Zhâŋ 13
13
Yěsô sóʼ kpee ŋgíŋgye pé
1Ndebéne Pasəka kɛ ghɛmbɛ́, njʉ́ Yěsô kɛ zé ŋgâ yé ŋkhoʼ kɛ kuʼu nɛ́, ŋkhoʼyɛ́ a kɛ ghɛ́ ntee mvé yɔŋ ŋgú pfuŋ Tɛd nɛ́. Ye wɛ́ a kʉ́yé pupé pɛ́ pɔ́b mvé ghaŋ, a po kʉ́yé wɔ́b kaʼatɛ mê nɛ́. 2Njʉ́ Sátaŋ kɛ séd ndzɔʼ Zhʉ́da Mɔ́ŋ ŋɔŋ ŋgɔŋ Iskaa, Mɔ́ŋ Símo kaʼatɛ a kpáŋá ne fíne Yěsô nɛ́. Ŋkhoʼyɛ́ pɔ́b kɛ tsé ndzɔ̂ mɔ́b nɛ́, 3Yěsô, njʉ́ a kɛ zé ŋgâ Tɛd kɛ tee ŋkɔŋɔ yɔ́b náá ndzó mbwó mé, a twɔ́ pwó Mboʼmvé ké mbó ŋgú pfúŋɔ́ Mboʼmvé nɛ́, 4á ŋǎ syé, sɔ́d ndzwé yé yé fóó, ndɔ́ɔ́ pɛ́rɛ́ ywɔ̌ndzwé ŋkwód ne kukúŋ yé. 5Níŋi nse ndzó taʼ kaŋ ndzyě ne sǒne kpee ŋgíŋgye pé mbó sebe ne yɔ́b ndzwé yɛ́ a kɛ kwórɔ́ ndúŋú kukúŋ yé nɛ́.
6Ŋkhoʼyɛ́ a kɛ páŋá mbəb Símo Pětro nɛ́, a tsɔ́ pwó yé ŋgâ: «Wo, Ntsɛɛpɔŋ, sǒ kpee máá!» 7Yěsô pɔ́rɔ́ pwó yé ŋgâ: «Yɔ́b yɛ́ mə ŋgyɛ́ nɛ́, tɛɛmbɛ wo pe zé ŋkhoʼyɔŋ pó, ntsʉʼmbé wo ndɛ ndzóʼó.» 8Pětro tsɔ́ pwó yé ŋgâ: «Sǒ kpee máá! Ngaŋ!» Yěsô ntsɔ́ pwó yé ŋgâ: «A pɛɛ yɛ́ mə sǒ wo nɛ́ pó, mbǒ paʼa naʼ mbó ntəb no ŋkʉ́rú pó.» 9Símo Pětro tsɔ́ pwó yé ŋgâ: «Kɛ́ʼɛ́, Ntsɛɛpɔŋ, a ndɛ ke mbɛ́ɛ́ ndaʼ kpee máá, ntsʉʼmbé sǒ tó ya pwɛ mbwó máá!» 10Yěsô tsɔ́ pwó yé ŋgâ: «Ŋɔŋ wɛ́ a sǒ mbəb yé nɛ́, a pó mbé tséʼé ŋgâ pe pó sǒ wé ŋkʉ́rʉ́ pó. Ŋkyé ŋgâ ŋkɔŋɔ mbəb yé náá yáŋme. Ŋgɛ́mbɛ́ ne puŋ, pǔŋ yáŋme, ntsʉʼmbé mbé pɛ́ɛ́ ŋkɔŋɔ wúŋ náá pó.» 11A kɛ ghɛmbɛ, a kɛ zɛ́ ŋɔŋ wɛ́ a fí wé nɛ́. A zhyɛ́ yéré a nsó ŋgâ: «A ŋkɔŋɔ wúŋ náá mbé yáŋme pó.»
12Ŋkhoʼyɛ́ a kɛ mê ne sǒne kpee mɔ́b nɛ́, Yěsô gbéé ndzwé yé yé fóó, mbó mbód ndzəb ndúŋú téépere nsó ŋgâ: «Puŋ zóʼ no yɛ́ mə ŋgyɛ́ mbəb puŋ nɛ́? 13Puŋ fû ya ŋgâ: “Kéʼeyáŋ”, mbó fû ŋgâ “Ntsɛɛpɔŋ”. Pǔŋ ntsɔ́ɔ́ néré, ŋkyé ŋgâ mə yé. 14Ndzyěne ŋkhoʼyɔŋ, a pɛ́ɛ́ yɛ́ mə sǒ kpee múŋ, mo, Ntsɛɛpɔŋ mbó mbé Kéʼeyáŋ wúŋ nɛ́, a zɔŋɔ ŋgâ puŋ ke sǒ múŋ kpee tsetsɛrɛ puŋ. 15Ŋkyé ŋgâ a taʼ fuʼno yɛ́ mə nyóʼó ne puŋ kɛ́ʼɛ́ nɛ́. No yɛ́ mə ŋgyɛ́ mbəb puŋ nɛ́, puŋ ke ŋgyɛ́ yúŋ pe néré. 16Kpaʼ sísíŋ, mə sə́ŋɛ́ wúŋ, tɛɛmbɛ ŋgaŋazeʼefaʼ pe tsɛ́ɛ́ tɛdfaʼ yé pó, kii taʼ ŋgaŋantɔ́b pó ntsɛ́ɛ́ ŋɔŋ wɛ́ a twɔ́ wé nɛ́ pó. 17Pǔŋ pé tɛ ndzɛ́ no yéré nɛ́, mbéne sʉ́ʼʉ pɛ́ ne puŋ, Mbéyɛ́ puŋ ntíí kpee múŋ ndúŋú nɛ́. 18Mə ntsɔ́ɔ́ pwó ŋkɔŋɔ wúŋ náá pó, mə ndzɛ́ pɔŋ pɛ́ mə ntsɔ́ʼ nɛ́. Ntsʉʼmbé, a pé néré ŋgâ tó Ŋwéʼe yúŋú. Ŋwéʼe yéré tsɔ́ɔ́ ŋgâ: “Ŋɔŋ wɛ́ psi yé kɛ zɔ̂ mɔ́b nɛ́, tsʉ́ʼ mbáŋ ya.” 19Mə ntsó yéré no ne puŋ ŋkhoʼyɔŋ kɛ́ʼɛ́ ŋgâ, ŋkhoʼ no ghɛ́ ŋkúʼɔ́. Yânéré kɛ́ʼɛ́ ŋgâ, ŋkhoʼyɛ́ a ndɛ mbáŋá nɛ́, puŋ psyɛ́ ŋgâ Mə Ye. 20Kpaʼ sísíŋ, mə sə́ŋɛ wúŋ, ndɔ̌ne ŋɔŋ wɛ́ mə twɔ́ wé nɛ́ sʉ́ʼʉ, pɛ́ɛ́ ndɔ̌ne tómbəb ya nɛ́. Ndɔ̌ne ya sʉ́ʼʉ, pɛ́ɛ́ ndɔ̌ne ŋɔŋ wɛ́ a twɔ́ ya nɛ́.»
Zhʉ́da fi Yěsô
(Mat 26:20-25; Máá 14:17-21; Lúk 22:21-23)
21Njʉ́ Yěsô kɛ nsó néré nɛ́, ndzɔʼ yé púbú, a ntsɔ́ tétáá ŋgâ: «Kpaʼ sísíŋ, mə sə́ŋɛ wúŋ ŋgâ taʼ ŋɔŋ ndzɔ́ʼɔ́ puŋ fí ya.» 22ŋgíŋgye tiŋi mbəb yɔ́b tsetsɛrɛ pɔ́b, mbzirɛ́ mbəb yɔ́b ne ŋɔŋ wɛ́ a tsɔ́ ŋkyé wé nɛ́. 23Taʼ ŋɔŋ ndzɔ́ʼɔ́ ŋgíŋgye pé, yé wɛ́ Yěsô kɛ kʉ́yé kaʼatɛ nɛ́, kɛ pɛ́ ne ŋgə́ yé. 24Símo Pětro ŋɔ́ʼ tíí pwó yé ŋgâ: «Psírí wé ne ŋɔŋ wɛ́ a tsɔ́ nɛ́.» 25Meŋkhó wéré máʼ mbəb yé fɛ́ pfuŋ ndzɔʼ Yěsô, ntsɔ́ pwó yé ŋgâ: «Ntsɛɛpɔŋ, a wɔ́?» 26Yěsô pód ŋgâ: «A ŋɔŋ wɛ́ mə ntsɔ̌bɔ́ ywɔ̂zó yɔŋ fɛ́ pwó yé nɛ́.» Néré, Yěsô yɔ́ɔ́ mbéé yɛ́ a kɛ ntsəb nɛ́, fɛ́ pwó Zhʉ́da, mɔ́ŋ Símo, ŋɔŋ ŋgɔŋ Iskaryotə. 27Njʉ́ a kɛ fɛ́ mbré ntsǒbme yéré ŋkhoʼyéré pwó yé nɛ́, Sátaŋ ŋkuŋɔ mbəb Zhʉ́da. Yěsô tsɔ́ pwó yé ŋgâ: «Yɔ́b yɛ́ wo tsɛ́ʼɛ́ ne ŋgyɛ̌ne nɛ́, zhyɛ́ zaŋa.» 28Mbɛ taʼ ŋɔŋ ndzɔ́ʼɔ́ pɔŋ pɛ́ pɔ́b kɛ pɛ yóʼó nɛ́, pe zóʼ no yɛ́, Yěsô kɛ zɔŋɔ ntsɔ́ nɛ́ pó. 29Njʉ́ a kɛ tséʼé Zhʉ́da tséʼé Mɔ́ŋ pab mbób nɛ́, pecyó pɔŋ kpaŋa ŋgâ Yěsô kɛ ntsɔ́ɔ́ ŋgâ, a zúŋ mɔ́b ne ndebéne kii fɛ́ yɔ́b pwó mbɔ́ŋmbɔŋ. 30Ghɛmbɛ ne Zhʉ́da, njʉ́ a kɛ kpê mbé ntsǒbme nɛ́, a ke ntwɔ́ yé pe néré. Ŋgɛmbɛ ntsuʼ kɛ síŋ.
Kaŋ ffé
31Ŋkhoʼyɛ́ Zhʉ́da kɛ twɔ́ nɛ́, Yěsô nsó ŋgâ: «Ŋkhoʼyɔŋ, Mɔ́ŋ ŋɔŋ kɛ pé ghúʼúme. Mɔ́ŋ ŋɔŋ pó ŋgúʼɔ́ Mboʼmvé. 32Mboʼmvé náʼá ŋguʼɔ wé ne tómbəb yé. A tsʉ́ʼ mɔ́ŋtiʼa ŋkhoʼ ŋkɔŋ, a pɔ́rɔ́ ŋgúʼɔ wé. 33Pɔ́ŋtiʼa pɔ́ŋ páá, piŋ mbó ntsó kyáŋá pó. Pǔŋ náʼá ntáʼá, njʉ́ mə mbě ntsɔ́ pwó pɛ ntsɛ́ssó pɛ Yúda nɛ́. Mə mbě ntsɔ́ɔ́ ŋgâ: “Ywoʼ yɛ́ mə ŋgǔ nɛ́, tɛɛmbɛ puŋ pé kʉ́yó yóʼó pó”. Mə kiʼi ké mbó nsó nɛ́ ne puŋ ŋkhoʼyɔŋ.
34Mə fɛ́ taʼ kaŋ ffé ne puŋ: “Puŋ kʉyě mbəb yuŋ tsetsɛrɛ puŋ. Njʉ́ mə kɛ kʉ́yé wúŋ nɛ́, puŋ kʉyě mbəb yuŋ tsetsɛrɛ puŋ.” 35A pɛ́ɛ́ yɛ́ puŋ tséʼé kəŋe tsetsɛrɛ puŋ nɛ́, mbǒ ŋkɔŋɔ pɔŋ náá ndzɛ ŋgâ puŋ ŋgíŋgye páá.»
(Mat 26:31-35; Máá 14:27-31; Lúk 22:31-34)
36Símo Pětro tsɔ́ pwó yé ŋgâ: «Ntsɛɛpɔŋ, wo ghú pɛ́ɛ́?» Yěsô pɔ́rɔ́ pwó yé ŋgâ: «Ywoʼ yɛ́ mə ŋgú nɛ́, wo kúʼɔ́ ne ndzɔ̌ŋne ya ŋkhoʼyɔŋ pó, ntsʉʼmbé wo náʼá nzɔ́ŋɔ ya cyó zhyémve.» 37Pětro pɔ́rɔ́ pwó yé ŋgâ: «Ntsɛɛpɔŋ, a zhyɛ́ kɔ́ tɛɛmbɛ mə mbé zɔŋɔ wo kpaʼ ŋkhoʼyɔŋ pɔ̂? Mə fɛ̌ tsómvé ya ŋkyé wo!» 38Yěsô pɔ́rɔ́ pwó yé ŋgâ: «Wo fɛ́ tsómvé wo ŋkyé ya mɔ! Kpaʼ sísíŋ mə sə́ŋɛ wo ŋgâ ŋkhoʼ ŋgɛ ntú, wo sirɛ́ ya kɛ́ɛ́ yíkyéd.»
ទើបបានជ្រើសរើសហើយ៖
Zhâŋ 13: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
