Galato 2
2
Zhakə, Pětro pú Zhâŋ tséʼé taʼ ntswee pú Pɔ́lə ndúŋú Ŋkəŋ sʉ́ʼʉ
1Ŋkʉ́rʉ́, ŋkhoʼyɛ́ ntsɔ̌b ŋgǒʼmvé yíkwa kɛ záʼ nɛ́, mə mbó ŋkɔ́ʼɔ́ Yerʉ́salɛm psi Baanabasə. A kɛ kɔ́ʼ psyɛ́ Titə. 2Mə kɛ ghɛ̂ kɔʼɔ yóʼó kɛ́ʼɛ́, a zhyɛ́ no yɛ́ Mboʼmvé kɛ nyóʼó ne mo nɛ́. Mə mbó ŋgyɛ́ pɔ́b zóʼ Ŋkəŋ sʉ́ʼʉ yɛ́ mə kɛ cʉ́rɛ pwó pɔŋ pɛ́, pɔ́b kɛ́ pé pé pɛ́ Yuda nɛ́ pó. Mə kɛ ké mbó ntsɔ́ɔ́ yéré ne mbaʼá, pwó pɔŋ pɛ́ pɔ́b kɛ pɛ́ tsetsɛrɛ pǔkristo, pé fɛ́ ŋgúʼune ne pɔ́b zááme nɛ́. Mbɔ́ɔ́ ŋgâ faʼ yɛ́ mə kɛ yɔ̌ ŋgəʼo faʼ nɛ́, kii yɛ́ mə yɔ̂ ŋgəʼo ndúŋú ŋkhoʼyɔŋ nɛ́, ndɛ mbɛ́ɛ́ ndzəndzoʼ. 3Ntsʉʼmbé pé pé ziʼɛ́ Titə ŋgaŋákpee ya, wɛ́ a kɛ pé ŋɔŋ Gerɛʼ nɛ́, ŋgâ pe psirɛ́ wé pó. 4Mbɛ njʉ́ fɛ̌pɔ́ŋmɛ́ kɛ pɛ tsetsɛrɛ psi, ndzɔŋɔ ŋgâ pe psirɛ wé nɛ́. Pɔ́b kɛ kúŋ néré tsetsɛrɛ psi kɛ́ʼɛ́, pé ne mkpeʼéne ywí, njʉ njʉ́ psi pɛ́ mkpaŋ nɛ́ pó, mbó ŋgyɛ́ psi tsʉʼ pɛ mkpaŋ ne no kaŋ pɛ Yuda. A tsʉʼ kɛ́ túbú Yěsô Kristo ntúbɔ́ ywí ndzɔ́ʼɔ́ mkpaŋ yéré 5Psi kɛ pé psyɛ́ ndzóʼó ne pɔ́b pó. Mbɛ mɔ́ŋtiʼa ŋkoʼyɛ́ psi pɔ́b kɛ nsó ndzóʼ nɛ́, kɛ pe pɛ́ yóʼó pó, yânéré ŋgâ ŋgerɛ́ŋged yɛ́ ndzɔ́ʼɔ́ Ŋkəŋ sʉ́ʼʉ nɛ́, kʉ́yó mbɛ ne puŋ. 6Ntsʉʼmbé, ŋgɛ́ ŋku ne pughúʼúme pɛ́, pɔ́b kɛ pe zíʼ taʼ no ne mo, fáá yɛ́ a kɛ pě mbé nɛ́ pó, a ghɛmbɛ pɔ́b pé pughúʼúme néré sísíŋ, ntsʉʼmbé a pé zhʉ ya ne cyó yɔ́b pó, ŋkyé ŋgâ Mboʼmvé tsé mbé tiŋɛ́ njʉ́ ŋumesɔŋ ghú nɛ́ pó. 7Pɔ́b kɛ pó njʉ́ʉ́ ŋgâ, Mboʼmvé kɛ tee ncʉríne Ŋkəŋ sʉ́ʼʉ pwó pɔŋ pɛ́, pɔ́b pɛ́ Yúda nɛ́ pó, pé ne mo, pɔ́b pɛ́ pɔ́b psírɛ pɔŋ nɛ́ pó. Ntsʉ́ŋtsʉ́ŋ njʉ́, a kɛ tee ncʉríne Ŋkəŋ sʉ́ʼʉ pwó pɛ́ Yúda, pɔ́b pɛ́ pɔ́b psírɛ pɔŋ nɛ́, pé pwó Pětro nɛ́. 8Ŋkyé ŋgâ Mboʼmvé wɛ́ a kɛ fɛ́ tʉ̌ŋ pwó Pětro ŋgâ a cʉrí Ŋkəŋ sʉ́ʼʉ pwó pupsírime nɛ́, a kɛ ké mbó fɛ́ ye fɛ́ tʉ̌ŋ ne mo ŋgâ mə ncʉri ŋkəŋ sʉ́ʼʉ pwó pɔŋ pɛ́ pɔ́b pɛ́ Yúda nɛ́ pó. 9Zhakə, Kefasə pú Zhâŋ pɛ́ pɔ́b kɛ pé pɛ ŋgaa ne míí pǔkristo nɛ́, kɛ méʼéntswee ndúŋú foʼndzəndzoʼ yɛ́ Mboʼmvé kɛ fɛ́ ne mo nɛ́ pó. Néré pɔ́b cyoʼ pwó zhí Baanabasə. Yéré pé kiŋi nɛ́ ŋgâ, psi pɔ́b tséʼé taʼ ntswee, ŋgâ psi ghú zhí pfúŋɔ pɔŋ pɛ́ pɔ́b pɛ́ Yúda nɛ́ pó, pɔ́b ghú yɔ́b pfúŋɔ pupsírime. 10Ŋkɔŋɔ no yɛ́ pɔ́b kɛ tsɔ́ ne psi náá nɛ́, kɛ pɛɛ ŋgâ psi ke kpaŋa pɛ mbɔ́ŋmbɔŋ kpâŋ. No yɛ́ mə kɛ ke sáʼtʉŋ, ŋgyɛ́ kpáʼá sʉ́ʼʉ nɛ́.
A zhyɛ́ Kristo, Mboʼmvé tiŋɛ́ ŋɔŋ njʉ́ ŋɔŋ ŋgerɛ́ŋged nɛ́
11Ntsʉʼmbé, ŋkhoʼyɛ́ Kefasə kɛ páŋa Antyoshə nɛ́, mə ŋgyɛ̂ siŋi pɔŋ, a zé ŋgâ psi ye tséʼé taʼ ntswee pó. Ŋkyé ŋgâ a kɛ ghɛmbɛ á sháŋa. 12Pɔŋ pɛ́ Zhakə kɛ twɔ́ wɔ́b nɛ́ kɛ ghɛ́ mbáŋa, Kefasə tsé ndzɔ́ mɔ́b pwɛ pɔŋ pɛ́, pɔ́b pɛ Yúda nɛ́ pó. Ntsʉʼmbé, ŋkhoʼyɛ́ pɔ́b kɛ páŋ nɛ́, a ywóʼó wɔ́b ywoʼ, pwɛ pɔ́b pó pe tsé ndzɔ̂ mɔ́b ŋkʉ́rʉ́ pó, ŋkyé ŋgâ a kɛ tsé mbɔ̂ pupiríme. 13Mbɛ pecyó pɛ Yúda ké mbó ndéé kpee yé, kaʼatɛ Baanabasə ke kúŋɔ́ yé ndzɔ́ʼɔ́ pépwɔmíí wéré. 14Ŋkhoʼyɛ́ mə kɛ zhʉ́ ŋgâ pɔ́b tsé mbé nyí ŋgerɛ́ŋged njʉ́, no sísíŋ yɛ́ ndzɔ́ʼɔ́ Ŋkəŋ sʉ́ʼʉ nɛ́ tsɔ́ nɛ́ pó, mə ntsɔ́ pwó Kefasə síŋ ŋkɔŋɔ pɔŋ náá ŋgâ: «Wo wɛ́, wo ŋɔŋ Yúda nɛ́, wo tsó ghaŋ njʉ́ pɔŋ pɛ́ pɔ́b pɛ Yúda nɛ́ pó, tsó nɛ́, mbó mbé tsǒ njʉ kaŋ pɛ Yúda tsɔ́ nɛ́ pó. Wo ŋgyɛ niŋ ndzíʼɛ́ pɔŋ pɛ́ pɔ́b pɛ Yuda nɛ́ pó, ŋgâ pɔ́b tsó njʉ́ pɛ Yuda nɛ́?»
15Ŋgɛ ŋkhu ne psi, pé pfɛ́ ywí, psi pɛ́ɛ́ pɛ Yúda. Psi ghaŋázhyɛ́ meno kəpɔŋ tsetsɛrɛ pecyó pɔŋ pó. 16Mbɛ néré, psi zé ŋgâ Mboʼmvé tíŋɛ́ njʉ́ ŋɔŋ psibɛ kaŋ nɛ́, fú wé ne ŋɔŋ ŋgerɛ́ŋged pó. Ntsʉʼmbé, ndaʼ njʉ́, a tséʼé psyɛ́ndzɔʼ mbəb Yěsô Kristo nɛ́. Ŋkɔʼɔtombəb zhí, psi tséʼé psyɛ́ndzɔʼ mbəb Yěsô Kristo, kɛ́ʼɛ́ ŋgâ Mboʼmvé ndɛ ndiŋɛ́ kaŋ yɛ́ psi psibɛ nɛ́, fú ywí ne pɔŋ ŋgerɛ́ŋged. Ntsʉʼmbé, a tiŋɛ́ psyɛ́ndzɔʼ zhí mbəb Kristo. Ŋkyé ŋgâ, tɛɛmbɛ psibɛ kaŋ pe zhyɛ́ Mboʼmvé tiŋɛ́ ŋɔŋ njʉ́ ŋɔŋ ŋgerɛ́ŋged nɛ́ pó. 17Ntsʉʼmbé, a pɛ́ɛ́ yɛ́, psi pɛ́ psi pɛ Yuda nɛ́, psi taʼa njʉ́ a ŋgyɛ̂ Kristo, Mboʼmvé tiŋɛ́ ywí njʉ puŋgerɛ́ŋged nɛ́, pe pó njʉ̌ ŋgâ psi ke ghɛmbɛ́ zhí pe pukəpɔŋ nɛ́, mbǒ yéré zɔŋɔ ntsɔ́ɔ́ ŋgâ Kristo fáʼa pwó kəpɔŋ? Ŋgáŋ! Tɛɛmbɛ a naʼ mbé pé néré po! 18Ŋgɛmbɛ, a pɛ́ɛ́ yɛ́ mə mbó tsé ŋkurɔ́ yɔ́b yɛ́ mə kɛ sáʼ nɛ́, mbǒ mə nyóʼó pwó tómbəb ya ŋgâ, a mo mbé mvɔ̂no. 19Ŋkyé ŋgâ, a ghɛmbɛ ne mo, a ne meno pɛ́ a tiŋɛ́ kaŋ Mǔsê nɛ́, mə kɛ pfó. Ntsʉʼŋgɛ pfɔ̂, a zhyɛ́ ŋkɔʼɔtombəb kaŋ yéré. Yânéré kɛ́ʼɛ́ ŋgâ mə ŋgɛ́ ntsó mvé ŋkhoʼyɔŋ, ntsó ŋkyé Mboʼmvé. Pé kɛ kpǐ ywí Kristo ndúŋú ŋgʉŋʉ. 20A pɛ́ɛ́ yɛ́ mə tsé tsó mvé ŋkhoʼyɔŋ nɛ́, mbǒ a tsó mo ŋkʉ́rʉ́ pó, a tsó Kristo mbəb mo. Ŋkyé ŋgâ tsómvé yɛ́ mə ntsó ŋkhoʼyɔŋ njʉ́ ŋumesɔŋ nɛ́, mə ntsóó ne psyɛ́ndzɔʼ, psyɛ́ndzɔʼ yɛ́ mə ntséʼé ŋkyé Mɔ́ŋ Mboʼmvé wɛ́ a kɛ́ kʉyě ya, kaʼatɛ mbó fɛ́ tsómvé yé ŋkyé ya nɛ́. 21Tɛɛmbɛ, mə mbé psyɛ́ ŋgâ foʼndzəndzoʼ yɛ́ Mboʼmvé fɛ́ ne mo nɛ́, záʼ ndzəndzoʼ pó. Ŋkyé ŋgâ a pɛ́ɛ́ yɛ́ a zhyɛ́ kaŋ Mǔsê, Mboʼmvé tiŋɛ́ ŋɔŋ njʉ́ ŋɔŋ ŋgerɛ́ŋged nɛ́, mbǒ Kristo kɛ pfɔɔ ndzəndzoʼ.
ទើបបានជ្រើសរើសហើយ៖
Galato 2: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល