Máákuusə 1
1
Ncʉ́rí yɛ́ Zhâŋ Ŋgaŋafɛ́ kpênse kɛ máʼ nɛ́
(Mat 3:1-6; 3:11-12; Lúk 3:1-6; 3:15-18)
1Nzyé ŋkəŋ sʉ́ʼʉ Yěsô Kristo Mɔ́ŋ Mboʼmvé, 2féré njʉ́ a ŋweʼéme ndzó póʼ ŋweʼe ŋgaŋatsɔ́kpaŋató Mboʼmvé Ezaya nɛ́, ŋgâ:
«Zhʉ́, mə twɔ́ ŋgaŋáncʉri ya síŋ wo,
Ne tsuŋúne mɛndɔ́b wo.
3Ŋɔŋ ghéʼe nɛ́ ghúŋkwéʼé:
“Puŋ tsúŋú mɛndɔ́b Ntsɛɛpɔŋ!
sí pɔ́ŋ mɛndɔ́b pé, a nsé ŋgerɛ́ŋged.”»
4Zhâŋ ŋgaŋafɛ́ kpênse fɛ́ɛ́ twɔ́ ghúŋkwéʼé, cʉ́rɛ ŋgâ: «Puŋ séd mbziʼe yúŋ, kpênse, Mboʼmvé máʼ vɔ̌no yúŋ.» 5Ŋkɔŋɔ mbé pɛ́rɛ́ ŋgɔŋ Zhʉdé pwɛ mbɛ́lʉ́ŋ Yerʉ́salɛm náá, kʉ́yó mbɛ́rɛ́ Zhâŋ. Sí kəpɔŋ pɔ́b, ŋkúŋɔ nse Zhuudɛŋ, kpênse pwó ye. 6Pe kɛ tswɔ́ ndzwé Zhâŋ pe ne nwɔ́ naapeʼe ghúŋkwéʼé. Ŋkandáá ndúŋú kukúŋ yé kɛ pɛ́ɛ́ ne ŋgɔb. Mwɔ́zo pe pɛ́ɛ́ pɛ mbzyɛ́ŋkí pwɛ nə́b ndzɔ́ʼɔ́kaʼ. 7Zhâŋ kɛ cʉ́rɛ ŋgâ: «Ŋɔŋ tsé ŋkʉ́yó ndzəb mo, ntsɛ́ɛ́ ya, kaʼatɛ mə mbé kúʼɔ́ ne ntsuŋúne mbəb ya ŋkéé kpǐtɔ́kpee yé pó. 8Mo ya, a ndaʼ nse yɛ́, mə fɛ́ kpênse núŋ ne puŋ nɛ́. Tsʉ́ʼmbé, a ŋkʉ́yó fɛ́ kpênse ne puŋ pé ne Zhʉye Yáŋme.»
Yěsô kpéé nse
(Mat 3:13-17; Lúk 3:21-22)
9A kɛ pe ŋkhoʼyéré, Yěsô ŋáá Nǎzarɛd ndzó pɛ́rɛ́ ŋgɔŋ Galílya, ŋgú Zhuudɛŋ, kpênse pwó Zhâŋ. 10Ŋkhoʼyɛ́ Yěsô kɛ tsé twɔ́ nse nɛ́, a zhʉ́ njʉ́ pépéé ŋaʼ nɛ́. Zhʉye Yáŋme, njʉ́ taʼ fɔŋzɔ́tsaʼ nɛ́, shʉyíí mbəb yé. 11Taʼ ndzəb twɔ́ pépéé ŋgâ: «Wo Mɔ́ŋ ya wɛ́ mə kʉ́yé ŋgaʼ nɛ́. Mə ntsɔ́ʼ wo pe ne ndebéne.»
Zhʉye kəpɔŋ mwɔ́ Yěsô ghúŋkwéʼé
(Mat 4:1-11; Lúk 4:1-13)
12Fǐme nɛ́, Zhʉye Yáŋme núrɔ́ wé máʼá ghúŋkwéʼé. 13A tsó yóʼó ne zhyémve ghúbmekwa. Sátaŋ mwɔ̂ wé. A kɛ pe pwɛ pɛ nâkaʼ. Pɛ aŋgere fáʼa pwó ye.
Yěsô cʉrí Ŋkəŋ sʉ́ʼʉ Galílya
(Mat 4:12-17; Lúk 4:14-15)
14Njʉ́ pe kɛ fúŋɔ́ Zhâŋ ndábtsáŋ nɛ́, Yěsô ghú ndzó pɛrɛ́ ŋgɔŋ Galílya, cʉ́rɛ ŋkəŋ sʉ́ʼʉ Mboʼmvé, ntsɔ́ ŋgâ: 15«Ŋkhoʼmvé yɛ́ Mboʼmvé kɛ tíí nɛ́ kuʼú. Nofɔŋ Mboʼmvé nyi mbɛ́rɛ́ wúŋ. Puŋ séd mbziʼe yúŋ, mbó ntséʼé psyɛ́ndzɔʼ ne Ŋkəŋ sʉ́ʼʉ yɔŋ.»
Yěsô tsɔʼ sɔ́ ŋgíŋgyé pé
(Mat 4:18-22; Lúk 5:1-3, 10-11)
16Njʉ́ Yěsô kɛ tsé nyí ne gháá lepaanse Galílya nɛ́, a zhʉ́ Símo pú Andéré, mɔ́ŋmɛ́ yé. Pɔ́b tsé ndzoo mbúndzáá nse, ŋgɛ́mbɛ́ mbé pɛ mgbâssó. 17Yěsô tsɔ́ ne pɔ́b ŋgâ: «Puŋ cʉ́ʼɔ́ ndzəb mo. Mə ŋgyɛ́ puŋ tsʉʼ maʼa gbâ pumésɔŋ.» 18Kpaʼ ŋkhoʼyéré pɔ́b ke ntéé mbúndzáá pɔ́b pé néré, ntsʉ́ʼɔ́ ndzəb Yěsô. 19Yěsô pó naʼ ŋgɛ́ ŋgú ssó, njʉ́ Zhakə, mɔ́ŋ Zebede pú mɔ́ŋmɛ́ yé Zhâŋ. Pɔ́b pɛ́ ndzó páŋ yɔ́b ntəŋɛ́ mbúndzáá pɔ́b. 20Kpaʼ ŋkhoʼyéré, a fú wɔ́b. Pɔ́b tee tɛd wɔ́b Zebede ndzó páŋ pwɛ ŋgaŋafaʼ, cʉ́ʼɔ́ ndzəb Yěsô.
Yěsô zú zhʉye kəpɔŋ mbəb ŋɔŋ
(Lúk 4:31-37)
21Yěsô pwɛ ŋgíŋgyé pé nyi mbáŋá ndzó mbɛ́lʉ́ŋ Kapɛɛnawum, zhyéze pɛ Yúda kuʼu, a kúŋɔ́ ndántéré pɛ Yúda fɛ́ ntʉ́ʉ́. 22Mbziʼe yɛ́ a kɛ fɛ́ yé ntʉ́ʉ́ nɛ́, ntsɛ́ɛ́ wɔ́b. Ŋkyé ŋgâ nsó yé kɛ tséʼé tʉ̌ŋ Mboʼmvé, a pó mbé nyoʼ ye pe njʉ́ ghaŋákeʼekaŋ nɛ́ pó. 23A kɛ ghɛmbɛ néré, taʼ ŋɔŋ pɛ ndántéré pɛ Yúda yéré, zhʉye kəpɔŋ pɛ mbəb ye. Ŋɔŋ wéré ghéʼ, nsó ŋgâ: 24«Yěsô Mɔ́ŋ ŋɔŋ Nǎzarɛd, wo kɛ́ɛ́ kɔ́ ne psi? Wo kʉ́yó pô ywí póó? Mə ndzɛ́ ŋɔŋ wɛ́ wo nɛ́: Wo Ŋɔŋ Yáŋme wɛ́ Mboʼmvé twɔ́ nɛ́!» 25Yěsô míí wé, ntsɔ́ pwó yé ŋgâ: «Zhírɛ́! Twɔ́ mbəb ŋɔŋ wékénɛ́.» 26Zhʉye kəpɔŋ nyʉ́ wé kaʼatɛ, ŋgɛ́ twɔ́ ŋgéʼ ne tʉ̌ŋ. 27No tsɛ́ɛ́ ŋkɔŋɔ pɔŋ pɛ́, pɔ́b kɛ pɛ́ yóʼó náá nɛ́. Pɔ́b psirɛ́ mbəb yɔ́b ŋgâ: «Yɔŋ zhǐ twɔ́ pɛɛ? Taʼ ntʉ́ʉ́ ffé pé nɛ́, ŋgaŋ mé gháʼmbwo. A sáʼá mbɛ pɛ zhʉye kəpɔŋ, pɔ́b ké ndzóʼó pwó ye pe néré.» 28Njʉ́ yéré no kɛ záʼ nɛ́, tíí Yěsô ké gbáʼá néré ndzó ŋkɔŋɔ pɛ́rɛ́ ŋgɔŋ Galílya náá.
Yěsô pɛ́d ghɔŋ pɔŋ zááme
(Mat 8:14-15; Lúk 4:38-39)
29Ŋkhoʼyɛ́ Yěsô kɛ twɔ́ ndántéré pɛ Yúda nɛ́, a ghú ndáb Símo pú Andéré. Zhakə pú Zhâŋ tyáŋa wé. 30Mvɔ́b Símo núnú, fóó pɛ mbəb ye. Yěsô ké ŋgɛ́ kúŋɔ́ ndáb, pe tsɔ́ pwó yé. 31A suʼú mbəb ye mbɛ́rɛ́ wé, gbâ pwó ye, ŋgyɛ́ a ŋáá syé. Fóó twɔ́ mbəb ye. A zyé fǎʼne ne pɔ́b.
Yěsô pɛ́d ghɔŋ zááme
(Mat 4:24; 8:16-17; Lúk 4:40-41)
32Ne fwɔ̌nab, ŋkhoʼyɛ́ ménab kɛ máʼ nɛ́, pɔŋ yɔ́ɔ́ pɛ ghaŋághɔŋ pwɛ pɔŋ pɛ zhʉye kəpɔŋ kɛ pɛ́ mbəb pɔ́b nɛ́, ŋkʉ́yó ne wɔ́b pfúŋɔ́ Yěsô. 33Ŋkɔŋɔ pɔŋ pɛ pɔ́b kɛ pɛ́ ndzó yéré mbɛ́lʉ́ŋ nɛ́, téré náá ntswěndáb yéré. 34Yěsô zhyɛ̂ pɔŋ zááme pɛ́ pɔ́b kɛ tséʼé mbziʼembziʼe ghɔŋ nɛ́ fwó, mbó ndzú zhʉye kəpɔŋ zááme mbəb pɔŋ. A kɛ pe tee mɛndɔ́b ŋgâ pɔ́b tsɔ́ no pó, ŋkyé ŋgâ pɔ́b kɛ zɛ ŋɔŋ wɛ́ Yěsô yéré nɛ́.
Yěsô kɛ́rɛ́ ndzó ŋgɔŋ Galílya cʉ́rɛ Ŋkəŋ sʉ́ʼʉ
(Mat 4:23; Lúk 4:42-44)
35Kêmvé, ne fʉ́ʉ́wáá, Yěsô ŋǎ syé, ntwɔ́, mbaʼ, ntsé ntsɛ́ʼɛ́ Mboʼmvé yóʼó. 36Símo pwɛ pɛkpee pe ghú ne ntáʼne wé, 37njʉ́ wé, tsɔ́ pwó ye ŋgâ: «Ŋkɔŋɔ pɔŋ náá tsé nɛ́ ntaʼa wo.» 38Yěsô pɔ́rɔ́ ne pɔ́b ŋgâ: «Piŋi ghú ywoʼɔ ndúŋ, ndzó pɛ yaʼ pɛ a tsyɛ́ wíŋi nɛ́. Mə ké ntsɛ́ʼɛ́ ne ncʉríne Ŋkəŋ sʉ́ʼʉ yóʼó, ŋkyé ŋgâ mə ŋkʉ́yó ndúŋú.» 39Yěsô kɛ́rɛ́ ndzó ŋkɔŋɔ pɛ́rɛ́ ŋgɔŋ Galílya náá, ncʉ́rɛ no Mboʼmvé ndzó pɛ ndántéré pɛ Yúda, mbó ndzú pɛ zhʉye kəpɔŋ.
Yěsô pɛ́d taʼ ŋgaŋakə́kóó
(Mat 8:1-4; Lúk 5:12-16)
40Taʼ ŋgaŋakəkóó nyí mbɛ́rɛ́ Yěsô, mbóʼmbwó pwó ye, mvɔ́ ne kpee mé nsó ŋgâ: «A pɛ yɛ́ wo kʉ́yé nɛ́, mbǒ tɛɛmbɛ́ wo zhyɛ́ mə fwó.» 41Yěsô tiŋɛ́ wé, ntsáá ghəghəŋ ye, sí pwó ye, ŋkébé wé, ntsɔ́ pwó ye ŋgâ: «Mə kʉ́yé, fwó.» 42Fǐme, kəkóó ké twɔ́ mbəb ye pe néré, a fwó. 43Yěsô sú təŋé ye, ndzú wé, 44ntsɔ́ pwó ye ŋgâ: «Zhyaŋa nɛ́ njʉ́ wo mwɔ́ tsɔ́ cyó no pwó ŋɔŋ nɛ́. Ntsʉʼmbé, ghú nyóʼ mbəb wo pwó ŋgaŋashʉ́, mbó fɛ́ shʉ́ ne khǐŋgóʼ njʉ́ kaŋ Mǔsê tsɔ́ nɛ́, ne kiŋi fwóne mo.» 45Ntsʉʼmbé, njʉ́ ŋɔŋ wéré kɛ ghú nɛ́, a tsʉʼ ncʉ́rɛ no yɛ́ a kɛ záʼ nɛ́ cʉrí ne tʉ̌ŋ, mbó nzerɛ ywoʼ ywoʼ. A kɛ zhyɛ́ tɛ Yěsô pó mbé tsé nyóʼó mbəb ye ndzó cyó mbɛ́lʉ́ŋ ŋkʉ́rʉ́ pó. A kɛ tsó ye ŋkhoʼyɔŋ pe ne mbaʼá. Mbɛ néré, pɔŋ ké twɔ́ twɔ́ ndzó ŋkɔŋɔ ywoʼ náá ŋkʉ́yó pfúŋɔ́ ye.
ទើបបានជ្រើសរើសហើយ៖
Máákuusə 1: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល