Meelie mé Petúmí 15
15
Peétépi pá Antiós épekenyipekenyi ó pusíó pú puansá
1Pɛɛndɔ pómotí paaniatɔ́k Yuté, paayɔɔk Antiós. Kɔ́ɔk, poónyonyi peétépí, pɔɔyɔn pɔ́ ɛ́ɛ́: «Índɛ nusiɛl nutipíánsa, aná kikotí kí Moyíis ɔ́ɔ́yɔɔnɛ́ɛ, Támbák tiónusoti.» 2Póole, nɛɛyɛ́ na Palanápas ɛ́pi ɛ́ɛ́ iŋónyítónyí i pɛɛndɔ pakáánɛ tipá kémuémue; petiényi nɔpɔ́, póond ékupekenyipekenyi na pukaaka. Paasɔ́mb ɛ́ɛ́ no Póol na Palanápas nɔ pɔsɔ́k pómotí yɔɔk Yelúsalɛm ɛ́ɛ́ paanɔ́n puónyi pukáánɛ ne petúmí no posíósíó. 3Embúl ú peétépí umaápá Aŋtióos weeki pɔ́ puandá kitikit ó pusíó púɛŋɛnd. Paatápukɛn Fenisi na Samalí, póól pɔ́ɔ́yɔ aná pɛɛnd patiánipá Pɛyúútɛn píkúŋunanɛ́, pɔɔŋɔn kíŋilí í Ɔkɔ́n; niɔy nikáánɛ ékenyi peétépí kiandá kíanyamɔ́. 4Pɛmɛɛl paámán Yelúsalɛm, ɔlɔŋ ú peétépí ne petúmí no posíósíó pookóli pɔ; Póole nɛɛyɛ́ na Palanápas paatían pɔ́ puandá kitikit Támbák mɛɛ́lɛ́ ɔlɔŋ nɔpɔ́.
Ɔlɔŋ ú peétépí Yelúsalɛm másɔ́mb puónyi púpuansá
5Pafalisiɛ́ŋ pómotí, pɛ́mɛɛ́yí Peétépi, pɔɔkɔ́l nukal, pɛɛ́pí ɛ́ɛ́: «púɛ́kɛɛsikɛnɛn ɛ́ɛ́ peétépí patiánipá Pɛyúútɛn paansa pɔ, pond powóonyosi pikotí pí Moyíis.» 6Petúmí no posiósio paapíkusikan ákuanuna puónyi pukáánɛ.
7Peepekenyipekenyi téé; é kélém kuɛ́yɛ, Píɛlɛ wɔɔkɔ́l nukal, wɔ́ ɛ́ɛ́: «Paandimán, nuémenyen ɛ́ɛ́ Támbák miyɔ́ɔ́n kánɔ ɛ́ kikɛtɛ́kɛtɛ́ɛ púkanyɛ insuá, ɛ́ɛ́ iŋémen pɛɛnd patiánipá Pɛyúútɛn insɔ́m yi indámb ɛ́ɛ́ pɔpítɔ́likɔn pond paátapan. 8Támbákɛ́ɛ, umenyené ɔtɛ́m ú mɔɔnd kitikit, étíínyí ɛ́ɛ́ waákaátapan pɔ, aná wéniekí pɔ Emfúnukufúúmɛ ɛlɛɛ́ pasuɛ́. 9Támbák tiáák maátukana naasɔ́ nɔɔpɔ́: wásukɔ́n itɛ́m siɔ́pɔ́ á kiákí ɛ́ɛ́ paátáp. 10Nínúan kɔk, ó pusíó pú kiákɛ nuambanɛ́ɛ kutɔ́kɛt Támbákɛ́ɛ, ákukúta popióny ɛ́ɛ́ papitúukɛn kinuá kimápiányɛn pesípɔkúnɛ́ páásɔ naasɔ́? 11Paasɔ́ tuákátapan ɛ́ɛ́ ɔ́tɛm peseé ú Ɔkɔ́n Yésus wónitúsóti, puandá púmoómí anɛ pɔ!» 12Pɛɛndɔ kitikit pamaápá ékilumén peelúŋ yeewú, póond ɔ́kupítɔ́likɔn Palanápasɛ nɛɛyɛ́ no Póol pɔmɔ́ɔyɔ pisey nemelinsí kitikit Támbák mɛ́ɛlɛ́ utápukaninɛ kɔ́ɔ́p aká pɔmɔɔ́kɔtɔ ɛ́ kikɛtɛ́kɛtɛ́ɛ kí pɛɛnd pɛmɛɛl pɛtiɛlɛ́ Pɛyúútɛn. 13Pɛmɛɛl pamáaman akála, Sáakɛ wɔɔkɔ́l nukal, wɔ́ ɛ́ɛ́: «paandimán ɔ́numbítɔ́likɛn. 14Símun mɛ́ɛkɛt etúpítéékiti aná, énitúmín, Támbák maáyɔ́ɔ́n, ɛ́ kikɛtɛ́kɛtɛ́ɛ kí piɛ́nɛn pítiánipá Pɛyúútɛn, pɛɛnd pɔ́ɔ́pinɔnɛ́ɛ wɔ. 15Tukál tú peémímekélíé má Támbák élumenen na nukál nukáánɛ; á kiákí ɛ́ɛ́ imfiɔ́ŋ sí peémímekélíé ɔ́kɔyɔ ɛ́ɛ́:
16“Ɔkɔ́n ɛ́pi ɛ́ɛ́: É kélém kuɛ́yɛ́, yóniond ákuand awáak kiansi kí Tafíit kímeékulukut.
Yénietukenyi kikilikitie kiɛ́yɛ́, yand eténikenyi kɛ́ɛ.
17Kɔ́ɔkɔ́ pɔsɔ́k pɛɛnduɛ pólotí kitikit ániambanɛ́ Ɔkɔ́n,
nɛ piɛ́nɛ́n kitikit pítiánipá Pɛyúútɛn píŋɔ́pɔninɛ́.
Púupukáánɛ Ɔkɔ́n ɔ́ɔ́yɔɔnɛ́ɛ,
umówóonyi anakáánɛ imbítáákítɛ́n siɛ́yɛ́
18umɛɛ́lɛ ɛ́ɛ́ pémeny sí kuetúm á nipundɛ́n ní kúúsí.”»
19Sáakɛ wasuŋɔn na nukal, wɔ́ ɛ́ɛ́: «kúúkɔ́ yáátapanɛ́ ɛ́ɛ́ tutiɔ́yikínɛ́n kikímbikɛ kí iŋilí i péepé patiánipá Pɛyúútɛn. 20Maná, ɛniɛ́ tuɔ́ŋín pɔ ɛ́kuɛl kɔ́ɔ́p ɛ́ɛ́ nutinyá puány pasiaápífunan Támbákɛ́ɛ u kúúsí, mɔɔnd tiɛndɛt isɔm, patinyá puány púnyam pɔmɔ́niɔ́n katɛ kusikite, tɛ manɔ́ŋ petipítúm mɔ́ éniít. 21Púnyɛ́ ɛ́ɛ́, ekéné akɛ, pɛɛnd ékéme pikotí pí Moyíis ésik pálíkɛ, póond palááŋa pí siki puɔ́s pú sápat á pians pí Pɛyúútɛn pí imbisokóli.»
Ɔmbɔp pamánitúmɛ́n peétépí patiánipá Pɛyúútɛn
22Kúúkɔ́ petúmí no posíósíó nɔ ɔlɔŋ ú peétépí kitikit peelumen ekélú ɛ́ɛ́ payɔ́ɔn nikál ní pɛɛnd kɔ́ɔpɔ́ ɛ́ kikɛtɛ́kɛtɛ́ɛ, patɔ́m pɔ́ Antíos ɔlɔŋ no Póol na Palanápas. Paayɔ́ɔn Yúte pamaand apílan ɛ́ɛ́ Palasápasɛ, nɛɛyɛ́ na Sílas; pamapá pɛɛnd pɛ́nyɛɛ́ ɛ́ɛ́ wɛɛ́tɛ kálɛt é peétépí pɔkɔ́pinɔn wɔ. 23Peekeki pɔ́ ɔmbɔp; ɔmbɔp ukáánɛ ɔ́ɔ́yɔ ɛ́ɛ́: «Pasuɛ́ petúmí, no posíósíó na paandimán páánɔ́, tuménupikeliti, panɔ́ paandimán pásɔ nutiánipá Pɛyúútɛn nunyɛ́ Antíos, Silí ne Silisí. 24Tuɔ́pɔ́n ɛ́ɛ́ pɔsɔ́k pómotí, poniólín akɛ kuasɔ́, ésinúpuéŋényí meéne, pɛɛlɛ ɛ́ɛ́ nútúmen natukál tuɔ́p; tutipá pasuɛ́ tuánitɔ́m pɔ. 25kúúkɔ́ tuénilumén ekelú pasɔ́ peem ɛ́ɛ́ túyɔ́ɔn pɛɛnd tunútúmɛn, ɔlɔŋ na Palanápas no Póol, paandimán páásɔ́ tuɔyɔnɛ́ táásɛ, 26panyɛ pɛɛnd pɛ́nyɛɛ́ peekenyí kusɔ́t kuɔ́p ó pusíó púkisiɛ́n kí Ɔkɔ́n wasɔ́ Yésus Kilíise. 27Tumánutúmɛ́n kɔk Yúute nɛɛyɛ́ na Sílas, ɛ́ɛ́ pɔnuɔ́yɔn pɔ́muɛ́t epú tumɔ́ninuɔ́ŋɛn kɔ́ ɔmbɔp ewe. 28Punyɛ́ ɛ́ɛ́, ne Emfúnukufúúmɛ naasɔ́ tuásɔ́mb ɛ́ɛ́ tutipá tunúkúta na puandá púlotí púkuɛl, ɛsiɛ́ eme nuɛsikɛnɛnɛ́ kuwóonyosi tɛ kupínan: 29nutinyá puány pamánipífuna kifól kítámbák; nutinyá manɔ́ŋ, tɛ puány púnyam pɔmɔ́niɔ́n katɛ kusikite; nutiɛndɛ́t isɔm. Índɛ nuépikeŋenyesi maandá makáánɛ peseékése, nukapá nuɛlɛ peseé. Tóoto oó!»
30Pókóndi Póole na Palanápas ne Yút na Sílas, paayɔk Antíos. Pɛmɛɛl paáman, pakúsikan peétépí kitikit, peekeki pɔ́ ɔmbɔp. 31Paaláaŋɛn peétépí ɔmbɔp, epú pɔmɔɔ́pitɔ́líkɔ́n púeki pɔ́ anyamɔ́, á kiákí ɛ́ɛ́ púmaákán pɔ́ ilúndɛ. 32Aná Yúute nɛɛyɛ́ na Sílas maápá peémímekélíé má Támbák, póond ákukala é peétépí téé, ákuákan pɔ́ ilúndɛ nakutáam á kuátap. 33Pɛɛkɛl kɔ́ɔk kitám kí kisikɛl, é kélém kuɛ́yɛ ɔlɔŋ ú peétépí wóokóndi pɔ, pɛɛl kɔ́ɔpɔ́ ɛ́ɛ́ pɛ́ɛndɛ peseé ɔ́kuɔwɔɔ́kɛ́n epé pamaátɔ́m pɔ. [34] 35Póole nɛɛyɛ́ na Palanápas pɔ́, pɔɔlɔp Antíos. Pamapá, ɔlɔŋ nɔ pɔsɔ́k pólotí kutek, pónyonyi póond pekéme insɔ́m yi indámb i mekélíe mɔ́ Ɔkɔ́n.
No Póol na Palanápas máatukan
36É kélém kú kisikɛl na pusɔ́mb ne pukel, Póol ɛ́ɛ́pí á Palanápas ɛ́ɛ́: «Ɛ́niɛ́ túond ésik pálíkɛ ewú tuénikéme mekélíe mɔ́ Ɔkɔ́n awɔ, tuɔ́nyɔlɔ́ paandimán páásɔ́ pa kuátap, ɛ́ɛ́ tuɛ́ɛ́n aná pɛnyɛ́ɛ.» 37Palanápas maambá ɛ́ɛ́ ukɔ́l Isáaŋɛ, pamaánd apílan ɛ́ɛ́ Málúkuse, paayɔk ɔlɔŋ. 38Maná, Póol timaátapan ɛ́ɛ́ paand ɔkɔ́l kɔ́ɔ́p kɔ́lɔŋ mɔɔnd umaápiátɔ́n pɔ́ Pamifilí, tɛ ɛ́ɛ́ ukɔ́l níɛ́yí niap á pusɔ́m pamaáyuukan a puɔ. 39Peepekenyipekenyi napukaaka, pualɔnd paakátukan. Palanápasɛ wɔɔkɔ́l Málúkuse, paamákat ésitíme paayɔɔk Sípele, 40Póole wɔ́, wɔɔkɔ́l Sílasɛ. Akuyɔk kúɔ́p, peétépí páatal pɔ́ kí imbɔ́k sí Ɔkɔ́n ɛ́ɛ́ ɔtɛ́m peseé wɛ́yí kííka pɔ.
Timoté mɔ́piɔyikin ó Póol na Sílas
41Póole wɔpɔŋ Silí ne Silisí, wól wákan ilɔŋ sí peétépí ilúndɛ.
ទើបបានជ្រើសរើសហើយ៖
Meelie mé Petúmí 15: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
