Zhâŋ 14
14
A Yěsô mbé mɛndɔ́b ne ŋgǔne pfúŋɔ́ Mboʼmvé
1Yěsô ké mbó nsó ŋgâ: «Kii ndzɔʼ yuŋ ndɛ nteŋe. Puŋ psyɛ́ Mboʼmvé, mbó mbzyɛ́ ya ywoʼ. 2Ywoʼɔ́nsó záá ndáb Tɛd ya. A ghɛmbɛ pé pe néré pó, mbǒ mə mbó ŋgyɛ̌ níŋ nsó ŋgâ mə ŋgú tsúŋɔ́ ywoʼ yɛ́ puŋ ŋkʉ́yó ntsó nɛ́? 3Ŋkhoʼyɛ́ mə náʼá ŋgú ntsúŋɔ ywoʼ yéré ne puŋ nɛ́, mə mbód ndzəb ndɔ́ɔ́ wúŋ, kɛ́ʼɛ́ ŋgâ ywoʼ yɛ́ mə mbɛ́ nɛ́, puŋ kʉ́yó ke mbɛ́ yuŋ pe yóʼó. 4Ŋgɛ ŋkhú ne ywoʼ yɛ́ mə ŋgú nɛ́, puŋ zɛ́ mɛndɔ́b.» 5Tomâsə ntsɔ́ pwó Yěsô ŋgâ: «Ntsɛɛpɔŋ, psi ndzyě mbé zɛ́ ywoʼ yɛ́ wo ghú nɛ́ pó. Psi ndzɛ́ mɛndɔ́b pe níŋ?» 6Yěsô pɔ́rɔ́ pwó yé ŋgâ: «Mə mɛndɔ́b, mbé no sísíŋ, mbó mbé tsómvé. Tɛɛmbɛ, ŋɔŋ pe ghú pfúŋɔ́ Tɛd kii záʼá ne mo pó. 7A ghɛmbɛ́ puŋ zɛ́ ya, mbǒ puŋ ke ndzɛ́ Tɛd ya. Ndzyěne ŋkhoʼyɔŋ, pǔŋ ndzɛ́ wé, mbó njʉ́ wé.» 8Filipo tsɔ́ pwó yé ŋgâ: «Ntsɛɛpɔŋ, nyóʼ Tɛd ne psi, a kuʼu!» 9Yěsô pɔ́rɔ́ pwó yé ŋgâ: «A ke mbɛ piŋi féré mɛ́ zhyémve. Mbɛ néré, wo Filipo, wo pó mbé zɛ́ ya pó! Ŋɔŋ wɛ́ a zhʉ́ ya nɛ́, zhʉ́ Tɛd. A zhyɛ́ kɔ́ wo ntsɔ̂ ŋgâ: “Nyóʼ Tɛd ne psi”? 10Wo tsé mbé psyɛ́ ŋgâ mə mbɛ́ɛ́ pwó Tɛd, psi yé pó kpaʼ náá mbɛ́ɛ́ taʼ no pɔɔ? Meno pɛ́ mə ntsɔ́ ne puŋ nɛ́, twɔ̌ pfɔ̂ mo pó. A Tɛd wɛ́ a ne mo nɛ́, ŋgyɛ̂, mə faʼa kpaʼ faʼ pé. 11Puŋ tíí ndzɔʼ yuŋ mbəb mo, mə mbɛ́ɛ́ pwó Tɛd, psi yé pó kpaʼ náá mbɛ́ɛ́ taʼ no. Mbéyɛ́ puŋ tsé mbé psyɛ́ nsó ya nɛ́ pó, puŋ yǎ ndúŋú faʼ pe ké nɛ́ tséʼé psyɛ́ndzɔʼ. 12Kpaʼ sísíŋ, mə sə́ŋɛ wúŋ, ŋɔŋ wɛ́ a psyɛ́ ya ne taʼ ndzɔʼ nɛ́, ke ŋkʉ́yó faʼa yé pɛ faʼ pɛ́, mə faʼa nɛ́. Mbɛ, á ŋkʉ́yó faʼa pɛ faʼ pɛ a ntsɛ́ɛ́ páá nɛ́, ŋkyé ŋgâ mə ŋgǔ pfúŋɔ́ Tɛd. 13Ŋkɔŋɔ yɔ́b yɛ́ puŋ ŋkʉ́yó mbzírɛ́ pwó Tɛd ne tíí ya náá nɛ́, mə ŋkʉ́yó ŋgyɛ́. Néré, Mo wɛ́ mə Mɔ́ŋ nɛ́, yáá ndúŋú nyóʼó ghɛ́ɛ́ Tɛd. 14A pɛ́ɛ́ yɛ́ puŋ záʼá ndúŋú tíí ya mbziri yɔ́b ne mo nɛ́, mbǒ mə ŋgyɛ́.»
Kaʼ Zhʉye Yáŋme
15Yěsô kémbó nsó ŋgâ: «A pɛ́ɛ́ yɛ́ puŋ kʉyě ya nɛ́, mbǒ pǔŋ sáʼá tʉ̌ŋ nyi njʉ́ kaŋ máá tsɔ́ nɛ́. 16Néré, Mo ya, mə mbóʼmbwó pwó Tɛd. A fɛ́ cyó taʼ Ŋgebe ne puŋ, wɛ́ puŋ pɔ́b náʼ ke ntsǒ tsó nɛ́. 17A yé mbé Zhʉye yaŋmé. Á nyóʼó yé nyóʼó no sísíŋ. A yé wɛ́ pǔmvémvé kúʼɔ́ ne ŋgəyǐne wé nɛ́ pó, ŋkyé ŋgâ pɔ́b tsé mbé zhʉ́ faʼ pé pó, ké mbé zɛ́ wé pó. Ŋgɛmbɛ ne puŋ, pǔŋ zɛ́ wé ŋkyé ŋgâ a ke mbɛ́ɛ́ ne ŋgə́ yuŋ, mbó ŋgɛmbɛ mbəb puŋ. 18Mə náʼá ntee wúŋ puŋ pe pɔ́ŋntsé pó. Mə ŋkʉ́yó pfúŋɔ́ puŋ. 19A tsʉʼ mɔ́ŋtiʼa ŋkhoʼ, pǔmvémvé pó mbé tsé njʉ́ ya ŋkʉ́rʉ́ pó. Ntsʉ́ʼmbɛ ne puŋ, puŋ ŋkʉ́yó njʉ́ ya ŋkyé ŋgâ mə mɔ́b, kɛ́ʼɛ́ ŋgâ puŋ naʼ náá ndúŋú, ke ntsó yuŋ mvé. 20A náʼá mbɛ zhyémve yéré, puŋ zé ŋgâ psi Tɛd ya ke mbɛɛ taʼ no, puŋ pó mbɛ ne mo, mə mbó mbɛ ndzó ndzɔʼ yuŋ. 21Ŋɔŋ wɛ́ a zóʼ kaŋ máá mbó nyí njʉ́ a zɔŋɔ nɛ́, a yé mbé ŋɔŋ wɛ́ a tsé kʉyě ya nɛ́. Ŋɔŋ wɛ́ a kʉyě ya nɛ́, mbǒ Tɛd ya kʉ́yé yé ywoʼ. Ŋgɛ ŋkhú ne mo, mə mbó kʉ́yé wé, mbó nyóʼ mbəb ya pwó yé.»
22Zhʉʉdə, mbó mbe pɛ́ɛ́ Zhʉ́da Mɔ́ŋ ŋɔŋ Iskaa pó, psirɛ́ wé ŋgâ: «Ntsɛɛpɔŋ, a mbɛ́ɛ́ níŋ wo nyóʼ mbəb wo ne psi, ŋgɛ mbé nyóʼó pwó pǔmvémvé pɔɔ?» 23Yěsô pɔ́rɔ́ pwó yé ŋgâ: «A pɛ́ɛ́ yɛ́ ŋɔŋ kʉyě ya nɛ́, a nyí njʉ́ nsó ya psirɛ́ nɛ́, mbǒ Tɛd ya ŋkʉ́yé wé. Psi yé kʉ́yó pfúŋɔ́ yé, ntɛŋɛ ywoʼɔ tsó zhí ndzó ndzɔʼ yé. 24Ŋɔŋ wɛ́ a kʉyě ya nɛ́ pó, tsé mbé nyí njʉ́ nsó ya psirɛ́ nɛ́ pó. Ntsʉʼŋgɛmbɛ, nsó wɔŋ wɛ́ puŋ zóʼó nɛ́, twɔ́ pfɔ̂ mo pó, a ke twɔ̌ pwó Tɛd ya, wɛ́ a twɔ́ ya nɛ́. 25Mə ŋgɛ́ ntsɔ́ meno pekénɛ́ kɛ́ʼɛ́, kɛ kɛrɛ pfúŋɔ́ puŋ. 26Ŋgebe, Zhʉye Yáŋme wɛ́ Tɛd náʼá twɔ́ ne tíí ya nɛ́, ŋkʉ́yó ndzéʼé wúŋ ne ŋkɔŋɔ meno náá, ŋgɛ mbó ŋgyɛ́ tó yuŋ pó fû ndúŋú ŋkɔŋɔ meno pɛ́ mə ntsɔ́ ne puŋ náá nɛ́. 27Mə ntee mbúru nɛ́ ne puŋ, mə fɛ́ mbúru ya ne puŋ. Mə fɛ́ nɛ́ ne puŋ pe njʉ́ mvémvé nɛ́ pó! Ndzɔʼ yuŋ ndɛ ntéŋé, kii pó tsé mbɔɔ. 28Puŋ kɛ zóʼ, mə mbó ntsɔ́ ne puŋ ŋgâ: “Mə ŋgu kaʼa, mbɔ́rɔ́ ŋkʉ́yó pfúŋɔ́ puŋ.” A pɛ́ɛ́ yɛ́ pǔŋ kʉ́yé ya nɛ́, mbǒ puŋ ndebɛ́ ne no yɛ́ mə ŋgǔ pfúŋɔ́ Tɛd nɛ́, ŋkyé ŋgâ Tɛd ntsɛ́ɛ́ ya. 29Mə ntsɔ́ ne puŋ ŋkhoʼyɔŋ ŋkɔ́ŋ, no yéré pɔ́rɔ́ mbáŋá. Néré ŋgâ ŋkhoʼyɛ́ a mbáŋá nɛ́, puŋ tséʼé psyɛ́ndzɔʼ mbəb mo. 30Ndzyěne ŋkhoʼyɔŋ, piŋi mbó ke tséʼé nsó pó, ŋkyé ŋgâ Sáʼmvé wɔŋ tsé ŋkʉ́yó. A sísíŋ ŋgâ a tséʼé cyó tʉ̌ŋ ne ŋgyɛ̌ne cyó no mbəb mo pó, 31ntsʉʼmbé, mbziʼe yɛ́ a ŋkʉ́yó mbɛ nɛ́, mvémvé ŋkʉ́yó n zɛ́ ŋgâ mə kʉ́yé Tɛd ya, ké mbó faʼa njʉ́ Tɛd ya tsɔ́ ne mo nɛ́. Puŋ ŋǎ syé, piŋi ghú!»
ទើបបានជ្រើសរើសហើយ៖
Zhâŋ 14: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
