Galato 4
4
Ŋɔŋ wɛ́ a psyɛ́ Yěsô Kristo nɛ́, a ke mbɛ́ yé pé mɔ́ŋ Mboʼmvé
1Yɔŋ ya kpaŋató: ŋkhoʼyɛ́ ndzóndáb kɛ kɛrɛ mɔ́ŋ nɛ́, yé wɛ́ a ntsɛ́ssó ndúŋú ŋkɔŋɔ yɔ́b náá nɛ́, pú mkpaŋ no yípáá pó. 2Ntsʉʼmbé a tsɛ́ʼɛ́ ne ndzóʼne pwó pɔ́ŋ pɛ́ pɔ́b tʉ̌ wé, mbó ntsúŋɔ meno pé nɛ́, kaʼatɛ mbáŋ zhyémve yɛ́, tɛd yé kɛ tíí nɛ́. 3Ntsʉ́ŋtsʉ́ŋ njʉ́ piŋi nɛ́. Ŋkhoʼyɛ́, piŋi kɛ pé pɛ mɔ́ŋ, a sáʼá meno pɛ́ a ndzó mvé yɔ́ŋ, sáʼá pɔŋ, mbó sáʼá wíŋi nɛ́, piŋi kɛ pé pɛ mkpaŋ. 4Ntsʉ́ʼmbɛ njʉ́ ŋkhoʼ kɛ kuʼú nɛ́, Mboʼmvé twɔ́ Mɔ́ŋ Yé, taʼ məŋgʉ́yé pfɛ́ wé, a nyi njʉ́ kaŋ tsɔ́ nɛ́, 5yânéré ŋgâ a zhyɛ́, pɔŋ pɛ́ kaŋ kɛ kurɔ́ wɔ́b nɛ́, pɔ́b tsó ywiŋíme, kɛ́ʼɛ́ ŋgâ piŋi tsʉ́ʼ pɔ́ŋ Mboʼmvé pe mírɛmírɛ. 6Ŋgɛ́ khú ne puŋ, puŋ ké ghɛmbɛ́ yúŋ kpaʼ pɔ́ŋ pé sísíŋ. A zhyɛ́ yéré, Mboʼmvé twɔ́ Zhʉye Mɔ́ŋ yé ndzó ndzɔʼ yiŋí, a ghéʼe ŋgâ: Aba, kě tsi pɛ́ɛ́ ŋgâ, Tɛd! 7Néré kɛ́ʼɛ́, wo pó nɛ́ mbé pé mkpaŋ ŋkʉ́rʉ́ pó, wo tsʉ́ʼ Mɔ́ŋ. Njʉ́ wo Mɔ́ŋ nɛ́, wo ke ghɛmbɛ́ yo pé ndzóndáb. A faʼ yɛ́ nɛ́, Mboʼmvé faʼa nɛ́.
Pɔ́lə tsúŋí ŋkyé pɛ Galato
8A kɛ pɛ́ ssəsó, ŋkhoʼyɛ́ puŋ kɛ pé zɛ́ Mboʼmvé nɛ́ pó, puŋ pé pɛ mkpaŋ pwó pecyó mɔ́b pɛ́, pɔ́b kɛ zyé mbé pé, pɛ Mboʼmvé nɛ́ pó. 9Ntsʉʼmbé, ŋkhoʼyɔŋ njʉ́ puŋ zɛ́ Mboʼmvé nɛ́ -piŋi ntsɔ̂ ŋgâ njʉ́ Mboʼmvé zɛ́ wúŋ nɛ́- tɛɛmbɛ puŋ pó ŋgyɛ́ɛ́ níŋ, ndɔ̂ kpee múŋ mbódndzəb nuŋ ne tsʉ́ʼne pɛ mkpaŋ ŋkʉ́rʉ́ pwó mɔ́b pɛ́, pɔ́b tséʼé cyó tʉŋ pó, kii pó ntséʼé cyó ghebe ne puŋ nɛ́? 10Pǔŋ ghuʼɔ pecyó zhyémve, né pecyó pénab, nné pɛ ŋgabmvé pwɛ pecyó pɛ ŋgǒʼmvé, kaʼatɛ kii shaŋa. 11Pǔŋ zhyɛ́, mə mbɔ́ɔ́ ŋgâ mə kɛ fáʼa ne puŋ pe ndzəndzoʼ!
12Mə mbóʼómbwó ne puŋ kɛ pɔ́ŋmɛ́ páá, puŋ tséʼé ya mbziʼe, ŋkyé ŋgâ mə kɛ séd mbɛ njʉ́ puŋ nɛ́. Puŋ vɔ́ cyó no mbəb mo pó. 13Puŋ cʉ̌yi ndzé ŋgâ a kɛ zhyɛ́ ghɔŋ mə ncʉri Ŋkəŋ sʉ́ʼʉ ne puŋ ne sɔ́ kɛɛ. 14Mbɛ njʉ́ ghɔŋɔ ya kɛ fɛ́ faʼ ne puŋ kaʼatɛ nɛ́, pǔŋ kɛ pé nyáŋa pó, ke mbó mbé máʼá pó. Pǔŋ kɛ pó ndɔ́ɔ́ ya pé njʉ́ taʼ aŋgere Mboʼmvé nɛ́. Pǔŋ kɛ pó ndɔ́ɔ́ ya pé njʉ́ Yěsô Kristo nɛ́. 15Puŋ tsʉ́ʼ ndebéne mɛ́ pǔŋ kɛ tséʼé nɛ́ pɛ́ɛ́? ŋkyé ŋgâ mə zé faʼ sʉ́ʼʉ yɛ́, a kɛ ghɛ̂ tɛɛmbɛ puŋ fáʼ nɛ́. A kɛ pɛ́ɛ́ mbɛ ne tubúne mbzítíí yuŋ fɛ́ ne mo, mbǒ pǔŋ kɛ ké túbu túbu fɛ́. 16Ne ŋkhoʼyɔŋ, mə ntsʉʼ ŋgaŋakəpeŋe wuŋ, ŋkyé ŋgâ mə nsó no sísíŋ ne puŋ nɛ́?
17Zyaŋámbəb yekénɛ́ pɔ́b tséʼé ŋkyé wuŋ nɛ́, yáŋ pó. No yɛ́ pɔ́b taʼa nɛ́, pɛ́ɛ́ ne fǎne wúŋ mbəb mo, kɛ́ʼɛ́ ŋgâ puŋ ntséʼé zyaŋámbəb ŋkyé wɔ́b. 18A pǔ ŋgâ, zyaŋámbəb pé yáŋme. Mbé pɛ́ɛ́ ndaʼ ŋkhoʼyɛ́ mə kɛ pɛ́ tsetsɛrɛ puŋ nɛ́ pó, ntsʉʼmbé, mbɛ́ɛ́ ŋkɔŋɔ ŋkhoʼ náá. 19Pɔ́ŋtiʼa pɔŋ páá, mə ke mbó tsé njʉ́ ŋgəʼo, njʉ́ məŋgʉ́yé ndɛ mvɛ nɛ́ ŋkʉ́rʉ́, ŋkyé wuŋ, néré kɛ́ʼɛ́ kaʼatɛ mbáŋa ŋkhoʼyɛ́ puŋ sɛ́rɛ́ purúme kaʼatɛ mbɛ́ njʉ́ Kristo zɔŋɔ nɛ́. 20Ooʼ! A zhyɛ́ kɔ́, mə mbé pɛ́ pfúŋɔ́ puŋ ŋkhoʼyɔŋ pɔɔ? Mbǒ mə ndzɛ́ njʉ́ mə ntsɔ́ ne puŋ nɛ́, ŋkyé ŋgâ tó ya tsé mváʼá ŋkyé wúŋ.
Fuʼno mbəb Agaa pú Sara
21Puŋ sɔ́ŋɔ́ ya, puŋ pɛ́ puŋ zɔŋɔ a sáʼá kaŋ sáʼá wuŋ nɛ́, puŋ tsé mbé zóʼó no yɛ́ kaŋ yéré ntsɔ́ nɛ́ pɔɔ? 22A ŋwéʼéme ŋgâ: Ábraham kɛ tséʼé pɔ́ŋ pé pépáá, taʼ ye, a pfé pú məŋgʉ́yé mkpaŋ, cyó pé pú məŋgʉ́yé wɛ́ a kɛ pe pé mkpaŋ nɛ́ pó. 23Ntsʉʼmbé, mɔ́ŋ wɛ́ pú məŋgʉ́yé mkpaŋ kɛ pfé nɛ́, pe kɛ pfɛ́ wé pe njʉ́ ŋumesɔŋ ndɛ ŋkʉyê mvɛ mɔ́ŋ nɛ́. Wé məŋgʉ́yé wɛ́ a kɛ pe pé mkpaŋ nɛ́ pó, a pe wé kaʼ, wɛ́ Mboʼmvé kɛ kaʼ nɛ́. 24Meno péré kɛ́ʼɛ́, fuʼno nɛ́ yípáá. Pěŋgyé pɔ́ŋ ghɛmbɛ nɛ́ kɛ́ʼɛ́, mbé mbziʼe gbɛ́rɛ́ kaŋ yípáá. Ntsyó twɔ̌ ndúŋú ŋkə́ŋ Sinayi, mvɛ́ yé pé pɛ mkpaŋ. Á Agaa nɛ́. 25Ŋkyé ŋgâ ŋkə́ŋ Sinayi pɛ́ɛ́ ndzó ŋgɔŋ Arabya. Agaa pe nɛ́ pé njʉ́ Yerʉ́salɛm yɛ́ a ŋkhoʼyɔŋ nɛ́, ŋkyé ŋgâ pwɛ pɔ́ŋ pé kaa náá mbɛ́ɛ́ pɛ mkpaŋ. 26Ntsʉʼmbé Yerʉ́salɛm yɛ́ a twɔ́ pépéé nɛ́, a mkpaŋ ŋkʉ́rʉ́ pó, a yé mbé mɛ́ wíŋi. 27Ŋkyé ŋgâ a ŋweʼéme ŋgâ:
Wo wɛ́ wo zíŋ nɛ́, wo wɛ́ wo kaa kɛ pfɛ́ nɛ́ pó, tséʼé ndebéne.
Wo wɛ́ wo kɛ pé tséʼé zúʼúpfé nɛ́ pó, sáʼá yo pe ne ghʉye.
Ŋkyé ŋgâ pɔ́ŋ məŋgʉ́yé wɛ́ ndwɔ́ yé kɛ máʼá wé nɛ́, záá kaʼatɛ,
ntsɛ́ɛ́ pɔ́ŋ məŋgʉ́yé wɛ́ a tséʼé ndwɔ́ yé nɛ́.
28Pɔ́ŋmɛ́, ŋgɛ́ ŋkhú ne puŋ, pǔŋ ké ghɛmbɛ́ yuŋ pe pɔ́ŋ pɛ́ Mboʼmvé kɛ kaʼ nɛ́, njʉ́ Izaʼ nɛ́. 29Njʉ́ ŋɔŋ wɛ́ pé pfɛ́ wé njʉ́ pumésɔŋ pfɛ́ ŋɔŋ nɛ́, ŋǎ syé máʼá ŋɔŋ wɛ́ pé pfɛ́ wé ne Zhʉye nɛ́, a ké mbé ntsʉ́ŋtsʉ́ŋ no yɛ́ nɛ́, a tsé ndzáʼa ŋkhoʼyɔŋ nɛ́. 30Ŋweʼe yáŋme tsɔ́ɔ́ ŋgâ kɔ́? Zú məŋgʉ́yé mkpaŋ pú mɔ́ŋ yé, ŋkyé ŋgâ a tsé mbé zɔŋɔ ŋgâ, mɔ́ŋ məŋgʉ́yé mkpaŋ pú mɔ́ŋ məŋgʉ́yé wɛ́ a mkpaŋ nɛ́ pó, ndzóndáb pó. 31Néré kɛ́ʼɛ́ kɛ pɔ́ŋmɛ́, piŋi pɛ́ yíŋi pe pɔ́ŋ məŋgʉ́yé mkpaŋ pó, ntsʉʼmbé piŋi pɛ́ɛ́ pɔ́ŋ məŋgʉ́yé wɛ́ a mkpaŋ nɛ́ pó.
ទើបបានជ្រើសរើសហើយ៖
Galato 4: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល