Máákuusə 2
2
Yěsô pɛ́d taʼ pfɔ́mbəb
(Mat 9:1-8; Lúk 5:17-26)
1Njʉ́ pɔŋ zhyémve kɛ záʼ nɛ́, Yěsô pód ndzəb Kapɛɛnawum, pe zoʼ ŋgâ a ndáb. 2Pɔŋ zááme térɛ́ ndáb kaʼatɛ ywoʼ yúŋ, mbɛ ntswěndáb féʼé. Yěsô tsɔ́ nsó Mboʼmvé ne pɔ́b. 3Pɔŋ kʉ́yó ne taʼ pfɔ́mbəb pfúŋɔ́ Yěsô, ŋgɛ́ɛ́ pɔŋ pekwa kyɛ́ wé. 4Njʉ́ pɔŋ kɛ gháʼmbwo, tɛ ywoʼɔ záʼá ne ŋkúŋne mbáŋá pfuŋ Yé pó pé nɛ́ pó, pɔ́b tɔ́ɔ́ ntsɔ̌ʼndáb ndzó ywoʼ yɛ́ a kɛ pe nɛ́. Ntyaŋa pfɔ́mbəb wéré ndúŋú kɔʼ yɛ́ a kɛ nu ndúŋú nɛ́. 5Yěsô zhʉ́ psyɛ́ndzɔʼ yɔ́b, ntsɔ̂ pfɔ́mbəb ŋgâ: «Mɔ́ŋ ya, mə máʼ kəpɔŋ wo.» 6Pecyó ghaŋákeʼekaŋ pɛ́ pɔ́b kɛ ghɔ́rɔ́ yóʼó nɛ́, tsɔ́ ndzó ndzɔʼ yɔ́b ŋgâ: 7«Ŋɔŋ wɔŋ tsɔ́ kaʼa pe níŋ? A too Mboʼmvé nɛ́! Tɛɛmbɛ ŋɔŋ pe máʼ vɔ̌no ŋɔŋ fáá Mboʼmvé pó?» 8Yěsô zî kpaŋató yɔ́b kpaʼ ŋkhoʼyéré, ntsɔ́ ne pɔ́b ŋgâ: «Puŋ kpaŋa ndzó ndzɔʼ yuŋ kɛ́ʼɛ́ ŋkyé kɔ́? 9A kaʼa nzyaŋa ne nsóne pwó pfɔ́mbəb ŋgâ: “Mə máʼ kəpɔŋ wo?” Kii a zyaŋa nsóne ŋgâ: “Ŋǎ syé ndɔ́ɔ́ kɔʼ wo, nyi?” 10Kpaʼ sísíŋ, puŋ zɛ́ tó puŋ ŋgâ, Mɔ́ŋ Ŋɔŋ kúʼɔ́ ne mǎʼne kəpɔŋ pɔŋ ndúŋú tsetsáʼ.» Néré Yěsô pó séd mbəb ye ntsɔ́ pwó pfɔ́mbəb ŋgâ: 11«A tsɔ́ mo pwó wo: “ŋǎ sye ndɔ́ɔ́ kɔʼ yo mbódndzəb ywoʼ wo.”» 12Ŋɔŋ wéré ké ŋáá syé pe néré síŋ ŋkɔŋɔ pɔŋ náá, mbéʼ kɔʼ yé, ntwɔ́ mvé. Tó ŋkɔŋɔ pɔŋ náá vaʼ, pɔ́b ghúʼɔ Mboʼmvé ntsɔ́ ŋgâ: «Psi kâ kɛ zhʉ́ no njʉ́ yɔŋ nɛ́ pó.»
Yěsô tsɔ́ʼ Levi
(Mat 9:9-13; Lúk 5:27-32)
13Yěsô ké mbó ŋgú ne gháá lepaanse Galílya, ŋkɔŋɔ mvuʼ pɔŋ náá ŋkʉ́yó pfuŋ ye, a fɛ́ ntʉ́ʉ́ ne pɔ́b. 14A ghɛ́ ndzaʼa, njʉ́ Levi, Mɔ́ŋ Áləfe, a ghɔ́rɔ́ ndáb pɛ ghaŋákpêsebe pɛ Roma. Yěsô tsɔ́ pwó ye ŋgâ: «Ntsʉʼɔ ndzəb mo.» Levi ŋǎ sye nzɔ́ŋɔ Yěsô. 15Mɔ́ŋtiʼa ŋkhoʼ záʼ, Yěsô pwɛ ŋgíŋgye ghú ndáb Levi ne ndzône mɔ́b. Ghaŋákpêsebe zááme pwɛ ghaŋázhyɛ́ meno kəpɔŋ ké mbɛ yɔ́b yóʼó, ŋkyé ŋgâ pɔ́b kɛ cʉ́ʼɔ́ ndzəb ye zááme. 16Pɛ ghaŋákeʼekaŋ pɛ pɔ́b kɛ pe pɛ Farízya nɛ́ zhʉ́ njʉ́ Yěsô kɛ zɔ mɔ́b pwɛ pɛ mvɔno pwɛ ghaŋákpêsebe nɛ́, tsɔ̂ ŋgíŋgyé pe ŋgâ: «Kɔ́ yɔɔ! Ntsɛ́ssó wuŋ zɔ mɔ́b pe pwɛ ghaŋákpêsebe pwɛ pɛ ghaŋázhyɛ́ meno kəpɔŋ?» 17Yěsô zóʼ, ntsɔ́ ne pɔ́b ŋgâ: «Pɔŋ pɛ pɔ́b sʉ́ʼʉ nɛ́ tsé mbé ghú pfúŋɔ́ ndɔŋta pó, tsʉʼ mbé ndɔŋta tséʼé ghebe pe pwó ghaŋághɔŋ. Mə ŋkʉ́yó ne fûne puŋgerɛ́ŋged pó. Mə ŋkʉ́yó ne fûne ghaŋázhyɛ́ meno kəpɔŋ.»
Yěsô nsó no ne no zɛ̌nse
(Mat 9:14-17; Lúk 5:33-39)
18Ŋgíŋgye Zhâŋ Ŋgaŋafɛ́ kpênse pwɛ pɛ Farízya kɛ tse ndzɛ nse. Pɔ́b kʉ́yó mbzirɛ́ Yěsô ŋgâ: «Ŋgíŋgyé Zhâŋ pwɛ ŋgíŋgyé pɛ Farízya zɛ́ nse, ŋgíŋgyé pó, pe zɛ̌nse pó ŋkyé kɔ́?» 19Yěsô pɔ́rɔ́ ne pɔ́b ŋgâ: «Tɛ́ɛ́mbɛ ghəŋ zɛ̌nse ne tsefɔŋ mɔ́ŋndáá pfúŋɔ́ pɔ́b? A pú ŋgâ ŋkhoʼyɛ́ tsefɔŋ pfúŋɔ́ pɔ́b, pɔ́b ndɛ ndzé nse. 20Ntsʉʼmbé zhyémvé tsé ŋkʉ́yó, pé túbú tsefɔŋ tsetsɛrɛ pɔ́b, pɔ́b zɛ̌nse.» 21Yěsô ké mbó nsó ŋgâ: «Tɛɛmbɛ ŋɔŋ pe yɔ́ɔ́ pɛ́rɛ́ ndzwé ffé ntɛ́ɛ́ ndúŋú ye zuŋ pó. Mbǒ, pɛ́rɛ́ ye ffé yɛ́ pe pfíí ndúŋú nɛ́ sú ye zuŋ, ywoʼ yɛ́ a sɛ́ɛ́ nɛ́ a ghɛ́ɛ́ ŋgaʼ! 22Tɛɛmbɛ ŋɔŋ pé níŋi yoʼ ffé ndzó ndzuŋ ghúŋ ŋgɔb pó, mbǒ yoʼ ffé ŋgyɛ́ ghúŋ yéré cʉ́, pe ghɛ́ mbzye yoʼ ké mbó mbzyé ghúŋ psyé. A zɔŋɔ ŋgâ pe níŋi yoʼ ffé pe ndzó ghúŋ ffé!»
A tséʼé Yěsô tséʼé zhyéze pɛ Yúda
(Mat 12:1-8; Lúk 6:1-5)
23Cyó zhyéze pɛ Yúda, Yěsô pwɛ ŋgíŋgyé pé, tsé ndzáʼa ndzó pɛ faʼ bele. Ŋgíŋgye pé kábá tsoʼ mɔ́b ndzǒ. 24Pɛ Farízya tsɔ́ɔ́ Yěsô ŋgâ: «Ntíŋí yɔ́b yɛ́ pɔ́b zhyɛ́ zhyéze nɛ́, kaŋ miŋi psyɛ́ pó!» 25Yěsô pɔ́rɔ́ ne pɔ́b ŋgâ: «Puŋ kâ kɛ fú no yɛ́ fɔŋ Ndavíd kɛ zhyɛ́ ŋkhoʼyɛ́ no kɛ tsɛɛ wé, ndzye zí wé pwɛ pɛkpee pe nɛ́ pó! 26A ŋkuŋɔ Ndámboʼmvé, pfód mbre shʉ́, fɛ́ ye pɛkpee pe. Ntsʉʼ ŋgɛ́ mbɛ a pé mbre yɛ́, cyó ŋɔŋ tsɛ́ʼɛ́ ne pfódne fáá ndaʼ pɛ ghaŋáshʉ́ nɛ́ pó. A kɛ pe ŋkhoʼyɛ́ Abyataa kɛ pe tɛdshʉ́ kəkwéʼe nɛ́.» 27Yěsô pó tsɔ́ ne pɔ́b ŋgâ: «Mboʼmvé kɛ tíí zhyéze ŋkyé ŋumesɔŋ. A kɛ pe nteŋé ŋumesɔŋ ŋkyé zhyéze pó.» 28A zhyɛ́ yéré mə sɔ́ŋɔ́ wúŋ ŋgâ: «A ntséʼé Mɔ́ŋ ŋɔŋ ntséʼé ŋkɔŋɔ yɔ́b náá. Mbɛ zhyéze.»
ទើបបានជ្រើសរើសហើយ៖
Máákuusə 2: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល