Matʉyo 28
28
Yěsô zhʉyɛ́ ne vó
(Máá 16:1-8; Lúk 24:1-11; Zhâ 20:1; Zhâ 20:11-18)
1Njʉ́ zhyéze pɛ Yúda kɛ záʼ nɛ́, kpaʼ ne fʉ́ʉ́wáá ne sɔ́ zhyémve ne ŋgabtáŋ pɛ Yúda, Malya wɛ́ a kɛ twɔ́ Madala nɛ́ pú cyó Malya ghú ne ndíŋíne sye. 2Ŋgɛ́ mvuwɛ́ tsetsáʼ vod ne tʉ̌ŋ. Aŋgere Ntsɛɛpɔŋ shʉyí pépéé, ŋkʉ́yó ŋkəŋí ŋgɔʼ ŋgɔ́rɔ́ ndúŋú. 3Aŋgere kɛ nyʉyí njʉ́ mímíí mbuŋ nɛ́. Ndzwé ye fʉ́ʉ́ kaʼatɛ mbɛ́ɛ́ njʉ́ mbób nɛ́. 4Pɛ káŋató pɛ pɔ́b kɛ psibɛ vǎ nɛ́, pɔ́ɔ́ kaʼatɛ ntsʉ́ʼɔ́ njʉ́ pɛ pfɔ̂ pɔŋ nɛ́. 5Ntsʉʼmbé aŋgere tsɔ́ pwó pěŋgyé péré ŋgâ: «Puŋ ndɛ tsé mbɔ́ɔ́, mə ndzé ŋgâ puŋ taʼa Yěsô wɛ́ pe kɛ kpii wé ndúŋú ŋgʉŋʉ nɛ́. 6A ghaŋ pó! Á zhʉyɛ́ ne vó, njʉ́ a kɛ ntsó nɛ́. Puŋ kʉ́yó njʉ́ ywoʼ yɛ́ a kɛ nû nɛ́. 7Kɛ́ʼɛ́, puŋ ghú zǎŋazâŋa ntsɔ́ pwó ŋgíŋgye pé ŋgâ: “A zhʉyɛ́ ne vó. A kpɛ́ɛ́ síŋ puŋ, ndzwə́ʼɛ́ wúŋ Galílya. A ywoʼ yɛ́ nɛ́ puŋ zhʉ́ wé nɛ́.” A pé nɛ́! Mə tsɔ́ nɛ́ ne puŋ.» 8Péŋgyé pɛ́ ŋǎ tswee sye ne pɔ́ɔ́ pwɛ ndebéne zááme, ŋkí ndéé ŋgú ntsó meno péré pwó ŋgíŋgye Yěsô. 9Pɔ́b ghɛ̌ ŋgú, pwɛ Yěsô séré, a tsɔ́ ne pɔ́b ŋgâ: «Mə ntsɛʼɛ nɔŋ.» Pɔ́b suʼú mbəb yɔ́b fɛ́ pfuŋ ye, mvɔ́ ne kpee mé, ŋkebé kpee mé. 10Néré, Yěsô ntsɔ́ ne pɔ́b ŋgâ: «Puŋ ndɛ ntsé mbɔ́ɔ́. Puŋ ghú ntsɔ́ pwó pɔ́ŋmɛ́ páá ŋgâ pɔ́b ghú Galílya. A ywoʼ yɛ́ pɔ́b njʉ́ yáá nɛ́.» 11Njʉ́ pěŋgyé péré kɛ kɛ́ kɛrɛ mɛndɔ́b nɛ́, pecyó ghaŋápsibɛvǎ ghú mbɛ́lʉ́ŋ ntsó ŋkɔŋɔ meno pɛ a kɛ záʼ náá nɛ́ pwó pɛ ntsɛ́ssó ghaŋáshʉ́. 12Ntsɛ́ssó ghaŋáshʉ́ péré, ghú pwɛ pɛ ghəkód téré. Pɔ́b kpáŋa njʉ́ pɔ́b ŋgyɛ́ nɛ́. Fɛ́ mbób zááme pwó pɛ káŋató, 13ntsɔ́ ne pɔ́b ŋgâ: «Puŋ ntsó nɛ́ ŋgâ: “ŋgíŋgye pé kʉ́yó netsúʼ ndzwə́ə́ pfɔ̂ yé, ŋkhoʼyɛ́ a ghɛmbɛ psi tsé ŋgye nɛ́.” 14A pɛ́ɛ́ yɛ́ no yéré páŋa ndzó ntəŋé ntsɛ́ssó ŋgɔ́bmena nɛ́, mbǒ a mburɔ́ psi mburɔ́ ŋgyé mé, ké mbó ŋgyɛ́ ŋgâ kii pe ndɛ fɛ́ ŋgəʼo mbəb puŋ.» 15Pɛ káŋató kpéé mbəb, ŋgyɛ́ no yɛ́ pé kɛ tsɔ́ ne pɔ́b nɛ́. No yéré gbáʼ ŋkɔŋɔ ŋgɔŋ Yúda náá kaʼatɛ mbáŋ ndzebé.
Yěsô twɔ́ ŋgíŋgye pé
16Ŋgɛ ŋkhú ne ŋgíŋgye Yěsô tsɔ̌b yimɔʼɔ, pɔ́b ghú ndzó pɛ́rɛ́ ŋgɔŋ Galílya, ndúŋú ŋkə́ŋ yɛ́ Yěsô kɛ tsɔ́ ne pɔ́b nɛ́. 17Ŋkhoʼyɛ́ pɔ́b kɛ zhʉ́ Yěsô nɛ́, pɔ́b vɔ̂ ne kpee mé, ntsʉʼmbé, ntséʼé ndzɛ̌ne. 18Yěsô suʼú mbəb ye fɛ́ pfúŋɔ́ pɔ́b, ntsɔ́ ne pɔ́b ŋgâ: «Mboʼmve fɛ́ ŋkɔŋɔ tʉ̌ŋ náá ne mo, a pépéé pwɛ ndúŋú tsetsáʼ. 19Néré, puŋ ghú nɛ́ ndzó ŋkɔŋɔ ŋgɔŋ náá, ŋgyɛ́ pɔ́b tsʉ́ʼ ŋgíŋgye páá, puŋ fɛ́ kpênse ne pɔ́b ne tíí Tɛd, Mɔ́ŋ, Zhʉye Yáŋme. 20Puŋ zéʼé wɔ́b ne ŋgyɛ̌ne ŋkɔŋɔ meno pɛ́ mə nyóʼó ne puŋ náá nɛ́. Ŋgɛmbɛ ne mo, a ke mbɛ piŋi ŋkɔŋɔ zhyémve náá, kaʼatɛ mbáŋ ne zhyémve njʉyǐndzəb.»
ទើបបានជ្រើសរើសហើយ៖
Matʉyo 28: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
