Faʼ Ghaŋántɔ́b 3
3
Pětro pú Zhâŋ pɛ́d taʼ ŋkʉ́ŋʉ́
1A kɛ pe taʼ zhyémve, Pětro pú Zhâŋ tsé kɔ́ʼɔ́ Ndámboʼmvé ne ntsɛ́ʼɛ́ Mboʼmvé yɛ́ a kɛ pɛ́ ne náb yíkyéd, ŋkhoʼfwɔ̌nab nɛ́. 2Pe ŋkyɛ́ taʼ ŋɔŋ wɛ́ a kɛ twɔ́ pfɔ̂ mɛ́ yé pe ŋkʉ́ŋʉ́ nɛ́, ŋkʉ́yó níŋ i, mbé ŋɔŋ wɛ́ pé ndɛ ke mbéé ŋkʉ́yó níŋ i ŋkɔŋɔ zhyémve náá ntsúŋɔ ndzó cyó ntswěkaŋ Ndámboʼmvé yɛ́ pé kɛ fú né Ntswěkaŋ pǔme nɛ́. Kɛ́ʼɛ́ ŋgâ a ghɔ́rɔ́ yóʼó tsé ndɔŋɔ mɔ́b pwó pɔŋ pɛ́ pɔ́b kúŋɔ́ Ndámboʼmvé nɛ́. 3Ŋkhoʼyɛ́ a kɛ zhʉ́ Pětro pú Zhâŋ tsé kúŋɔ́ Ndámboʼmvé nɛ́, á yɔ́ŋ yɔ́b ne pɔ́b. 4Néré, Pětro pú Zhâŋ tiŋɛ́ wé mbébé, ntsɔ́ pwó ye ŋgâ: «Tiŋɛ́ ywí!» 5Ŋɔŋ wɛ́ tiŋɛ́ wɔ́b, ŋkyé ŋgâ a kɛ tsé shʉ́rɛ ŋgâ pɔ́b fɛ́ yɔ́b pwó yé. 6Pětro tsɔ́ pwó ye ŋgâ: «Mə ntséʼé mbób yɛ́ pe tɛŋɛ ne tʉ́ŋɔ kii ŋgâ ne tʉ́ŋɔ́paŋ nɛ́, ne fɛ́ne pwó pó. Ntsʉʼmbé yɔ́b yɛ́ mə ntséʼé nɛ́, mə fɛ́ pwó wo: A ne tíí Yěsô Kristo, Mɔ́ŋ ŋɔŋ Nǎzarɛd, ŋáá syé nyi!» 7Njʉ́ a kɛ nsó néré nɛ́, a gbáá pwó yé yé maʼ, ŋgyɛ́ a ŋáá syé. Kpaʼ ŋkhoʼyéré, kpee mé pwɛ nzwə́rɛ́ kpee mé, tʉ̌ŋ. 8A téd ntsɛ́ nsó ndzyě nyǐne. Pwɛ pɔ́b nyí kúŋɔ́ Ndámboʼmvé. A nyí, ntɛ́rɛ, ndébɛ, ŋgúʼɔ Mboʼmvé. 9Ŋkɔŋɔ pɔŋ náá zhʉ́ wé njʉ́ a kɛ nyí mbó ŋgúʼɔ Mboʼmvé nɛ́. 10Pe zǐ wé, nsó ŋgâ: «A kpaʼ ye wɛ́ a kɛ ghɔ́rɔ́ Ntswěkaŋ pǔme ndɔŋɔ nɛ́!» No ntsɛ́ɛ́ pɔŋ kaʼatɛ, tó yɔ́b vaʼ ne no yɛ́ a kɛ záʼá mbəb ŋɔŋ wéré nɛ́.
No yɛ́ Pětro kɛ tsɔ́ Ndámboʼmvé nɛ́
11Ŋɔŋ wɛ́ pó mbé psyɛ́ ŋǎ pfúŋɔ́ Pětro pú Zhâŋ ŋkʉ́rʉ́ pó. No ntsɛ́ɛ́ ŋkɔŋɔ pɔŋ náá kaʼatɛ. Pɔ́b kí ndéé ŋkʉ́yó pfúŋɔ́ pɔ́b ndúŋú ferɛ́nda yɛ́ pé kɛ fú né ferɛ́nda Salomɔŋ nɛ́. 12Ŋkhoʼyɛ́ Pětro kɛ zhʉ́ pɔŋ néré nɛ́, a ntsɔ́ ne pɔ́b ŋgâ: «Pɔ́ŋ Issayɛ, a zhyɛ́ kɔ́ no yɛ́ a záʼ nɛ́, ntsɛ́ɛ́ wúŋ kaʼa? A zhyɛ́ kɔ́ puŋ túŋɔ míí múŋ mbəb psi kaʼa pé njʉ́ psi zhíyɛ́ ne tʉ̌ŋ mi, kii ŋgâ a zhyɛ́ faʼa psyɛ́ndzɔʼ zhí, ŋɔŋ wɔŋ ŋáá syé nyí nɛ́!
13Mboʼmvé Ábraham, Mboʼmvé Izaʼ, Mboʼmvé Yakɔ́b, Mboʼmvé tɛd tɛd piŋi, fɛ́ ŋgúʼune pwó ŋgaŋafaʼ yé Yěsô, wɛ́ puŋ, puŋ kɛ táŋá wé mbó sirɛ́ wé síŋ Piláto, ŋgɛmbɛ mbǒ a kɛ kpaŋa ne ntěne wé nɛ́. 14Puŋ kɛ sirɛ́ wé wɛ́, a Yáŋme mbó mbé Ŋgerɛ́ŋged nɛ́, mbzírí ŋgâ pe tee taʼ nɔʼŋɔŋ. 15Yé, Fɔŋ wɛ́ a tséʼé tsómvé nɛ́, wɛ́ puŋ kɛ zhyɛ́ pe nɔ́ʼɔ́ wé nɛ́, Mboʼmvé zhʉyɛ́ wé ne vó. Psi pe nɔŋ, mbé ghaŋákpééntáŋ. 16A zhyɛ́ psyɛ́ndzɔʼ ne tíí Yěsô wéré. A fɛ́ tíí yéré fɛ́ tʉ̌ŋ pwó ŋɔŋ wɔŋ wɛ́ puŋ tiŋɛ́ káʼa, ŋgɛmbɛ mbó ndzɛ́ wé nɛ́. A psyɛ́ndzɔʼ yɛ́ a twɔ̌ pwó Yěsô nɛ́, ŋgyɛ ŋgâ ŋɔŋ wɔŋ tséʼé fwôghɔŋ, síŋ ŋkɔŋɔ wuŋ náá.
17Pɔ́ŋmɛ́ páá, mbɛ njʉ́ mə nsó kɛ́ʼɛ́ nɛ́, mə ndzé ŋgâ puŋ kɛ zhyɛ́ yéré no pe ndzɔ́ʼɔ́ fwɔ̂ne, tsʉntsʉ́ŋ njʉ́ ntsɛ́ssó puŋ nɛ́. 18Ŋgɛ́ ŋkhú ne Mboʼmvé, a kɛ pě ŋgyɛ, ŋkɔŋɔ ghaŋátsɔ́kpaŋató ye náá ncʉ́rí ŋgâ Kristo wɛ́ a náʼá ntwɔ́ nɛ́, ŋkʉ́yó njʉ́ ŋgəʼo. A kiʼi ke mbwɔ̂ néré. 19Puŋ séd mbziʼe yuŋ nɛ́, mbód ndzəb pwó Mboʼmvé, kɛ́ʼɛ́ ŋgâ a sebé kəpɔŋ wuŋ. 20Néré kɛ́ʼɛ́ ŋgâ Ntsɛɛpɔŋ fɛ́ fúfúru ye ne puŋ, ŋkhoʼyɛ́ a ŋkʉ́yó ntwɔ́ Kristo wɛ́ a tsɔ́ʼ ŋkyé wuŋ nɛ́, ne puŋ. Kristo wéré, a Yěsô 21wɛ́ a zɔŋɔ ŋgâ a tsó pépéé kaʼatɛ mbáŋ ŋkhoʼyɛ́ ŋkɔŋɔ pɛ meno náá ŋkʉ́yó mbɔ́rɔ́ ntsɛ́, ne poʼ pé nɛ́. Ŋkɔŋɔ meno pɛ Mboʼmvé kɛ pě nsó taŋa féré zhyémve, pwó ghaŋátsɔ́kpaŋató pé pé yáŋme ŋgâ pɔ́b nsó nɛ́. 22Mǔsê kɛ pě nsó ŋgâ: “Ntsɛɛpɔŋ Mboʼmvé ŋkʉ́yó ntsɔ́ʼɔ́ taʼ ŋɔŋ twɔ́ né puŋ, taʼ ŋɔŋ ndzɔ́ʼɔ́ pɔ́ŋmɛ́ puŋ, a pe taʼ ŋgaŋatsɔ́kpaŋató ye, njʉ́ tómbəb ya nɛ́. Puŋ ŋkʉ́yó mbzyé ntəŋé múŋ né ŋkɔŋɔ meno pɛ a ŋkʉ́yó ntsɔ́ ne puŋ náá nɛ́. 23Ntsye ŋɔŋ wɛ́ a ŋkʉ́yó ntíí kpee yé ndúŋú no yɛ́ ŋgaŋatsɔ́kpaŋató wéré ntsɔ́ nɛ́ pó, pe ntúbɔ́ wé ndzɔ́ʼɔ́ pɔŋ nɔ́ʼ.” 24Ŋkɔŋɔ ghaŋátsɔ́kpaŋató Mboʼmvé náá, ndzyěne mbəb Samyɛ, mbɛ pɛ pɔ́b kɛ cʉ́ʼɔ́ ndzəb yé nɛ́, Mbɛwɔ̂ ndzɔ́ʼɔ́ pɔ́b kɛ ke ncʉ́rɛ yé kɛɛ ndúŋú meno pɔŋ pɛ́ piŋi zhʉ́ ndzebé kaʼa nɛ́. 25A puŋ mbé pɔ́ŋ ghaŋátsɔ́kpaŋató Mboʼmvé. Mboʼmvé kɛ ŋgbɛd kaŋ pwɛ tɛd puŋ ŋkyé wuŋ, ŋkhoʼyɛ́ a kɛ tsɔ́ pwó Ábraham ŋgâ: “Mə ndzáʼá ne ndǎ ŋɔŋ wo, níŋ ɛ mbúru mbəb ŋkɔŋɔ ndǎ náá ndúŋú tsetsáʼ.” 26Mboʼmvé kɛ pě ntsɔ́ʼ Yěsô ŋgaŋafaʼ ye, pe ne ntwɔ́ne ne puŋ, kɛ́ʼɛ́ ŋgâ a níŋí mbúru mbó mbaʼ ntsye ŋɔŋ ndzɔ́ʼɔ́ puŋ ndúŋú kəpɔŋ ye.»
ទើបបានជ្រើសរើសហើយ៖
Faʼ Ghaŋántɔ́b 3: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
