2 Korɛŋto 3
3
Mbziʼe ŋgaŋafaʼ ndzó kaŋ ffé
1A kɛ́ʼɛ́ tséʼé psi ne nyǒʼne mbəb zhí ne tómbəb zhí? Kii a nzɔŋɔ ŋgâ, pecyó pɔŋ kii ŋgâ puŋ, ŋwéʼe ŋweʼe nyóʼ mbəb zhi ne puŋ, njʉ́ pecyó pɔŋ zhyɛ́ nɛ́? 2A kpaʼ puŋ mbé zhí ŋweʼe, ŋweʼe yɛ́ a ŋweʼéme ndzó ndzɔʼ zhi nɛ́, ŋkɔŋɔ pɔŋ náá zé, mbó tsé fu. 3A yáŋa ne mii ŋkɔŋɔ pɔŋ náá, puŋ pɛɛ ŋweʼe Kristo yɛ́ a kɛ tee ne psi, ne faʼ nɛ́. Pe pé ŋwɛʼɛ ne ŋkǔŋweʼe pó, ntsʉʼ mbɛ́ɛ́ ne Zhʉye Mboʼmvé, yé wɛ́ a mɔ́b nɛ́. Mbe pɛɛ ndúŋú pɛ taafrəre pɛ ŋgɔʼ pó, ntsʉʼmbɛ́ɛ́ ndzó ndzɔʼ yuŋ, yɛ́ a taafrəre ndzǎbmbəb nɛ́. 4Yekénɛ́ no yɛ́ nɛ́, psi cʉ̌yi ndzɛ́ siŋ Mboʼmvé, ŋgâ a sísíŋ, ŋgɛmbɛ a zhyɛ́ Kristo nɛ́. 5Psi saʼá tʉ̌ŋ pe ne tʉ̌ŋ ndúŋ myí pó, tʉ̌ŋ myí twɔ́ pwó Mboʼmvé.
6A zhyɛ́ yé, psi kúʼɔ́ ne mbéne ŋgaŋafaʼ ncʉrɛ kaŋ ffé. Yéré kaŋ ffé tsɛɛ ndúŋú yɔ́b yɛ́ pé ŋweʼě ŋweʼě nɛ́ pó. A tsɛ́ ye pé ndúŋú Zhʉye yáŋme, ŋkyé ŋgâ yɔ́b yɛ́ pé ŋweʼě ŋweʼě nɛ́, tsyaŋa pɔŋ pe ndúŋú mɛndɔ́b vó. Ntsʉʼmbé, Zhʉye yáŋme pó tsyaŋa yé pɔŋ, pé ndúŋú mɛndɔ́b tsómvé. 7Faʼ yéré yɛ́ a fɛ́ vó nɛ́, yɛ́ pe kɛ ŋwɛʼɛ ndúŋú taafrəre pɛ ŋgɔʼ nɛ́, a kɛ nyóʼ taʼ mbziʼe ghɛ́ɛ́ Mboʼmvé khoʼ yéré kaʼatɛ, tɛɛmbɛ pɔŋ Issayɛ pe ŋkúʼɔ́ ne ndíŋine záŋ Mǔsê pó, ntsʉʼŋgɛmbɛ ghɛ́ɛ́ wéré záʼá záʼá. 8Faʼ Zhʉye yáŋme ŋgyɛ níŋ mbé tséʼé ghɛ́ɛ́ kaʼatɛ ntsɛɛ wé tsɛɛ pɔɔ? 9A pɛ́ɛ́ yɛ́, faʼ yɛ́ a kɛ zhyɛ́ pe fǔŋɔ pɔŋ nɛ́ kɛ tséʼé ghɛ́ɛ́ nɛ́, mbǒ faʼ yɛ́ a zhyɛ́ pɔŋ pɛ ŋgerɛ́ŋged siŋ Mboʼmvé nɛ́, ŋgyɛ níŋ mbé tsɛ́ɛ́ yéré tsɛɛ pɔɔ? 10Ŋgáŋ, yɔ́b yɛ́ ghɛ́ɛ́ kɛ kébé wé nɛ́, pǒ mbé pe cyó yɔ́b siŋ wɔ̂ŋ ghɛ́ɛ́ wɛ́ a tséʼé fwɛ́ɛ́ ye nɛ́ pó. 11Ŋkye ŋgâ, a pɛɛ yɛ́ ghɛ́ɛ́ kɛ pɛ́ ndúŋú yɔ́b yɛ́ a zaʼa záʼá nɛ́, kɛ yikɔ́ ne yɛ́ a naʼ ŋgú ndzó cyó ywoʼ nɛ́ pɔɔ? 12A zhyɛ́ yéré mbziʼe shʉríne yɛ́ piŋi tséʼé nɛ́, piŋi tséʼé shʉ̌ndzɔʼ zááme. 13Piŋi tsé mbé zhyɛ́ yiŋi pe njʉ Mǔsê wɛ́, a kɛ pwɔ̂ záŋ ye ne ywɔ̌ndzwé, kɛ́ʼɛ́ ŋgâ pɛ Issayɛ ndɛ njʉ́ ndáŋne mé méré mɛ́, a kɛ záʼá záʼ nɛ́, kɛ ghɛ̂ mě nɛ́. 14Ntsʉʼmbé zɛ́no yɔ́b pɛɛ ndzɔ́ʼɔ́ ndzə́ndzə́b. Kaʼatɛ mbáŋa ne ndzebé, ŋkhoʼyɛ́ pe tsé fu ndzúŋ kaŋ nɛ́, ywɔ̌ndzwé yéré ke mbɛɛ pé. Pe suʼú pó, ŋkyé ŋgâ a pɛ́ɛ́ ŋkhoʼyɛ́ pe ntə́b pú Kristo mbé taʼye nɛ́ ŋkɔŋ, a pɔ́rɔ́ mbwó. 15Ɔ́ŋɔ́, kaʼatɛ mbáŋa ne ndzebé, ŋkɔŋɔ ŋkhoʼ yɛ pɔ́b tsé fu ŋweʼe Mǔsê yɔb náá nɛ́, ywɔ̌ndzwé yéré ke mbwɔ̂ ndzɔʼ yɔ́b pwɔ̌. 16A ndaʼ ŋkhoʼyɛ́ ŋɔŋ séd, mbzyɛ Ntsɛɛpɔŋ nɛ́ ŋkɔŋ, ywɔ̌ndzwé yéré pɔ́rɔ́ mbwó. 17Ŋkyé ŋgâ Ntsɛɛpɔŋ a Zhʉye yáŋme. Ywoʼ yɛ́ Zhʉye Ntsɛɛpɔŋ yóʼó nɛ́, ŋgʉyiŋine mbɛ yóʼó. 18Ŋkɔŋɔ wíŋi wɛ́ ywɔ̌ndzwé ndúŋú záŋ yiŋi nɛ́ pó, ghɛ́ɛ́ Ntsɛɛpɔŋ tsé nyʉyi mbəb piŋi. Néré kɛ́ʼɛ́, piŋi sêd nɛ́ ŋkhoʼyɔŋ ntsʉ́ʼɔ́ fwɛ́ɛ́ Ntsɛɛpɔŋ, ne taʼ ghɛ́ɛ́ wɛ́, a pó mbé yé kəkwéʼe kaʼatɛ ntsɛɛ wéré nɛ́. Yekénɛ́ no yɛ́ nɛ́ Ntsɛɛpɔŋ wéré wɛ́ a Zhʉye Yáŋme nɛ́, zhyɛ nɛ́.
ទើបបានជ្រើសរើសហើយ៖
2 Korɛŋto 3: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល