Matʉyo 27
27
Pe ghú ne Yěsô síŋ Piláto
(Máá 15:1-2; Lúk 22:66; 23:1; Zhâ 18:28)
1A kɛ pé ne ndzɔ́ʼɔ́wáá, ŋkɔŋɔ pɛ ntsɛ́ssó ghaŋáshʉ́ pwɛ ghəkód, kúŋ ntéré ntsúŋɔ́ njʉ́ pe fúŋɔ́ Yěsô ŋgâ pe nɔ́ʼɔ́ wé nɛ́. 2Pɔ́b zhyɛ́ pe ŋkwɔ́rɔ́ Yěsô ŋgú ne ye fɛ́ wé pwó Piláto wɛ́ a kɛ pe ntsɛ́ssó pɛ ŋgɔ́mənaʼ nɛ́.
Mbziʼe njʉ́ Yúda kɛ pfó nɛ́
3Ŋkhoʼyɛ́ Yúda wɛ́ a kɛ fí Yěsô nɛ́ kɛ zhʉ́ pe fúŋɔ́ wé nɛ́, ndzɔʼ ye zuʼɔ́ wé, a yɔ́ɔ́ mbób ghúbmekyéd yɛ́, ŋgú ne nuʼúne pwó pɛ ntsɛ́ssó ghaŋáshʉ́ pwɛ ghəkód. 4A tsɔ́ ne pɔ́b ŋgâ: «Mə ŋgyɛ́ no kəpɔŋ njʉ́ mə fí nsə mbóʼ ne puŋ nɛ́.» Ntsʉʼmbé, pɔ́b pɔ́rɔ́ pwó ye ŋgâ: «A zhʉ́ ywí ne cyó yɔ́b pó. A zoʼo wo!» 5Mbé néré, a máʼ mbəb pfúŋɔ́ ywoʼɔ́ze, ntwɔ́ ŋgú ŋkod. 6Pɛ ntsɛ́ssó ghaŋáshʉ́ yɔ́ɔ́ mbób yéré, ntsó ŋgâ: «A tsé mbé zɔŋɔ ŋgâ pe férɛ ndzɔ́ʼɔ́ foʼ yɛ́ á Ndámboʼmve nɛ́ pó, ŋkyé ŋgâ a mbób nsə.» 7Pɔ́b kúŋ ntéré, njʉ́ ŋgâ a tsyɛ́ ŋgâ pɔ́b zúŋ ywoʼ tsetsáʼ pwó mbwɔ́tsáʼ nuŋ, kɛ́ʼɛ́ ne cʉ̂ne pfɔ̂ pushʉyɛ yóʼó. 8A zhyɛ́ yéré pé fú ywoʼ yéré pe ne «Pfûŋ nsə», kaʼatɛ mbáŋa ndzebe. 9Kɛ́ʼɛ́, tó no yɛ́ ŋgaŋatsɔ́kpaŋató Mboʼmvé Zheremi, kɛ ntsó nɛ́ yúŋú. No yéré pɛ́ɛ́ ŋgâ: «Pɔ́b yɔ́ɔ́ mbób ghúbmekyéd yéré, á pe ndɔŋ ye yɛ́ pɔ́ŋ Issayɛ kɛ kpaŋ nɛ́, mbé ndɔŋ ye yɛ́, pe kɛ zhʉ́ ŋgâ pɔ́b fi wé núŋ nɛ́. 10Pɔ́b yɔ́ɔ́ fɛ́ ne mbób faʼ mbwɔ́tsáʼ, kɛ́ʼɛ́ njʉ́ Ntsɛɛpɔŋ kɛ tsɔ́ ne mo nɛ́.»
Yěsô síŋ Piláto
(Máá 15:2-15; Lúk 23:2-5; 23:13-25; Zhâ 18:28; 19:16)
11Pe fiʼɛ Yěsô síŋ Piláto, ntsɛ́ssó pɛ ŋgɔ́menaʼ. A psirɛ́ wé ŋgâ: «A wo mbé fɔŋ pɛ Yúda?» Yěsô pɔ́rɔ́ pwó yé ŋgâ: «Ŋgâ wo tsɔ́ nɛ́.» 12Ntsʉʼmbé, meno pɛ ntsɛ́ssó ghaŋáshʉ́ pwɛ ghəkód kɛ sɔ́bɔ́ wé ndúŋú nɛ́, a pé pód pó. 13Néré, Piláto psirɛ́ wé ŋgâ: «Wo tsé mbé zóʼó ŋkɔŋɔ meno pɔŋ pɛ́ pe tǐ tó wo náá nɛ́ pɔɔ?» 14Yěsô pe pód cyó no ndúŋú ŋkɔŋɔ meno péré náá pó. A tsɛ́ɛ́ ntsɛ́ssó pɛ ŋgɔ́menaʼ kaʼatɛ. 15A kɛ pɛ ŋkɔŋɔ ndebéne Pasəka pɛ Yúda náá, ntsɛ́ssó pɛ ŋgɔ́menaʼ túbɔ taʼ ŋɔŋ wɛ́ pɔŋ kɛ tsɔ́ʼɔ́ nɛ́ ndábtsáŋ. 16A kɛ ghɛmbɛ taʼ ntʉŋntʉŋ ŋgaŋatsáŋ pɛ yóʼó, pé zɛ́ we kaʼatɛ, tíí pé Yěsô Barabasə. 17Néré, Piláto psirɛ́ pwó pɔŋ zááme pɛ́ pɔ́b kɛ tɛ́rɛ yóʼó nɛ́ ŋgâ: «Puŋ zɔŋɔ ŋgâ mə ntúbɔ́ wɔ́, fɛ́ ne puŋ? Yěsô Barabasə kii Yěsô wɛ́ pe fú ne Kristo nɛ́?» 18A kɛ psírí néré ŋkyé ŋgâ, a kɛ zé ŋgâ, pe kɛ sháŋa Yěsô sháŋa ŋkɔŋ, mbɔ́rɔ́ fí wé. 19Ŋkhoʼyɛ́ a kɛ ghɔrɔ́ ndzó ywoʼɔ́ sábáfiʼ nɛ́, ŋgʉyé zhyɛ́ pe tsɔ́ pwó ye ŋgâ: «Wo ndɛ kúŋɔ́ ndúŋú no ŋuŋgerɛ́ŋged wékénɛ́! ŋkyé ŋgâ mə njʉ́ ŋgəʼo ndzɔ́ʼɔ́ ndzəb ndzebé kaʼatɛ ŋkyé wé.» 20Pɛ ntsɛ́ssó ghaŋáshʉ́ pwɛ ghəkód tsiŋɛ mvuʼ pɔŋ ŋgâ pɔ́b psirí Barabasə, mbó ŋgyɛ́ ŋgâ pe nɔ́ʼɔ́ Yěsô. 21Ntsɛ́ssó pɛ ŋgɔ́menaʼ po ndɔ́ɔ́ ntsó, mbzirɛ́ wɔ́b ŋgâ: «Ndzɔ́ʼɔ́ pɔŋ pɔŋ pépáá, puŋ zɔŋɔ ŋgâ mə ntubɔ́ wɔ́ fɛ́ ne puŋ?» Pɔ́b pód ŋgâ: «Barabasə.» 22Piláto pó mbzirɛ́ wɔ́b ŋgâ: «Tɛ mə ŋgyɛ níŋ ne Yěsô wɛ́ pe fú wé ne Kristo nɛ́?» Ŋkɔŋɔ wɔ́b náá pód ŋgâ: «Pe kpíí wé ndúŋú ŋgʉŋʉ!» 23A pó mbziʼi ŋgâ: «A gháŋ ŋgyɛ yɛ́rɛ́ no kəpɔŋ?» Néré, pɔ́b ke mě mê ŋgeʼe ne tʉ̌ŋ ntsɔ́ ŋgâ: «Pe kpíí wé ndúŋú ŋgʉŋʉ!» 24Piláto zhʉ́ ŋgâ a kǎ tséʼé cyó ghebe pó, a kɛ pó ndzɔŋɔ máʼá vaʼ. A yɔ̂ nse, sǒ mbwó mé núŋ síŋ pɔŋ, ntsó ŋgâ: «Mə ndzɛ́ cyó no ndúŋú nsə mbóʼ wɔŋ pó! Yéré tiŋɛ́ wúŋ!» 25Ŋkɔŋɔ pɔŋ náá pód ŋgâ: «Nsə mé khú tó psi, mbɛ tó pɔ́ŋ psi.» 26Néré, a tubu Barabasə fɛ́ ne pɔ́b, ŋgyɛ́ pe gbíí Yěsô ne fě, fɛ́ wé ŋgâ pe ghú ne ye kpíí wé ndúŋú ŋgʉŋʉ.
Pɛ káŋató túŋɔ́ Yěsô
(Máá 15:16-20; Lúk 23:11; Zhâ 19:2-3)
27Pɛ káŋató ntsɛ́ssó pɛ ŋgɔ́menaʼ yɔ́ɔ́ Yěsô ŋgú ne ye ndzó ywoʼɔ́sábafiʼ yɛ́ á ntɔ́ʼ Piláto nɛ́. Ŋkɔŋɔ pɛ káŋató náá zhyɛ̂ wé ntɛ́ɛ́. 28Pɔ́b sɔ́d ndzwé pe, gbéé ndzwé fóó ye psǐpsî mbəb ye, 29ntswɔ́ mézhyɛ ne mwɔ́sɔb ndzɔ́ŋzɔ́ŋ sɔ́ tó ye, níŋi ntʉ́ʼ mbeʼe ndzó pwó ye yé maʼ, féd kweʼé mɔ́b síŋ ye, ntuŋɔ wé ntsɔ́ pwó ye ŋgâ: «Psi tsɛʼɛ wo nɔŋ, kɛ Fɔŋ pɛ Yúda!» 30Pɔ́b tswə́ ntə́ mbəb ye, kpéé ntʉʼ mbeʼe yɛ́ pwó ye, sába tó ye. 31Ŋkhoʼyɛ́ pɔ́b kɛ túŋɔ wé kaʼatɛ ŋkáŋ nɛ́, pɔ́b sɔ́d ndzwé fóó yɛ́, mbó gbéé ndáá ndzwé pé mbəb ye, ndɔ́ɔ́ wé ŋgú ne mkpǐne wé ndúŋú ŋgʉŋʉ.
Pe kpǐ Yěsô ndúŋú ŋgʉŋʉ
(Máá 15:21-32; Lúk 23:26-43; Zhâ 19:16-24)
32Ŋkhoʼyɛ́ pɛ káŋató kɛ tsé ntwɔ́ ne Yěsô ndzó mbɛ́lʉ́ŋ yéré nɛ́, pɔ́b zhʉ́ taʼ ŋɔŋ sirɛnə tíí ye pe Símo, pɔ́b zíʼɛ́ wé ŋgâ a kyɛ́ ŋgʉŋʉ Yěsô. 33Njʉ́ pɔ́b kɛ páŋa ndzó ywoʼ yɛ́ pe fú ne Gɔləgɔ́ta, kě tsi ye ne ntsó pɛ Yúda pɛ́ɛ́ ŋgâ ywoʼɔ́ Ghə́ʼɛtó, nɛ́ 34pɔ́b fɛ́ yoʼ feréme ne nsěnsé ŋgâ Yěsô nɔ́. A nzəʼ, ŋkiri ŋgâ a nɔ́ pó. 35Ŋkhoʼyɛ́ pɔ́b kɛ kpíí wé nɛ́, pɔ́b máʼ pɛ́d, ŋgób ndzwé pé, 36ntaʼ ywoʼ ŋgód, tsé mvibɛ wé. 37Pɔ́b kɛ ghú ndúŋú ŋgʉŋʉ, ndúŋú ntsɔ́ʼɔ́ tó Yěsô, ŋwɛ́ʼɛ ndúŋú taafrəre kpíí, no yɛ́ a kɛ zhyɛ́ ŋgâ pe kpíí wé nɛ́. Pɔ́b kɛ ŋweʼé ŋgâ: «Yɔŋ Yěsô, Fɔŋ pɛ Yúda.» 38Pe kɛ ke kpǐ gháŋagháŋ pépáá pfúŋɔ́ ye. Taʼ yé ne ndzáʼ pwó yé yé maʼ, cyó ne ndzáʼ pwó yé yé ŋkʉbi. 39Pɔŋ pɛ́ pɔ́b kɛ záʼa yóʼó nɛ́, tó wé mbó ntswə́ʼɛ tó yɔ́b, 40ntsɔ́ ŋgâ: «Éee... Yɔ̌ŋ wo wɛ́, wo ŋgâ wo sáʼá Ndámboʼmvé mbó ŋkúrɔ́ ne zhyémve pekyéd nɛ́! Ɔ́ŋɔ́, kpéé mbəb wo ne tómbəb wo, shʉ́yǐ ndúŋú ŋgʉŋʉ mbé yɛ́ wo Mɔ́ŋ Mboʼmve nɛ́!» 41Ghaŋákeʼekaŋ, ghəkód pwɛ pɛ ntsɛ́ssó ghaŋáshʉ́ kɛ ke ntúŋɔ wé pe néré, 42ntsɔ́ ŋgâ: «A kɛ kpéé pecyó pɔŋ! Mbó mbé kúʼɔ́ ne mkpěne mbəb ye ne tómbəb yé pɔɔ? Ŋgâ a Fɔŋ pɛ Issayɛ! A shʉyí nɛ́ ŋkhɔʼyɔ̂ŋ ndúŋú ŋgʉŋʉ, kɛ́ʼɛ́ ŋgâ ŋkɔʼtómbəb zhí, psi ke mbzyɛ́ wé. 43Ŋgâ a ntíí ndzɔʼ ye mbəb Mboʼmvé? Mboʼmvé kpéé wé nɛ́ ŋkhɔʼyɔ̂ŋ, mbé yɛ́ a kʉyě wé nɛ́. Ŋkyé ŋgâ á ntsɔ́ ŋgâ: “Mə Mɔ́ŋ Mboʼmve”.» 44Mbɛ pɛ səbntswee pɛ́ pe kɛ kpíí wɔ́b pfuŋ ye nɛ́, kɛ ke ntó wé pe néré.
Ŋkhoʼyɛ́ Yěsô kɛ pfó nɛ́
(Máá 15:33-39; Lúk 23:44-48; Zhâ 19:28-30)
45Tsúʼ kɛ siŋɛ́ ndzó ŋkɔŋɔ ywoʼ náá, ndzíyene ne ntʉŋménab kaʼatɛ mbáŋa ne nab kyéd. 46A kɛ pɛ njʉ́ ywɔ́ ŋkhoʼmvé yíkyéd kɛ tsé ŋkuʼɔ nɛ́, Yěsô ghéʼ ne tʉ̌ŋ ntsó ŋgâ: «Eli! Eli! Lama sabaktani!» Kě tsi ye ne ntsó pɛ Yúda pɛɛ ŋgâ: «Mboʼmvé ya! Mboʼmvé ya! Wo máʼ ya kaʼa ŋkyé kɔ́?» 47Pecyó pɔŋ, ndzɔ́ʼɔ́ pɔŋ pɛ pɔ́b kɛ pɛ yóʼó ntsé njʉ́ nɛ́, zóʼ néré ntsó ŋgâ: «A pe niŋ fú Elya!» 48Fǐme néré, cyó taʼ ŋɔŋ khí ndéé, ndɔ́ɔ́ cyó yɔ́b yɛ́ pe kɛ fû ne epɔ́nzhə#27:48 epɔ́nzhə A taʼ ywɔ́paʼ yɛ́, a fwɛ̌ epɔ́nzhə yɛ́ pé tɛŋɛ matelasə nuŋ nɛ́. nɛ́, ntsɔbɔ ndzɔ́ʼɔ́ yoʼcʉyǒme, ŋkurɔ́ ndúŋú tó mbeʼe, tyáŋa fɛ́ tswee ye ŋgâ a nɔ́. 49Pecyó gháá: «Nzɛ́ʼɛ́! Piŋi zhʉ́ mbé yɛ́ Elya ŋkʉ́yó kpéé wé nɛ́.» 50Ntsʉʼmbé, Yěsô pó ŋgeʼe ŋkʉ́rʉ́ ne tʉ̌ŋ, zhʉye ye twɔ́. 51Mbe néré, ndzwé kəkwéʼe yɛ́ pe kɛ cʉ, mbwɔ́ ywoʼɔ́ze núŋ nɛ́, sɛ́ɛ́, ndzíyene ntsó mbáŋa syé, twɔ́ pɛ́d pépáá. Tsetsáʼ vód, pɛ yɛ́d sáŋ, 52pɛ sye tsɔ́ʼ. Pɔŋ zááme pɛ, pɔ́b kɛ ghɛ̌ pfɔ́, mbé ŋgerɛ́ŋged siŋ Mboʼmve nɛ́, zhʉyɛ́ ne vó, 53ntwɔ́ ndzó pɛ sye. Ŋkhoʼyɛ́ Yěsô kɛ zhʉyɛ́ ne vó nɛ́, pɔ́b kuŋɔ Yerʉ́salɛm, mbɛ́lʉ́ŋ yáŋme, nyóʼ mbəb yɔ́b pwó pɔŋ zááme. 54A kɛ pɛ njʉ́ ywoʼ kɛ vod, pwɛ pecyó meno pɛ́ a kɛ záʼ nɛ́, ntsɛ́ssó mkpǐ káŋató pwɛ pɛ káŋató pɛ pú pɔ́b kɛ psibɛ Yěsô nɛ́, pɔ́ɔ́ kaʼatɛ, ntsó ŋgâ: «Kpaʼ sísíŋ, ŋɔŋ wɔŋ kɛ pé Mɔ́ŋ Mboʼmvé!»
Pe cʉ́ Yěsô
(Máá 15:40-47; Lúk 23:49-56; Zhâ 19:25; 19:38-42)
55Péŋgyé kɛ pɛ yóʼó zááme, ntsɛ́ taŋa sesɛ, ndiŋɛ́. Pɔ́b kɛ tsʉʼɔ́ ndzəb Yěsô, féré njʉ́ a kɛ pɛ́ ndzó pɛrɛ ŋgɔŋ Galílya nɛ́, mbó fáʼa pwó ye. 56A kɛ pɛ ndzɔ́ʼɔ́ pěŋgyé péré Malya wɛ́ a kɛ twɔ́ Madala nɛ́, Malya mɛ Zhakə pú Yesə́b, mbɛ mɛ pɔŋ Zebede, pɛ ndzɔ́ʼɔ́ pɔ́b. 57Fwɔ̌nab kúʼu, taʼ ŋgaŋafaʼ twɔ́ Arimate mbáŋ, tíí ye pé Yesə́b. A kɛ ke ŋkhú ye meŋkho Yěsô. 58A ghú pfúŋɔ́ Piláto mbziri pfɔ́ Yěsô. Piláto, psyɛ ŋgâ pe fɛ́ pwó yé 59A yɔ́ɔ́ pfɔ́ Yěsô mbuwɛ́ wé ndzó ndzwé fə́fó ye yáŋme ye tʉŋɔ ndɔŋ, 60nuŋɔ wé ndzó sye ffé yɛ́ a kɛ zhyɛ́ pé tsú ndzɔ́ʼɔ́ yɛ́d nɛ́, ŋgyɛ́ pé ŋkəŋí táá ŋgɔʼ kəkwéʼe nǎŋ ntswěsye nuŋ, ŋgú yé. 61Ŋgɛmbɛ, Malya wɛ́ a kɛ twɔ́ Madala nɛ́ pú cyó Malya pɛ́ yóʼó, ŋgód ndiŋɛ́ sye.
Pɛ káŋató psyéb sye
62Kêmvé, yɛ́ a kɛ zhʉ́bí zhyémve ntsúŋɔ mbəb ne zhyéze nɛ́, ntsɛ́ssó ghaŋáshʉ́ pwɛ pɛ Farízya ntəb kpee ŋgú yóʼó Piláto, 63ntsɔ́ pwó ye ŋgâ: «Ntsɛɛpɔŋ, tó zhí fú ŋgâ ŋgaŋambwɔ́ wɔŋ, ŋkhoʼyɛ́ a kɛ pe mɔ́b nɛ́, a ntsó ŋgâ: “Zhyémve pékyéd ndzáʼa, mə njʉyɛ́ ne vó”. 64Fɛ́ tʉ̌ŋ ŋgâ pé psyéb sye ye kaʼatɛ mbáŋ zhyémve pékyéd, kɛ́ʼɛ́ ŋgâ ŋgíŋgye pé ndɛ ŋkʉ́yó ndzwə́ə́ pfó ye, mbó ŋgu ntsɔ́ pwó pɔŋ ŋgâ a zhʉyɛ́ ne vó. Pɔ́b zhyɛ́ zhyɛ́ néré, mbǒ yéré no mbɔ́rɔ́ mbʉ́ʉ́ kaʼatɛ ntsɛ́ɛ́ sɔ́ ye.» 65Piláto tsɔ́ ne pɔ́b ŋgâ: «Puŋ zhʉ́? Puŋ tséʼé pɛ káŋató. Kɔʼɔ tó mbəb yúŋ, puŋ psyéb sye ye, njʉ́ puŋ zhʉ́, a kúʼɔ́ mbəb puŋ nɛ́.» 66Pɔ́b ghú, ndwɛ̌ fûŋ ntswee sye Yěsô ne yɛ́d, mbó níŋí máŋ ndúŋú, mbó ntíí pɛ mânaŋ yóʼó.
ទើបបានជ្រើសរើសហើយ៖
Matʉyo 27: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
