Matʉyo 21
21
Yěsô kuŋɔ Yerʉ́salɛm
(Máá 11:1-11; Lúk 19:28-40; Zhâ 12:12-16)
1Njʉ́ Yěsô pwɛ ŋgíŋgye pé kɛ nyi kaʼatɛ tsé mbáŋa ndzó mbɛ́lʉ́ŋ Yerʉ́salɛm, pfúŋɔ́ Bɛfazhe, pfúŋɔ́ ŋkə́ŋ yɛ́ pe fú ne ŋkə́ŋ Nsó vód Oliivə nɛ́, a twɔ́ ŋgíŋgye pé pépáá. 2Ntsɔ́ ne pɔ́b ŋgâ: «Puŋ ghú ndzó yaʼ yɛ́ a síŋ puŋ nɛ́. Puŋ páŋa yóʼó njʉ́ ŋkíŋ Məŋgʉ́yé cʉ̌me pu Mɔ́ŋ ye pfuŋ ye. Puŋ kéé wɔ́b ŋkʉ́yó nuŋ fɛ́ ne mo. 3Á pɛ́ɛ́ yɛ́ ŋɔŋ tsɔ́ no ne puŋ nɛ́, puŋ pɔ́rɔ́ pwó yé ŋgâ: “Ntsɛɛpɔŋ tsé ndzɔŋɔ.” Mbǒ a ke ntéé néré puŋ ghú ne wɔ́b.» 4Yekénɛ́ no páŋ kɛ́ʼɛ́ ŋgâ tó no yɛ́ ghaŋátsɔ́kpaŋató Mboʼmvé kɛ ntsó nɛ́ yúŋú. No yéré pɛ́ɛ́ ŋgâ: 5«Puŋ ntsɔ́ pwó Mɔ́ŋ Məŋgʉ́yé wɛ́ a ndúŋú ŋkəŋ Syɔŋ nɛ́, ŋgâ: “Zhʉ́, fɔŋ wo kʉ́yó nɛ́ pfuŋ wo, fɛ́ mbəb ye syé mbó ŋkɔ́ʼɔ́ ndúŋú ŋkíŋ Məŋgʉ́yé pú Mɔ́ŋ ye. Mɔ́ŋtii ywɔ́paʼ yɛ́ a kyɛ́ mɔ́b nɛ́.”» 6ŋgíŋgye pé ghú, njʉ́ Yěsô kɛ tsɔ́ ne pɔ́b nɛ́, 7ndɔ́ɔ́ ŋkíŋ Məŋgʉ́yé pú Mɔ́ŋ ye ŋkʉ́yó núŋ. Mbó sɔ́d ndzwé fóó pɔ́b, ndě mbəb ŋkíŋ, Yěsô kɔʼ ŋgɔ́rɔ́ ndúŋú. 8Mbziʼe njʉ́ Yěsô kɛ nyí nɛ́, pɔŋ ké ndě ndzwé fóó pɔ́b pé néré mɛndɔ́b, a nyi ndúŋú. Pecyó pɔŋ fâ pɛ mbwónsó fwó ndě mɛndɔ́b. 9Pɔŋ pɛ́ pɔ́b kɛ nyi síŋ ye pwɛ pɛ́ pɔ́b kɛ zɔŋɔ wé nɛ́, ghéʼe ŋgâ: «Ozana pɛ́ pwó Mɔ́ŋ fɔŋ Ndavíd! Mbúru pɛ pwó ŋɔŋ wɛ́ a kʉ́yó ne tíí Ntsɛɛpɔŋ nɛ́! Ozana#21:9 Ozana A taʼ ndii ntsó ne ntsó pɛ Ebərə yɛ́ a kéétsi yé pɛ́ɛ́ ŋgâ: ŋgúʼune kii ŋgâ ghɛ́ɛ́ nɛ́. pɛ́ pwó Mboʼmve wɛ́ a kpaʼ pépéé nɛ́!» 10Ŋkhoʼyɛ́ Yěsô kɛ ŋkuŋɔ Yerʉ́salɛm nɛ́, ŋkɔŋɔ mbɛ́lʉ́ŋ náá nyʉ́. Pe pfirɛ ŋgâ: «A kaʼa mbé wɔ̌?» 11Pɔŋ pɔ́rɔ́ ŋgâ: «A Yěsô, ŋgaŋatsɔ́kpaŋató Mboʼmvé, Mɔ́ŋ ŋɔŋ Nǎzarɛd ndzó pɛrɛ́ ŋgɔŋ Galílya.»
Yěsô zû ghaŋapɛʼɛ́táŋ Ndáb Mboʼmvé
(Máá 11:15-19; Lúk 19:45-48; Zhâ 2:13-16)
12Ŋkhoʼyɛ́ Yěsô kɛ kúŋɔ́ mbɛ́lʉ́ŋ nɛ́, a ghú Ndámboʼmvé, ndzú ŋkɔŋɔ pɔŋ pɛ́ pɔ́b kɛ fí mɔ́b náá nɛ́, pwɛ pɛ́ pɔ́b kɛ zúŋɔ nɛ́. Séd téépere ghaŋásɛ́rɛ mbób ne pɛywʉŋ ghaŋáfí péshʉŋ, ŋkubɔ́ syé, 13ntsɔ́ ne pɔ́b ŋgâ: «A ŋweʼéme ndzó ŋweʼe yáŋme ŋgâ: “Mo Mboʼmve, pe ŋkʉ́yó fú ndáb ya pe ne ndáb tsɛʼɛ́mboʼmvé.” Ntsʉʼmbé puŋ pó sed a cʉ́ʼɔ́ ywoʼ zhibɛ gháŋagháŋ!» 14Pɛ ffǒme pwɛ pɛ ŋkʉŋi suʼú mbəb yɔ́b fɛ́ pfuŋ ye Ndámboʼmvé, a pɛ́d ghɔŋ yɔ́b. 15Ŋkhoʼyɛ́ ntsɛ́ssó ghaŋáshʉ́ pwɛ pɛ ghaŋákeʼekaŋ kɛ́ zhʉ́ pɛ́ shʉrɛ́no pɛ́ a kɛ ŋǎ zhyɛ́ zhyɛ́ nɛ́, pwɛ pɔ́ŋ pɛ́ pɔ́b kɛ ghéʼe Ndámboʼmvé ŋgâ: «Ozana pwó Mɔ́ŋ fɔŋ Ndavíd!» nɛ́, pɔ́b zúʼú ŋgyé 16ntsɔ́ pwó ye ŋgâ: «Wo tsé ndzóʼó no yɛ́ pɔ́b tsɔ́ kɛ́ʼɛ́ nɛ́?» Ntsʉʼmbé Yěsô tsɔ́ ne pɔ́b ŋgâ: «Ɔ́ŋɔ́, puŋ kaa kɛ fú ndzó ŋweʼe yáŋme, ywoʼ yɔŋ yɛ́ a tsɔ́ ŋgâ: “Wo tsuŋú nse ŋguʼune ne tíí wo, ŋgɛmbɛ ndzáʼa ndzó ntswee pɛ Mɔ́ŋ pwɛ pɔ́ŋmbɔ́d ŋgâ pɔ́b zɔ́b” nɛ́ pɔɔ?» 17Néré a tíí wɔ́b yóʼó njʉ́ pɛ púbɔ́ ŋkáŋá nɛ́, ntwɔ́ mbɛ́lʉ́ŋ ne ŋgúne Betáni ŋkyé ŋgâ a ywoʼ yɛ́ a kɛ ghɛ̌ ndáʼá nɛ́.
Yěsô niŋi ndɔŋ tó tsí figye
(Máá 11:12-14; 11:20-25)
18Njʉ́ Yěsô kɛ pɔ́rɔ́ ndzəb ndzó mbɛ́lʉ́ŋ Yerʉ́salɛm ne fʉ́ʉ́wáá nɛ́, ndzye tsé ndzí wé. 19A zhʉ́ taʼ tsi figye ne gháá mɛndɔ́b, suʼú mbəb ye fɛ́ yóʼó, ntsʉʼmbé a pe zhʉ́ yɔ́b ndúŋú, fáá fwo pé pó. A tsɔ́ pwó ye ŋgâ: «Wo náʼá mbó zwɔ́ ntáá ŋkʉ́rʉ́ po!» Kpaʼ ŋkhoʼyéré, tsí figye zwɔ́. 20Ŋkhoʼyɛ́ ŋgíŋgye pé kɛ zhʉ́ yéré no nɛ́, tó yɔ́b vaʼ, pɔ́b ntsɔ́ ŋgâ: «A pɛ́ɛ́ níŋ, kpaʼ ŋkhoʼyéré, tsi figye ke ndzwɔ́ néré?» 21Yěsô pɔ́rɔ́ ne pɔ́b ŋgâ: «Kpaʼ sísíŋ, mə səŋɛ wúŋ ŋgâ, a pɛ́ɛ́ taʼ zhyémve puŋ tséʼé psyɛ́ndzɔʼ kii tsé ndzɛɛ, mbǒ puŋ ke mbé zhyɛ́ ndáá no yɛ́ mə ŋǎ zhyɛ́ zhyɛ́ ndúŋú tsi figye yɔŋ nɛ́ pó, mbǒ mbɛ Mbéyɛ́ puŋ tsɔ́ pwó ŋkə́ŋ səsɛ yɔŋ ŋgâ: “Ŋǎ ndzó ywoʼ yekénɛ́, ŋgú mvɔ nse nɛ́”, mbǒ a ke mbɛ́ɛ́ néré. 22Ŋkɔŋɔ yɔ́b yɛ́ puŋ pfirɛ ndzɔ́ʼɔ́ tsɛʼɛ́mboʼmvé ne psyɛ́ndzɔʼ náá nɛ́, puŋ ŋkʉ́yó ntsɛ́ʼɛ́.»
Tʉ̌ŋ Yěsô twɔ́ pwó wɔ̌?
(Máá 11:27-33; Lúk 20:1-8)
23Ŋkhoʼyɛ́ a kɛ ŋkúŋɔ́ ndámboʼmvé nɛ́, pɛ ntsɛ́ssó ghaŋáshʉ́ pwɛ ghəkód suʼú mbəb yɔ́b fɛ́ pfuŋ ye, ŋgɛmbɛ a tsé fɛ́ ntʉ́ʉ́, pɔ́b pfiri wé ŋgâ: «Wo zhʉ́ yɔŋ mbziʼe tʉ̌ŋ pɛ́ɛ́ faʼa yɔŋ mbziʼe faʼ kaʼa? A fɛ́ wɔ̌ fɛ́ tʉ̌ŋ méré pwó wo?» 24Yěsô pɔ́rɔ́ ne pɔ́b ŋgâ: «Kɔʼɔ tómbəb ya, mə́ mbzírɛ́ wúŋ ne ndaʼ taʼ no. A pɛ́ɛ́ yɛ́ puŋ pód ŋgerɛ́ŋged nɛ́, mbǒ mə səŋɛ wúŋ ne ywoʼ yɛ́ mə njʉ́ tʉ̌ŋ faʼa yɔŋ mbziʼe faʼ núŋ kaʼa nɛ́. 25Zhâŋ kɛ zhʉ́ tʉ̌ŋ pɛ́ɛ́ fɛ́ kpênse núŋ pwó pɔŋ? A kɛ twɔ́ pwó Mboʼmvé kii pwó pumésɔŋ?» Pɔ́b kpaŋ tó, ntsɔ́ tsetsɛrɛ pɔ́b ŋgâ: «A pɛ́ɛ́ yɛ́ piŋi pód ŋgâ: “Á kɛ twɔ́ pwó Mboʼmvé nɛ́”, mbǒ a mbzírɛ́ wíŋi ŋgâ: “Tɛ a kɛ zhyɛ́ kɔ́ puŋ pé tséʼé psyɛ́ndzɔʼ ŋkyé ntsó yé pɔɔ?” 26Á pó mbɛ́ɛ́ yɛ́ piŋi pód ŋgâ: “Á kɛ twɔ́ pwó pumésɔŋ nɛ́”, mbǒ pɔŋ ŋgyɛ́ wíŋi ne no, ŋkyé ŋgâ ŋkɔŋɔ pɔŋ pɔ́ŋ náá kɛ zé sísíŋ ŋgâ Zhâŋ taʼ ŋgaŋatsɔ́kpaŋató Mboʼmvé.» 27Néré, pɔ́b pɔ́rɔ́ pwó Yěsô ŋgâ: «Psi zé pó.» Tómbəb ye pó ntsɔ́ ne pɔ́b ŋgâ: «Mo ya, mə səŋɛ wúŋ ne ywoʼ yɛ́ tʉ̌ŋ máá twɔ́, mə ŋgyɛ́ meno pɔŋ núŋ nɛ́ pó.»
Fuʼno ndúŋú pɔ́ŋ pépáá
28Yěsô pó ntsó ŋgâ: «Puŋ zhʉ́ yúŋ pe níŋ? Taʼ ŋɔŋ kɛ tséʼé pɔ́ŋ pépáá. Ŋɔŋ wéré tsɔ́ pwó sɔ́ Mɔ́ŋ ŋgâ: “Mɔ́ŋ ya, ghú faʼ ndzebe!” 29A pɔ́rɔ́ pwó ye ŋgâ: “Mə tsé mbé ghú pó!” A náʼá kyáŋá, ndzɔʼ ye sáʼá wé, a ghú. 30Ŋɔŋ wéré ghú pfúŋɔ́ mbɛ́rɛ́ Mɔ́ŋ ye yípáá, ke ntsɔ́ no yéré pwó ye. Wɔŋ ŋɔŋ pɔ́rɔ́ pwó ye ŋgâ: “Mə ŋgú, kɛ tɛd ya”. Ntsʉʼmbé, mbé ghú pó. 31A ndzɔ́ʼɔ́ pɔ́ŋ pépáá pɔŋ, a wɔ́ mbé wɛ́ a kɛ zhyɛ́ no yɛ́ tɛd ye kɛ zɔŋɔ nɛ́?» Pɔ́b pód ŋgâ: «A sɔ́ ye!» Yěsô tsɔ́ ne pɔ́b ŋgâ: «Mə səŋɛ wúŋ kpaʼ sísíŋ ŋgâ ghaŋákpêsebe pwɛ ghaŋá máʼá sakhə, ŋkʉ́yó ndɔ́rɔ́ wúŋ ndzó Nofɔŋ Mboʼmvé. 32Ɔ́ŋɔ́! Zhâŋ kɛ kʉ́yó ne nyóʼne mɛndɔ́b ŋgerɛ́ŋged ne puŋ, tsʉʼ mbé puŋ pé psyɛ́ wé pó. Ghaŋákpêsebe pwɛ pɛ sakhə pó mbzyɛ́ wé. Ŋgɛ ŋkhú ne puŋ, puŋ kɛ zhʉ́ yéré, ke mbé mwɔ́ séd ndzɔʼ yúŋ ne mbzyɛ́ne wé pó.»
Fuʼno mbəb ŋgaŋafaʼ kəpɔŋ
(Máá 12:1-12; Lúk 20:9-19)
33Yěsô pó ntsó ŋgâ: «Puŋ zóʼ cyó taʼ fuʼno. Taʼ ŋgaŋaywoʼ kɛ nuŋú taʼ faʼ ntsó yɛ́ ntáá mé fɛ́ yoʼ nɛ́. Ŋkwód kaŋ ndzyɛ̂ faʼ yéré núŋ. Ntéŋé ywoʼɔ kaa yoʼ, mbó ŋkwód ywoʼɔ ghaŋápsibɛvǎ. Ntéé pwó ŋgaŋafaʼ ŋgâ pɔ́b tsé ndiŋɛ́, ŋgú nsěnyi. 34Ŋkhoʼ yɔ́ɔ́mɔ́b kuʼu, a twɔ́ mkpaŋ pé ŋgâ pɔ́b ghú kpéé pé mɔ́b pɛ faʼ kɛ tóó nɛ́ pwó ŋgaŋafaʼ ŋkʉ́yó núŋ. 35Ntsʉʼmbé, ŋgaŋafaʼ gbáá mkpaŋ pé péré. Gbíí taʼ ye kaʼatɛ, nɔ́ʼ cyó, mbó tswɔ́ cyó ne pɛ ŋgɔʼ kaʼatɛ a pfó. 36A ké mbó twɔ́ pecyó mkpaŋ pé. Péré záá kaʼatɛ ntsɛ́ɛ́ sɔ́ pé. Ŋgaŋafaʼ ké mbó ŋgyɛ ne wɔ́b pé néré. 37Njʉyǐ ghɛmbɛ a twɔ́ Mɔ́ŋ ye wé ŋumbzí kpaŋa ŋgâ: “Njʉ́ a Mɔ́ŋ ya nɛ́, pɔ́b ŋgúʼɔ́ wé.” 38Ntsʉʼmbé ghaŋáfaʼ zhʉ́ njʉ́ Mɔ́ŋ kɛ kʉ́yó nɛ́, ntsɔ́ tsetsɛrɛ pɔ́b ŋgâ: “Yɔŋ ndzóndáb yé. Piŋi gbáá wé, nɔ́ʼ, nzó ywoʼ!” 39Pɔ́b gbáá wé, ntwɔ́ ne ye faʼ, nɔ́ʼ wé. 40Njʉ́ a kɛ́ʼɛ́ nɛ́, ŋkhoʼyɛ́ ŋgaŋywoʼ wɔŋ ŋkʉ́yó nɛ́, a ŋgyɛ́ níŋ ne ŋgaŋafaʼ péré?» 41Pɔ́b pɔ́rɔ́ pwó ye ŋgâ: «A mbéé ŋgyɛ́ ghaŋá nɔʼɔ pɔŋ pɔ́ŋ zhʉ́ ŋgəʼo kaʼatɛ ŋkɔŋ, mbɔ́rɔ́ pfɔ́. Mbó fɛ́ faʼ yéré ne ndíŋíne pwó pecyó ŋgaŋafaʼ pɛ pɔ́b fɛ́ ntáá pwó ye ŋkhoʼyɛ́ a zɔŋɔ nɛ́.» 42Yěsô ntsɔ́ ne pɔ́b ŋgâ: «Puŋ kaa kɛ fú ndzó ŋweʼe yáŋme ŋgâ:
“Ŋgɔʼ yɛ́ pɛ ghaŋákúrɔ ndáb kɛ máʼ nɛ́,
A tsʉʼ yéré tsʉʼ ŋgɔʼ ntɛ́ɛ́ndáb.
A yéré mbé faʼa Ntsɛɛpɔŋ,
Mbe ndáá shʉrɛ́no ne míí miŋi!”
43Mə ntsɔ́ nɛ́ ne puŋ ŋkʉ́rʉ́ ŋgâ: pe ŋkʉ́yó kpee Nofɔŋ Mboʼmvé ne puŋ, fɛ́ pwó pɔŋ pɛ pɔ́b ŋkʉ́yó nyí njʉ́ Mboʼmve zɔŋɔ nɛ́. 44Ŋɔŋ wɛ́ a ŋkʉ́yó mvɔ ndúŋú ŋgɔʼ yɔŋ nɛ́, a ŋʉʼɛ́ wé. A pɛ́ɛ́ yɛ́ ŋgɔʼ yéré pô mvɔ mbəb ŋɔŋ nɛ́, mbǒ a ŋgɔ́ʼɔ́ wé ghɔ́ʼ.» 45Pɛ ntsɛ́ssó ghaŋáshʉ́ pwɛ pɛ Farízya zí ŋgâ a kɛ ntsɔ́ wɔ́b ndzɔ́ʼɔ́ fuʼno yekénɛ́ a kɛ máʼ nɛ́. 46Pɔ́b táʼá ne gbǎne Yěsô. Ntsʉʼmbé tsé mbɔ́ɔ́ míí pɔŋ ŋkyé ŋgâ pɔŋ kɛ zé ŋgâ a taʼ ŋgaŋatsɔ́kpaŋató Mboʼmvé.
ទើបបានជ្រើសរើសហើយ៖
Matʉyo 21: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
