2 Korɛŋto Tónsó ŋweʼe pwó pɛ Korɛŋto 2
Tónsó ŋweʼe pwó pɛ Korɛŋto 2
Mbziʼe njʉ́ pɛ fɛ́ ntʉ́ʉ́ kəpɔŋ ndzó mvé ŋkhoʼyɔŋ nɛ́, a kɛ pe ndzyě ndzebé pó. Metə́d kɛ ke ndzyéé pwɛ pɛ ntʉ́ʉ́ kəpɔŋ péré, ntʉ́ʉ́ kəpɔŋ péré kɛ ke mwɔ̂ pǔkristo ndzó mbɛ́lʉ́ŋ Korɛnto. Mbɛ náá kɛ́ʼɛ́, pɔŋ pɛ́ pɔ́b kɛ ké kɛ psyɛ́ Mboʼmvé psyɛ́ nɛ́, ntsʉ́ʼɔ́ yɔ́b pé pɛ yɔ́ɔ́pfóme ndúŋú ntʉ́ʉ́ kəpɔŋ péré. A kɛ zhyɛ́ yéré nɛ́, Pɔ́lə ŋwéʼe yɔŋ ŋweʼe, ne ntʉ́ʉ́ne tó pɔŋ pɛ́, pɔ́b ké kɛ psyɛ Mboʼmvé psyɛ́ nɛ́, mbó zhyɛ́ pɔ́b zé no yɛ́ a tsé ndzwəʼɛ wɔ́b ndúŋú no psyɛ́ndzɔʼ ŋkɔŋ, pɔ́b pɔ́rɔ́ tsɛ́ʼɛ́ psyɛ́ndzɔʼ ntʉ̌ŋme nɛ́. Ŋkhoʼyɛ́ pe fú ŋweʼe yɔŋ nɛ́, pe zóʼó pɛ nsó kəŋe, pwɛ pɛ́ a fɛ́ tʉ̌ŋ njʉ́ tɛɛmbɛ pe kúʼɔ́ ne ŋkíríne ntʉ́ʉ́ sʉ́ʼʉ mbó maʼ pe kəpɔŋ nɛ́.
A kɛ ŋwéʼé wɔ̂ŋ wéʼé ŋweʼe Korɛŋto 2?
Njʉ́ sɔ́ ŋweʼé pwó pɛ Korɛŋto nɛ́, a kɛ ke ŋweʼé Pɔ́lə ŋweʼé zhʉbɛ́ ŋwéʼe yípáá yɔŋ. A kɛ ŋwɛʼɛ ndúŋú ywɔ̌ ŋgǒʼmvé 55 kii ne ywɔ̌ 57 kɛ́ʼɛ́, ŋkhoʼyɛ́ a kɛ pɛ ndzó pɛ́rɛ́ ŋgɔŋ Makadoniya nɛ́.
A kɛ ŋwɛʼɛ pwó wɔ̂? A kɛ ŋwɛʼɛ ŋkyé kɔ́?
A kɛ pe pǔkristo ndzó ndáméted Korɛnto, mbé sɔ́ pɔŋ pɛ́ Pɔ́lə kɛ ŋweʼé yɔŋ ŋweʼe ne pɔ́b nɛ́. Ŋkhoʼyɛ́ Pɔ́lə kɛ ŋǎ ndzó yéré ndáméted ŋgú ywoʼɔ́ ndúŋ nɛ́, pɔŋ tsʉʼ nsó ndzəb ye ŋgâ, a ndáá ŋgaŋantɔ́b pó, néré kɛ́ʼɛ́, ne mǎʼne ntere ndúŋú ntʉ́ʉ́ pɛ́ a kɛ fɛ́ nɛ́. Pɔ́lə ŋweʼe nɛ́ kɛ́ʼɛ́ pe ne cʉ̌yine ŋgyɛ́, pɔ́b zé ntʉ́ʉ́ pɛ́ a kɛ fɛ ne pɔ́b nɛ́, mbó nsó no yɛ́ a zhyɛ́ a tsɔ́ ŋgâ a ndáá ŋgaŋantɔ́b nɛ́. A ké mbó ŋweʼe kɛ́ʼɛ́ pe ne ntʉ́ʉ́ne tó yɔ́b, ŋkyé pɔŋ péré pɛ́ pɔ́b ghaa, pɔ́b pɛɛ ghaŋántɔ́b nɛ́.
Pe tsɔ̌ ŋgâ kɔ́ ndzó ŋweʼe yɔŋ?
A ndzó ŋweʼe yɔŋ Pɔ́lə saʼa tʉ̌ŋ pe ne ntuʼúne faʼ yé, mbó ntsó ŋkyé pɔŋ pɛ́ pɔ́b mbubɔ tíí yé, mbó máʼa ntere, mbó ŋgyɛ ŋgâ pɔŋ tséʼé ndzɛ̌ne ŋkyé tʉ́ʉ́ pɛ́ a kɛ fɛ̂ nɛ́. A ndzó ŋweʼe yɔŋ, Pɔ́lə sí ŋkɔŋɔ yɔ́b yɛ́ a nyóʼó náá ŋgâ, a ke mbɛ yé ŋgaŋantɔ́b, mbó kúʼɔ́ ne fɛ́ne ntʉ́ʉ́ njʉ́ a ke zhyɛ́ nɛ́.
Pe tsuŋǔ ŋweʼe yɔŋ pé níŋ?
Yɔŋ pe nɛ́ njʉ́ Pɔ́lə tsuŋǔ yɔŋ ŋweʼe nɛ́:
Pɔ́lə fɛ́ tséʼé pwó ndáméted yɛ́ a Korɛŋto nɛ́ mbó ŋgúʼɔ́ Mboʼmvé: 1:1-11
Faʼa ŋgaŋantɔ́b siŋ pǔkristo: 1:12–2:17
Ŋkʉyěne ŋɔŋ njʉ́ Kristo kɛ ŋkʉye wíŋi nɛ́: 3:1–7:16
Ghebe pwó pǔkristo: 8:1–9:15
Pɔ́lə nsó ŋgâ kpaʼ sísíŋ á taʼ ŋgaŋatɔb: 10:1–13:10
Njʉyǐndzʉ tséʼé: 13:11-13.
ទើបបានជ្រើសរើសហើយ៖
2 Korɛŋto Tónsó ŋweʼe pwó pɛ Korɛŋto 2: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល