Matʉyo 26
26
Menaŋ mɛ́ pe kɛ nyí ŋkyé Yěsô nɛ́
(Máá 14:1-2; Lúk 22:1-2; Zhâ 11:47-49; 11:53)
1Ŋkhoʼyɛ́ Yěsô kɛ méé fɛ́ ntʉ́ʉ́ péré nɛ́, a ntsɔ́ pwó ŋgíŋgye pé ŋgâ: «Puŋ zé ŋgâ a tsʉ́ʼ zhyémve pépáá ndebéne Pasəka páŋ. 2Pe fí Mɔ́ŋ ŋɔŋ ŋgâ pe kpíí wé ndúŋú ŋgʉŋʉ.» 3A kɛ pé néré, pɛ ntsɛ́ssó ghaŋáshʉ́ pwɛ ghəkód ntérɛ ntɔ́ʼ tɛdshʉ́ kəkwéʼe wɛ́ tíí ye kɛ pe Kayifə nɛ́. 4Pɔ́b tséʼé taʼ ntswee njʉ́ pɔ́b ŋgyɛ́ ŋgɔ́b gbâ Yěsô, nɔ́ʼɔ wé nɛ́. 5Mbɛ njʉ́ pɔ́b kɛ tíí néré nɛ́, pɔ́b tsɔ́ tsetsɛrɛ pɔ́b ŋgâ: «A tsé mbé zɔŋɔ ŋgâ a pɛ́ ndzɔ́ʼɔ́ ndebéne pó, kɛ́ʼɛ́ ŋgâ vaʼ ndɛ mvɔ́ ndzɔ́ʼɔ́ pɔŋ.»
Taʼ Məŋgʉ́yé núʼ vód tswɔtwɔ́ tó Yěsô
(Máá 14:3-9; Zhâ 12:1-8)
6Njʉ́ Yěsô kɛ pɛ Betáni, ndáb Símo wɛ́ kəkóó kɛ pɛ mbəb naʼ myé nɛ́, 7taʼ Məŋgʉ́yé suʼú mbəb fɛ́ pfúŋɔ́ yé, ne taʼ tɔ́ʼ vód tswɔtwɔ́ ye tʉŋɔndɔŋ, ndzó ncʉ́ŋ fə́fó, ntsɔʼ ntswee ye, nuʼɔ tó Yěsô ŋkhoʼyɛ́ a kɛ ghɔ́rɔ́ ne ndzóne mɔ́b nɛ́. 8Ŋgíŋgye pé zhʉ́ néré, ndzúʼu ŋgyé, ntsɔ́ tsetsɛrɛ pɔ́b ŋgâ: «Yɔŋ psyé pɛ́ɛ́ ye kɔ́? 9A ghɛ̂ tɛɛmbɛ pe fí ne tsʉʼɔŋɔndɔŋ, fɛ́ mbób pwó pɛ mbɔ́ŋmbɔŋ.» 10Ŋkhoʼyɛ́ Yěsô kɛ zǐ kpaŋató yɔ́b nɛ́, a tsɔ́ ne pɔ́b ŋgâ: «Puŋ záá Məŋgʉ́yé wé ké nɛ́ ne ŋgəʼo ŋkyé kɔ́? No yɛ́ a ŋǎ zhyɛ́ zhyɛ́ mbəb mo nɛ́, ndáá no sʉ́ʼʉ. 11A ké mbɛ puŋɛ mbɔ́ŋmbɔŋ ŋkɔŋɔ ŋkhoʼ náá. Ntsʉʼŋgɛmbɛ ne mo, á ké mbé pɛ́ piŋi ŋkɔŋɔ ŋkhoʼ náá pó. 12A núʼ vód tswɔtwɔ́ mbəb mo kɛ́ʼɛ́, tsuŋɔ cʉ̂ne máá. 13Kpaʼ sísíŋ, mə səŋɛ wuŋ ŋgâ, ŋkɔŋɔ ywoʼ yɛ́ pe ŋkʉ́yó cʉ́rɛ Ŋkəŋ sʉ́ʼʉ ndzó pɛ mbǎʼmvé náá nɛ́, pé náʼá ké ntsɔ́ no yɛ́ Məŋgʉ́yé wɔŋ ŋǎ ne ŋgyɛ̌ne nɛ́ ntsó, ndɔ̂ kpáŋa tíí ye núŋ.»
Yúda zɔŋɔ fí Yěsô pwó ntsɛ́ssó ghaŋáshʉ́
(Máá 14:10-11; Lúk 23:3-6)
14Néré, cyó ŋɔŋ ndzɔ́ʼɔ́ ŋgíŋgye Yěsô tsɔ̌bpáá, wɛ́ pe kɛ fú wé ne Yúda Iskaryotə nɛ́, ŋáá ŋgú njʉ́ pɛ ntsɛ́ssó ghaŋáshʉ́, 15mbzírɛ́ wɔ́b ŋgâ: «Puŋ fɛ́ɛ́ kɔ́ ne mo, mə fí wé ne puŋ?» Pɔ́b tíí ŋgâ pɔ́b fɛ́ mbób pwó ye ghúbmekyéd. 16Ndzyěne néré, Yúda taʼa ndáá ŋkhoʼ sʉ́ʼʉ yɛ́ a ndâ ndúŋú fɛ́ Yěsô ne pɔ́b nɛ́.
Yěsô zhyɛ́ pé ntsúŋu mɔ́b Pasəka
(Máá 14:12-16; Lúk 22:7-13)
17A kɛ pe sɔ́ zhyémve ndebéne yɛ́ pé fú ne ndebéne mbré kii mvuʼ nɛ́, ŋgíŋgye Yěsô psirɛ́ wé ŋgâ: «Wo zɔŋɔ ŋgâ psi ghú pɛ́ɛ́ tsúŋu mwɔ̌zó Pasəka pwó wo?» 18A pɔ́rɔ́ ne pɔ́b ŋgâ: «Puŋ ghú mbɛ́lʉ́ŋ, yóʼó taʼ ŋɔŋ ntsɔ́ pwó ye ŋgâ: “Kéʼeyáŋ ywí gháá: yáá ŋkhoʼ tsé ŋkuʼɔ́! Mə ndebɛ ndebéne Pasəka pe ywoʼ wo, psyɛ ŋgíŋgye páá”.» 19ŋgíŋgye ke ŋgyɛ́ njʉ́ Yěsô kɛ ntsɔ́ ne pɔ́b nɛ́, ntsuŋu mɔ́b Pasəka.
Yěsô keʼetsi sɔbɔ ŋgʉ́ʉ́ fûŋ
(Máá 14:17-21; Lúk 22:14; Zhâ 13:21-30)
20A kɛ pé ne fwɔ̌nab, Yěsô pwɛ ŋgíŋgye pé tsɔ̌bpáá ghɔ́rɔ́ ne ndzône mɔ́b. 21Ŋkhoʼyɛ́ pɔ́b kɛ zɔ̂ mɔ́b nɛ́, a tsɔ́ ne pɔ́b ŋgâ: «Kpaʼ sísíŋ mə səŋɛ wúŋ ŋgâ taʼ ŋɔŋ ndzɔ́ʼɔ́ puŋ fí yá.» 22Pɔ́b tsuŋí kaʼatɛ, Mbɛwɔ̂ zyáŋa mbəb ye, ntsɔ́ ŋgâ: «Ntsɛɛpɔŋ, a zhʉ́ʼ mbé pé mo pɔɔ?» 23A pód ŋgâ: «Ŋɔŋ wɛ́ psi ye zɔ̂ mɔ́b ndzó taʼ káŋ nɛ́, a fi ye fí yá. 24Mɔ́ŋ Ŋɔŋ nsé nɛ́ pe mɛndɔ́b njʉ́ a ŋweʼéme ndzó Ŋweʼe yáŋme ŋkyé wé nɛ́. Ntsʉʼmbé ndɔŋ tó ŋɔŋ wɛ́ pe ndzáʼa mbəb ye fí Mɔ́ŋ ŋɔŋ nɛ́! A pú yɛ́ pe kɛ ghɛ̌ ndzye mbé pfɛ́ wé nɛ́ pó!» 25Yúda wɛ́ a kɛ ghɛ́ fí wé nɛ́, yɔ́ɔ́ ntsó mbzírɛ́ wé ŋgâ: «A kɛ́ʼɛ́ mbé mo, Kéʼeyáŋ?» A pɔ́rɔ́ pwó ye ŋgâ: «Ŋgâ wo tsɔ́ nɛ́!»
Mbziʼe yɛ́ Yěsô kɛ nuŋú ntɛ́d nɛ́
(Máá 14:22-25; Lúk 22:15-20; 1Ko 11:23-26)
26Ŋkhoʼyɛ́ pɔ́b kɛ zɔ̂ mɔ́b nɛ́, Yěsô yɔ̌ mbré. Níŋí mbúru ndúŋú. Poʼ fɛ́ pwó ŋgíŋgye pé, ntsó ŋgâ: «Puŋ mkpě mfód, yɔŋ ndzáb mbəb ya.» 27Ke mbó ndɔ̂ ndɔ́ŋ yoʼ. Fɛ tséʼé pwó Mboʼmve, fɛ́ pwó ŋgíŋgye pé, ntsó ŋgâ: «Puŋ nɔ́ ŋkɔŋɔ wúŋ náá, 28ŋkyé ŋgâ yɔŋ nsə máá, nsə kaŋ yɛ́ a mvérɛ́ ndúŋú tó pɔŋ zááme nɛ́, ne mǎʼne kəpɔŋ wɔ́b. 29Mə səŋɛ wúŋ ŋgâ, ndzyěne ŋkhoʼyɔŋ, mə mbó naʼ nɔ́ yoʼ ŋkʉ́rʉ́ pó, kaʼatɛ mbáŋ zhyémve yɛ́ mə náʼá nɔ́, ŋgɛmbɛ a pɛ́ɛ́ ye ffé, piŋi pɛ́ ndzó Nofɔŋ Tɛd ya nɛ́.»
Pětro ŋkʉ́yó sirɛ́ Yěsô
(Máá 14:26-31; Lúk 22:33-34; 22:39; Zhâ 13:37-38)
30Ŋkhoʼyɛ́ Yěsô pwɛ ŋgíŋgye pe kɛ mě zɔbɔ́ nse yɛ́ a twɔ́ ndzó ŋweʼe zɔbɔ́ nse nɛ́, pɔ́b kɔʼɔ ndúŋú ŋkə́ŋ Nsó vód Oliivə. 31Néré, Yěsô tsɔ́ ne pɔ́b ŋgâ: «Kpaʼ netsúʼ wɔŋ, ŋkɔŋɔ wuŋ náá mvɔ́ ŋkyé ya. Ŋkye ŋgâ, pe fû ndzó poʼ Ŋweʼe yáŋme ŋgâ: “Mə náʼá nɔ́ʼɔ́ mvyébkɛd, njʉyǐnjʉyî pé gbáʼ.” 32Ntsʉʼmbe mə mbé tɛ́ njʉyɛ́ ne vó, ndɔrɔ́ wúŋ Galílya.» 33Pětro yɔ́ɔ́ ntsó, ntsɔ́ pwó Yěsô ŋgâ: «Mbɛ Mbéyɛ́ ŋkɔŋɔ pɔŋ náá mvɔ́ ŋkyé wo nɛ́, cyó zhyémve yɛ́ mə náʼá mvɔ́ ya ŋkyé wo nɛ́, ghú pó.» 34Yěsô pɔrɔ́ pwó ye ŋgâ: «Kpaʼ sísíŋ mə sɔ́ŋɔ́ wo ŋgâ, mbɛ netsúʼ wɔŋ, ŋkhoʼ ŋgɛ ntú, wo sírí ya ŋkɛ́ɛ́ yíkyéd.» 35Pětro tsɔ́ pwó ye ŋgâ: «A pɛ́ɛ́ yɛ́ a tsyɛ́ ŋgâ paʼa pfó nɛ́, ŋgaŋ! Mbǒ mə sírí wo pó.» Ŋkɔŋɔ ŋgíŋgye Yěsô kpaʼ ke ntsɔ́ɔ́ néré náá.
Yěsô tsɛ́ʼɛ́ Mboʼmve Getsemani
(Máá 14:32-42; Lúk 22:40-46)
36Yěsô pwɛ ŋgíŋgye pé páŋa ndzó taʼ ywoʼ yɛ́ pé kɛ fú ne Getsemani nɛ́, á tsɔ́ ne pɔ́b ŋgâ: «Puŋ ghɔ́rɔ́ ghaŋ, mə ŋgɛ́ ŋgú ghíŋ ntsɛ́ʼɛ́ Mboʼmvé.» 37A yɔ́ɔ́ Pětro pwɛ pɔŋ Zebede pépáá. Ŋkhoʼyɛ́ pɔ́b kɛ tsé ŋgú nɛ́, pépáá ye zyé sáŋne wé, ndzɔʼ ye gbî. 38A tsɔ́ ne pɔ́b ŋgâ: «Ménee ya tse ntsuŋɛ kaʼatɛ mbɛ́ɛ́ njʉ́ tɛ mbɛ ntsuŋíne méré zhyɛ́ mə pfó nɛ́. Puŋ ghɔ́rɔ́ ghaŋ, piŋi yaʼ sáŋ.» 39A náʼá suʼú mbəb ye, ŋkúbú záŋ ye syé, ntsɛ́ʼɛ́ Mboʼmvé ntsó ŋgâ: «Tɛd ya, mbé yɛ́ tɛɛmbɛ a pé néré nɛ́, wo suʼú yɔŋ ndɔŋ ŋgəʼo pfúŋɔ́ mo. Ntsʉʼmbé, ndɛ ŋgyɛ́ njʉ́ mə kʉ́yé nɛ́, zhyɛ̌ yɛ́ kɔʼɔ tómbəb wo, wo kʉyě nɛ́.» 40Yěsô pód ndzəb pfúŋɔ́ ŋgíŋgye pé, njʉ́ wɔ́b pɔ́b zhyé zhyé. A ntsɔ́ pwó Pětro ŋgâ: «Kɛ́ʼɛ́, puŋ zyé mbé tséʼé tʉŋ ŋgâ piŋi yáʼ sáŋ, mbɛ́ ne taʼ ŋkhoʼmvé pɔɔ? 41Puŋ yáʼ sáŋ, ntsɛ́ʼɛ́ Mboʼmvé, kɛ́ʼɛ́ ŋgâ kpeʼe ndɛ ntsɛ́ɛ́ wúŋ. Ndzɔʼ yuŋ tsé nɛ́ ndzɔŋɔ ŋgyɛ́ no sʉ́ʼʉ kaʼatɛ, ntsʉʼmbé mbəb yuŋ pé psyɛ́ pó.» 42A ké mbó suʼú mbəb ye ne mbɛ́rɛ́ yípáá pfúŋɔ́ ŋgíŋgye pé, ntsɛ́ʼɛ́ Mboʼmvé, ntsó ŋgâ: «Tɛd ya, a ghɛ́ tɛɛmbɛ yɔŋ ndɔŋ ŋgəʼo záʼ kii mə nɔ́! Ntsʉʼmbé, ké ŋgyɛ́ ndaʼ yɔ́b yɛ́ wo kʉyě nɛ́.» 43Yěsô pód ndzəb ŋkʉ́rʉ́ pfúŋɔ́ ŋgíŋgye pé pekyéd, njʉ́ wɔ́b pɔ́b zhyé zhyé ŋkyé ŋgâ a kɛ ghɛ́mbɛ yɔ́ɔ́ gháʼmbwo mɔ́b. 44A ke mbó ntéé wɔ́b, mbó suʼú mbəb ye, ntsɛ́ʼɛ́ Mboʼmvé ŋkʉ́rʉ́ ne zhʉbɛ́ yíkyéd, ŋgɛmbɛ ke mbziʼɛ́ tséʼé yɛ́ a ghɛmbɛ a kɛ pě ntséʼé nɛ́. 45Ŋkhoʼyɛ́ a kɛ mee nɛ́, a pód ndzəb pfúŋɔ́ ŋgíŋgye pé, ntsɔ́ ne pɔ́b ŋgâ: «Puŋ kɛ zhyé? Puŋ ke ŋgyé zhyé sʉ́ʼʉ, fúrɔ́ mbəb yuŋ! Ŋkhoʼyɛ́ pe fí Mɔ́ŋ ŋɔŋ pwó pukəpɔŋ nɛ́, tsé ŋkuʼɔ́. 46Puŋ ŋáá syé, piŋi ghú. Ŋɔŋ wɛ́ a fí ya nɛ́ kɛ páŋ.»
Pe gbáá Yěsô
(Máá 14:43-52; Lúk 22:47-53; Zhâ 18:2-11)
47Ŋkhoʼyɛ́ Yěsô kɛ tsɔ́ néré nɛ́, Yúda wɛ́ a kɛ pɛ́ ndzɔʼ ŋgíŋgye Yěsô tsɔ̌bpáá nɛ́, páŋ pwɛ pɔŋ zááme, ŋgɛmbɛ pɔ́b tséʼé pɛ káfáá pwɛ kʉ́yé. A kɛ twɔ́ pɛ ntsɛ́ssó ghaŋáshʉ́ pwɛ ghəkód ntwɔ́ wɔ́b. 48A kɛ ghɛmbɛ Yúda wéré, ŋɔŋ wɛ́ a kɛ ghɛ̌ fi wé nɛ́, tebé kiŋi yɛ́ a ŋgyɛ́ nɛ́. A kɛ tsɔ́ ne pɔ́b ŋgâ: «Ŋɔŋ wɛ́ mə ŋkô wé nɛ́, a yé, puŋ gbáá wé.» 49Fǐme wɛ́ pɔ́b kɛ paŋ nɛ́, Yúda suʼú mbəb mbɛ́rɛ́ Yěsô, ntsɛ́ʼɛ́ wé ŋgâ: «Kéʼeyáŋ, mə ntsɛʼɛ nɔŋ!» Nkô wé. 50Yěsô tsɔ́ pwó ye ŋgâ: «Sɔŋ ya! Fáʼ faʼ yo yɛ́ wo kʉ́yó faʼa faʼa nɛ́!» Pɔ́b máʼ mbwó mɔ́b gbáá Yěsô. 51Cyó taʼ ŋɔŋ ndzɔʼ ŋgíŋgye Yěsô, ntúbú káfáá yé, gbíí ŋgaŋafaʼ tɛdshʉ́ kəkwéʼe, ntséé ntəŋé. 52Néré, Yěsô tsɔ́ pwó ye ŋgâ: «Níŋí káfáá yo ndzó mbáŋ ye! ŋkyé ŋgâ pɔŋ pɛ pɔ́b nɔʼɔ ne káfáá nɛ́, a ŋkʉ́yó ke nɔʼɔ káfáá nɔʼɔ wɔ́b. 53Wo zhí ŋgâ tɛɛmbɛ mə mbó máʼ ntswee pwó Tɛd, kpaʼ ŋkhoʼyéré, a fɛ́ pɛ aŋgere ne mo, kaʼatɛ a záʼ kɛd#26:53 Taʼ kɛd tséʼé ywɔ́ ŋkáb káŋató yitóó kɛ́ʼɛ́. ntsɔ̌bpáá pɔɔ? 54A pɛɛ pé néré, mbǒ pɛ meno pɛ́ a ŋweʼéme ndzó ŋweʼe yáŋme nɛ́ ŋgâ a ndzáʼa kaʼa nɛ́, ŋgyɛ́ níŋ ndúŋɔ?» 55A kɛ pɛ́ ne yéré ŋkhoʼmvé, Yěsô ntsɔ́ pwó mvuʼ pɔŋ ŋgâ: «Puŋ kʉ́yó ne gbǎne ya ne pɛ káfáá pwɛ pɛ kʉ́yé njʉ́ mə mbɛ səbntswee nɛ́? Piŋi mbɛ́ ŋkɔŋɔ zhyémve náá Ndámboʼmvé, mə fɛ́ ntʉ́ʉ́ ne puŋ, puŋ pe gbaa ya pó! 56Ntsʉʼmbé, ŋkɔŋɔ ye yɔŋ náá paŋ kɛ́ʼɛ́ ŋgâ tó no yɛ́ ghaŋátsɔ́kpaŋató Mboʼmvé kɛ ŋweʼe nɛ́, yúŋú.» Néré, ŋkɔŋɔ ŋgíŋgye pé khí yɔ́b náá, ntéé wé.
Yěsô síŋ ghaŋásábáfiʼ kəkwéʼe pɛ Yúda
(Máá 14:53-65; Lúk 22:54-55; 22:63-71; Zhâ 18:12-18)
57Pɔŋ pɛ́ pɔ́b kɛ gbáá Yěsô nɛ́, ghú ne ye yóʼó tɛdshʉ́ kəkwéʼe, wɛ́ tíí ye kɛ pe Kayifə nɛ́. A kɛ ghɛmbɛ ghaŋákeʼekaŋ pwɛ ghəkód tɛ́rɛ yóʼó. 58A kɛ ghɛmbɛ néré, Pětro nyí ndzəb ye taŋa sesɛ kaʼatɛ mbáŋa ntɔ́ʼ tɛdshʉ́ kəkwéʼe, ŋkuŋɔ ndáb ŋgód pwɛ ŋgaŋafaʼ ywoʼ yéré ne njʉ̌ne mbziʼe njʉ́ tó ye mbáŋa nɛ́. 59A kɛ pe néré, pɛ ntsɛ́ssó ghaŋáshʉ́ pwɛ ŋkɔŋɔ ghaŋásábáfiʼ kəkwéʼe pɛ Yúda náá, taʼa ŋɔŋ wɛ́ a kɛ ghɛ̌ ntíí paŋ tó Yěsô, pɔ́b yáá ndúŋú fúŋɔ́ wé, pe nɔʼ nɛ́. 60Ntsʉʼmbé, mbe zhʉ́ pó, mbɛ njʉ́ ghaŋátíí paŋ kɛ gháʼmbwo nɛ́. Tó ye ghɛ́ mbáŋa, pecyó pépáá kʉ́yó, 61ntsó ŋgâ: «Ŋɔŋ wɔŋ gháá: “Tɛɛmbɛ mə nyʉʼi Ndámboʼmvé, a ghɛmbɛ zhyémve pekyéd, mə mbó ŋkwód.”» 62Tɛdshʉ́ kəkwéʼe ŋáá syé mbzírɛ́ Yěsô ŋgâ: «Wo tséʼé no ne mbǒdne pɔɔ? Pɔŋ pɔŋ sɔ́b wo kaʼa pé ne no kɔ́?» 63Ntsʉʼmbé Yěsô pe pód no pó! Tɛdshʉ́ kəkwéʼe tsɔ́ pwó ye ŋgâ: «Mə sə́b ne tíí Mboʼmvé ŋeŋáŋ! Sɔ́ŋɔ́ ywí, a wo mbé Kristo, Mɔ́ŋ Mboʼmve?» 64Yěsô pɔ́rɔ́ pwó ye ŋgâ: «Ŋgâ wo tsɔ̂ nɛ́! Ndaʼ ŋgâ mə səŋɛ wúŋ nɛ́! Ndzyěne ŋkhɔʼyɔ̂ŋ, puŋ njʉ́ Mɔ́ŋ ŋɔŋ ghɔ́rɔ́ ne ndzáʼ pwó Mboʼmve Fɔŋ metʉŋ ye maʼ, ké mbó ŋkʉ́yó njʉ́ wé a kʉ́yó ndzɔ́ʼɔ́ pfuŋ pépéé.» 65A kɛ pe néré, tɛdshʉ́ kəkwéʼe sɛ́ɛ́ ndzwé pé, ntsó ŋgâ: «A tó Mboʼmve. Ghaŋákpééntáŋ tséʼé ghebe ne piŋi ŋkʉ́rʉ́ pó! Puŋ zóʼó njʉ́ a too Mboʼmve nɛ́. 66Puŋ zhʉ́ yuŋ pe níŋ?» Pɔ́b pód ŋgâ: «A ke tsyɛ́ ŋgâ pe nɔ́ʼɔ́ wé.» 67Néré, pɔ́b tswə́ ntə́ ndúŋú záŋ ye, mbó gbíí wé, pecyó gbíí pɛ shʉ́ ndzó ntəŋé mé. 68A kɛ pe néré, pɔ́b ntsɔ́ pwó ye ŋgâ: «Wo, Kristo! Wo gháá wo ŋgaŋatsɔ́kpaŋató Mboʼmvé, səŋɛ ywí ne ŋɔŋ wɛ́ a gbíí wo nɛ́.»
Pětro sirɛ́ Yěsô
(Máá 14:66-72; Lúk 22:56-62; Zhâ 18:17; 18:25-27)
69A kɛ ghɛmbɛ Pětro ghɔ́rɔ́ mvé syémasǎ. Taʼ ŋgaŋafaʼ Məŋgʉ́yé suʼú mbəb ye mbɛ́rɛ́ wé, ntsɔ́ pwó ye ŋgâ: «Kpaʼ tó mbəb yo, a mbɛ puŋ Yěsô ŋɔŋ Galílya!» 70Ntsʉʼmbé, a sirɛ́ síŋ ŋkɔŋɔ pɔŋ náá, ŋgâ: «Mə ndzɛ́ no yɛ́ wo zɔŋɔ ntsɔ́ nɛ́ pó.» 71Ŋkhoʼyɛ́ a kɛ tsé ŋgú pfúŋɔ́ ntswěkaŋ nɛ́, cyó taʼ ŋgaŋafaʼ pó njʉ́ wé, ntsɔ́ pwó pɔŋ pɛ pɔ́b kɛ pɛ yóʼó nɛ́ ŋgâ: «Ŋɔŋ wɔŋ mbɛ pú Yěsô, ŋɔŋ Nǎzarɛd.» 72A ké mbó sírí ŋkʉ́rʉ́, kaʼatɛ sə́b ntsó ŋgâ: «Mə ndzɛ́ ŋɔŋ wɔŋ pó.» 73Mɔ́ŋtiʼa ŋkhoʼ ghɛ́ ndzáʼa, pɔŋ pɛ́ pɔ́b kɛ pɛ́ yóʼó nɛ́, suʼú mbəb yɔ́b ŋkʉ́yó pfúŋɔ́ Pětro, ntsɔ́ pwó ye ŋgâ: «A sísíŋ, kpaʼ wo yo, wo ŋukpee wɔ́b! Mbziʼe ntsɔ́ no yo kee tsi wo.» 74Néré, Pětro seb kaʼatɛ ndɔ́ʼ ŋgâ: «Mə ndzɛ́ ŋɔŋ wékénɛ́ puŋ tsɔ́ kɛ́ʼɛ́ nɛ́ pó yɛ́!» Fǐme nɛ́, ŋkhoʼ tú. 75Tó Pětro fú ne no yɛ́ Yěsô kɛ tsɔ́ pwó ye nɛ́, ŋgâ: «Ŋkhoʼ ŋgɛ ntú, wo siri ya ŋkɛ́ɛ́ yíkyéd.» Pětro twɔ́, ŋkhó kaʼatɛ.
ទើបបានជ្រើសរើសហើយ៖
Matʉyo 26: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
