Galato 1
1
Pɔ́lə fɛ́ tséʼé pwó ndáméted yɛ́ a Galasi nɛ́
1A mo Pɔ́lə, ŋgaŋantɔ́b Yěsô Kristo, ŋgɛmbɛ a pé tsɔ́ʼ pumésɔŋ kii ŋgâ cyó ŋɔŋ ntsɔ́ʼ ya pó, ntsʉʼmbé, ndáá mbəb Yěsô Kristo pú Mboʼmvé yé wɛ́ a Tɛd nɛ́, yé wɛ́ a kɛ zhʉyɛ́ Yěsô Kristo ne vó nɛ́. 2A mo, ŋwɛ́ʼɛ́ pwó yáʼméted pɛ́ pɔ́b ndzó pɛ́rɛ́ ŋgɔŋ Galasi nɛ́. A psyɛ́ ŋkɔŋɔ pɔ́ŋmɛ́ pɛ́ psi pɔ́b ghaŋ náá nɛ́. 3A foʼndzəndzoʼ pwɛ mbúru yɛ́ a twɔ́ pwó Mboʼmvé, yé wɛ́ a Tɛd wíŋi nɛ́, ŋgɛmbɛ pwó Ntsɛɛpɔŋ Yěsô Kristo, mbɛ́ ne puŋ. 4Yěsô wɛ́ a kɛ fɛ́ mbəb ye ŋkyé kəpɔŋ wíŋi, yânéré kɛ́ʼɛ́ ne ntúbune wíŋi ndzó mvé kəpɔŋ yɔŋ, mbziʼe njʉ Mboʼmvé, yé wɛ́ a Tɛd wíŋi nɛ́, kɛ kʉ́yé nɛ́. 5A ŋgúʼune pɛ pwó ye ŋgǒʼ ne ŋgôʼ. Á pé néré!
Ŋkəŋ sʉ́ʼʉ ndaʼ taʼ ye
6A tsɛɛ ya nɛ́ njʉ́ puŋ fɛ́d séd pfuŋ yuŋ pwó ŋɔŋ wɛ́ foʼndzəndzoʼ Kristo kɛ zhyɛ́ a fú wúŋ nɛ́, mbó ŋgúú ne ndzóʼne cyó Ŋkəŋ sʉ́ʼʉ ndúŋ nɛ́. 7Tsʉ́ʼŋgɛmbɛ néré, a pé pɛ́ɛ́ ŋgâ cyó Ŋkəŋ sʉ́ʼʉ ndúŋ yóʼó pó! A pɛ́ɛ́ ndaʼ njʉ́ pecyó pɔŋ maʼa vaʼ tsetsɛrɛ puŋ, mbó ndzɔŋɔ máʼá ŋkəŋ sʉ́ʼʉ Kristo syé nɛ́. 8Ntsʉʼmbé, a pɛ́ɛ́ yɛ́ cyǒ ŋɔŋ, mbɛ twɔ́ ndzɔ́ʼɔ́ psi kii ŋgâ taʼ aŋgere pépéé, kɛ pó cʉrí ŋkəŋ sʉ́ʼʉ ndúŋ ne puŋ, kii a pɛɛ wɛ́ psi kɛ cʉ́rɛ ne puŋ nɛ́, á ndɔŋ pɛ́ tó ye! 9Psi kɛ pě ntsó nsó wéré, mə ké mbó nɛ́ mbziʼɛ ŋkhoʼyɔŋ: a pɛ́ɛ́ yɛ́ ŋɔŋ cʉrí ŋkəŋ sʉ́ʼʉ ndúŋ ne puŋ kii a pɛ́ɛ́ wɛ́ puŋ kɛ pě ndzóʼó nɛ́, a ndɔŋ pɛ́ tó ye! 10ŋkyé ŋgâ a ne ŋkhoʼyɔŋ, mə kɛ́ʼɛ́ ntáʼa njʉ́ mə ŋgɛmbɛ sʉ́ʼʉ pe siŋ pumésɔŋ nɛ́, kii mə kɛ́ʼɛ́ ntáʼa njʉ́ mə ŋgɛmbɛ sʉ́ʼʉ pe siŋ Mboʼmvé nɛ́? Mə kɛ́ʼɛ́, ntáʼa mbúú pwó pumésɔŋ? A kɛ ghɛmbɛ mə ntáʼa ne ŋgyɛ̌ne no yɛ́ a mbǔ pwó pumésɔŋ nɛ́, mbǒ mə kɛ kɛrɛ ŋgaŋafaʼ Kristo ŋkʉ́rʉ́ pó.
Yěsô Kristo nyǒʼ mbəb ye pwó Pɔ́lə mbó ntwɔ́ wé
11Pɔ́ŋmɛ́ páá, mə ndzɔŋɔ puŋ zé ŋgâ, Ŋkəŋ sʉ́ʼʉ wekénɛ́ mə kɛ́ cʉ́rɛ ne púŋ nɛ́, kɛ́ pé twɔ̌ pwó ŋumesɔŋ pó. 12Mbɛ, á kɛ́ pé záʼa mbəb ŋɔŋ fɛ́ ne mo pó, kii pó záʼa mbəb ŋɔŋ, ndzéʼé ya nuŋ. A kɛ nyóʼ Yěsô Kristo, nyoʼ yéré no ne mo, ŋkhoʼyɛ́ a kɛ́ nyoʼó mbəb ye ne mo nɛ́.
13Ŋkyé ŋgâ puŋ kɛ zoʼó pe tɛ́bɛ mbziʼe yɛ́ mə kɛ tséʼé nɛ́, ŋkhoʼyɛ́ mə kɛ ghúʼɔ Mboʼmvé njʉ pɛ Yúda ghúʼɔ nɛ́. Puŋ zé ndɔŋɔ ndʉʼ yɛ́ mə kɛ yɔ́ɔ́ ndzáá Ndáméted Mboʼmvé nuŋ ne ŋgəʼo, mbó ntáʼá ne mbône wé nɛ́. 14Ndúŋú ŋgúʼune Mboʼmvé njʉ́ pɛ Yúda ghúʼɔ nɛ́, mə kɛ tsɛɛ záá tiʼɛ zhí pwɛ záá mbéŋgɔŋ ywí. Mbəb ya kɛ zyaŋa kaʼatɛ ntsɛɛ wɔ́b náá, ndúŋú ŋgúʼune núŋu pɛ tɛd páá. 15Ntsʉʼmbé, Mboʼmvé ŋɔŋ wɛ́ a kɛ ntsɔ́ʼ ya ŋgɛmbɛ mə kɛ kɛrɛ pfɔ̂ mɛ́ ya, mbó fú ya pé né pǔndzɔʼ yé, Ŋkhoʼyɛ́ a kɛ kuʼɔ pwó yé nɛ́, 16ne nyǒʼne mɔ́ŋ ye ne mo, kɛ́ʼɛ́ ŋgâ mə cʉrɛ́ wé tsetsɛrɛ pɔŋ pɛ́, pɔ́b pɛ Yúda nɛ́ pó, kpaʼ ŋkhoʼyéré mə mbó mbé ghú pfúŋɔ́ cyô ŋumesɔŋ ne kpêne ntʉ́ʉ́ pwó yé pó. 17Mə kɛ́ pé kɔʼɔ Yerʉ́salɛm pfúŋɔ́ pɔŋ pɛ́ pɔ́b kɛ pě mbé ŋgaŋantɔ́b, mə mbɔ́rɔ́ mbɛ ya nɛ́ pó, mə kɛ pó ŋgǔ ŋgɔŋ Arabya, ŋǎ yóʼó mbódndzəb Damáásə. 18Néré, ŋgǒʼmvé yíkyéd záʼ, mə kɔ́ʼɔ́ Yerʉ́salɛm ne ndzêne ŋɔŋ wɛ́ pe fu wé né Kefasə#1:18 Pé fú Símo Pětro ne Kefasə. nɛ́. Mə tsó pfuŋ ye ne ntsɔ̌b zhyémve yítaŋ. 19Mə kɛ pe zhʉ́ cyó ŋgaŋantɔ́b fáá Zhakə mɔ́ŋmɛ́ Ntsɛɛpɔŋ pó. 20No yɔŋ yɛ́ mə ŋwɛ́ʼɛ́ ne puŋ kaʼa nɛ́, mə ntsɔ́ɔ́ siŋi Mboʼmvé. Á mbwɔ́ pó! 21Néré mə ŋáá yóʼó, ŋgú ndzó pɛ́rɛ́ ŋgɔŋ Sirya pú Silisya. 22A kɛ ghɛmbɛ pǔkristo ndzó yáʼméted ndzó pɛ́rɛ́ ŋgɔŋ Zhʉde pe zɛ́ ya pó. 23Pɔ́b kɛ ke ndzóʼó ndaʼ njʉ́ pé kɛ́ tsɔ̂ ŋgâ: «Ŋɔŋ wɛ́ a kɛ záá wíŋi ne ŋgəʼo ssəsó nɛ́ tsʉʼʉ nɛ́ ŋkhoʼyɔŋ cʉrɛ́ ŋkəŋ sʉ́ʼʉ no psyɛ́ndzɔʼ yɛ́ a kɛ pé psyɛ́ pó nɛ́!» 24Néré, pɔ́b pó ŋgúʼɔ Mboʼmvé ŋkyé ya.
ទើបបានជ្រើសរើសហើយ៖
Galato 1: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល