1 Korɛŋto 10
10
Fuʼno mbəb pɔ́ŋ Issayɛ ghúŋkwéʼé
1Pɔ́ŋmɛ́ páá, mə tsé mbé zɔŋɔ ŋgâ puŋ tsó kii zé no yɔŋ pó: Ŋkɔŋɔ tɛd tɛd piŋi náá kɛ záʼa ndzɔ́ʼɔ́ pfuŋ, ŋkɔŋɔ wɔ́b pó kpaʼ náá siʼá lepaanse. 2Ŋkɔŋɔ wɔ́b náá kɛ kpéé nse ndzó lepaanse pwɛ pfuŋ, kɛ́ʼɛ́ ŋgâ pwɛ Mǔsê kaa náá mbé taʼ ye. 3Pɔ́b kpaʼ náá zó taʼ ywɔ̌zó, ŋgɛmbɛ a fɛ́ Zhʉye Yáŋme ne pɔ́b. 4Ŋkɔŋɔ wɔ́b náá kpaʼ náá nɔ́ taʼ nse wɛ́ a twɔ́ pwó Zhʉye Yáŋme nɛ́, ŋkyé ŋgâ a kɛ twɔ̌ ndzó yɛ́dŋgɔʼ yɛ́ Zhʉye yáŋme kɛ zhyɛ́ pwɛ pɔ́b nyí nɛ́. Yɛ́dŋgɔʼ yéré, a kɛ pé Kristo. 5Ntsʉʼŋgɛmbɛ néré, záá pɔŋ ndzɔ́ʼɔ́ pɔ́b pe pé yáŋme ne míí Mboʼmvé pó, ŋkyé ŋgâ pfɔ́ pɔ́b kɛ zhʉyí ghúŋkwéʼé. 6Meno péré kɛ páŋ kɛ́ʼɛ́ ŋgâ piŋi tséʼé zé, mbé tséʼé ndzye kəpɔŋ njʉ́ pɔ́b kɛ tséʼé nɛ́ pó. 7A ŋweʼéme nɛ́ ŋgâ: «Pɔŋ kɛ ghɔrɔ́ syé zó mbó nɔ, ŋáá syé tsé ŋgéŋɛ. Kii puŋ ndɛ khú ghaŋáŋguʼɔzáʼá nɛ́ njʉ́ pecyó pɔŋ ndzɔ́ʼɔ́ pɔ́b nɛ́.» 8Kii piŋi ndɛ ŋgyɛ́ menoghóʼotó njʉ́ pecyó pɔŋ ndzɔ́ʼɔ́ pɔ́b kɛ zhyɛ́, ŋkáb ghúbmebáá ne káb yíkyéd pfɔ ne taʼ zhyémve nɛ́. 9Kii piŋi ndɛ m wɔ̂ Ntsɛɛpɔŋ njʉ́ pecyó pɔŋ ndzɔ́ʼɔ́ pɔ́b kɛ zhyɛ́ nɛ́. Pɔ́b kɛ zhyɛ́ néré, nɔ́ n wɔ̂ wɔ́b, pɔ́b pfó náá. 10Mə ŋgɛ kurɔ tó yé, ntsɔ́ ne puŋ ŋgâ, kii puŋ ndɛ tsé ŋúbɔ njʉ́ pecyó pɔŋ ndzɔ́ʼɔ́ pɔ́b kɛ ŋúbu, aŋgere vó zhyɛ́ pɔ́b pfó nɛ́. 11Meno péré kɛ kúŋɔ́ wɔ́b néré kɛ́ʼɛ́, pé ŋgâ pé yǎ ndúŋú tséʼé zé. Pé ŋweʼé meno péré kɛ́ʼɛ́, ne zhyáŋane tó yiŋi, piŋi pɛ́ piŋi kɛ nyi kaʼatɛ ntsé mbáŋa ne zhyémve njʉyǐndzəb nɛ́.
12Néré kɛ́ʼɛ́, ŋɔŋ wɛ́ a kpáŋa ŋgâ a ntsɛ́ nsó nɛ́, zhyáŋá ne mvǒne syé. 13Mkpeʼe pɛ́ a kɛ tsɛ́ síŋ puŋ nɛ́, kɛ ke mbɛɛ yɛ́, tɛɛmbɛ a kúŋɔ́ ŋumesɔŋ nɛ́. Mboʼmvé ŋuŋgerɛ́ŋged. Tɛɛmbɛ a pe psyɛ́ ŋgâ mkpeʼe tsɛ́ɛ́ wúŋ pó. Mkpeʼe pe tɛ ntsɛ́ síŋ puŋ, a fɛ́ tʉ̌ŋ ne puŋ, puŋ ghúru, mbó nyóʼ mɛndɔ́b wɛ́ puŋ ndzáʼa, ntwɔ́ ndzóʼó nɛ́.
Ŋukristo tséʼé cyó no pú zhʉye kəpɔŋ pó
14Pɔ́ŋmɛ́ páá pɛ́ mə kʉyě kaʼatɛ nɛ́, a zhyɛ́ yéré nɛ́ kɛ́ʼɛ́ mə tsɔ́ ne puŋ ŋgâ, puŋ kí ŋgúʼune pɛ záʼá. 15Mə tsɔ́ ne puŋ pé njʉ́ pɔŋ pɛ́ pɔ́b tséʼé nsětó nɛ́! kpaʼ puŋ, ŋkɔʼɔtómbəb yuŋ puŋ kpéʼé no yɛ́ mə tsɔ́ nɛ́. 16Ndɔ́ŋ mbúru yɛ́ piŋi yɔ́ɔ́ ŋkhoʼ ntɛ́d, ŋgúʼɔ Mboʼmvé núŋ nɛ́, ŋgâ a yéré ŋgyɛ́ ŋgâ piŋɛ nsə Kristo pé taʼ ye pɔɔ? Mbré yɛ́ piŋi ghɔbɔ nɛ́, ŋgâ a yéré ŋgyɛ́ ŋgâ piŋɛ ndzab mbəb Kristo pe taʼ ye pɔɔ? 17Njʉ́ a ndaʼ taʼ mbré nɛ́, piŋi kaa nɛ́ náá mbɛɛ taʼ ŋɔŋ. Ŋkyé ŋgâ ŋkɔŋɔ wíŋi náá, kpaʼ náá pfɔ́rɔ ndaʼ taʼ mbré wéré. 18Puŋ zhʉ́ pɔ́ŋ Issayɛ njʉ́! pɔ́ŋ pɛ́ pɔ́b pfɔrɔ mwɔ̌shʉ́ nɛ́, pwɛ ywoʼɔ́shʉ́ kpaʼ náá ke mbɛɛ taʼ ye. 19Mə ndzɔŋɔ tsɔ́ɔ́ ŋgâ kɔ́? Ŋgâ ndzab yɛ́ pé kí syé nuŋ nɛ́, kii ŋgâ pɛ záʼá péré, pɔ́b kaa náá ndzyé kúʼɔ́ kɔ́? 20Ŋgáŋ! Ntsʉʼmbé a njʉ́ shʉ́ yɔ́b yéré, pɔ́b fɛ̌ pwó pɛ zhʉye kəpɔŋ nɛ́, kii pó fɛ̌ pwó Mboʼmvé nɛ́, mə tsé mbé zɔŋɔ ŋgâ, puŋɛ pɛ zhʉyɛ́ kəpɔŋ ntə́b khú taʼ ye pó. 21Tɛɛmbɛ puŋ pé nɔ́ ndɔ́ŋ Ntsɛɛpɔŋ ké mbó nɔ́ ye zhʉye kəpɔŋ pó. Tɛɛmbɛ puŋɛ ntsɛɛpɔŋ pé zó mɔ́b, puŋɛ zhʉye kəpɔŋ ké mbó zó pó. 22Kii piŋi zɔŋɔ ndɔbɔ́ Ntsɛɛpɔŋ? Piŋi kɛ́ʼɛ́ tʉ̌ŋ kaʼatɛ ntsɛɛ wé?
Ŋkɔŋɔ yɔ́b náá pɛɛ ne ŋgúʼune Mboʼmvé
23Pecyó pɔŋ ndzɔ́ʼɔ́ puŋ tsɔ ŋgâ: «Tɛɛmbɛ ŋɔŋ zhyɛ́ ŋkɔŋɔ yɔ́b yɛ a kʉyě náá nɛ́», ntsʉʼmbé ŋkɔŋɔ yɔ́b náá pé tsyɛ́ pó. Pecyó ké mbó ntsɔ́ ŋkʉ́rʉ́ ŋgâ: «Tɛɛmbɛ ŋɔŋ zhyɛ́ ŋkɔŋɔ yɔ́b yɛ́ a kʉye náá nɛ́», ntsʉʼmbé ŋkɔŋɔ yɔ́b náá pe zhyɛ́, pe ghóʼo pó. 24Kii ŋɔŋ ndɛ ntaʼá kpaʼ wé sí, ntsʉʼmbé ŋɔŋ taʼá sí mɔ́ŋmɛ́ ye. 25Ŋkɔŋɔ mɔ́b pɛ́ pe fí ndúŋú táŋ náá nɛ́, puŋ zó kii tsé ntáʼa tsí ndúŋú, njʉ́ mbɛɛ ndzɔʼ yuŋ sáʼá wuŋ nɛ́. 26Ŋkyé ŋgâ tsetsáʼ pwɛ ŋkɔŋɔ mɔ́b pɛ́ a ndúŋú náá nɛ́, pɛɛ pwó Ntsɛɛpɔŋ. 27A pɛ́ɛ́ yɛ́ taʼ kiizɛ́mboʼmvé ŋkáaʼ wúŋ ne no, kaʼatɛ puŋ ghɛ̌ ŋgú nɛ́, puŋ páŋa yóʼó, ndzó ŋkɔŋɔ mɔ́b pɛ́ pé fɛ́ ne puŋ náá nɛ́, kii tsé ntáʼa tsí ndúŋú njʉ́ tɛɛmbɛ ndzɔʼ yuŋ sáʼá wuŋ nɛ́. 28Ntsʉʼmbé, a pɛ́ɛ́ yɛ́ ŋɔŋ tsɔ́ ne puŋ ŋgâ: «A ndzab khí syé» nɛ́, kii puŋ ndɛ pfód, ŋkyé ŋɔŋ wɛ́ a nsó nɛ́, kɛ́ʼɛ́ ŋgâ ndzɔʼ yé ndɛ mbó tsé sáʼ wé. 29Mə tsɔ́ nɛ́ kɛ́ʼɛ́ mbé tsɔ̌ ndzɔʼ yuŋ pó, ntsʉʼmbé tsɔ̌ ndzɔʼ ye, ŋkyé ŋgâ, a mbó ŋgyɛ kɔ, a fiʼɛ ŋɔŋ ndúŋ fiʼɛ ya, kaʼatɛ níŋ ɛ ya ndɛ tsáŋ? 30A pɛ́ɛ́ yɛ́ mə ŋgɛ́ ndzɔ̂ mɔ́b néré, fɛ̌ ŋgúʼune pwó Mboʼmvé nɛ́, mbǒ pe mbó fiʼɛ́ ya ndúŋú no yɛ́, mə fɛ́ ŋgúʼune pwó Mboʼmvé nɛ́, ŋkyé kɔ́? 31Kii puŋ zɔ zɔ́, kii puŋ nɔ́ nɔ́, kii puŋ zhyɛ́ mbɛ kɔ, puŋ zhyɛ́ ŋkɔŋe náá pe ne fɛ́ne ŋgúʼune pwó Mboʼmvé. 32Kii puŋ ndɛ ŋgyɛ́ ŋɔŋ vɔ ndzɔ́ʼɔ́ kəpɔŋ, mbɛ pɛ Yúda, kii mbé Gerɛʼ, kii ndáméted Mboʼmvé. 33A zhyɛ́ yéré kɛ́ʼɛ́, ŋkɔʼɔtómbəb ya mə sáʼá tʉ̌ŋ kɛ́ʼɛ́ ŋgâ, ŋkɔŋɔ meno pɛ́ mə ŋgyɛ náá nɛ́, pú ŋkɔŋɔ wuŋ náá. Mə tsé mbé taʼá ndaʼ waa sí pó, ntsʉʼmbé mə ntaʼá wé pɔŋ zááme, kɛ́ʼɛ́ ŋgâ pɔ́b tséʼé ndzǔne.
ទើបបានជ្រើសរើសហើយ៖
1 Korɛŋto 10: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល