Meelie mé Petúmí 14
14
No Póol na Palanápas Ikonióm
1Aká Póol na Palanápas maásiámá Ikonióm pumapá pilɔŋ pímoómí aná Antiós. Pépíkin á kiansi kí imbísokólí kí Pɛyúútɛn páakála andikɛ́k kɔ́ɔk. Pɛɛnd puólíkóli pɛ́ Pɛyúútɛn ne epé pɛ́mɛɛ́lɛ́ pɛ́tiɛlɛ́ Pɛyúútɛn pɛ́kɛɛ́yi peétépí. 2Maná Pɛyúútɛn pémeéné kuátap nukál nú Támbák póókoond é kulikesi epé pɛ́mɛ́ɛlɛ́ pɛ́tiɛlɛ́ Pɛyúútɛn ɛ́ɛ́ pénuenesi peétépí. 3Maná Póole na Palanápas pɔ́ɔlɔp kɔ́ɔk kiandákáand kisikɛl, pópióndonyí ɔtɛm nɔ́ Ɔkɔ́n á kiákí ɛ́ɛ́ wɔ́ umeékényí pɔ́ pukaaka pú kuɛlɛ maandá má kuáyakuáya ne pisey ɛ́ɛ́ útínyi pɔ́ ɛ́ɛ́ unyi ɔtɛ́m peseé. 4Pɛɛnd pá pálɛ́k páapíapiti aŋapa áandɛ́: epe kiáyí kí Pɛyúútɛn epe kiáyí kí petúmí. 5Ne epé pátiányípá Pɛyúútɛn, nɛ Pɛyúútɛn, nɔ pɔkɔ́n pɔ́ɔp pasɔ́mb ɛ́ɛ́ pésésenyi petúmí póond pátútan pɔ́ atányi; 6Aná petúmí meémenyí imbítáákítɛ́n síɔ́p páyuukɔ á papálíkɛ pé Likaoní panyɛ́ Lísitɛ Tɛlipé nɛ mɛŋɛ́l mɔ́ɔp. 7Pékémé nukál nú Ɔkɔ́n kukáánɛ́ kɛ́kɛ́ɛ́yɛ́.
Póol meéŋúkí kikóndi Lísitɛlɛ
8Mɔɔnd mapá Lísitɛlɛ, kikóndi píkɔ́ndɔ yɛkɛlɛ utitélimet, péepíén wuɛ́ umapása utiɛndɛt. 9Epué puɔ́s umɔpítɔlíkɔ́n Póol kála, Póole watámb wɔ́ eŋis wɛkɛ́nɛ wɔ́ ɛ́ɛ́ unyi no pipióndínyi ɔtɛm ó kisótio. 10Ukanyi á mɔɔnd ne ekélú alúndán ɛ́ɛ́: «Atúkɛn télímít kááwɔ ɔ́ pikɔ́nd!» Mɔɔnd wenyémben wookoond ɛ́ kuɛndɛ. 11Ana pɛɛnd mɛɛ́nɛ́ puandá Póol mɛɛ́lɛ́ pákaáka nukokó na nulikaoníɛ́ŋɛ pákanyi ɛ́ɛ́: «Epué nyɛ pa Támbákɛ́ɛ pɛ́mɛ́nyɛ́yí pɛɛnd péméselé kuasua?» 12Pálukɔ pɔ́ pisiɛ́n pí pa Támbákɛ́ɛ pɔ́ɔp, Palanápasɛ ɛ́ɛ́: «Sɛsɛ», Póole ɛ́ɛ́: «Ɛ́lɛ́mɛsɛ», á kiákí ɛ́ɛ́ wɔ́ umaápá ekélíkélí. 13Afunɔ́fɔn u Támbákɛ́ɛ wɔɔpɔ́ Sɛsɛ wakasiám, kiansi kí imbísólí kí Sɛsɛ mapá énipíkínín ní pálɛ́k. Afúnúfɔn ukánɛ wokóló nɔ pɔnímɛ pí inyak silɛŋɛ́ na tulandany tú pisɛl énipíkíníní ní pálɛ́k. Nɛyí nɔ kiɔ́pɔ́ páakáminini ekelú ekuesikítíni petúmí inyak si káaní. 14Póole na Palanápas mɛɛlɛ́ pɔ́ɔpɔnɔ páapílaf indífɔnɔ́ siɔ́p pɔ́pínɔtikini é kimbí pánsa: 15«woókó! Kiákí kikání nuɛlɛnɛ akáánɛ́? Tunyi pɛɛnd niaŋ níanɔ! Niɔy nindámb tukémené, nínyɛ́ɛ nuyɛk maandá mánánánɛ makáánɛ́ núpíkuŋɔn kú Támbák unyɛ́ ɔkɔ́si umaáluŋá mɛnɛ́mɛnɛ́ɛ ne kúúsí na mááŋ na mandá meem mɛ́nyɛ́ kɔ́ɔk. 16É metúk mí insuá umayapá pitɔŋ pim ɛ́ɛ́ piɔ́ŋɔn kí iŋilí síɔp. 17Tɛ nɔ́ Támbák suŋuna ne kunúpítínyenyi é peseé unuɛ́lɛnɛ́. Unútúmanini tupɔ́l no niok á kisikɛl, unúfáan múkunyá woond uwónyosi itɛ́m síánɔ na anyamɔ́.» 18Tɛ nɔ́ po Póole pɛ́kɛɛ́n muyú á kukányi ne embúlu ɛ́ɛ́ weeki pɔ́ pifunɔ́. 19Pɛyúútɛn pónyólin Antíos ú Pisití nɔ Ikɔniúm pɔ́píkɔ́kitini embul. Pókondo á kutúútan Póole atányí pétútule wɔ́ pékémi wɔ́ á pálɛ́k páyap wɔ́ pápítááka ɛ́ɛ́ umékú. 20Aká peétépí maásípíkúsíkána pékéŋeliti wɔ, wakatukini wookoond á pálɛ́k nɔɔpɔ́. Kuápála páyukɔ na Palanápas á pálɛ́k kisiɛ́n ɛ́ɛ́ Telepé.
Póole na Palanápas moóndo Antiós
21Póole na Palanápas póókoond é kukéme insúmɔ yi indámb á pálɛ́k u Telepé pɛɛnd puólíkóli pɛ́kɛɛ́yi popíónyí. É kélém kuɛ́yí péepítúnukini Lísitɛlɛ, Ikoniúm na Antíos u Pisití 22páákan peétépí ilúndɛ ókupíóndonyi ɔtɛ́m na Támbák, pɔyɔn pɔ́ ɛ́ɛ́ ánupílúndánɛn á kuátap. Tuɛ́kɛsikɛnɛn kuɛ́n muyú táásɛ ekupíkini é pufuŋ pú támbák. 23Ésiki ɔlɔŋ ú peétépí pɛ́tɛkɛ posiósió pópísókolonyi pápísúmba pilɔ́ɔ́ŋɛ́t kɔ́ɔ́p ó pusío petíínyenyi pɔ́ kɔ́ Ɔkɔ́n pátálanɛ́ ɛtú kɛ́ɛ́yɛ́. 24É kélém akánɛ páasapinɛ kitɔŋ kí Pisití, pányámá á kí Pamifílí. 25Pényekémé mekélié má Tambák Pɛlití, pékesitúnúkú Atálí. 26Akánɛ pɔ́kɔ́l kitoóŋ kikɔn ókuondo Antíos u Silí, kɔɔ́mɔ pámátál pɔ́ kí imbɔ́kɔ sí Támbák ó puólí pómónyólo pɛɛ́lɛ. 27Pɛmɛlɛ́ paamana kɔk Antiós, pákúsikana ɔlɔŋ ú peétépí póókoond ɔ́kuɔyɔn pɔ́ puandá kitikit Támbák mɛɛ́lɛ́ nɔɔpɔ solsol aná umeéfuníni epé pátiányípá Pɛyúútɛn iŋilí i kuátap. 28No Póol na Palanápas pápáapitɛ kiták kátak no popíónyí.
ទើបបានជ្រើសរើសហើយ៖
Meelie mé Petúmí 14: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
