Matʉyo 22
22
Fuʼno ndúŋú ndebéne kpáʼá ndáá
(Lúk 14:15-24)
1Yěsô ke mbó ntsó pɛ meno ne pɔ́b né fuʼno ŋgâ: 2«Nofɔŋ Mboʼmvé pe nɛ́ pe njʉ́ taʼ fɔŋ wɛ́ a kɛ ntsúŋú ndebéne zɔ́ʼɔ́ ndáá Mɔ́ŋ ye wé ŋumbzí nɛ́. 3A twɔ́ ghaŋáfaʼ ŋgâ pɔ́b ghú fú pɛ ghəŋ pɛ a kɛ kaʼ nɛ́, ne ndebéne. Ntsʉʼmbé pɛ ghəŋ pe tsé ndzɔŋɔ ŋkʉ́yó pó. 4A twɔ́ pecyó ŋgaŋafaʼ ŋkʉ́rʉ́ ŋgâ pɔ́b ghú ntsɔ́ɔ́ pɛ ghəŋ ŋgâ: “Puŋ zhʉ́, mə ntsuŋú mɔ́b. Mə ŋgyɛ̂ pe nɔ̌ʼ pɛ naʼ kəkwéʼe páá pwɛ mvó páá pe kɔ̌ʼme. Mɔ́b kɛ pfé, puŋ ŋkʉ́yó ne ndebéne.” 5Ntsʉʼmbé, pɔ́b pe zóʼ fú ne cyó yɔ́b pó, ŋgú yɔ́b: cyó ghú faʼ ye, cyó ghú psi táŋ mé. 6Pecyó gbáá ŋgaŋafaʼ ndzáá wɔ́b ne ŋgəʼo, mbó nɔ́ʼɔ́ wɔ́b. 7Ŋgyé fɔŋ zuʼu. A twɔ́ pɛ káŋató, ŋgyɛ́ pe nɔ́ʼ pukəpɔŋ péré mbó ntɔŋ mbɛ́lʉ́ŋ yɔ́b. 8Néré, a tsɔ́ pwó ŋgaŋafaʼ pe ŋgâ: “Ndebene ntsuŋúme, ntsʉʼmbé pɛ ghəŋ pe kúŋɔ́ ndúŋú pó. 9Puŋ ghú ndzó pɛ záŋ, pɛ ntʉʼé mɛndɔ́b, ŋkaʼ ŋkɔŋɔ pɔŋ pɛ́ puŋ zhʉ́ nɛ́ náá ne ndebéne.” 10Ghaŋáfaʼ ghú ndzó pɛ mɛndɔ́b, mvú ŋkɔŋɔ pɔŋ pɛ pɔ́b kɛ zhʉ́ nɛ́ náá pukəpɔŋ pwɛ pusʉ́ʼʉ kaʼatɛ ndáb ndebéne yúŋɔ pwó pɛ ghəŋ. 11Fɔŋ kuŋɔ ne ndíŋíne pɛ ghəŋ, njʉ́ taʼ ŋɔŋ pɛ ndzóʼó mbé gbéé ndzwé ndebéne pó. 12A tsɔ́ pwó ye ŋgâ: “Sɔŋ ya, wo zhyɛ́ níŋ mbɔ́rɔ́ ŋkuŋɔ́ ghaŋ kii tséʼé ndzwé ndebéne?” A móʼ móʼ. 13Néré, fɔŋ tsɔ́ pwó ghaŋáfaʼ ŋgâ: “Puŋ ŋkwód kpee mé ne mbwó mé máʼá wé mvé, ndzɔ́ʼɔ́ ndzə́ndzə́b, ywoʼ yɛ́ pe ŋkhɔ pfɔrɔ sɔŋ nɛ́.” 14Kpaʼ sísíŋ, pe fú pɔŋ zááme, ntsʉʼmbé pɔŋ pɛ́ pé ntsɔ́ʼ nɛ́ khóó kaʼatɛ.»
A pú ŋgâ pe péé sebe pwó Káza?
(Máá 12:13-17; Lúk 20:20-26)
15A kɛ pe néré pɛ Farízya téré ne ntɔ́ne pfɔ̌ Yěsô, a ntsó no mvó pɔ́b gbáá wé. 16Pɔ́b twɔ́ ŋgíŋgye pɔ́b pwɛ ghaŋá tsyɛ́ŋəŋ Erodə ŋgâ pɔ́b ghú mbzírɛ́ Yěsô ŋgâ: «Kéʼeyáŋ, psi zé ŋgâ wo ŋɔŋ no sísíŋ, kii tiŋɛ́ ŋgʉyétsuʼ mbɔ́ɔ́ míí mé. Wo tsé mbé tiŋɛ́ njʉ́ pɔŋ ghú nɛ́ pó. Wo nyóʼó mɛndɔ́b Mboʼmvé pé njʉ́ a zɔŋɔ nɛ́. 17Sɔ́ŋɔ́ ywí! Wo zhʉ́ yo pe níŋ: “Ɔ́ŋɔ́ kii ŋgáŋ! Kaŋ miŋi psyɛ́ ŋgâ, tɛɛmbɛ pe péé sebe pwó Káza?”» 18Tsʉ́ʼmbɛ njʉ́ Yěsô kɛ zé ŋgɔ́b mɔ́b nɛ́, a ntsɔ́ ne pɔ́b ŋgâ: «Pɛ pépwɔmíí, puŋ pfɛrɛ ya ne wě ŋkyé kɔ́? 19Puŋ nyoʼ mbób yɛ́ pe pê sebe núŋ nɛ́, mə njʉ́!» Pɔ́b nyoʼ taʼ mbób pwó wo. 20Yěsô psirɛ́ wɔ́b ŋgâ: «Záŋ yɔŋ pú ŋweʼe yɔŋ ye wɔ́?» 21Pɔ́b pód ŋgâ: «A ye Káza!» Néré, Yěsô tsɔ́ ne pɔ́b ŋgâ: «Puŋ fɛ́ yɔ́b Káza pwó yé, fɛ́ yé Mboʼmvé pwó Mboʼmvé.» 22Pód yɛ́ Yěsô kɛ fɛ́ nɛ́ tsɛ́ɛ́ wɔ́b kaʼatɛ, pɔ́b tee wé, ŋgú yɔ́b.
Pɔŋ ŋkʉ́yó njʉyɛ́ ne vó
(Máá 12:18-27; Lúk 20:27-38)
23A kɛ pe zhyémve yéré, pɛ Sadúkayə kʉ́yó pfuŋ ye. Pɛ Sadúkayə pɔŋ pɛ́ pɔ́b tsɔ́ ŋgâ pe náʼá njʉyɛ́ ne vó nɛ́ pó. Pɔ́b psirɛ́ Yěsô ŋgâ: 24«Kéʼeyáŋ, Mǔsê kɛ gháá: “A pɛ́ɛ́ yɛ́ ŋɔŋ pfó kii tsɛ́ʼɛ́ Mɔ́ŋ nɛ́, mɔ́ŋmɛ́ ye sǒ pfʉ́ʉ́ ye, ne ŋgyɛ́ne ŋgâ tíí ye ndɛ mbwó.” 25Pɔ́ŋmɛ́ pesambáá kɛ pɛ yóʼó. Sɔ́ ye zɔ́ʼ, pfó. Njʉ́ a kɛ pfó kii yɔ́b nɛ́, a tee ŋgʉyé pwó mɔ́ŋmɛ́ yé. 26Mbɛ́rɛ́ yípáá pwɛ mbɛ́rɛ́ yíkyéd ke mbɛ́ɛ́ néré, kaʼatɛ mbáŋa ndúŋú mbɛ́rɛ́ yísambáá, a ke mbɛ́ɛ́ néré. 27Pɔ́b pfó náá. Njʉyí ghɛmbɛ Məŋgʉ́yé ke mbó pfɔ́ yé. 28Kɛ́ʼɛ́! Zhyémve yɛ́ pɔŋ ŋkʉ́yó njʉyɛ́ne vó nɛ́, a náʼá mbɛ́ɛ́ ŋgʉyé wɔ́ tsetsɛrɛ pɔ́ŋmɛ́ pesambáá péré, njʉ́ ŋkɔŋɔ wɔ́b kɛ yɔ́ɔ́ wé ne ŋgʉyé wɔ́b náá nɛ́?» 29Yěsô pɔ́rɔ́ ne pɔ́b ŋgâ: «Puŋ tsé fwɔ́ kaʼatɛ ŋkyé ŋgâ puŋ zé yɔ́b yɛ́ a ndzó Ŋweʼe yáŋme nɛ́ po, kii pó ndzɛ́ tʉ̌ŋ Mboʼmvé. 30Ŋkhoʼyɛ́ pe ŋkʉ́yó njʉyɛ́ ne vó nɛ́, pe pé zɔ́ʼɔ́ ndáá pó. Ntsʉʼmbé, pé pɛ́ɛ́ njʉ́ pɛ aŋgere pɛ a pépéé nɛ́. 31Ŋgɛ mbɛ́ ne njʉyɛ́ne ne vó, puŋ kɛ zóʼ ntsó wɛ́ Mboʼmvé kɛ tsɔ́ ne puŋ nɛ́ pɔɔ? A kɛ tsɔ́ɔ́ ŋgâ: 32Mo, mə Mboʼmvé Ábraham, Mboʼmvé Izaʼ mbó mbé Mboʼmvé Yakɔ́b? Ntsʉʼŋgɛ mbɛ Mboʼmvé pó mbé pɛ́ɛ́ wé pfɔ̂pɔŋ pó. A Mboʼmvé pumɔ́b.» 33Ŋkhoʼyɛ́ pɔŋ kɛ zóʼ mbziʼe yɛ́ Yěsô kɛ fɛ́ ye ntʉ́ʉ́ nɛ́, a ntsɛ́ɛ́ wɔ́b.
A yɛ́rɛ́ kaŋ ntsɛ́ɛ́ pecyó?
(Máá 12:28-34; Lúk 10:25-28)
34Njʉ́ pɛ Farízya kɛ zóʼ ŋgâ Yěsô móʼ ntswee pɛ Sadúkayə nɛ́, pɔ́b téré. 35Taʼ ŋɔŋ ndzɔ́ʼɔ́ pɔ́b, mbé taʼ ŋgaŋakeʼekaŋ, zɔŋɔ mverɛ́ Yěsô, mbzírɛ́ wé ŋgâ: 36«Kéʼeyáŋ, a yɛ́rɛ́ kaŋ ntsɛ́ɛ́ pecyó?» 37Yěsô tsɔ́ pwó ye ŋgâ: «kʉ́yé Ntsɛɛpɔŋ Mboʼmvé wo ne ŋkɔŋɔ ndzɔʼ wo náá, ne ŋkɔŋɔ Ménee wo náá, ne ŋkɔŋɔ kpaŋató wo náá. 38Yekénɛ́ yɛ́ a ntsɛ́ɛ́ wɔ́b náá nɛ́, mbó mbé sɔ́ kaŋ. 39Zhʉbí yɛ́ a ke mbó ntséʼé ghebe nɛ́, pɛ́ɛ́ ŋgâ: “Kʉyě mɔ́ŋmɛ́ wo njʉ́ wo kʉ́yé tómbəb wo nɛ́.” 40Ŋkɔŋɔ kaŋ Mǔsê náá pwɛ ŋkɔŋɔ Ghaŋátsɔ́kpaŋató Mboʼmvé náá, nzwərɛ ndúŋú yípáá yɔŋ.»
Kristo Mɔ́ŋ mbó mbé Ntsɛɛpɔŋ pwó fɔŋ Ndavíd
(Máá 12:35-37; Lúk 20:41-44)
41Njʉ́ pɛ Farízya kɛ téré nɛ́, Yěsô psirɛ́ wɔ́b ŋgâ: 42«Yúŋ kpaŋató pɛ́ɛ́ níŋ ŋkyé Kristo? A Mɔ́ŋ wɔ́?» Pɔ́b pód ŋgâ: «A Mɔ́ŋ fɔŋ Ndavíd.» 43Yěsô nsɔ́ ne pɔ́b ŋgâ: «Tɛ a kɛ zhyɛ́ kɔ́ fɔŋ Ndavíd, ŋkhoʼyɛ́ Zhʉye Yáŋme kɛ tsiŋɛ wé nɛ́, a fú wé ne Ntsɛɛpɔŋ. Ŋgɛ́ɛ́ ntsɔ́ ŋgâ:
44Ntsɛɛpɔŋ tsɔ́ pwó Ntsɛɛpɔŋ ya ŋgâ:
Ghɔrɔ́ ne ndzaʼ pwó ya ye maʼ
kaʼatɛ mbáŋ ŋkhoʼyɛ́ mə ŋgyɛ́ ghaŋákepeŋe pó tsʉ́ʼ ywoʼɔ tíí kpee mó nɛ́?
45A pɛ́ɛ́ yɛ́ fɔŋ Ndavíd fú wé ne Ntsɛɛpɔŋ nɛ́, mbǒ a mbɔ́rɔ́ ŋgyɛ́ niŋ mbɛ Mɔ́ŋ ye?» 46Njʉ́ a kɛ́ pe néré nɛ́, ŋɔŋ tsetsɛrɛ pɔ́b pó mbé kúʼɔ́ ne mbǒdne ndii nsó ŋkʉ́rʉ́ pó. Ndzyěne néré, ŋɔŋ pó mbé mwɔ́ mvírɛ́ wé ne cyó no ŋkʉ́rʉ́ pó!
ទើបបានជ្រើសរើសហើយ៖
Matʉyo 22: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
