1 Korɛŋto 8
8
Ndzab yɛ́ pé khí syé nuŋ nɛ́
1Ŋgɛ khú ne ndzab pɛ́ pé khí syé nuŋ nɛ́, ŋkɔŋɔ wíŋi náá tséʼé zɛ́no ndúŋú, njʉ́ puŋ tsɔ́ nɛ́. Zɛ́no fɛ́ɛ́ ntətoʼ pwó ŋunwɔ̌tó. Ntsʉʼmbé, kəŋe zhyɛ́ ŋgâ pecyó pɔŋ ghóʼ. 2A pɛ́ɛ́ yɛ́ ŋɔŋ tsé kpaŋa ŋgâ a zé no nɛ́, mbǒ a zyé mbé kɛ zɛ́ njʉ́, a ghɛmbɛ á zɔŋɔ ŋgâ a zé nɛ́ pó. 3Ntsʉʼmbé, a pɛ́ɛ́ yɛ́ ŋɔŋ kʉyě Mboʼmvé nɛ́, mbǒ Mboʼmvé zɛ́ wé.
4Kɛ́ʼɛ́, tɛɛmbɛ pé pfód ndzab yɛ́ pé khí syé nuŋ nɛ́? Piŋi zé ŋgâ cyó záʼá, kii cyó Mboʼmvé ndzó mvé yɔŋ, fáá ndaʼ Mboʼmvé, yé wɛ́ a ne ndúŋú yé nɛ́, pó. 5Mbɛ njʉ́ pecyó pɛ mɔ́b pépéé, kii ŋgâ ndúŋú tsetsáʼ, pe tsɔ́ ŋgâ a pɛ Mboʼmvé nɛ́. A sísíŋ ŋgâ pɛ Mboʼmvé yóʼó zááme, pwɛ pɛ ntsɛɛpɔŋ zááme. 6Ntsʉ́ʼmbɛ ne piŋi, piŋi tséʼé ndaʼ taʼ Mboʼmvé, yé wɛ́ a Tɛd nɛ́, yé wɛ́ ŋkɔŋɔ yɔ́b náá twɔ́ pwó ye nɛ́. Yé wɛ́ ŋkɔŋɔ wíŋi náá ghú pfúŋɔ yé nɛ́. Piŋi tséʼé ndaʼ taʼ Ntsɛɛpɔŋ, á pé Yěsô Kristo yé wɛ́ ŋkɔŋɔ yɔ́b náá záʼá mbəb yé mbé nɛ́. A pó ŋgyɛ́ yé piŋi tsómvé.
7Ntsʉʼmbé, a zé ŋkɔŋɔ pɔŋ náá kɛ́ʼɛ́ pó. Pecyó pɔ́ŋ kɛ ghúʼú záʼá kaʼatɛ a mɛ́rɛ́ mbəb pɔ́b. Kaʼatɛ mbɛ ne ŋkhoʼyɔŋ, pɔ́b pfɔrɔ ndzab yéré, a ke mbɛ ne pɔ́b pe njʉ́, a ghaŋá kembɛ́ ndzab yɛ́ pe khí syé nuŋ nɛ́. Njʉ́ pɔ́b tséʼé ndzɔʼ pɔ́dme nɛ́, a tsé sáʼá wɔ́b ŋgâ, ndzab yéré tsé siŋɛ́ wɔ́b. 8A yɔ́b yɛ́ a kuŋɔ tswee piŋi nɛ́ súʼɔ wíŋi fɛ́ pfúŋɔ Mboʼmvé pó. A pɛ́ɛ́ yɛ́, piŋi zó nɛ́ pó, piŋi pé psyé cyó yɔ́b pó. Mbɛ mbé yɛ piŋi zó nɛ́, piŋi ké mbé sí cyó yɔ́b pó. 9Ntsʉʼmbé puŋ zhyáŋá, kɛ́ʼɛ́ ŋgâ ŋgʉŋíne múŋ méré ndɛ ŋgyɛ́, pɔŋ pɛ́ ndzɔʼ yɔ́b pɔ́d nɛ́, shaŋa. 10Ŋkyé ŋgâ, wo wɛ́ tɛɛmbɛ mɔ́b péré pe zhyɛ́ cyó yɔ́b mbəb wo nɛ́ pó, a zhʉ́ ŋɔŋ wɛ́ yé psyɛ́ndzɔʼ pɔ́d nɛ́ njʉ́ wo, wo wɛ́ wo tséʼé zɛ́no nɛ́, njʉ́ wo ghɔ́rɔ́ ywoʼɔ́syé ndzɔ́ mwɔ̌ khí syé nɛ́, mbǒ a ntsíŋɛ́ wé ŋgâ, a ghú yé yóʼó ke pfɔ́rɔ́ yé ndzab yɛ́ pe khí sye nuŋ nɛ́ pɔɔ? 11A pɛ́ɛ́ pe néré mbǒ, zɛ́no wo yɛ́ wo tséʼé nɛ́ ŋgyɛ́ mɔ́ŋmɛ́ wɛ́ psyɛ́ndzɔʼ yé pɔ́d nɛ́ pwó, ntsʉ́ʼ ŋgɛmbɛ mbǒ Kristo kɛ pfó ŋkyé pe ye. 12Ŋkhoʼyɛ́ puŋ shaŋá kɛ́ʼɛ́ mbəb pɔ́ŋmɛ́ púŋ, mbúbú ndzɔʼ yɔ́b ye pɔ́d nɛ́, mbǒ puŋ shaŋá mbəb ŋkɔʼɔtómbəb Kristo. 13A zhyɛ́ yéré, mbé yɛ́ tɛɛmbɛ a zhyɛ́ ywɔ̌zó mɔ́ŋmɛ́ ya sháŋa nɛ́, ŋkhoʼ néré, mə ŋkirí pfɔ́rɔ́ ndzab, ne yɛ́ mə ŋgyɛ́ mɔ́ŋmɛ́ ya shaŋá nɛ́.
ទើបបានជ្រើសរើសហើយ៖
1 Korɛŋto 8: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល