2 Korɛŋto 1
1
Pɔ́lə fɛ́ tséʼé pwó ndáméted yɛ́ a Korɛŋto nɛ́
1A mo Pɔ́lə wɛ́ Mboʼmvé kɛ fú ne ŋkʉyěne mé, ne mbéne ŋgaŋantɔ́b Yěsô Kristo nɛ́, pú Timoté, mɔ́ŋmɛ́. Ŋwɛʼɛ pwó ndáméted Mboʼmvé yɛ́ a ndzó mbɛ́lʉ́ŋ Korɛŋto nɛ́. Mbɛ pwó ŋkɔŋɔ pǔmboʼmve pɛ́ pɔ́b ndzó ŋkɔŋɔ pɛ́rɛ́ ŋgɔŋ Akayi náá nɛ́. 2A foʼndzəndzoʼ ne mbúru twɔ́ pwó Mboʼmvé, yé wɛ́ a Tɛd wíŋi nɛ́, mbɛ pwó Ntsɛɛpɔŋ Yěsô Kristo, ŋgɛ mbɛ́ ne puŋ!
Pɔlə fɛ́ ŋgúʼune pwó Mboʼmvé
3Á ŋgúʼune pɛ pwó Mboʼmvé, yé wɛ́ a Tɛd Ntsɛɛpɔŋ wíŋi Yěsô Kristo, yé wɛ́ a Tɛd wɛ́ a tséʼé tsaaghəghəŋ zááme nɛ́, yé wɛ́ a fɛ́ tsúbɔndzɔʼ ne ŋkɔŋɔ no náá nɛ́. 4A fɛ́ tsúbɔndzɔʼ ne piŋi ndúŋú ŋkɔŋɔ ŋgəʼo pɛ́ a kúŋɔ́ wíŋi náá nɛ́. Ne ŋgyɛ̌ne ŋgâ piŋi ŋkúʼɔ́ ne fɛ́ne tsúbɔndzɔʼ pwó ŋkɔŋɔ pɔŋ pɛ́ pɔ́b tséʼé ŋgəʼo náá nɛ́, ndâ ndúŋú tsúbɔndzɔʼ yɛ́ ŋkɔʼɔtómbəb Mboʼmvé fɛ́ ne piŋi nɛ́. 5Mbziʼe njʉ́ piŋɛ Yěsô Kristo zhʉ́ ŋgəʼo zááme nɛ́, a ke mbé nɛ́ njʉ́ Mboʼmvé ndzáʼa mbəb Kristo fɛ́ tsúbɔndzɔʼ ne piŋi zááme nɛ́. 6A pɛ́ɛ́ yɛ́ psi tsé tsɛʼɛ ŋgəʼo nɛ́, mbǒ yéré pɛɛ ne tsúbune ndzɔʼ yúŋ pwɛ ndzǔne múŋ. A pɛɛ yɛ́ psi tséʼé tsúbɔndzɔʼ nɛ́, mbǒ yéré pɛɛ ne tsúbune ndzɔʼ yúŋ, ne ŋgurúne mbziʼe mbziʼe ŋgəʼo pɛ́, psi ke ndzáʼa zhí ndzóʼó nɛ́. 7Shʉríne yɛ́ psi tséʼé ŋkyé wuŋ nɛ́ ke ŋgɛmbɛ ndɔŋ ye. Psi pó zé ŋgâ njʉ puŋ tsé njʉ́ ŋgəʼo zhí nɛ́, puŋ kémbó tsé tsɛʼɛ tsúbɔndzɔʼ yɛ́ psi tséʼé nɛ́. 8Ŋkyé ŋgâ kɛ pɔ́ŋmɛ́ páá, psi tsé mbé nzɔŋɔ ŋgâ puŋ tsó kii zé ŋgâ ŋgəʼo yɛ́ a kɛ kúŋɔ́ ywí ndzó pɛ́rɛ́ ŋgɔŋ Azi nɛ́ kɛ gháʼmbwó myi kaʼatɛ psi kpaŋ ŋgâ a ndɔ́ɔ́ tó zhí.
9Ɔŋɔ́, psi kɛ zóʼó mbəb psi ŋgâ zhí no kɛ myé. Néré a kɛ ghɛ, tɛɛmbɛ psi pó mbé ntíí psyɛ́ndzɔʼ zhí pe mbəb psi ne tómbəb zhí pó. Ntsʉʼmbé tíí mbəb Mboʼmvé, yé wɛ́ a zhʉyɛ́ pɔŋ ne vó nɛ́. 10A kɛ mkpéé ye mkpéé ywí pwó yekénɛ́ zhi vó, ke ŋgɛ náʼá ke mkpê ywí mkpéé. Psi shʉ́rɛ zhí pe ndaʼ yé, a ke ŋgɛ náʼá ke kpê ywí kpéé ŋkʉ́rʉ́. 11Ŋkɔʼɔtómbəb yuŋ, puŋ ke tsé ŋgɛbɛ ywí ne ntsɛ́ʼɛ́ Mboʼmvé yuŋ. Néré kɛ́ʼɛ́ Mboʼmvé ghɛ̂ náʼá ŋkʉ́yó mbɔ́rɔ́ tséʼé pɔŋ zááme pɛ́, pɔ́b tsɛʼɛ ŋkyé ywí nɛ́. Puzááme péré pó fɛ́ ŋgúʼune pwó ye ŋkyé ywí.
Pɔ́lə sed kpaŋató yé
12Yɔ́b yɛ tɛɛmbɛ a zhyɛ́ piŋi ŋéʼe nɛ́, a no yɔŋ yɛ́, ndzɔʼ yiŋi tsɔ́ ne piŋi nɛ́. No yéré pɛɛ ŋgâ. Psi kɛ nyi zhí ndzó mvé yɔŋ, mbɛ náá síŋ puŋ, pe ne fɛ mbəb sye pwɛ ŋgerɛ́ŋgéd yɛ́ a twɔ́ pwó Mboʼmvé nɛ́. Mbé nyǐ ne zɛ́no ŋumesɔŋ pó, a tyáŋa foʼndzəndzoʼ Mboʼmvé tyáŋa ywí. 13Psi tsé mbé ŋwɛʼɛ cyó yɔ́b ndúŋú kii a ke mbɛɛ meno pɛ́ puŋ fú mbó ndzoʼ nɛ́ pó. Ntsʉʼmbé mə mkpâŋ ŋgâ puŋ tsé ndzóʼó ywí kpaʼ sʉ́ʼʉ ŋkhoʼyɔŋ. 14Ŋkyé ŋgâ puŋ kɛ pě ndzóʼó ywí pé tiʼé, puŋ yɔ̌ ywí tíʼé nuŋ, ntsʉ́ŋtsʉ́ŋ njʉ́ psi ke náʼá ndɔ̂ wuŋ tiʼɛ nuŋ ne zhyémve Ntsɛɛpɔŋ Yěsô nɛ́. 15Njʉ́ mə kɛ cʉyǐ ndzɛ́ ndzó ndzɔʼ ya ŋgâ yéré no sísíŋ nɛ́, mə ntíí ŋgâ tɛɛmbɛ mə mbě ndzáʼá yóʼó puŋ ŋkɔ́ŋ, ne mkpêne mbɛ́rɛ́ foʼndzəndzoʼ yipáá, 16ŋgɛ́ ŋǎ yóʼó puŋ ŋgú Makadoniya, ke mbó ŋgɛ mbɔ́rɔ́ ndzəb ndzáʼá yóʼó puŋ kɛ́ʼɛ́ ŋgâ puŋ cʉ̌yi ntsúŋú nsěnyi ya ne ŋgǔne ndzó pɛ́rɛ́ ŋgɔŋ Zhʉde. 17Mə kɛ ghɛ̂ ntii yéré no kɛ́ʼɛ́, ntii kii yɔ̌ kpaŋató? Kii ya kpaŋató ké mbɛɛ yé pumésɔŋ, kaʼatɛ no pɛ siŋ mo, a pɛ́ ndzó ndzɔʼ ya, mə ŋgɛ́ mbzyɛ́ mbó sirɛ́? 18Mboʼmvé zé ŋgâ nsó ywí wɛ́ psi tsɔ̂ ne puŋ nɛ́, kɛ pé pɛ́ɛ́ «Ɔ́ŋɔ́» pú «ŋgáŋ» pó, 19ŋkyé ŋgâ Mɔ́ŋ Mboʼmvé, Yěsô Kristo wɛ́ mo, Siləvɛŋ né Timoté, psi kɛ cʉ́rɛ wé yóʼó puŋ nɛ́, kɛ pe pé «Ɔ́ŋɔ́» pú «ŋgáŋ» pó. A kaa kɛ pɛ́ cyó yɔ́b kii ke mbɛ́ɛ́ «ɔ́ŋɔ́» pó 20ŋkyé ŋgâ, ŋkɔŋɔ pɛ kaʼ pɛ́ Mboʼmvé kaʼ náá nɛ́, záʼá mbəb yé, ndúŋɔ. Néré, mbé «Ɔ́ŋɔ́.» A ke mbó zaʼá ndúŋú tíí yé, piŋi tsɔ̂ ŋgâ: «Á pé néré», ne fɛ́ne ŋgúʼune pwó Mboʼmvé nɛ́. 21A Mboʼmvé mbé ŋɔŋ wɛ́, a fɛ́ tʉ̌ŋ ne psi, ŋgɛ mbɛ́ ne puŋ, ndzɔ́ʼɔ́ tsómvé yiŋɛ Kristo nɛ́. A tsɔ́ʼ ŋkɔʼɔtómbəb Mboʼmvé wéré, ntsɔ́ʼɔ́ wíŋi ne fǎʼne pwó yé. 22Yé wɛ́ a kémbó níŋ i ye níŋ i máŋ ye mbəb piŋi, mbó níŋí Zhʉye yáŋme ndzó ndzɔʼ yiŋi, kɛ́ʼɛ́ ŋgâ piŋi cʉ̌yi ndzé ŋgâ, a naʼ fɛ́ cyó foʼ ne piŋi nɛ́. 23Mboʼmvé zé! A pɛ́ɛ́ yɛ́ mə ntsɔɔ mbwɔ̂ nɛ́, a zhyɛ́ mə pfó! Mə kɛ ghɛ́ mbé kʉ́yó ndzó mbɛ́lʉ́ŋ Korɛŋto pó, a zhyɛ no yɛ́ mə kɛ pe tsé nzɔŋɔ ntsɔ no yɛ́ a ndzuʼɔ ndzɔʼ yuŋ nɛ́ pó. 24A pe nɛ́ pe ŋgâ psi nzɔŋɔ ndzíʼɛ no yɛ́ pǔŋ mbzyɛ nɛ́ ziʼ pó, ŋkyé ŋgâ puŋ nsé ntʉ̌ŋme ndzɔ́ʼɔ́ psyɛ́ndzɔʼ yuŋ. Ntsʉʼmbé, no yɛ́ psi kɛ táʼa nɛ́, kɛ pɛɛ ŋgâ ndebéne ghɛ mbɛ́ ndzó ndzɔʼ yuŋ, zhí pwó ke mbɛ ndúŋú.
ទើបបានជ្រើសរើសហើយ៖
2 Korɛŋto 1: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល