé Petúmí 19: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
