1 Korɛŋto 16
16
Mbób yɛ pe kɛ ghɛ́ maʼ fɛ́ ndáméted Yerʉ́salɛm nɛ́
1Ŋgɛ khú ne no mbób yɛ́ pe maʼa fɛ pwó pǔkristo nɛ́, a nzɔŋɔ ŋgâ ŋ ŋkɔʼɔtómbəb yuŋ nyí njʉ́, mə kɛ nsó ŋgâ pǔkristo ndzó pɛ́rɛ́ ŋgɔŋ Galasi nyí nɛ́. 2A zɔŋɔ ŋgâ ŋkɔŋɔ pɛ sɔ́ zhyémve náá ne ŋgabtáŋ, mbɛwɔ̂ kʉyo ne yɔ́b yɛ́ a tsúŋɔ ndáb ye ne fɛ́ne nɛ́, pe ndɛ mbó ndzwə́ʼɛ́ ŋkhoʼyɛ́ mə mbáŋa nɛ́ mbɔ́rɔ́ tsé tɛ́rɛ fɛ́ ywoʼɔ́ mɔʼɔ. 3Ŋkhoʼyɛ́ mə mbáŋa nɛ́, mə fɛ́ ŋweʼe pwó pɔŋ pɛ́, puŋ tsɔʼɔ wɔ́b ne ndɔ̌ne mɔ́b pɛ́ puŋ téré nɛ́, ŋgú nuŋ Yerʉ́salɛm. 4A pɛɛ yɛ́ a tsyɛ́ɛ́ ŋgâ ŋ ŋkɔʼɔtómbəb ya, mə ŋgú nɛ́, mbǒ psi pɔ́b ŋgú.
Pɔ́lə kaʼ nsěnyi wɛ́ a ŋgú nɛ́
5Mə ŋgɛ mbáŋa pfúŋɔ́ puŋ, ndzáʼá ne Makadoniya. Mə siʼá yéré pɛ́rɛ́ ŋgɔŋ, 6Cyǒkhoʼ mə mboʼ ndáʼ pɔŋ zhyémve yóʼó puŋ, kii ŋgâ mə mbóʼó tsó ŋkɔŋɔ ŋgábmvé kəpɔŋ náá yóʼó puŋ. Kɛ́ʼɛ́ ŋgâ puŋ ghébɛ́ ya ne ghǔne ne ssó ne nsěnyi ya. 7Yɔŋ kɛɛ, mə tsé mbé zɔŋɔ tsɛɛ tsó njʉ́ wúŋ pó. Mə nzɔŋɔ piŋi naʼ ndáʼ, mbéyɛ́ Ntsɛɛpɔŋ psyɛ́ nɛ́. 8Ntsʉʼmbé mə tsó Éfɛ̂zə kaʼatɛ mbáŋa zhyémve ndebéne Paŋtekotə. 9Ŋkyé ŋgâ Mboʼmvé fɛ́ mɛndɔ́b kəkwéʼe ne mo, ne fǎʼne yóʼó pwó yé, mbɛ njʉ́ ghaŋákepeŋe gháʼmbwó yóʼó nɛ́. 10A pɛɛ yɛ́ Timoté kʉyo yóʼó puŋ nɛ́, puŋ zhyɛ́ njʉ́ a ntsó sʉ́ʼʉ tsetsɛrɛ puŋ nɛ́, ŋkyé ŋgâ a ke faʼa faʼ Ntsɛɛpɔŋ njʉ́ mo nɛ́. 11Néré kɛ́ʼɛ́ ŋɔŋ ndɛ gbáŋá wé. Ntsʉʼmbé puŋ níŋ i páb ye njʉ́ a ŋgɛ mbɔ́rɔ́ ndzəb pfúŋɔ́ mo, mbɔ́rɔ́ ne mbúru nɛ́. Ŋkyé ŋgâ psyɛ pecyó pɔ́ŋmɛ́ tsé ndzwəʼɛ wé. 12Ŋgɛ khú ne mɔ́ŋmɛ́ wíŋi Apolosə, mə fɛ́ tʉŋ pwó ye ŋgâ a kʉ́yó yóʼó puŋ, pwɛ pecyó pɔŋmɛ́. Ntsʉʼmbé a pe tsé nzɔŋɔ ŋkʉyo ŋkhoʼyɔŋ pó, a náʼá ŋkʉ́yó ŋkhoʼyɛ́ Mɔ́ŋ sáŋ twɔ́ pwó ye nɛ́.
Pɔ́lə fɛ njʉyǐndzʉ ntʉ́ʉ́
13Puŋ yaʼ sáŋ, kii ndzɔʼ yuŋ po təŋé ne no psyɛ́ndzɔʼ. Puŋ ntséʼé shʉ̌ndzɔʼ kii mbwó múŋ ndɛ mbɔ́d. 14Puŋ ke ŋgyɛ̂ ŋkɔŋɔ yúŋ no náá, pe ne kəŋe. 15Pɔ́ŋmɛ́ páá, mə tséʼé taʼ no yɛ́ mə ké mbó tsɔ́ ne puŋ nɛ́: puŋ zé ŋgâ, a kɛ pé Stefanasə pwɛ yé ndáá ndáb mbé sɔ́ ghaŋá psyɛ́ndzɔʼ ndzó pɛ́rɛ́ ŋgɔŋ Akayi, pɔ́b kɛ fáʼa pwo pǔkristo kaʼatɛ. 16Néré kɛ́ʼɛ́, puŋ zóʼntswee pɔŋ njʉ́ pɔ́b nɛ́, pwɛ ŋkɔŋɔ pɔŋ pɛ́ pɔ́b yɔ́ɔ́ ŋgəʼo, fáʼa njʉ́ ye nɛ́.
17Mə tséʼé ndebéne zááme ŋkyé Stefanasə, pwɛ Fɔtʉnatʉsə ne Akayikʉsə pɛ́ pɔ́b pfúŋɔ́ mo, njʉ́ puŋ yóʼó nɛ́ pó. 18Ŋkyé ŋgâ pɔ́b zhyɛ́ kpaŋató ya fúru, mbɛ yuŋ. Puŋ zɛ́ njʉ́ tɛɛmbɛ puŋ ghóʼ zhí pughúʼúme péré nɛ́.
19Pɛ yáʼméted pɛ́ a ndzó pɛ́rɛ́ ŋgɔŋ Azi nɛ́, tsɛ́ʼɛ́ wúŋ. Akilasə pú Priska tsɛ́ʼɛ́ wuŋ ne tíí Ntsɛɛpɔŋ, pwɛ ŋkɔŋɔ pɔ́ŋmɛ́ pɛ́ pɔ́b tɛ́rɛ náá ndáb pɔ́b nɛ́. 20Ŋkɔŋɔ pɔ́ŋmɛ́ náá ghaa mə tsɛ́ʼɛ́ wúŋ, puŋ tsɛ́ʼɛ́ mbəb yuŋ tsetsɛrɛ puŋ kaʼatɛ ŋgébé.
21Tséʼé yɔŋ, a ŋwéʼe kpaʼ mo Pɔ́lə, ne pwó ya. 22Ŋɔŋ wɛ́ a kʉyě Ntsɛɛpɔŋ nɛ́ pó, a ndɔŋ pɛ tó ye. Maranata, kě tsi pe ŋgâ: kʉ́yó kɛ Ntsɛɛpɔŋ.
23A foʼndzəndzoʼ Ntsɛɛpɔŋ Yěsô Kristo pɛ ne puŋ. 24Mə kʉ́yé ŋkɔŋɔ wúŋ náá ne tíí Yěsô Kristo.
ទើបបានជ្រើសរើសហើយ៖
1 Korɛŋto 16: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល