1 Korɛŋto 9
9
Faʼ yɛ́ Pɔ́lə tsɛ́ʼɛ́ ne fǎʼne nɛ́
1Mə mbɛɛ mkpaŋ? Mə ŋgaŋantɔ́b Kristo pɔɔ? Mə kɛ pé zhʉ́ Yěsô Ntsɛɛpɔŋ wíŋi pɔɔ? A puŋ mbé kiŋi yaa faʼ yɛ́ mə faʼá pwó Ntsɛɛpɔŋ nɛ́ pɔɔ? 2A pɛ́ɛ́ yɛ́ pecyó pɔŋ zé ya njʉ́ ŋgaŋantɔ́b Kristo nɛ́ pó, mbǒ a nzwɛɛ ne ndaʼ puŋ, mbǒ mə yéré. Ŋkyé ŋgâ, a puŋ mbé kiŋi ŋgâ mə kɛ fáʼ faʼ ŋgaŋantɔ́b Ntsɛɛpɔŋ Kristo. 3Mbziʼe yɛ́ mə kpéé mbəb ya, pwó pɔŋ pɛ́ pɔ́b sɔbɔ́ ya nɛ́ pe nɔŋ: 4Psi tsɛ́ʼɛ́ ne ndzône mbó nɔ́ pɔɔ? 5Tɛɛmbɛ psi ké mbé yɔɔ zhi pěŋgyé pɛ pɔ́b pǔkristo nɛ́, pɔ́b tsyaŋ ywí njʉ́ pecyó pɛghaŋantɔ́b, mbɛ pɔ́ŋmɛ́ Ntsɛɛpɔŋ pwɛ Kefasə zhyɛ́ nɛ́, pɔɔ? 6A ndaʼ psi Baanabasə, mbé pɔŋ pɛ́ pɔ́b faʼa ŋkɔŋ, mbɔ́rɔ́ tsɛ́ʼɛ́ yɔ́b yɛ pɔ́b ndzɔ́ nɛ́? 7Á kɛrɛ fáʼ wɔ̌ njʉ́ káŋató nɛ́, kii tséʼé péé? Á kɛrɛ́ nǔʼ wɔ̂ nûʼ fɔŋ tsyé mbwóme syé? A kɛrɛ fɛ́ɛ́ wɔ̂ fɛɛ mɔ́b, kii kʉyě ne ndzǒne nɛ́? 8Á kpáŋ ndaʼ ŋumesɔŋ ne tó ye, ŋgyɛ́ néré? Ŋgáŋ! Kaŋ Mǔsê ke ntsɔɔ néré. 9Ntsʉʼŋgɛmbɛ, a pé ŋweʼéme ndzó kaŋ Mǔsê ŋgâ: «Wo ndɛ naʼ kwód ntswee naʼ wɛ́, a tsé ŋgɛ́bɛ wo kába mɔ́b pó nɛ́.» Mboʼmvé kɛ́ʼɛ́ tséʼé kpaŋató ŋkyé pɛ naʼ? 10A ké mbé tsɔ́ kɛ́ʼɛ́ ŋkyé ndaʼ wíŋi pɔɔ? Ɔ́ŋɔ́, pé kɛ ŋweʼé yéré ŋkyé wíŋi. Ŋkyé ŋgâ a zɔŋɔ ŋgâ ŋɔŋ wɛ́ a kyɛ́ faʼ nɛ́, tsé shʉ́rɛ, ŋɔŋ wɛ́ a kábá nɛ́, shʉri ŋgâ yé tsɔ́ʼɔ faʼ ndzoʼo. 11A pɛɛ yɛ́ psi kɛ pfé mve mɔ́b Zhʉye Yáŋme tsetsɛrɛ puŋ, puŋ pó fɛ́ mɔ́b puŋ ne psi nɛ́, mbǒ a gháʼambwo kaʼatɛ? 12A pɛɛ yɛ́ pecyó pɔŋ zhyɛ́ néré mbəb puŋ nɛ́, ŋkɛɛ yikɔ ne psi? Ntsʉʼmbɛ ne psi, psi kɛ pe zhyɛ́ néré pó. Psi gbǎ mbəb zhí ne ŋkɔŋɔ no náá, kɛ́ʼɛ́ ŋgâ yɔ́b ndɛ náŋá wuŋ ne ndzóʼne Ŋkəŋ Sʉ́ʼʉ Kristo.
13Puŋ zɛ́ ŋgâ a njʉyí ndámboʼmvé njʉyí pɔŋ pɛ́ pɔ́b faʼá ndzóó nɛ́. Pɔŋ pɛ́ pɔ́b faʼá ndzó ywoʼɔ́shʉ́ nɛ́, tséʼé yɔ́b mbɛ́d ndúŋú mwɔ̌shʉ́. 14A ke mbé tsʉŋtsʉ́ŋ njʉ́ Ntsɛɛpɔŋ nsó ŋgâ, pɔŋ pɛ pɔ́b cʉ́rɛ Ŋkəŋ Sʉ́ʼʉ nɛ́, a ké ŋgyɛ́ yéré pɔ́b tsǒ mvé. 15Ntsʉʼmbɛ ne mo, mə kɛ pe tsɔʼ yéré pfiŋi pó, ké mbó mbé ŋwɛ́ʼɛ kaʼa, pé ne ŋkɛ̂ne pó. Ŋkhoʼnéré mə pfo! ŋkyé ŋgâ ŋɔŋ yóʼó yɛ́ tɛɛmbɛ a túbú yéré no yɛ́ mə tiʼɛ núŋ nɛ́, ndzó ndzɔʼ ya nɛ́ pó! 16ŋkyé ŋgâ ncʉrɛ́ Ŋkəŋ Sʉ́ʼʉ pɛɛ no ntetoʼ ne mo pó, a no yɛ́ a nzɔŋɔ nɛ́, a taʼ no sʉ́ʼʉ yɛ́ mə tsɛ́ʼɛ́ ne ŋgyɛ̌ne nɛ́: a ndɔŋ pɛ tó mo, mbéyɛ́ mə ncʉ́ri Ŋkəŋ Sʉ́ʼʉ nɛ́ pó! 17A ghɛmbɛ mə ŋgyɛ́ ne tó ya, mbǒ mə tsé ndzwəʼɛ péé, ntsʉʼmbé a njʉ́ mə tsɛ́ʼɛ́ ne fǎʼne nɛ́, a taʼ peʼ yɛ́ pe tíí tó mo nɛ́. 18Ya péé kii ghɛ mbɛɛ kɔ́? Á ncʉríne Ŋkəŋ Sʉ́ʼʉ ndzəndzoʼ kii tsé ndzwəʼɛ pfiŋi yɛ́ a ŋgɛ mbɛ ndúŋú ne mo, nɛ́.
19Ɔ́ŋɔ́, mə mkpaŋ ŋɔŋ pó. Ntsʉʼmbé, mə séd ntsʉ́ʼ mkpaŋ ŋkɔŋɔ pɔŋ náá ne ndzóne pɔŋ zááme. 20Mə kɛ pɛ́ tsetsɛrɛ pɛ Yúda pé njʉ́ taʼ ŋuyuda nɛ́, ne ndzóne pɛ Yúda, pwɛ pɔŋ pɛ́, pɔ́b cʉ́ʼɔ́ pɛ mkpaŋ pwó kaŋ Mǔsê nɛ́, pé njʉ́ mə mbɛɛ cyó ŋɔŋ wɔ́b nɛ́. Néré pé ne ndzóne pɔŋ pɛ́ pɔ́b tsʉʼ pɛ mkpaŋ pwó kaŋ Mǔsê nɛ́. Ntsʉʼŋgɛ́ mbɛ mə mbé pé mbziʼe ŋɔŋ wéré pó. 21Mə kɛ pɛ́ tsetsɛrɛ pɔŋ pɛ́ pɔ́b zɛ kaŋ Mǔsê nɛ́ pó, pe njʉ́ kii mə ké mbé zɛ ya nɛ́ pó. Néré kɛ́ʼɛ́, pé ne ndzóne wɔ́b. Ntsʉʼŋgɛmbɛ, mə mbé tsó kii zɛ́ kaŋ Mboʼmvé pó, ŋkyé ŋgâ a Kristo mbé máá kaŋ. 22Mə kɛ pɛ́ tsetsɛrɛ pɔŋ pɛ psyɛ́ndzɔʼ yɔ́b pɔ́d nɛ́ kembɛ́ njʉ́ pɔ́b nɛ́, yânéré ŋgâ mə ndzɔ́ wɔ́b. Mə mbzyɛ́ ŋkɔŋɔ no náá pwó ŋkɔŋɔ pɔŋ náá kɛ́ʼɛ́ ŋgâ cyó ŋkhoʼ pecyó pɔ́ŋ yáá ndúŋú tséʼé ndzǔne. 23Mə ŋgyɛ́ ŋkɔŋɔ yéré náá kɛ́ʼɛ́ ŋkyé Ŋkəŋ Sʉ́ʼʉ, yânéré ŋgâ yáá mbɛ́d pɛ ndúŋú.
Mbziʼe yɛ́ ghaŋakíndéé tséʼé nɛ́
24Puŋ zé ŋgâ ghaŋakíndéé kpáʼá kí náá, ntsʉʼmbé ndaʼ taʼ ŋɔŋ ghɛ̂ ndzɔ̂. Puŋ khí ndéé nɛ́ pé njʉ́ puŋ zɔŋɔ zó zó nɛ́. 25Ŋkɔŋɔ ghaŋakíndéé náá tsé ntee meno zááme, ŋkhoʼyɛ́ pɔ́b tsé ndzeʼe ndéé nɛ́. Pɔ́b nʉʉ yɔ́b pé mézhyɛ wɛ́ a kʉ́yó mbubɔ́ nɛ́. Ŋgɛ khú ne piŋi, wíŋi mézhyɛ pɛ́ɛ́ wɛ́ a naʼ mbubú nɛ́ pó. 26Mbɛ ne mo, mə ŋgɛ kí ndzɛ́ ywoʼ yɛ́ mə ŋgú nɛ́: mə kí ne míí pfobɔ́ pó. Mə ŋgɛ gbíí kup, ndzɛ́ ywoʼ yɛ mə mgbíí nɛ́: mə mgbíí ndzó ywoʼɔ́ ndzəndzóʼ pó. 27Ntsʉʼmbé mə mgbáá mbəb ya ne tʉ̌ŋ, mbó kirɛ pɛ meno pwó ye zááme, mbɔ́ɔ́ ŋgâ mə ndɛ ncʉ́ri Ŋkəŋ Sʉ́ʼʉ pwó pecyó pɔŋ, mbó mbé pɛ́ ya ndzóʼó pó.
ទើបបានជ្រើសរើសហើយ៖
1 Korɛŋto 9: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល