Matʉyo 20
20
Fuʼno ghaŋáfaʼ pɛ́ pé kɛ fú wɔ́b ne nab yítaŋ nɛ́
1Yěsô máʼ fuʼno ŋgâ: «Nofɔŋ Mboʼmvé fwɛ́ɛ́ taʼ ŋgaŋaywoʼ wɛ́ a ŋǎ ne fʉ́ʉ́wáá ntáʼ ŋgaŋafaʼ ne niŋíne faʼ yé nɛ́. 2Pú pɔ́b ntsúŋú ŋgâ a fɛ́ taʼ mbób ne pɔ́b ne zhyémve, twɔ́ wɔ́b faʼ yé. 3A twɔ́ ne ywɔ̌ nab yipfuʼɔ, njʉ́ pecyó pɔŋ pɔ́b ntsɛ́ záŋ kii tsé faʼa, 4a tsɔ́ ne pɔ́b ŋgâ: “Puŋ ke ghú yúŋ faʼ mo. Mə fɛ́ yɔ́b yɛ́ a kúʼɔ́ nɛ́ ne puŋ.” 5Pɔ́b ghú yóʼó. A ke mbó ntwɔ́ ne ntʉŋ ménab, ne ywɔ́ nab yíkyéd ŋkʉ́rʉ́, ke mbó ŋgyɛ́ néré. 6Ne ywɔ̌ nab yítaŋ kɛ́ʼɛ́, a ke mbó ntwɔ́ ŋkʉ́rʉ́, njʉ́ pecyó pɔŋ ke ntsɛ́ɛ́ nsé, a ntsɔ́ ne pɔ́b ŋgâ: “A zhyɛ́ kɔ́ féré ndzɔʼɔwáá púŋ ke ntsɛ́ɛ́ nsé kii tsé faʼa?” 7Pɔ́b pód ŋgâ: “ŋkyé ŋgâ ŋɔŋ yɔ́ɔ́ ywí ne faʼ pó.” A ntsɔ́ ne pɔ́b ŋgâ: “Puŋ ke ŋgú yúŋ faʼ mo.” 8Ŋkhoʼfwɔ̂nab kuʼu, ŋgaŋaywoʼ ntsɔ́ pwó ŋɔŋ wɛ́ a kɛ nâ faʼ nɛ́ ŋgâ: “Fú ŋgaŋafaʼ, fɛ́ yé ŋɔŋ péé pwó ye, ndzyěne mbəb njʉyí njʉyi pɔŋ mbáŋa mbəb sɔ́ pɔŋ.” 9Pɔŋ pɛ́ pé kɛ yɔɔ wɔ́b ne nab yítaŋ nɛ́ kʉ́yó yɔ́b, Mbɛwɔ̂ kpě taʼ mbób. 10Sɔ́ pɔŋ ke ŋkʉ́yó yɔ́b ne yɔ́b kɛɛ, kpáŋa ŋgâ pe fɛ́ yɔ́b péé a záá. Ntsʉʼmbé tómbəb yɔ́b, Mbɛwɔ̂ ke kpě taʼ mbób. 11Ŋkhoʼyɛ́ pɔ́b kɛ kpě nɛ́, pɔ́b ŋubɔ ŋubɔ ŋkyé ŋgaŋaywoʼ, 12ntsɔ́ ŋgâ: “Pɔŋ pɔŋ pɛ́ pɔ́b kʉ́yó njʉyǐndzəb nɛ́ ke fáʼa ndaʼ taʼ ŋkhóʼmvé, wo ke mbó mbéé wɔ́b pe njʉ́ a pě psi pɔ́b faʼa féré wáá nɛ́? Psi pɛ́ ménab ke ntɛ́ɛ́ ywí féré wáá nɛ́.” 13Ntsʉʼmbé a pɔ́rɔ́ pwó taʼ ŋɔŋ ndzɔʼ pɔ́b ŋgâ: “Sɔŋ ya, mə mvɔ̌ no mbəb wo pó. Paʼa tsúŋɔ no taʼ mbób pɔɔ? 14Kpéé yɛ́ a pɛbɛ pó nɛ́ ŋgód fwóme. Yɔ́b yɛ́ mə fɛ́ pwó nɛ́, a ke mbɛ yɛ́ mə fɛ́ pwó njʉyǐndzəb wɔ́ŋ nɛ́. 15Tɛɛmbɛ mə mbé zhyɛ́ ne foʼ ya njʉ́ mə kʉ́yé nɛ́ pɔɔ? Kii mbzítíí wo pʉ́ʉ́ kɛ́ʼɛ́ ŋkyé ŋgâ mə ŋusʉ́ʼʉ nɛ́?” 16Kɛ́ʼɛ́ pɛ njʉyǐndzəb náʼá ntsʉʼɔ pɛ sɔ́ pɔŋ, pɛ sɔ́ pɔŋ náʼá ntsʉ́ʼ pɛ njʉyǐndzəb.»
Yěsô ntsó ŋkyé vó ye ne njʉyɛ́ne mé ne vó ne mbɛ́rɛ́ yíkyéd,
(Máá 10:32-34; Lúk 18:31-34)
17Njʉ́ Yěsô kɛ yɔ́ɔ́ mɛndɔ́b ne ŋkɔ́ʼne Yerʉ́salɛm nɛ́, a yɔ́ɔ́ ntsɔ̌b ŋgíŋgye pé pépáá pú pɔ́b ghɛ́ mbaʼá, a ntsɔ́ ne pɔ́b ŋgâ: 18«Puŋ zóʼ no yɔŋ! Njʉ́ piŋi kɔ́ʼɔ́ kaʼa Yerʉ́salɛm nɛ́, pé fi Mɔ́ŋ ŋɔŋ ndzó mbwó pɛ ntsɛ́ssó ghaŋáshʉ́ pwɛ ghaŋákeʼekaŋ. Pɔ́b tséé fiʼ ye ŋgâ pe nɔ́ʼ wé. 19Pɔ́b fí wé pwó pɔŋ pɛ́ pɔ́b pɛ Yúda nɛ́ pó, kɛ́ʼɛ́ ŋgâ pɔ́b ntuŋɔ wé, gbíí wé ne gbaa, mbó kpii wé ndúŋú ŋgʉŋʉ. Ntsʉʼmbé, zhyémve pekyéd ghɛ́ ndzáʼa, a zhʉyɛ́ ne vó.»
Zhakə pú Zhâŋ táʼá sɔ́ ywoʼ
(Máá 10:35-45; Lúk 22:25-27)
20Néré, mɛ́ pɔ́ŋ Zebede suʼú mbəb ye pwɛ pɔ́ŋ pé fɛ́ pfúŋɔ́ Yěsô, ŋguŋu pfɔ́ ye, ndɔ́ŋ taʼ no pwó ye. 21Yěsô tsɔ́ pwó ye ŋgâ: «Wo zɔŋɔ kɔ́?» A pɔ́rɔ́ pwó ye ŋgâ: «Zhyɛ́ ŋgâ ndzɔ́ʼɔ́ Nofɔŋ wo, pɔ́ŋ páá pɔŋ ghɔ́rɔ́ ne ghə́ə́ wo, taʼ ye ne ndzaʼ pwó wo ye maʼ cyó ne ndzaʼ pwó wo ye ŋkʉbi.» 22Yěsô pɔ́rɔ́ ne pɔ́b ŋgâ: «Pǔŋ zɛ yɔ́b yɛ́ puŋ pfirɛ nɛ́ pó! Puŋ kuʼɔ ne njʉ́ne ŋgəʼo yɛ́ mə njʉ́ nɛ́?» Pɔ́b pɔ́rɔ́ pwó ye ŋgâ: «Psi kuʼu.» 23Yěsô tsɔ́ ne pɔ́b ŋgâ: «A sísíŋ! Ŋgəʼo yɛ́ mə njʉ́ nɛ́, puŋ njʉ́. Ntsʉʼŋgɛ ŋkhú ne ŋgǒdne ne ndzaʼ pwó ya ye maʼ kii ne ye ŋkʉbi, a tséʼé mo ne fɛ́ne ne puŋ pó. Tɛd ŋkʉ́yó fɛ́ pwó pɔŋ pɛ́ a ntsuŋɔ́ ne pɔ́b nɛ́.» 24Ŋkhoʼyɛ́ pecyó vwɔ́ ŋgíŋgye kɛ zóʼ no yéré nɛ́, pɔ́b zúʼú ŋgyé mbəb pɔ́ŋmɛ́ pépáá péré. 25Ntsʉʼmbé Yěsô fú wɔ́b, ntsɔ́ ne pɔ́b ŋgâ: «Puŋ zé! Pé fɔŋ mvémvé pɔ́rɔ́ sáʼá wɔ́b, kɔʼɔ kɔ́ʼɔ́ ŋgɔrɔ tó pɔ́b, pɛ mɛ́tó kɔʼɔ fɛ́rɛ wɔ́b. 26A ndɛ mbé néré tsetsɛrɛ puŋ! Ndaʼ ŋgâ a pɛ́ɛ́ yɛ́ ŋɔŋ zɔŋɔ mbɛ́ ŋukəkweʼé tsetsɛrɛ puŋ nɛ́, a zɔŋɔ ŋgâ a pé ŋgaŋafaʼ ne puŋ. 27Mbó Mbéyɛ́ ŋɔŋ zɔŋɔ mbɛ sɔ́ ŋɔŋ ndzɔ́ʼɔ́ puŋ nɛ́, a pe mkpaŋ wuŋ. 28Ŋkyé ŋgâ Mɔ́ŋ ŋɔŋ kɛ pe kʉ́yó ŋgâ pe faʼa pwó ye pó, a kɛ kʉ́yó ne fǎʼne pwó pɔŋ, mbó fɛ́ tsómvé ye ne ndzúŋne tó pɔŋ zááme.»
Yěsô pɛ́d ffǒme pépáá Zheriko
(Máá 10:46-52; Lúk 18:35-43)
29Njʉ́ Yěsô pwɛ ŋgíŋgye pé kɛ tsé ntwɔ́ ndzó mbɛ́lʉ́ŋ Zheriko nɛ́, pɔŋ zááme zɔŋɔ wɔ́b. 30Ffǒme pépáá ghɔ́rɔ́ ne gháá mɛndɔ́b. Ndzóʼ ŋgâ a záʼá Yěsô. Pɔ́b zyé ne ŋgěʼne ŋgâ: «Ntsɛɛpɔŋ, Mɔ́ŋ fɔŋ Ndavíd, tsaaghəghəŋ zhí!» 31Pɔŋ míí wɔ́b, ntsó ŋgâ: «Puŋ móʼ ntswee wúŋ!» Ntsʉʼmbé, pɔ́b mě mê ŋgeʼe ne tʉ̌ŋ, ntsɔ ŋgâ: «Ntsɛɛpɔŋ, Mɔ́ŋ fɔŋ Ndavíd, tsaaghəghəŋ zhí!» 32Yěsô tsébé, fú wɔ́b, ntsɔ́ ne pɔ́b ŋgâ: «Puŋ zɔŋɔ ŋgâ mə ŋgyɛ́ kɔ́ ne puŋ?» 33Pɔ́b tsɔ́ pwó ye ŋgâ: «Ntsɛɛpɔŋ, zhyɛ́ psi zhʉ́ ywoʼ!» 34Yěsô tsaaghəghəŋ yɔ́b, kébe míí mɔ́b. Kpaʼ ŋkhoʼyéré, pɔ́b pó njʉ́ ywoʼ, ndzye ntsʉ̌ʼne ndzəb yé.
ទើបបានជ្រើសរើសហើយ៖
Matʉyo 20: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
