Galato 3
3
Mboʼmvé yáá ndúŋú psyɛ́ndzɔʼ ŋgyɛ̂ shʉrɛ́meno
1Óóʼ! Puŋ pɛ Galato, pɛ kiitó! A kɛ́ púrú wɔ̂ mbúrɔ́ wúŋ! Puŋ pɛ́ pe tsʉʼ kɛ zhyɛ́ ndzɔ́ʼɔ́ Ŋkəŋ sʉ́ʼʉ wɛ́ pe kɛ cʉrí nɛ́, puŋ zhʉ́ Yěsô Kristo wéré wɛ́ pé kɛ kpǐ wé ndúŋú ŋgʉŋʉ nɛ́? 2Puŋ cʉ̌yi ŋgyɛ tó ya yáŋa ndúŋú yɔŋ no: a kɛ́ zhyɛ́ no yɛ́ puŋ kɛ tíí kpee yuŋ ndúŋú kaŋ nɛ́ ŋkɔ́ŋ, puŋ pɔ́rɔ́ ntsɛ́ʼɛ́ Zhʉye Yáŋme? Kii a kɛ zhyɛ́ no yɛ́ puŋ kɛ́ zóʼ Nsó Mboʼmvé, ntséʼé psyɛ́ndzɔʼ nɛ́? 3Pǔŋ táŋá mbé pɛ kiitó pe kaʼa? Puŋ pɛ́, puŋ kɛ zyé ne Zhʉye Yáŋme nɛ́, a pó mbɛ́ɛ́ niŋ ŋkhoʼyɔŋ, puŋ zɔŋɔ mbó méé ne tʉ̌ŋ ndúŋú múŋ? 4Ŋkɔŋɔ meno péré pɛ́ puŋ kɛ́ zaʼá ndzóʼó náá nɛ́ kɛ pɛ́ɛ́ ndzəndzoʼ? Tɛɛmbɛ a ghaŋásyé ké mbé pɛɛ ndzəndzoʼ pó. 5Mboʼmvé wɛ́ a fɛ́ Zhʉye Yáŋme ne puŋ, mbó ŋgyɛ̂ pɛ shʉrɛ́meno tsetsɛrɛ puŋ nɛ́, a zhyɛ́ néré kɛ́ʼɛ́ ŋkyé ŋgâ puŋ tíí kpee yúŋ ndúŋú kaŋ? Kii a zhyɛ́ néré kɛ́ʼɛ́ ŋkyé ŋgâ pǔŋ kɛ zóʼ Nsó yé, ntséʼé psyɛ́ndzɔʼ?
A zhyɛ́ mvyébne kaŋ ŋɔŋ pɛ́ ŋugerɛ́ŋged pó
6Njʉ́ Ábraham kɛ́ tséʼé psyɛ́ndzɔʼ mbəb Mboʼmvé, á yɔ̌ wé njʉ ŋuŋgerɛ́ŋged nɛ́, 7puŋ yáá nɛ́ ndúŋú ndzóʼó ŋgâ: a pɔŋ pɛ́ pɔ́b tséʼé psyɛ́ndzɔʼ nɛ́, mbé pɔ́ŋ Ábraham. 8Ŋkʉ́rʉ́, Ŋweʼe yáŋme tsɔ́ ŋgâ, njʉ́ a kɛ ghɛ́ ŋgyɛ́ psyɛ́ndzɔʼ, Mboʼmvé tiŋɛ́ pɔŋ pɛ́ pɔ́b pɛ́ Yúda nɛ́ pó, njʉ́ puŋgerɛ́ŋged nɛ́, a yód cʉri ŋkəŋ sʉ́ʼʉ yɔŋ pwó Ábraham ŋgâ: «Mboʼmvé náʼ ndâ mbəb wo, ŋkɔŋɔ mvémvé náá tséʼé mbúru.» 9Néré kɛ́ʼɛ́, pɔŋ pɛ́ pɔ́b tséʼé psyɛ́ndzɔʼ nɛ́, Mboʼmvé níŋí mbúru mbəb pɔ́b pwɛ Ábraham, ŋgaŋa psyɛ́ndzɔʼ. 10Pɔŋ pɛ́ ŋkɔŋɔ yɔ́b no náá, ke mbɛɛ no ŋgúʼune kaŋ nɛ́, ndɔŋ tó pɔ́b. Ŋkyé ŋgâ a ŋweʼéme ŋgâ: «Ndɔŋ tó ntsyé ŋɔŋ wɛ́, a tsé mbé nyí ŋkɔŋɔ zhyémve náá, njʉ́ ŋkɔŋ meno pɛ́ a ŋweʼéme ndzó ŋweʼe kaŋ náá nɛ́, ntsɔ́ nɛ́ po!» 11Piŋi cʉ̌yi ndzé náá ŋgâ, ŋɔŋ tsé mbé záʼá ndúŋú kaŋ, mbó mbɛ́ ŋugerɛ́ŋged siŋi Mboʼmvé pó. Ŋkyé ŋgâ, ŋɔŋ wɛ́ a zhyɛ́ psyɛ́ndzɔʼ, a pɛ ŋgerɛ́ŋged nɛ́, a tsó mvé. 12Tsʉ́ʼŋgɛmbɛ, psyɛ́ndzɔʼ pú kaŋ ndɛ mbé tɔ́bɔ kpěnsenyi pó. Ŋgɛ́ ŋkhú ne kaŋ, ŋɔŋ wɛ́ a cʉ̌yi nyí njʉ́ kaŋ tsɔ́ nɛ́, kaŋ méré ŋkʉ́yó ŋgyɛ́, ŋɔŋ wéré tséʼé tsómvé. 13Kristo kɛ́ péé ne tsómvé yé, ne ntúbune ndɔŋ yɛ́ kaŋ kɛ́ níŋɛ tó piŋi nɛ́. A kɛ séd tsʉʼ ŋgaŋandɔŋ ne tó yiŋi, ŋkyé ŋgâ a ŋwéʼéme ŋgâ: «Ndɔŋ tó ŋɔŋ wɛ́ a ghɛ̂ pfɔ́, ŋkǒdŋkôd nɛ́.» 14Néré kɛ́ʼɛ́ ŋgâ mbúru yɛ́ a kɛ́ pɛ́ mbəb Ábraham nɛ́, nyí kaʼatɛ mbɛ́rɛ́ pɔŋ pɛ́ pɔ́b pɛ Yúda nɛ́ pó, ne tíí Yěsô Kristo. Ndâ ndúŋú kɛ́ʼɛ́ ŋgâ, psyɛ́ndzɔʼ yɛ́ piŋi tséʼé nɛ́, zhyɛ́, piŋi tséʼé Zhʉye Yáŋme yɛ́ Mboʼmvé kɛ kaʼ nɛ́.
A mbɛ́kɔ́ mbé ndǎndáb Ábraham
15Pɔ́ŋmɛ́ páá, piŋi yɔɔ fuʼno njʉ́ pumésɔŋ zhyɛ́ nɛ́. Ŋkhoʼyɛ́ ŋɔŋ ghɛ́ mpfɔ́ ntee no yé nɛ́, a pɛ́ɛ́ yɛ́ a cʉ̌yi nteŋé nɛ́, mbǒ tɛɛmbɛ ŋɔŋ pe túbú no ndúŋú kii ŋgâ mvíí cyó no ndúŋú pó. 16Ɔ́ŋɔ́! Kaʼ kɛ́ pɛ́ɛ́ pwó Ábraham pwɛ ndǎ ŋɔŋ yé. Pe kɛ́ pe tsɔ̌ ŋgâ: «Pwɛ ndâ ŋumesɔŋ» pó, njʉ́ a kɛ ghɛ̂ mbɛ́ɛ́ pwó puzááme nɛ́! Ntsʉʼmbé, a kɛ́ pɛ́ɛ́ pwó ndaʼ taʼ ŋɔŋ pú ndǎndáb ye! Ndǎndáb yéré, a Kristo. 17Kpaŋató ya pe nɔŋ: taʼ no yóʼó yɛ́ Mboʼmvé kɛ́ pě cʉ̌yi ntəŋé ntíí nɛ́. Kaŋ ghɛ́ mbɛ́, mbǒ kpii ŋgǒʼmvé yíkwa ne ghúbmekyéd kɛ záʼ. Tɛɛmbɛ, kaŋ yéré pé kʉ́yó mbóó wé pó. Mbǒ kaʼ kɛ́ syɛ́ mbɛ́ɛ́ ndzəndzoʼ. 18Ŋkyé ŋgâ a pɛ́ɛ́ yɛ́, pé zaʼa ndúŋú kaŋ mbɔ́rɔ́ ntsɛʼɛ mbɛd nɛ́, mbǒ a kaʼ ŋkʉ́rʉ́ pó. Ŋgɛmbɛ, Mboʼmvé kɛ́ záʼá ndúŋú kaʼ mbɔ́rɔ́ fɛ́ foʼndzəndzoʼ ye pwó Ábraham. 19Néré kɛ́ʼɛ́, kaŋ kɛ́ kʉ́yó zhyɛ́ kɔ́ nɛ́? Mboʼmvé kɛ pfíí wé kɛ́ʼɛ́, ne ŋgyɛ̌ne ŋgâ shǎŋane twɔ́ tétáá, ŋgɛ tsé ndzwəʼɛ ndǎndáb yɛ́, kaʼ kɛ pé yé nɛ́. A kɛ zhyɛ́ pɛ aŋgere, pé zé kaŋ yéré, ŋgɛmbɛ, taʼ ŋɔŋ pɛ njʉ́ tɛdmandɔ́b nɛ́. 20Tɛdmandɔ́b ndɛ tsɛʼɛ ghebe pe ŋkhoʼyɛ́ no tiŋɛ́ pɔŋ pépáá nɛ́. Ábraham kɛ pɛɛ ne ndúŋ ye ŋkhoʼyɛ́ Mboʼmvé kɛ fɛ́ yéré kaʼ pwó ye nɛ́. 21Yéré no zɔŋɔ ntsɔ̌ ŋgâ kaŋ tsyɛ́ pú kaʼ Mboʼmvé pɔɔ? Ŋgáŋ! Tɛɛmbɛ a naʼ mbé pe néré po! Ŋkyé ŋgâ a pɛ́ɛ́ yɛ́, pe kɛ fɛ́ taʼ kaŋ pwó ghaŋápsyɛ́ndzɔʼ, a kúŋɔ́ ne fɛ́ne tsómvé ne pɔ́b nɛ́, mbǒ a náʼá ŋgyɛ́ kaŋ yéré, Mboʼmvé tiŋɛ́ wɔ́b njʉ́ puŋgerɛ́ŋged nɛ́. 22Ntsʉʼmbé, Ŋweʼe yáŋme zhyɛ́, ŋkɔŋɔ pɔŋ náá zé ŋgâ kəpɔŋ kpaʼ ŋkúrɔ́ wɔ́b náá, kɛ́ʼɛ́ ŋgâ kaʼ yɛ́ Mboʼmvé kɛ́ kaʼ nɛ́, yúŋɔ́ ndzó tsómvé pɔŋ pɛ́, pɔ́b tséʼé psyɛ́ndzɔʼ mbəb Yěsô Kristo nɛ́.
23Psyɛ́ndzɔʼ kɛ ghɛ̂ ŋkʉyo, kaŋ kúrɔ wíŋi kaʼatɛ piŋi syɛ̂ njʉ̌ ŋgəʼo, tsé ndzwəʼɛ zhyémve yɛ́ psyɛ́ndzɔʼ kɛ ghɛ́ nyóʼó mbəb yé nɛ́. 24Néré kɛ́ʼɛ́, a kɛ́ psibɛ kaŋ mbzyɛbɛ wíŋi, ŋgɛ́ tsé ndzwəʼɛ Kristo, kɛ́ʼɛ́ ŋgâ psyɛ́ndzɔʼ zhyɛ́ piŋi pe ŋgerɛ́ŋged siŋi Mboʼmvé. 25Kɛ́ʼɛ́, njʉ́ psyɛ́ndzɔʼ kɛ páŋ nɛ́, a pó mbé mvibɛ kaŋ Mǔsê yéré mvibɛ wíŋi ŋkʉ́rʉ́ pó. 26Ŋkyé ŋgâ, ŋkɔŋɔ wuŋ náá, puŋ yǎ ne psyɛ́ndzɔʼ yɛ́ puŋ tsɛʼɛ ne tíí Yěsô Kristo nɛ́, mbé pɔ́ŋ Mboʼmvé. 27Ɔ́ŋɔ́! Ŋkɔŋɔ wúŋ wɛ́ puŋ kɛ kpênse ne tíí Kristo nɛ́, mbziʼe yé pɛ́ mbəb puŋ nɛ́ njʉ́, pɔŋ ndɛ ndɔ̂ ndzwé máʼá mbəb pɔ́b nɛ́. 28Cyó no yóʼó ŋgâ, cyó ŋɔŋ pɛ́ɛ́ ŋuyúda kii ŋúgerɛʼ pó, kii ŋgâ mkpaŋ, kii ŋgâ ŋuyʉŋíme pó. Cyó no yóʼó ŋgâ, cyó ŋɔŋ pɛ́ɛ́ ŋúmbzi kii ŋgâ məŋgʉ́yé pó, ŋkyé ŋgâ, ŋkɔŋɔ wúŋ náá, puŋ kaa náá mbɛ́ɛ́ taʼye, ne tíí Yěsô Kristo. 29A pɛ́ɛ́ yɛ́ puŋ pɛ́ɛ́ pǔkristo nɛ́, mbǒ puŋ ne ndǎndáb Ábraham. Mbziʼe njʉ́ Mboʼmvé kɛ kaʼ nɛ́, a ŋkʉ́yó fɛ́ foʼ ye ne puŋ.
ទើបបានជ្រើសរើសហើយ៖
Galato 3: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល