Meelie mé Petúmí 16
16
1Póol maniáma á pálɛ́k u Tɛlɛpé, wasuŋunɔ Lísíte. Eŋétépí mapá kɔ́ɔk kisiɛ́n ɛ́ɛ́ Timoté; Yóotí mapá indónyí i Pɛyúútɛn umɛɛ́yí eŋétépí, sí mapá mɔnɔ́ pɛ́ kɛlɛ́k. 2Peétépí pɔ́mɔɔ́sɔ́tɔ́nɔ Lísíte ni Ikɔniúmu mɔyɔ́ pilɔŋ peseé piɛ́yí. 3Póol mɔpílɔ́ŋɔ́ kuyɔɔk nɛɛyɛ́ kɛ́ ɛŋɛnd wɔɔkɔ́l kɔk wɔ́. Wakansa Timoté á kiákí ɛ́ɛ́ Pɛyúútɛn pɔ́mɔɔ́sɔ́tɔ́nɔ́ ɔ́ kitɔŋ kikáaní memenyen ɛ́ɛ́ utipá aŋansán ó pusíó ɛ́ɛ́ sí nyɛ mɔnɔ́ pɛ́ Kilɛk. 4Á pa pálɛ́k epé póol ne Sílas maátápúkáná, pɔ́yɔnɔ peétépí epú petúmí no posíósío pé Yelúsalɛm mɛɛ́tíkínɛ póondo pɔ́yɔn pɔ́ ɛ́ɛ́ pɛ́nɛkɛn pikotí pikánɛ. 5Ilɔŋ sí peétépí mapílúndánínɛ á kuátap síɔ́mbɔ siki puɔ́síɛ.
Póol mápiá iŋɛ́níní á pálɛ́k u Tuloás
6Póole na Sílas másaápíni kitɔŋ kí Filisí nɔ kitɔŋ kí pá Kaláat, á kiákí ɛ́ɛ́ emfunúkufúumɛ makányí nɔɔpɔ́ ɛ́ɛ́ pétipékítí nukál ɔ́ kitɔŋ kí Así. 7Pɛ́mɛɛlɛ́ pámana masíá nɔ kitɔŋ kí Misí, pápia kilɔ́ŋɛt kí kuyɔɔk á pálɛ́k u Pitiní, maná kilínditíe kí Yésus anakáánɛ́ kunyɛ́ ɛ́ɛ́: Emfúnukufúúmɛ wákányi nɔɔpɔ́. 8Páasapinɛ kɔk Misí páap kuám ɔ́ nikɔ́l sitíme ní Tɔlɔ́as. 9Neputúkú, Póole waapia iŋɛ́nɛn: Wɛkɛɛ́nɛ mɔɔnd u Masetuáne, etélímét upísokolonyi wɔ́ ɛ́ɛ́: «Óló Masetuán ɔ́sitúɔkɔ́!» 10Nɔ nyɔ́kɔ́tɔ́n é kélém kú iŋɛ́nɛn, tuakambitɛ kuyɔɔk Masetuán, á kiákí ɛ́ɛ́ tumemenyén cɛ́ɛ́nyí ɛ́ɛ́ Támbák átúpílíkíni é kuekémítí isúm yi indámb.
Líitia máátáp Ɔkɔ́n
11Tuamákat é sitíme Tɔlɔ́as tuanyámá kí ilua í Samotaláse, puɔ́s pú mɔɔ́ŋɔn tuayukɔ á pálɛ́k u Neapolís. 12Tuapálukɔ akáánɛ́ á kuyɔɔk Filipe. Unyɛ́ pálɛ́k wɔkɔn ɔ́ kitɔŋ kí masetuáne kínyɛ́ á kipia kí Lóma. Tuɔlɔp akáánɛ́ paán pé metúk. 13Puɔ́sí pú sápat, tuakáama á pálɛ́k á kuyɔɔk á kiŋindiŋindi kí kiilu, tumapítáká kuɛ́nɛ kɔɔ́mɔ kí imbísókólí kɛ Pɛyúútɛn. Tuɔnyɔmbítɛ, tuakála na pakáandɔ́ pá maápíkúsíkána akáánɛ́. 14Olotí kisiɛ́n ɛ́ɛ́ Líitiɛ, Umapá indónyí i pálɛ́k i Tiyalitíil, umapá utuénen isunú sí inyuán sí mɔɔ́ŋúnɔ́ pikúŋɔ kutek woond ukúmesi Támbákɛ́ɛ. Umɔtupitɔlikɔn, ɛkuɛlɛɛ́ Ɔkɔ́n mefuúnú ɔtɛm wɛ́yí ɛ́ɛ́; wɔp peseé na tukál tú Póol. 15Péetu wɔ́ ne nikúli niɛ́yí ní pɛɛnd. Watúpílikinɛ ukanyi ɛ́ɛ́: «Índɛ nuɛ́kɛ́nɛn ɛ́ɛ́ yaákátapan Ɔkɔ́n ékémuémue, ánuasípítímínɛ kuam.» Watúkútikan ɛ́ɛ́ túátap.
Póole na Sílas máyukɔ á kiansi kí imbíne
16Epue puɔ́s, tuyukana ɔ́kɔɔ́m kí imbísókólí, eŋelí masúmɔ wa akáandɔ́ wokoóló ókuositúkóli. Umapiána kilɔk kí kiliínditié wɔyɔ epú puónyóloné, umepíkínyényí pɔkúnɔ́ pɛ́ɛ́yɛ́ pikúŋɔ táasi ne púpú umɛɛ́lɛ. 17Wookoond ɔ́kuɔ́ŋɔn kásɔ, waánsa ɛ́ɛ́: «Pɛɛnd epe nyɛ peelímoólí pá Támbákɛ́ɛ u isáánupúlɛ́! Pénútínyenyi iŋilí iyukanɛ́ naanɔ́ ó kisótio.» 18Wokonditonyi pú metúkú asi metúkú. Ákuamaná Póole wɔkɔɔ́pɔ kutɛɛ wɛpíkɛkɛlɛt wookoond watiána kilɔk kí kiliinditié kikáaní ɛ́ɛ́: «Ɛ́ kisiɛ́nɛ kí Yésus Kilíis yɛ́ɛpí káwɔ ɛ́ɛ́ ám ká akáandɔ ewé!» Kiliínditié kíakaam kɔ́ɔk nɔ nyɔ́kɔ́tɔ́n kɛ́ɛ́yɛ́ ɔ́nuɔ́l. 19Pɔkɔ́n pɛ́ɛ́yɛ́ mɛɛlɛ́ pɛ́ɛnɛn ɛ́ɛ́ pátiákandá apúta pikúŋɔ kɛ́ɛ́yɛ́, pɛ́kɛtikini Póole ne Sílas péétútule pɔ́ énilumené ní pɛɛnd ké eŋis yɔ́ pɔŋgɔ́munɛ. 20Páyukɔ nɔɔpɔ ku pesúmbí pisɛnɛ pá punya Lóma póókoond pɔ́kɔyiti ɛ́ɛ́. «Pɛɛnd epe á kaákana kipueŋitenye kásɔ́ á pálɛ́k. Pányi Pɛyúútɛn. 21Pókónyonyi melínyélinyé mɔ́ɔpɔ́ mɛ Pɛyúútɛn, pasɔ́ punyia Lóma tu tiányípá tuátapan, tɛ kuɔŋɔn amɔ.» 22Embúlu wóndo wápúluŋudini pɔ. Pesúmbí pisen pékeki pukaaka ɛ́ɛ́ péeŋi Póole na Sílas indifɔnɔ́ póondo pásáp pɔ́ iŋás. 23Pɛ́mɛɛlɛ́ ne kusúpiti pɔ́ peseé, páatɔ́t pɔ́ á kiansi kí imbíne póókoond pátián ekíkí ɛ́ɛ́ ukíika pɔ́ peseéképese. 24Umɛɛlɛ́ wɔɔ́pɔnɔ anakáánɛ́, ekíikí wakaák pɔ́ á kiansi kí imbíne kindiófínó, wookoond wakaák pɔ́ pikɔ́nd é kilu 25á puandá pú ɔtɛm u putúk, Póole na Sílas mopisokolonyi póókoond pɔ́tɔ́ŋɔ isaka é kukúmesi Támbákɛ́ɛ; Pɔ́kuɔ́pɔ pimbukɛ pítɔ́likɔnɔ pɔ́. 26Nɔnyɔ́kɔ́tɔ́nɔ, kúúsí kuépíeyitin na pukaaka, itɛ́nɛ sí kiansi kí imbíne síepíeyen. Eŋití kitikit yá kiansi kí imbíne yépifun mesuŋ má pimbɔk kitikit mókoluk. 27Ekíikí wɛkɛnyɔk; umɛɛlɛ́ wɛɛ́nɛn eŋítí yá kiansi kí imbíne yefuúnen wɔsɔkɔ yɔɔ́nɔnɔ́ yɛ́ɛyí ípití ɛ́ɛ́ upiɔn, á kiákí umapítáká ɛ́ɛ́ pimbɔk siamana ɔpínɔnɔn.#16.27 Ekííkí mɛ́lɛ́ úpiɔ́n ó pusíó ɛ́ɛ́ enu Lóma anú ekííki indi pimbúk siɔpíno pɔ́kuɔn. 28Maná Póole waánsit ni imbekí yɛɛyɛ́ kitikit ɛ́ɛ́: «Ɛtipíɛlɛ́ kilɔk! Tunyi kɔkɔ páásɔ́ peem!» 29Ekíikí kɔk woówunu kisie, wɔpínɔtikin nɛkɛtɛ́ɛ, na puwá kitikit wakunɔ Póole na Sílas ɔ́ pikɔ́nd. 30Wémi pɔ́ kɔk wookoond woówunu pɔ́ ɛ́ɛ́: «Tat, kiákí yɛ́ɛlɛɛ́ ákupia kusɔt kú teníiki?» 31Pókondinyi wɔ́ ɛ́ɛ́: «átápa Ɔkɔ́n Yésuse ápia kusɔ́t kú teníik ne nikúli níawɔ ní pɛɛnd.» 32Pɔkɔyɔnɔ wɔ́ nukál nú Ɔkɔ́n nɛ pɛɛnd pámaápá kɛ́ɛ́yɛ́ á kiansi kitikit. 33Ekíikí waayɔɔk nɔɔpɔ́ ne putúkú akáánɛ́ ákuándínán imféŋ síɔpɔ. Tɛ wand epéti, péetu wɔ nɛɛyɛ́ na kiansi kíɛ́yɛ́ kí pɛɛnd. 34Wayukɔ no Póole na Silas kuɛyí watáaŋ pɔ́. Mɔɔnd ukáánɛ́ ne nikúli níɛyí ní pɛɛnd, pówón na anyiamɔ á kiákí ɛ́ɛ́ pámaátáp Támbákɛ́ɛ. 35Kuɔ́mɔ mɛɛlɛ́ kúpálana, pesúmbí pisɛnɛ pá punya Lóma pátúmɔ mélúse, ákutíána ekíikí ɛ́ɛ́: «yapá pɛɛnd pakáanɛ.» 36Ekíikí watíana Póole ɛ́ɛ́: «Pesúmbí pisɛn mátúmɔ pɛɛnd ɛ́ɛ́ ínúyap. Nunyi kuáma nuóndo núyuk é kiyeéwe!» 37Maná Póole wokondinyi ɛ́ɛ́: «péekí pukaaka ɛ́ɛ́ pétúsúpit ké eŋís yɛ́ pɛɛnd tɛ ɛ́ɛ́ pótúsósiti, pasɔ́ epé pikotí pí Lóma túkíkanɛ́! Póondo páátútɔ́t á kiansi kí imbíne. Nínuána pákamba ɛ́ɛ́ petuemi kí iŋɔsikɔ? Pútipá anakan! Inyɛ́ pólo pɔ́muɛt ékuesituémi!» 38Mélúse mányatíána pesúmbí pisɛn pí Lóma. Pɛ́mɛɛlɛ́ pɔ́ɔ́pɔnɔ, pumbíla púɛkɛtikin pɔ́ aná Póol na Sílas nyɛ́ á kipia kí pikotí pí Lóma. 39Poolo kɔk ɔkuɔsiɔŋɛn pɔ kuyap, póond peemi pɔ á kiansi kí imbíne, póokoówun pɔ́ ɛ́ɛ́ páatɔk á pálɛ́k. 40Pɛ́mɛɛlɛ́ páamana á kiansi kí imbíne, Póole na Sílas páyukɔ ku Liití. Pɛ́mɛɛ́lɛ́ pɛ́ɛ́mɛn paandimán pɔ́ɔ́pɔ́ pá kuátap pékeki pɔ́ ilúndɛ, pásuŋunɔ iŋilí yɔpɔ́.
ទើបបានជ្រើសរើសហើយ៖
Meelie mé Petúmí 16: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
