2 Korɛŋto 2
2
1Ŋgɛ́ khú ne mo, mə ntíí ŋgâ mə mbáŋa yóʼó puŋ tsé fɛ́ tsuŋíne ne puŋ pó. 2Mbó mbéyɛ́ mə ŋgyɛ́ puŋ tsúŋí nɛ́, mbǒ a ŋgyɛ́ wɔ̂ mə ŋgɛŋɛ, fáá ŋɔŋ wɛ́ mə ŋgyɛ́ a tsúŋí nɛ́? 3A kɛ zhyɛ́ yéré mə ŋweʼé ŋweʼe fɛ́ ne puŋ, mbɔɔ ŋgâ kii mə ndɛ ŋgɛ́ mbáŋa pɔŋ pɛ́ pɔ́b kɛ ghɛ̂ ŋgyɛ́ ndzɔʼ ya yáŋ nɛ́, ndɛ mbó ŋgyɛ mə tsuŋɛ tsuŋɛ. Ŋgɛ khú ne puŋ, mə cʉ̌yi ndzɛ́ ndzó ndzɔʼ ya ŋgâ ndebéne mɛ́ mə tséʼé nɛ́, puŋ ke ntsɛ́ʼɛ́ yuŋ pe néré. 4Ɔ́ŋɔ́ mə kɛ ghɛ́ ŋwɛʼɛ, ŋwɛʼɛ ne ndzɔ́ʼɔ́ púbúme, a po tsé ndzuʼɔ kaʼatɛ, ne yaŋ zááme, mbé pɛɛ ne ŋgyɛ̌ne ŋgâ puŋ tsé tsúŋɛ pó. Ntsʉʼmbé, a kɛ pɛ́ɛ́ ne ŋgyɛ̌ne, puŋ zé kəŋe zááme yɛ́ mə tséʼé ŋkyé wuŋ nɛ́.
Puŋ máʼ vɔ̌no mvɔ̂no wékénɛ́
5A pɛ́ɛ́ yɛ́ ŋɔŋ kɛ zhyɛ́ taʼ no yɛ́, a kɛ zúʼɔ́ pɔŋ nɛ́, mbǒ a kɛ pe zhyɛ́ mbəb mo pó. Ntsʉʼmbé mbǒ a kɛ zhyɛ́ mbəb ŋkɔŋɔ wuŋ náá. A tsyɛ́ nɛ́ ŋgâ pe máʼ ndzɛ́ɛ́ ndúŋú pó. 6Ne zhí ŋɔŋ wéré, a pɛ́ɛ́ yɛ́ ndáméted kɛ fiʼ fiʼ tó ye nɛ́, pe tee kɛ́ʼɛ́. 7A zhyɛ́ yéré a pó ndzɔŋɔ nɛ́ pe ŋgâ puŋ máʼ vɔ̌no ndɔ́ɔ́ wé, ntsúbú ndzɔʼ yé kɛ́ʼɛ́ ŋgâ ntsúŋine ndɛ ŋgaʼmbwó me.
8A zhyɛ́ yéré, mə mbóʼómbwó ne puŋ ŋgâ, puŋ zhyɛ́ a zé kəŋe yɛ́ puŋ tséʼé ŋkyé wé nɛ́. 9Ŋkyé ŋgâ mə ŋwɛʼɛ kaʼa, pé ne njʉ́ne mbéyɛ́ puŋ tsé ndzóʼo ntswee ndúŋú ŋkɔŋɔ no náá, nɛ́. 10Ŋɔŋ wɛ́ puŋ máʼ vɔ̌no ye nɛ́, ŋ ŋkɔʼɔtómbəb ya, mə máʼ vɔ̌no yé. Mbó mbéyɛ́ mo, mə kɛ máʼ vɔ̌no ŋɔŋ nɛ́ -ne yaa fuʼ yɛ́, mə kɛ zhyɛ́ nɛ́- mbǒ mə kɛ zhyɛ́ néré, ŋkyé wúŋ síŋ Kristo. 11Yânéré ŋgâ kii Sátaŋ ndɛ shʉyɛ́ wíŋi. Piŋi fwɔ̌ kpaŋató yé?
Ghaŋátɔ́b Kristo pɛ́ɛ́ njʉ́ ndáá vódtswɔtwɔ́ nɛ́
12Mə kɛ páŋá Trowasə ne ncʉríne Ŋkəŋ Sʉ́ʼʉ Kristo. Mbɛ njʉ́ Ntsɛɛpɔŋ kɛ tsɔ́ʼ mɛndɔ́b ne mo ŋgâ a záʼ sʉ́ʼʉ nɛ́, 13ndzɔʼ ya pé pɛ ndzóó sʉ́ʼʉ pó. Ŋkyé ŋgâ mə kɛ pe zhʉ́ Titə, mɔ́ŋmɛ́ ya pó. Mə ndíʼɛ́ wɔ́b, ŋáá yóʼó ŋgú Makadoniya. 14Mə fɛ́ ŋgúʼune pwó Mboʼmvé. Ye wɛ́ a tsyaŋá wíŋi kii kaŋ ndzɔ́ʼɔ́ pɔŋ pɛ́, pwɛ Kristo maʼa ntsɛɛ nɛ́. A yɔɔ ywí ncʉrɛ zɛ́no Kristo nuŋ, ndzó ŋkɔŋɔ ywoʼ náá, njʉ́ taʼ vódtswɔtwɔ́ yɛ́, tswɔ yé ndɛ mgbáʼa ŋkɔŋɔ ywoʼ náá nɛ́. 15A kiʼi ŋgɛ mbɛ, piŋi pɛ pwó Mboʼmvé pé njʉ́ ndáá vódtswɔtwɔ́ yɛ́, Kristo fɛ́ pwó ye nɛ́. Ŋkye pɔŋ pɛ́ pɔ́b ndúŋú mɛndɔ́b pwó nɛ́, ghɛmbɛ́ pwɛ pɔŋ pɛ́ pɔ́b ndúŋú mɛndɔ́b ndzǔne nɛ́. 16Piŋi pwó sɔ́ pɔŋ péré, mbé tswɔ vó yɛ́ a tyáŋa ndzɔ́ʼɔ́ vó nɛ́. Ŋgɛmbɛ pwó pecyó, mbé tswɔ tsómvé yɛ́ a tyáŋa ndzɔ́ʼɔ́ tsómvé nɛ́. A kiʼi ŋkuʼú wɔ̌ ne fǎʼne yeré faʼ?
17Psi pɛ́ zhí pe njʉ́ záá pɔŋ pɛ́ pɔ́b yɔɔ Nsó Mboʼmvé ntaʼá mbób núŋ nɛ́ pó. Psi cʉ́rɛ zhí pe ne ŋgerɛ́ŋged ne mii Mboʼmvé, ŋgɛmbɛ a twɔ́ yé ntwɔ́ ywí, psyɛ́ Kristo pó ntə́b mbé taʼ yé.
ទើបបានជ្រើសរើសហើយ៖
2 Korɛŋto 2: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល