2 Korɛŋto 4
4
Faʼ ghaŋántɔ́b pɛ́ɛ́ ne ncʉríne Yěsô Kristo
1Mboʼmvé kɛ tee faʼ yɔŋ ne psi pé ne tsaaghəghəŋ. A zhyɛ́ yéré tɛɛmbɛ mbwó myi pe pɔ́d pó. 2Psi kɛ kiri meno nyaʼa nyaʼa pwɛ meno pfɔ́shʉ́ŋ. Psi zhyɛ́ no pe ne ŋgerɛ́ŋged, kii pó tsé sɛ́rɛ Nsó Mboʼmvé. Ntsʉʼmbé, psi cʉ́rɛ ŋgerɛ́ŋged yéré kɛ́ʼɛ́, nyoʼó ne ŋ ŋkɔʼɔtómbəb zhí ŋgâ, tɛɛmbɛ ŋkɔŋɔ pɔŋ náá tíí ndzɔʼ yɔ́b mbəb psi, siŋi Mboʼmvé. 3A pɛɛ yɛ́ Ŋkəŋ sʉ́ʼʉ zhí yéré pɛɛ ywʉme nɛ́, mbǒ a pɛɛ pwó pɔŋ pɛ́ pɔ́b tsɛɛ mɛndɔ́b pwó nɛ́, 4pɔ́b pɛ́, pɔ́b tséʼé psyɛ́ndzɔʼ nɛ́ pó, pɔ́b pɛ́, Sáʼmvé wɔŋ ffǒ zɛ́no yɔ́b nɛ́. Kɛ́ʼɛ́ ŋgâ kii pɔ́b ndɛ njʉ́ ndáŋne yɛ́, Ŋkəŋ sʉ́ʼʉ fɛ nɛ́. Ŋkəŋ sʉ́ʼʉ wéré nyóʼó ghɛ́ɛ́ Kristo, yé wɛ́ a fwɛ́ɛ́ Mboʼmvé nɛ́. 5Ŋgáŋ! psi cʉ́rɛ́ tómbəb zhí pó. Ntsʉʼmbé, á Ntsɛɛpɔŋ Yěsô Kristo, mbé ŋɔŋ wɛ́ psi cʉ́rɛ nɛ́. Ŋgɛ ŋkhú ne psi, a zhyɛ Yěsô ŋgâ psi tsɔ́ ŋgâ psi ŋgaŋafaʼ ne puŋ. 6Ŋkyé ŋgâ Mboʼmvé wɛ́ a kɛ nsó ŋgâ: «Mɔ́ɔ́ yáŋá ndzɔ́ʼɔ́ ndzə́ndzə́b» nɛ́, a kembé yé mbé Ŋɔŋ wɛ́, a zhyɛ́ ŋgâ ŋkaʼmɔ́ɔ́ ye yáŋá ndzó ndzɔʼ yiŋi. Kɛ́ʼɛ́ ŋgâ piŋi yǎ ndúŋú, ntséʼé zɛ́no ndúŋú ghɛ́ɛ́ yé wɛ́ a nyʉyí ndúŋú záŋ Kristo nɛ́. 7Ntsʉʼmbé yéré foʼ, psi pɛ́bɛ́ pɛ́bɛ́ njʉ́ pe ndɛ mbɛ́bɛ kəŋtsetsaʼ nɛ́. Yânéré kɛ́ʼɛ́ ŋgâ pɔŋ zé ŋgâ, méré mbziʼe tʉ̌ŋ kəkwéʼe twɔ́ ne psi pó, ŋgâ a twɔ̌ pwó Mboʼmvé. 8Pe fɛrɛ ywí ne ŋkɔŋɔ ndzáʼá yé náá, ntsʉʼmbé psi pe tɔ́b pó. Ndzáá ywí ne ŋkɔŋɔ ŋgəʼo náá, ntsʉʼmbé mbwó myi pé pɔ́d pó. 9Nʉ́ʉ́ ywí, n ntsʉʼmbé pɛ́rɛ́ ywí pó. Máʼá ywí syé, ntsʉʼmbé psi pe pfó pó. 10Psi kyɛ̂ vó Yěsô mbəb psi kii kaŋ. Kɛ́ʼɛ́ ŋgâ pe ke njʉ́ tsómvé Yěsô zhʉ́ mbəb psi. 11Mbɛ́ njʉ́ psi kɛ kɛrɛ pumɔ́b nɛ́, psi tsɛɛ mésɔvó ŋkyé tíí Yěsô, kɛ́ʼɛ́ ŋgâ pɔŋ zhʉ́ tsómvé Yěsô mbəb psi, psi pɛ́ psi ke ŋkʉ́yó pfó pfó nɛ́. 12Néré, vó ghɛ̂ fáʼá faʼ yé mbəb psi, a pó fáʼa tsómvé mbəb puŋ. 13A ŋweʼéme ŋgâ: «Mə kɛ psyɛ́. A kɛ zhyɛ́ yéré mə nsó.» Njʉ́ a ké mbé taʼ psyɛ́ndzɔʼ wéré fáʼa mbəb psi nɛ́, a zhyɛ́ yéré, mbɛ tómbəb zhí, psi psyɛ́ kémbó ntsɔ. 14Ŋkyé ŋgâ psi zé ŋgâ, Mboʼmvé, yé wɛ́ a kɛ zhʉyɛ́ Ntsɛɛpɔŋ Yěsô ne vó nɛ́, náʼá ke njʉyɛ ywí ne vó, mbó ŋkáá wíŋi pɔ́b ntíí ne gháá ye. 15Ŋkɔŋɔ meno pɛ́ a ŋkuŋɔ ywí náá nɛ́, pé ŋkyéé wuŋ, kɛ́ʼɛ́ ŋgâ foʼndzəndzoʼ Mboʼmvé ke mêmě mvii. Puŋ po ndzáá ne fɛ́ne khǐŋgóʼ ne ghɛ́ɛ́ Mboʼmvé.
Ntwɔ́ ndáb ghaŋántɔ́b pɛ́ɛ́ yɔ́b yɛ́ pe tsé mbé zhʉ́ nɛ́ pó
16A zhyɛ́ yéré tɛɛmbɛ mbwó myi pe pɔ́d pó. Mbɛ njʉ́ ndzǎbmbəb zhí ke ŋɔ́ʼɔŋɔʼɔ́ mbúbɔ ŋkɔŋɔ zhyémve náá nɛ́, zhʉye ywí ke ŋkhú yé féé ŋkɔŋɔ zhyémve náá. 17Ŋkyé ŋgâ ŋgəʼo yɛ́ psi zhʉ́ ne mɔ́ŋtiʼa khoʼ wɔŋ nɛ́, a kúʼú cyó yɔ́b ne psi, ne mɛ́mɛ́ ghɛ́ɛ́ wɛ́ a tsé ntsúŋɔ ne psi, a ghɛ̂ náʼá mbé mye nɛ́ pó. 18Ntwɔ́ ndáb myí pɛɛ yɔ́b yɛ́ pe zhʉ́ nɛ́ pó. Ntsʉʼmbé a pɛɛ pɛ́ pe tsé mbé zhʉ́ nɛ́ pó. Ŋkye ŋgâ mɔ́b pɛ́ pe zhʉ nɛ́, zaʼa zaʼa. Ntsʉʼmbé, yɛ́ pe tsé mbé zhʉ nɛ́ po, náʼá myé ne cyó zhyémve pó.
ទើបបានជ្រើសរើសហើយ៖
2 Korɛŋto 4: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល