Faʼ Ghaŋántɔ́b 2
2
Zhʉye Yáŋme shʉ̌yí mbəb pɔŋ pɛ́ pɔ́b kɛ psyɛ́ nɛ́
1A kɛ pé zhyémve Paŋtekotə#2:1 Pɛ Yúda kɛ zhyɛ́ ndebéne Paŋtəkotə pe ŋkhoyɛ́ zhyémve ghúbmetáŋ zaʼa ndúŋú zhyémve yɛ́ pɔ́b zhyé ndebéne Pasəka nɛ́. pɛ Yúda. Ŋgɛmbɛ ŋkɔŋɔ pɔŋ pɛ́ pɔ́b kɛ psyɛ́ nɛ́, kpáʼ náá ntɛ́rɛ́ ndzó taʼ ywoʼ. 2Pɔ́b ghɛ́ mvuwɛ, ndzóʼ taʼ ndzəb, twɔ́ pépéé, njʉ́ a tú taʼ fəfod ntʉ̌ŋme nɛ́. Fəfod yéré yúŋɔ́ ndzó ndáb yɛ́ pɔ́b kɛ pɛ́ ndzóó nɛ́. 3Mbe néré kɛ́ʼɛ́, pɛ kpékpáŋ twɔ́. Ntsʉʼmbé, pɛ́ kpékpáŋ péré pɛ́ɛ́ njʉ́ mɔ́ɔ́ nɛ́, ŋgə́b mbəb yɔb, ndzab á mbəb Mbɛwɔ̂ ndzɔ́ʼɔ́ pɔ́b. 4Zhʉye Yáŋme kpaʼ ndúŋ ŋkɔŋɔ wɔ́b náá, pɔ́b zyé ntsóne pecyó pɛ nsó ndúŋ, mbziʼe njʉ́ Zhʉye Yáŋme kɛ zhyɛ́ ŋgâ pɔ́b nsó nɛ́.
5A kɛ ghɛmbɛ́, pɛ Yúda pɛ́ pɔ́b kɛ tséʼé pɔ́ɔ́ Mboʼmvé nɛ́, twɔ́ ndzó ŋkɔŋɔ mbǎʼmvé náá, mbɛ Yerʉ́salɛm. 6Ŋkhoʼyɛ́ yéré no kɛ gbaʼa ywoʼ nɛ́, pɔ́b tɛ́rɛ yóʼó, nó tsɛ́ɛ́ wɔ́b kaʼatɛ, ŋkyé ŋgâ Mbɛwɔ̂ ndzɔ́ʼɔ́ pɔ́b kɛ zóʼo nó yɛ́ pɔ́b kɛ tsɔ́ nɛ́, ne wé nsó. 7Tó yɔ́b váʼ, pɔ́b syɛ́ nâ náá, ntsɔ́ ŋgâ: «Ŋkɔŋɔ pɔŋ pɔ́ŋ pɛ́ pɔ́b tsɔ́ kaʼa náá nɛ́, pǔ Galílya pɔɔ? 8A pó mbɛ́ɛ́ níŋ Mbɛwɔ̂ ndzɔ́ʼɔ́ piŋi zóʼo no yɛ́ pɔ́b tsɔ nɛ́ né wé nsó? 9A ndzɔ́ʼɔ́ piŋi, pɔŋ twɔ̌ ndzó ŋgɔŋ Páátya, Medya pwɛ Elamitə. Pɔŋ pɛ́ pɔ́b tsó Mézopotamya, ndzó pɛ́rɛ́ ŋgɔŋ Zhʉde pwɛ Kapadosə, ndzó ŋgɔŋ Pɔŋ pwɛ Azi, 10pɔŋ pɛ́ pɔ́b twɔ́ Firizhi pwɛ Paŋfilya, ndzó ŋgɔŋ Egibto, ndzó pɛ́rɛ́ Sirɛnə a Libya, pɔŋ pɛ́ pɔ́b twɔ́ Roma, ntsó ghaŋ nɛ́. 11Ŋkɔŋɔ pɔŋ náá, pɛ Yúda njʉ́ pushʉyɛ pɛ́ pɔ́b psyɛ Mboʼmvé nɛ́, pǔ Krɛtə, pwɛ pǔ Arabya, piŋi zóʼo ne nsó yaʼ wíŋi, mbziʼe yɛ́ pɔ́b cʉ́rɛ shʉrɛ́meno Mboʼmvé nɛ́ pe níŋ?» 12No kɛ tsɛ́ɛ́ ŋkɔŋɔ wɔ́b náá kaʼatɛ. Ndzɔ́ʼɔ́ vaʼátó yéré, pɔ́b psirɛ́ mbəb yɔ́b ŋgâ: «Yɔŋ kaʼa mbɛ̌ ŋgâ kɔ́?» 13Ntsʉʼmbé, pecyó pɔŋ pó túŋɔ pɔŋ pɛ́ pɔ́b kɛ psyɛ́ nɛ́ tuŋú, ntsɔ ŋgâ: «Pɔ́b kɛ nɔ́ kaʼatɛ ntsebé!»
No yɛ́ Pětro kɛ nsó nɛ́
14Njʉ́ a kɛ pé néré nɛ́, Pětro wɛ́ pwɛ ŋgíŋgye ntsɔ̌bmɔʼɔ kɛ pé nɛ́, yɔ́ɔ́ nsó, nsó ŋgâ:
«Puŋ, pɛ Yúda, ŋkɔŋɔ wúŋ wɛ́ puŋ tsó náá Yerʉ́salɛm nɛ́, puŋ ncʉ́yí ndzóʼ no yɛ́ a tsé ndzáʼa nɛ́. Puŋ psyé ntəŋé múŋ ndzóʼ no yɛ́ mə ntsɔ́ nɛ́. 15Ŋgáŋ! Pɔŋ pé ké nɛ́ nɔɔ yoʼ njʉ́ puŋ kpaŋa nɛ́ pó. Piŋi ke mbɛ́ɛ́ ndaʼ ne nǎb yípfuʼɔ né ndzɔ́ʼɔ́wáá. 16No yɛ́ a záʼá ghaŋ nɛ́, a no yɛ́ nɛ́ ŋgaŋatsɔ́kpaŋató Mboʼmvé Zhuwɛl kɛ cʉrí nɛ́. No yéré kɛ pɛ́ɛ́ ŋgâ:
17“Mboʼmvé nsó ŋgâ, a ŋkʉ́yó ŋgɛmbɛ ne zhyémve njʉyǐndzəb
Mo, Mboʼmvé mə ntwɔ́ Zhʉye ya pwó ŋkɔŋɔ ŋɔŋ náá.
Pɔ́ŋ puŋ pe mbziŋi pwɛ pe pěŋgíŋgye ŋkʉ́yó ntsɔ́ kpaŋató ya,
Kɔʼpɔŋ púŋ tséʼé zhʉ́ywoʼ,
Zǔŋ pɔŋ púŋ tséʼé zhyěndzəb.
18Ɔ́ŋɔ́! A ŋkʉ́yó mbɛ
Mbəb ŋgaŋafaʼ páá, pe mbziŋi njʉ́ pe pěŋgyé nɛ́. Ne zhyémve péré, Mə ntwɔ́ Zhʉye ya
Pɔ́b ntsó kpaŋató ya.
19Mə ŋkʉ́yó ŋgyɛ́ shʉrɛ́meno kpaʼ pépéé,
Mbó ŋgyɛ́ pɛ kiŋi ghaŋ ndúŋú tsetsáʼ.
Nsə, mɔ́ɔ́ pwɛ pfáʼá ndzə̌ndzê ŋkʉ́yó mbɛ́.
20Ménab ŋkʉ́yó sɛ́rɛ́ siŋɛ́, ménwɔ̂tsúʼ séd ntsʉʼ nsə,
Ŋkɔ́ŋ, zhyémve Ntsɛɛpɔŋ ye kəkwéʼe yɛ́ á ŋkʉ́yó nyóʼó Mbəb ye nɛ́, pɔrɔ́ mbɛ.
21Néré, ntsyé ŋɔŋ wɛ́, a ŋkʉ́yó ŋkhɔ́ fú Ntsɛɛpɔŋ náá nɛ́, ŋkʉ́yó ntsɛ́ʼɛ́ ndzǔne.”
22Pɔ́ŋ Issayɛ, puŋ zóʼ nsó wɔŋ. Yěsô ŋɔŋ Nǎzarɛd, a ŋɔŋ wɛ́ Mboʼmvé kɛ twɔ́ wé pfúŋɔ́ puŋ nɛ́. Ne ŋgyɛ̌ne puŋ zé ŋgâ a kɛ twɔ́ ye ntwɔ́ wé, á záʼá mbəb ye, ŋgyɛ́ pɛ́ shʉrɛ́meno, pɛ meno ntʉ̌ŋme pwɛ pɛ kiŋi tsetsɛrɛ puŋ, njʉ́ puŋ cʉyǐ ndzé nɛ́. 23Ŋɔŋ wéré, puŋ kɛ fí wé pwó pɛ kiizɛ́mboʼmvé, pɔ́b kpíí wé ndúŋú ŋgʉŋʉ, nɔ́ʼɔ́ wé. Ntsʉʼ ŋgɛ mbɛ, mbǒ Mboʼmvé ndzɔ́ʼɔ́ zɛ́no ye, kɛrɛ pě ntíí néré. 24Ntsʉʼmbé, Mboʼmvé zhʉyɛ́ wé, kpéé wé pwó zúʼuvó, ŋkyé ŋgâ a kɛ ghɛ́ tɛɛmbɛ tʉ̌ŋ vó pé kúʼɔ́ ne gbǎne wé pó. 25Ɔ́ŋɔ́, ŋgɛmbɛ Fɔŋ Ndavíd kɛ nsó ŋkyé wé ŋgâ:
“Mə kɛ ké njʉ́ Ntsɛɛpɔŋ zhʉ́ síŋ mo.
Ŋkyé ŋgâ a tsɛ́ ne ndzaʼ pwó ya ye maʼ kɛ́ʼɛ́ ŋgâ ndzɔʼ ya ndɛ nteŋé.
26A zhyɛ́ yéré, ndebéne yúŋɔ́ ndzó ndzɔʼ ya, mə mbó ndzɔ́bɔ ne ŋgə̌ŋene.
Cyó yɔ́b yoʼó ntsɛ́ɛ́ yɔŋ: Mbɛ mbé yɛ́ mə́ fúrɔ nɛ́, mə ŋgɛ́ fúrɔ́ ke tsé shʉ́rɛ shʉ̂rɛ.
27Ŋkyé ŋgâ Wo Ntsɛɛpɔŋ, Wo ŋkʉ́yó ŋkiyé ya ndzó ŋgɔŋ pfɔ̂pɔŋ pó,
Wo ghɛ́ náʼá mbé tee, ŋgaŋafaʼ wo, á yúbɔ ndzɔ́ʼɔ́ tsetsáʼ pó.
28Wo kɛ nyóʼ pɛ mɛndɔ́b pɛ a fɛ́ tsómvé nɛ́ né mo. Ŋkhoʼyɛ́ wo ŋkʉ́yó mbɛ́ ne ŋgə́ ya nɛ́, wo yúŋú ndzɔʼ ya ne ndebéne.”
29Pɔ́ŋmɛ́ páá, puŋ psyɛ́ ŋgâ mə nsó yɔŋ no ne puŋ ne kɔbɔndzɔʼ. Fɔŋ Ndavíd wɛ́ a tɛd ndzɔ́ʼɔ́ tɛd piŋi nɛ́, kɛ pfó, pé cʉ́ wé. Sye yé kɛ kɛrɛ yóʼó piŋi kaʼatɛ mbáŋa ne ndzebé. 30Ntsʉʼmbé, fɔŋ Ndavíd kɛ pé ŋgaŋatsɔ́kpaŋató Mboʼmvé, mbó ndzé ŋgâ Mboʼmvé kɛ səbɔ́ pwó yé ŋgâ, a ŋkʉ́yó ntsubɔ́ ŋɔŋ ne ndǎndáb yé, kpaʼ Mɔ́ŋ pfé ye ndúŋú ywʉ yé. 31Yéré nyóʼó ŋgâ a kɛ pě njʉ́ njʉyɛ́ne Kristo ne vó. A kɛ zhyɛ́ yéré, a nsó ŋkyé wé ŋgâ: “Pé kɛ pé ŋkiyé wé ndzó ŋgɔŋ pfɔ̂pɔŋ pó, ndzab mbəb ye pó mbé yúb pó.” 32Yěsô wéré, Mboʼmvé kɛ zhʉyɛ́ wé ne vó. Psi wɔŋ, psi kɛ kpaʼ náá njʉ́. 33Mboʼmvé Tɛd kʉrɔ́ wé fɛ́ ne ndzáʼ pwó yé ye maʼ, fɛ́ Zhʉye Yáŋme yɛ́ a kɛ kaʼ nɛ́ pwó yé. A kiʼi ndzɛ́d nɛ́ njʉ́ puŋ zhʉ́ mbó ndzóʼo kɛ́ʼɛ́ nɛ́. 34Fɔŋ Ndavíd wɛ́ a kɛ pe kɔ́ʼɔ́ pépéé nɛ́ pó, tsʉ́ʼ kɛ nsó ŋgâ: “Ntsɛɛpɔŋ tsɔ́ pwó Ntsɛɛpɔŋ ya ŋgâ:
Ghɔrɔ́ ne ndzáʼ pwó ya ye maʼ,
35Kaʼatɛ mə ŋgyɛ́ ghaŋákepeŋe pó tsʉ́ʼ ywoʼɔ́ tíí kpee mo.”
36Ŋkɔŋɔ pɔŋ Issayɛ náá, puŋ cʉ̌yi nɛ́ ndzé ndzebé : Yěsô wɛ́ puŋ, pǔŋ kɛ kpii wé ndúŋú ŋgʉŋʉ nɛ́, Mboʼmvé kúʼɔ́ wé ne Ntsɛɛpɔŋ, a pó mbé Kristo.»
Sɔ́ pɔŋ pɛ́ pɔ́b kɛ séd ndzɔʼ yɔb nɛ́
37Ŋkhoʼyɛ́ pɔŋ kɛ zóʼ nsó wéré nɛ́, ndzɔʼ yɔb vaʼ. Pɔ́b psirɛ́ Pětro pwɛ pecyó ghaŋántɔ́b ŋgâ: «Pɔ́ŋmɛ́ psi, tɛ psi ŋgyɛ̌ níŋ?» 38Pětro pɔ́rɔ́ né pɔ́b ŋgâ: «Puŋ séd ndzɔʼ yuŋ! Ntsye ŋɔŋ ndzɔ́ʼɔ́ puŋ kpênse né tíí Yěsô Kristo, yânéré kɛ́ʼɛ́ ŋgâ Mboʼmvé máʼ kəpɔŋ púŋ, mbó fɛ́ Zhʉye Yáŋme ne puŋ. 39Ŋkyé ŋgâ kaʼ yéré yɛ́ Mboʼmvé kɛ tíí nɛ́, pɛ́ɛ́ ne puŋ puŋɛ pɔ́ŋ puŋ, mbɛ pwó ghaŋá taŋá sesɛ. Mbɛ pɔ́b záá níŋ, no pɛ́ɛ́ ŋgâ Ntsɛɛpɔŋ Mboʼmvé wíŋi fú wɔ́b.» 40Pětro ké mbó nsó pɛ meno zááme ne kpêne ntaŋ, mbɛ ne ntǔʼne wɔ́b. A kɛ ke mbó ntsɔ́ ne pɔ́b ŋgâ: «Puŋ twɔ́ ndzɔ́ʼɔ́ kerɛmvé kəpɔŋ yɔŋ, ntséʼé ndzǔne.» 41Pɔŋ pɛ́ pɔ́b kɛ psyɛ́ nsó yé nɛ́, kpênse. Zhyémve yéré, ywɔ̌ ŋkáb ŋɔŋ yíkyéd pfii wɔ́b.
Mbziʼe yɛ́ sɔ́ pǔkristo kɛ téré, ntsó nɛ́
42Ŋkɔŋɔ wɔ́b náá kɛ tíí kpee yɔ́b ndúŋú meno pɛ́ ghaŋántɔ́b kɛ zéʼé wɔ́b núŋ nɛ́, ntséʼé nsó ndzóʼ tsetsɛrɛ pɔ́b, mbó kpaʼ náá ndɔ́ɔ́ mɔ́b, pwɛ mbɛ ntsɛ́ʼɛ́ Mboʼmvé. 43Néré, ŋkɔŋɔ pɔŋ náá ntséʼé pɔ́ɔ́ Mboʼmvé, ghaŋántɔ́b Yěsô zhyɛ́ pɛ shʉrɛ́meno pwɛ pɛ kiŋi zááme. 44Ŋkɔŋɔ pɔŋ pɛ́ pɔ́b kɛ psyɛ́ Mboʼmvé náá nɛ́ kɛ nzwə́ré ŋkhú taʼ yé, mbó ŋkaa mwɔ̌ pɔ́b fɛ́ ywoʼɔmɔʼɔ. 45Pɔ́b kɛ fí faʼ yɔ́b pwɛ mwɔ̌ pɔ́b, ŋgobɔ́ mbób tsetsɛrɛ ŋkɔŋɔ wɔb náá, mbziʼe njʉ́ ntsɛ̌ no ŋɔŋ kɛ pɛ nɛ́. 46Pɔ́b tséʼé taʼ ntswee, ntɛ́rɛ ŋkɔŋɔ zhyémve náá kii ziʼá Ndámboʼmvé. Mbɔ́rɔ́ ndzəb ndáb pɔ́b, ndɔ́ɔ́ mwɔ̌ pɔ́b. Ndzɔ̂ mwɔ̌zó pɔ́b néré ne ndebéne pwɛ ndzɔʼ yɔ́b yé wéé. 47Pɔ́b kɛ ghúʼɔ Mboʼmvé, ŋkɔŋɔ pɔŋ náá pó ŋgəhɛ wɔ́b sʉ́ʼʉ. Ŋkɔŋɔ zhyémve náá, Ntsɛɛpɔŋ pfǐ wɔ́b ne pɔŋ pɛ́ a kɛ kpee wɔ́b nɛ́.
ទើបបានជ្រើសរើសហើយ៖
Faʼ Ghaŋántɔ́b 2: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
