Zhâŋ 12
12
Malya núʼ vód tswɔtwɔ́ ndúŋú kpee Yěsô
1A kɛ́ tsʉʼ zhyémve péntóó ndebéne Pasəka pɛ Yuda kúʼú. Yěsô páŋá Betáni, ndzó ywoʼ yɛ́ Nǎzaro wɛ́ a kɛ zhʉyɛ́ wé ne vó, kɛ ntsó nɛ́. 2Pe tíí mwɔ̌zó ne ŋgúʼune wé. Nǎzaro pɛ nzdɔ́ʼɔ́ pɛ ŋgəŋ, ŋkhoʼyɛ́ Máátaa kɛ ghɔ́bɔ mɔ́b nɛ́. 3Malya yɔ́ɔ́ vód tswɔtwɔ́ yé tʉŋɔ ndɔŋ yɛ́ pe kɛ ntə́ŋé ne mkpeeghaŋ yɛ́ pe fû ne naa nɛ́, nǔʼ kpee Yěsô núŋ, sébé ne nwɔ̂tó mé. Tswɔ́ vód méré gbáʼ ŋkɔŋɔ ndáb náá. 4Mbénére, Zhʉ́da Mɔ́ŋ ŋgɔŋ Iskaryotə, cyó taʼ meŋkho Yěsô wɛ́ a kɛ ghɛ́ fí wé nɛ́, nsó ŋgâ: 5«A zhyɛ́ kɔ́ pe pé fí vód tswɔtwɔ́ yɔŋ ne kpǐ denyé yíkyéd, fɛ́ mbób pwó pɛ mbɔ́ŋmbɔŋ pɔɔ?» 6A kɛ ntsɔ́ néré kɛ́ʼɛ́ mbé pɛ́ɛ́ ŋgâ a kɛ tsǎ pɛ mbɔ́ŋmbɔŋ tsâ pó, ntsʉʼmbé ŋkyé ŋgâ a kɛ pɛ́ɛ́ taʼ gháŋamve. Njʉ́ kɛ tséʼé yé tséʼé Mɔ́ŋ pab mbób nɛ́, a nzwə́ə́ mbób yɛ́ pe kɛ ywʉ́ʼɔ́ pwó nɛ́. 7Yěsô ntsɔ́ pwó yé ŋgâ: «Tee wé! A zhyɛ́ kɛ́ʼɛ́ tsúŋɔ pfɔ̂ ya ne zhyémve yɛ́ pé náʼá niŋɛ́ ndzó syé nɛ́. 8A ké mbɛ puŋɛ mbɔ́ŋmbɔŋ ŋkɔŋɔ ŋkhoʼ náá. Ntsʉ́ʼŋgɛ́mbɛ ne mo, a ké mbé pɛ piŋi ŋkɔŋɔ ŋkhoʼ náá pó.» 9A kɛ ghɛmbɛ néré kɛ́ʼɛ́, mbǒ kɛ́rɛ́ pɛ Yúda kɛ zóʼ ŋgâ Yěsô yóʼó. Pɔ́b kɛ́ pé kʉ́yó ŋkyé ndaʼ Yěsô pó, ntsʉʼmbé ne njʉ̂ne Nǎzaro wɛ́ a kɛ zhʉyɛ́ wé ne vó nɛ́. 10Ndzyěne néré, pɛ ntsɛ́ssó ghaŋáshʉ́ sɛ́ɛ́ ne ŋgyɛ̌ne ŋgâ Nǎzaro ké mbó pfɔ́ yé. 11Ŋkyé ŋgâ a kɛ zhyɛ́ yé, záá pɛ Yúda kí wɔ́b, mbó ntíí ndzɔʼ yɔ́b pé mbəb Yěsô.
Yěsô kúŋɔ Yerʉ́salɛm njʉ́ fɔŋ nɛ́
(Mat 21:1-11; Máá 11:1-11; Lúk 19:28-40)
12Keemvé, pɔŋ zááme pɛ́ pɔ́b ke kʉ́yó ne ndebéne Pasəka nɛ́ zóʼ ŋgâ Yěsô tsé mbáŋa Yerʉ́salɛm. 13Pɔ́b tséé pɛ tsɛ́záŋ, ntwɔ́ ne ŋgúne ndɔ̂ wé. Pɔ́b kɛ́ yíʼɛ, ntsɔ́ ŋgâ: «Ozana! Mbúru pɛ mbəb ŋɔŋ wɛ́ a kʉ́yó ne tíí Ntsɛɛpɔŋ, fɔŋ pɛ Issayɛ nɛ́.» 14Yěsô zhʉ́ taʼ Mɔ́ŋ ŋkíŋ, ŋgɔ́rɔ́ ndúŋú yé, njʉ́ ŋwéʼé yáŋme tsɔ́ nɛ́: 15«Ndɛ mbɔ́ɔ́ kɛ Mɔ́ŋ Syɔŋ wé məŋgʉ́yé. Fɔŋ wo pé nɔŋ ŋkʉ́yó, a kɔ́ʼɔ́ Mɔ́ŋ ŋkíŋ!» 16A kɛ pɛ́ ne ndzyě yé, ŋgíŋgye pé, pé tsé ndzóʼó no yɛ́ a kɛ záʼá nɛ́ pó. Ntsʉʼmbé, ŋkhoʼyɛ́ Mboʼmvé kɛ fɛ́ ŋgúʼune pwó Yěsô nɛ́, tó yɔ́b fû ŋgâ no yéré ŋwéʼéme ŋkyé wé. A pó mbé kpaʼ yéré yɛ́ pe kɛ zhyɛ́ mbəb yé nɛ́. 17Ŋgɛ́ mbɛ néré, pɔŋ zááme pɛ́ pwɛ Yěsô kɛ pé ŋkhoʼyɛ́ a kɛ fû Nǎzaro, a twɔ́ ndzó sye, a zhʉyɛ́ wé ne vó nɛ́, kpê ntáŋ yé. 18A kɛ zhyɛ́ no yɛ́ pɔ́b kɛ zóʼ ŋgâ a zhyɛ́ péré shʉrɛ́no nɛ́, pɔ́b ghú ne ndɔ̌ne wé. 19Néré, pɛ Farízya tsɔ́ tsetsɛrɛ pɔ́b ŋgâ: «Puŋ zhʉ́ wé! Puŋ náʼá ŋkúʼɔ́ ne cyó yɔ́b pó. Puŋ zhʉ́ njʉ́ ŋkɔŋɔ pɔŋ náá ke ŋgǔ ndzəb yé nɛ́!»
Ŋɔŋ wɛ́ a zɔŋɔ faʼa pwó Yěsô nɛ́, a zɔŋɔ wé
20Pecyó pɛ Gerɛʼ kɛ ke kɔ́ʼɔ́ yɔ́b Yerʉ́salɛm ne ŋgúʼune Mboʼmvé zhyémve ndebéne Pasəka. 21Pɔ́b tsɔ́ pwó Filipo wɛ́ a kɛ pé ŋɔŋ Betsayida ndzó pɛ́rɛ́ ŋgɔŋ Galílya nɛ́, ŋgâ: «Ntsɛɛpɔŋ, psi zɔŋɔ njʉ́ Yěsô.» 22Filipo ghú ntsɔ́ pwó Andéré, pɔ́b pépáá ntsɔ́ pwó Yěsô. 23Yěsô pɔ́rɔ́ ne pɔ́b ŋgâ: «Ŋkhoʼ kúʼú, ŋkhoʼyɛ́ pé njʉ́ ghɛ́ɛ́ Mɔ́ŋ ŋɔŋ nɛ́. 24Kpaʼ sísíŋ, mə sə́ŋɛ́ wúŋ ŋgâ Mbéyɛ́ mbzí ŋgəsáŋ vɔ̂ syé mbé pfɔ̂ nɛ́ pó, mbǒ a ntsʉʼɔ ne ndúŋ yé. A pó Mbéyɛ́ a pfɔ̂ nɛ́, mbǒ a sáʼá ndzwɔ́ ntáá zááme. 25Ntsye ŋɔŋ wɛ́ a kʉyě tsómvé yé nɛ́, psyé psyé. Ntsʉʼmbé ntsyé ŋɔŋ wɛ́ a kʉyě Mboʼmvé nɛ́, ntsɛʼɛ tsómvé yé ndzó mvé yɔŋ nɛ́, ŋkʉ́yó ntsɛ́ʼɛ́ tsómve ŋeŋáŋ. 26A pɛ́ɛ́ yɛ́ ŋɔŋ zɔŋɔ faʼa ne mo nɛ́, a cʉ́ʼɔ́ ndzəb mo. Ywoʼ yɛ́ mə ghɛmbɛ́ nɛ́, ŋgaŋafaʼ ya ke mbɛ yé pe yóʼó. Ŋɔŋ wɛ́ a faʼa ne mo nɛ́, Tɛd náʼá fɛ́ ŋgúʼune pwó yé.
27A ne ŋkhoʼyɔŋ, pepáá ya tsé saŋa ya, mə mbó ntsɔ́ɔ́ ŋgâ kɔ́? Tɛd, zhyɛ́ yɔŋ ŋkhoʼmvé záʼ fáá tó ya. Ntsʉʼmbé mə kɛ ghaŋásyé kʉ́yó, ŋkyé yɔŋ ŋkhoʼmvé. 28Tɛd, ŋgúʼú tíí wo.» Néré, taʼ ndzəb twɔ́ pépéé ntsɔ́ ŋgâ: «Mə kɛ ŋgúʼú, ke mbó ŋgɛ́ náʼá ŋgúʼɔ ŋkʉ́rʉ́.» 29Pɔŋ pɛ́ pɔ́b kɛ pɛ yóʼó mbó ndzóʼ nɛ́, nsó ŋgâ: «A mbuŋ ŋkɔʼɔ.» Pecyó kɛ ntsɔ́ ŋgâ: «A nsó taʼ aŋgere nsó no pwó yé.» 30Ntsʉʼmbé Yěsô tsɔ́ ne pɔ́b ŋgâ: «Ndzəb yɔŋ zwɔ̌ ŋkyé páá pó, a zwɔ̌ ŋkyé wúŋ. 31Yɔŋ ŋkhoʼyɛ́ Mboʼmvé sabafiʼ mvémvé nɛ́, ŋkhoʼyɛ́ pe máʼá Sáʼmvé wɔŋ mvé nɛ́. 32Ŋgɛmbɛ ne mo, ŋkhoʼyɛ́ mə ŋkɔ́ʼɔ́ pépéé nɛ́, mə súú ŋkɔŋɔ pumésɔŋ náá fɛ́ ne ŋgə́ ya.» 33Yěsô kɛ záʼá ndúŋú nsó wéré, fúʼ zhí vó wɛ́ a kɛ ghɛ́ mpfɔ́ nɛ́. 34Pɔŋ pɔ́rɔ́ pwó yé ŋgâ: «Psi zéʼé ndzó kaŋ ŋgâ Kristo ke ŋkʉ́yó ntsǒ tsó. Wo zhyɛ́ níŋ ntsɔ́ ŋgâ a zɔŋɔ ŋgâ pe ŋkʉ́rʉ́ Mɔ́ŋ ŋɔŋ? Mɔ́ŋ ŋɔŋ wéré, a wɔ́?» 35Yěsô pɔ́rɔ́ ne pɔ́b ŋgâ: «Ŋkaʼmɔ́ɔ́ kɛ kɛ́rɛ́ tsetsɛrɛ puŋ ne mɔ́ŋtiʼa ŋkhoʼ. Puŋ nyi ŋkhoʼyɛ́ pǔŋ kɛ tsɛ́ʼɛ́ ŋkaʼ mɔ́ɔ́ nɛ́, kɛ́ʼɛ́ ŋgâ ndzə́ndzə́b ndɛ tsérɛ́ wúŋ. Ŋkyé ŋgâ ŋɔŋ wɛ́ a nyi ndzɔ́ʼɔ́ ndzə́ndzə́b nɛ́, zɛ́ ywoʼ yɛ́ a ghú nɛ́ pó. 36Ŋkhoʼyɛ́ puŋ kɛ tsɛ́ʼɛ́ ŋkaʼ mɔ́ɔ́ nɛ́, puŋ psyɛ́ wé, ne tsʉ́ʼne pɔ́ŋ ŋkaʼ mɔ́ɔ́.» Njʉ́ Yěsô kɛ nsó néré ne pɔ́b nɛ́, a túbú mbəb yé ndzɔ́ʼɔ́ pɔ́b, ŋgíbí.
Pɛ Yuda pé psyɛ́ Yěsô pó
37Mbɛ njʉ́ Yěsô kɛ zhyɛ́ pɛ shʉrɛ́meno síŋ pɔ́b kaʼatɛ nɛ́, pɔ́b pe ntíí ndzɔʼ yɔ́b mbəb yé pó. 38Kɛ́ʼɛ́ ŋgâ, no yɛ́ Ezaya, ŋgaŋatsɔ́kpaŋató Mboʼmvé kɛ nsó nɛ́ yúŋú. No yéré pɛ́ɛ́ ŋgâ: «Ntsɛɛpɔŋ, a kɛ psyɛ́ wɔ́ mbzyɛ́ no yɛ́, pe kɛ zóʼó ntswee psi nɛ́? Ntsɛɛpɔŋ kɛ pó nyoʼ tʉ̌ŋ mé pe pwó wɔ́?» 39Ezaya wéré ke mbó nsó no yɛ́ a zhyɛ́ ŋgâ kii pɔ́b ndɛ mbzyɛ́ nɛ́. A pɛ́ɛ́ ŋgâ: 40«A ffo míí mɔ́b, mbó shí ndzɔʼ yɔ́b, kɛ́ʼɛ́ ŋgâ kii pɔ́b ndɛ njʉ́ ne míí mɔ́b, kii pó tsé ndzóʼó ne ndzɔʼ yɔ́b, kii pó séd mbziʼe yɔ́b, mə ndáá ndúŋú mbɛ́d ghɔŋ yɔ́b!» 41Ezaya kɛ ntsɔ́ néré ŋkyé ŋgâ a kɛ pê zhʉ́ ghɛ́ɛ́ Yěsô, mbó ntsó no yé. 42A kɛ ghɛmbɛ néré, tsetsɛrɛ pɛ ntsɛ́ssó pɛ Yuda, záá wɔ́b psyɛ́ Yěsô. Ntsʉʼmbé, njʉ́ pɔ́b kɛ pɔ́ɔ́ ŋgâ pɛ Farízya ndzú wɔ́b ndántéré nɛ́, pɔ́b psyɛ́ ndzəb yɔ́b pe kɔ́ʼɔ́ nsó pó. 43A kɛ zhyɛ́ no yɛ́, pɔ́b kɛ kʉyě ghɛ́ɛ́ wɛ́ a twɔ́ pwó pumésɔŋ ntsɛ́ɛ́ wɛ́ a twɔ́ pwó Mboʼmvé nɛ́.
44A kɛ́ pé néré, Yěsô ncʉri ŋgâ: «Ŋɔŋ wɛ́ a tíí ndzɔʼ mbəb mo nɛ́, ntíí ndzɔʼ pe mbəb mo pó. Ntsʉʼmbé, a tíí ndzɔʼ pe mbəb ŋɔŋ wɛ́ a twɔ́ ya nɛ́. 45Ŋɔŋ wɛ́ a zhʉ́ ya nɛ́, kémbó njʉ́ ŋɔŋ wɛ́ a twɔ́ ya nɛ́. 46Mo wɛ́ mə ŋkaʼ mɔ́ɔ́ nɛ́, mə ŋkʉ́yó mvé pe ŋgâ ŋɔŋ wɛ́ a psyɛ́ ya nɛ́, ndɛ cʉ́ʼɔ́ ndzɔ́ʼɔ́ ndzə́ndzə́b. 47A pɛ́ɛ́ yɛ́ ŋɔŋ zóʼ nsó ya, mbé ntíí kpee ndúŋú nɛ́ pó, mbǒ a fiʼɛ mo fiʼɛ wé pó. Ŋkyé ŋgâ mə kɛ kʉ́yô ne fíʼne pumésɔŋ pó, mə kʉ́yô ne kpêne wɔ́b. 48Ŋɔŋ wɛ́ a máʼá ya, mbó mbé psyɛ́ nsó ya nɛ́ pó, kɛ tséʼé ŋgaŋasabafiʼ yé. A nsó wɛ́ mə kɛ nsó nɛ́ ŋgɛ náʼá fiʼɛ wé ne zhyémve njʉyǐndzəb. 49No yɛ́ mə nsó nɛ́ twɔ̌ pfɔ̂ mo pó, ntsʉʼmbé a nsó Tɛd ya wɛ́ a twɔ́ ya nɛ́, nsó wɛ́ mə́ ntsɔ̂ mbó ncʉ́rɛ́ nɛ́, twɔ̌ pwo yé. 50Mə mbó ndzé ŋgâ kaŋ mé, fɛ́ tsómvé ŋeŋáŋ. No yɛ́ mə ntsɔ́ nɛ́, mə ke ntsɔ́ɔ́ njʉ́ Tɛd ya tsɔ́ ne mo nɛ́.»
ទើបបានជ្រើសរើសហើយ៖
Zhâŋ 12: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
