1 Korɛŋto 7
7
Pód ndúŋú no zɔ́ʼɔ́ndáá
1Mə mbɔ́rɔ́ pɔ́rɔ́ ŋweʼe yúŋ yɛ́, puŋ kɛ ŋwéʼe fɛ ne mo nɛ́, ŋkhoʼyɔŋ. A pú ŋgâ ŋumbzí paʼ míí mé ne no məŋgʉ́yé. 2Ntsʉʼmbɛ ne ŋgʉyóʼne menoghóʼotó, a pú ŋgâ mbɛ wɛ́rɛ́ ŋumbzí ntsɛ́ʼɛ ŋgʉyé ye, mbɛ wɛ́rɛ́ məŋgʉ́yé pó ntsɛ́ʼɛ́ ndwɔ́ ye. 3Á ŋumbzí fáʼ faʼ yɛ́ a ntsɛ́ʼɛ́ ne fǎʼne pwó ŋgʉyé nɛ́, məŋgʉ́yé fáʼ yé yɛ́ a ntsɛ́ʼɛ́ ne fǎʼne pwó ndwɔ́ ye nɛ́. 4A tséʼé məŋgʉ́yé ntséʼé mbəb ye pó, a tséʼé ndwɔ́ ye. Ntsʉ́ŋtsʉ́ŋ njʉ́ a tséʼé ŋumbzí tséʼé mbəb ye nɛ́ po, a tséʼé məŋgʉ́yé ye. 5Ŋɔŋ ndɛ séd pfuŋ ye pwó mɔ́ŋmɛ́ ye, ndaʼ ŋkhoʼyɛ́ puŋ nsó ndzoʼ, ŋɔŋ zɔŋɔ tsɛ́ʼɛ́ Mboʼmvé ne ndúŋ ye, ne Mɔ́ŋtiʼa khoʼ nɛ́. Ntsʉ́ʼmbé ŋkhoʼyɛ́ yéré ŋkhoʼ záʼ nɛ́, puŋ ké mbó kébe mbəb yuŋ. Mbɔ́ɔ́ ŋgâ mbɔ́dne múŋ ndɛ fɛ sáŋ, Sátaŋ mwɔ̂ wúŋ. 6Mə ŋgɛ tsɔ kɛ́ʼɛ́, mbé ziʼɛ wúŋ, ziʼ pó. Ntsʉʼmbé, a pɛɛ yɛ́ puŋ zhyɛ́ néré nɛ́, mbǒ a pú. 7Mə ndzɔŋɔ ŋgâ ŋkɔŋɔ pɔŋ náá pɛ́ njʉ́ mo nɛ́. Ntsʉʼmbé, Mboʼmvé ke fɛ ye ŋɔŋ, pé njʉ́ a kúʼɔ́ mbəb nɛ́. Tɛɛmbɛ a fɛ, fɛ́ yɔŋ pwó wo, mbó fɛ́ ye ndúŋ pwó cyó ŋɔŋ.
8Mə tsɔ́ nɛ́ pwó pɛ ŋkʉye, pwɛ pfʉ́ʉ́ pěŋgyé ŋgâ a pú pɔ́b tsó kɛ́ʼɛ́, njʉ́ mo nɛ́. 9Ntsʉʼmbé, a pɛ́ɛ́ yɛ́ tɛɛmbɛ pɔ́b pe gbáá mbəb yɔ́b nɛ́ pó, pɔ́b zɔ́ʼ ndáá. Ŋkyé ŋgâ zɔ́ʼɔ́ndáá pú kaʼatɛ ntsɛ́ɛ́ mkpîne. 10Ŋgɛmbɛ ne pɔŋ pɛ́ pɔ́b zɔ́ʼ ndáá nɛ́, mə tsɔ́ nɛ́ ne pɔ́b, a ntsʉ́ʼmbé tsɔ mo nɛ́ pó, a tsɔ́ Ntsɛɛpɔŋ, ŋgâ kii məŋgʉ́yé ndɛ kí ndwɔ́ yé. 11A pɛ́ɛ́ yɛ́ məŋgʉ́yé twɔ́ ndáá nɛ́, a ndɛ mbó ndzɔ́ʼ cyó ŋɔŋ, néré pó, pɔ́b zhʉyí sáʼá yɔ́b. Kii ŋumbzí ndɛ ndzú ŋgʉyé. 12Ŋgɛ khú pwó pecyó pɔŋ, a tsɔ mo, a tsɔ́ Ntsɛɛpɔŋ pó. A pɛ́ɛ́ yɛ́ taʼ ŋukristo zɔ́ʼ taʼ məŋgʉ́yé wɛ́ a zɛ́ Mboʼmvé nɛ́ pó, ntsʉʼŋgɛmbɛ a psíyɛ́ ŋgâ pú yé ntsó nɛ́, a ndɛ ndzú wé. 13A pó mbɛ́ɛ́ yɛ́ taʼ məŋgʉ́yé tséʼé ndwɔ́ ye wɛ́ a zɛ́ Mboʼmvé nɛ́ pó, ntsʉʼŋgɛmbɛ a psyɛ́ ŋgâ pú yé ntsó nɛ́, a ndɛ ndzú wé. 14Ŋkyé ŋgâ məŋgʉ́yé ŋgyɛ́, ndwɔ́ ye, ŋí mbɛ́rɛ́ Mboʼmvé. Ŋumbzí ghɛ̂ ŋgyɛ́, ŋgʉyé ye ke ŋí yé, mbɛ́rɛ́ Mboʼmvé. A pɛɛ pe néré pó, mbǒ pɔ́ŋ puŋ kɛ ŋǐ mbɛ́rɛ́ Mboʼmvé pó, ntsʉʼŋgɛmbɛ mbǒ pɔ́b kɛ pɛ pfuŋ yé. 15A pɛ́ɛ́ yɛ́, ŋɔŋ wɛ́ a ŋukristo nɛ́ pó, zɔŋɔ twɔ́ ndáá nɛ́, a twɔ́ məŋgʉyé kii ŋumbzí wɛ́ a zɛ́ Mboʼmvé nɛ́, pú ye tséʼé cyó no ŋkʉ́rʉ́ pó, ŋkyé ŋgâ Mboʼmvé fú wúŋ pé ŋgâ puŋ tsó ne mbúru. 16Ŋgɛmbɛ wo zɛ́ɛ́ níŋ, wo məŋgʉ́yé ŋgâ a náʼá mkpéé wo mkpéé ndwɔ́ wo? kii wo zɛ́ɛ́ níŋ, wo ŋumbzí, ŋgâ a náʼá mkpéé wo mkpéé ŋgʉyé wo?
Mbɛwɔ̂ ke mbɛ́ɛ́ njʉ́ Mboʼmvé kɛ ghɛ́ fú we, á pé nɛ́
17Ŋgɛ khú ne cyó ndzaʼ ye, a zɔŋɔ ŋgâ ntsye ŋɔŋ ke ntsóó ne mbziʼe yɛ́ Ntsɛɛpɔŋ kɛ fɛ́ pwó yé nɛ́. A zɔŋɔ ŋgâ ŋɔŋ tsɛ́ ndzó ywoʼ yɛ́, Mboʼmvé kɛ ghɛ fú wé, á pé nɛ́. Yekénɛ́ no yɛ́ nɛ́, mə ntsɔ́ ŋgâ pe zhyɛ́ ndzó ŋkɔŋɔ yáʼméted náá nɛ́. 18A pɛ́ɛ́ yɛ́ Mboʼmvé kɛ ghɛ́ fú ŋɔŋ, á pé psiríme nɛ́, á ndɛ séd. Wɛ́ pé psirɛ́ wé nɛ́ pó, a ndɛ ŋgyɛ ŋgâ pe psírɛ́ wé. 19Mbzírine ŋɔŋ kii mbé psíri pó, tséʼé ghebe siŋ Mboʼmvé pó. Yɛ́ a tséʼé ghebe nɛ́ pɛɛ mvyébne kaŋ Mboʼmvé. 20A zɔŋɔ ŋgâ mbɛwɔ̂, ke mbɛɛ njʉ́, Mboʼmvé kɛ ghɛ́ fu wé a pé nɛ́. 21A pɛ́ɛ́ yɛ́ Mboʼmvé kɛ ghɛ́ fú wo, wo pɛ́ɛ́ mkpaŋ nɛ́, wo ndɛ tsé tsúŋɛ ndúŋú. Ntsʉʼmbé, wo zhʉ́ mɛndɔ́b ne ntwɔ́ ne ndzɔ́ʼɔ́ mkpaŋ kii wo ndɛ ntee. 22Ŋkyé ŋgâ, mkpaŋ wɛ́ Ntsɛɛpɔŋ fú nɛ́, a fɛ́ ŋgʉŋîne pwó yé ne tíí. Ntsʉ́ŋtsʉ́ŋ njʉ́, ŋɔŋ wɛ́ pe kɛ ghɛ̂ fu wé, a pe ywʉŋíme nɛ́, tsʉ́ʼ mkpaŋ pwó Kristo nɛ́. 23Taʼ ŋɔŋ kɛ zúŋɔ́ wúŋ ne tʉŋɔndɔŋ. Puŋ ndɛ mbó tsʉ́ʼ mkpaŋ pwó pumésɔŋ. 24Pɔ́ŋmɛ́ páá, a zɔŋɔ ŋgâ mbɛwɔ̂ ke ghɛmbɛ siŋ Mboʼmvé, pe njʉ́ a kɛ ghɛ́ fú wé, a pé nɛ́.
Ntʉ́ʉ́ pwó ŋɔŋ wɛ́ a kɛ zɔ́ʼɔ́ndáá nɛ́ pó, pwó wɛ́ a tswɛ́ nɛ́, pwɛ mpfʉ́ʉ́
25Ŋgɛ ŋkhú ne pɔ́ŋndɛ́mɛ́, mə tséʼé cyó no yɛ́ Ntsɛɛpɔŋ nsó nɛ́ pó, yɔŋ pɛ́ɛ́ ya kpaŋató, kpaŋató ŋɔŋ wɛ́ Ntsɛɛpɔŋ ne pǔpfob ye zhyɛ́, tɛɛmbɛ a nsó no, pe zóʼ ntsɛ́ ndúŋú nɛ́. 26Mə njʉ́ ŋgâ a pú ne tsóne kɛ́ʼɛ́, ŋkyé pɛ ŋgəʼo pɛ a ndzebé nɛ́. Ɔ́ŋɔ́, tsóne kɛ́ʼɛ́ pú. 27A pɛ́ɛ́ yɛ́ puŋ məŋgʉ́yé kɛ nzwə́ré nɛ́, ndɛ tséé yéré kpii. A pɛɛ yɛ́ wo kɛ tsɛ́ʼɛ́ məŋgʉ́yé nɛ́ pó, wo ndɛ ntáʼa məŋgʉ́yé. 28A po mbɛ́ɛ́ yɛ́ wo zɔ́ʼ ndáá ŋkhoʼyɔŋ nɛ́, mbǒ wo zhyɛ́ no kəpɔŋ pó. Mbó mbé yɛ́ taʼ mɔ́ŋndɛ́mɛ́ zɔ́ʼ ndáá nɛ́, mbǒ a zhyɛ́ no kəpɔŋ pó. Pɔŋ pɛ́ pɔ́b zɔ́ʼ ndáá nɛ́, pɔ́b ŋkʉyo ntsɛ́ʼɛ́ pɛ mkpeʼe tédme pɛ́ pɔ́b ŋkʉ́yó tsɛ́ ndzóʼó nɛ́. Néré, mo, mə tsé mbé nzɔŋɔ ŋgâ yéré no kúŋɔ́ wúŋ pó.
29Pɔ́ŋmɛ́ páá, no yɛ́ mə tsɔ́ ne puŋ nɛ́ pénɔŋ! Ŋkhoʼ kɛ tsé ŋ kúʼɔ. Ndzyěne ne ŋkhoʼyɔŋ, pɔŋ pɛ́ pɔ́b tséʼé məŋgʉ́yé nɛ́, tsó njʉ́ pɔ́b tséʼé nɛ́ pó. 30Pɔŋ pɛ́ pɔ́b ŋkhɔ nɛ́, pɛ njʉ́ pɔŋ pɛ́ pɔ́b tsé mbé ŋkhɔ nɛ́ pó. Pɔŋ pɛ́ pɔ́b yɛbɛ́ nɛ́, pɛ njʉ́ pɔŋ pɛ́ pɔ́b tsé mbé yɛbɛ nɛ́ pó. Pɔŋ pɛ́ pɔ́b zuŋɔ nɛ́, pɛ njʉ́ pɔŋ pɛ́ pɔ́b tséʼé cyó yɔ́b nɛ́ pó. 31Pɔŋ pɛ́ pɔ́b taʼa pfiŋi mvé ghaŋ nɛ́, pɛ njʉ́ pɔŋ pɛ́ pɔ́b gháŋ mbé tséʼé nɛ́ pó. Ŋkyé ŋgâ mvé yɔŋ, mbziʼe njʉ́ a kaʼa nɛ́, záʼá záʼá. 32Mə tsé nɛ́ mbé zɔŋɔ ŋgâ tó yuŋ kí ndéé ndzóó pó. Ŋɔŋ wɛ́ a zɔ́ʼ ndáá nɛ́ pó, á pé ndaʼ no Ntsɛɛpɔŋ mbé ntsɛɛ no ye, mbó ntaʼá njʉ́ a ŋgyɛ́ meno pɛ́ a pú Ntsɛɛpɔŋ nɛ́. 33Ntsʉʼmbé ŋɔŋ wɛ́ a zɔ́ʼ ndáá nɛ́, á meno mvé pɔŋ, mbé ntsɛɛ no ye. A taʼá njʉ́, a mbuu ŋgʉyé nɛ́. 34Kɛ́ʼɛ́, ndzɔʼ ye tsɛɛ ndúŋú no yípáá. Məŋgʉyé wɛ́ a zɔ́ʼ ndáá nɛ́ pó, tsʉŋtsʉ́ŋ njʉ́ mɔ́ŋndɛ́mɛ́ nɛ́, á yɔ́b tsɛ́ɛ́ no pɛ́ɛ́ ne fǎʼne pwó Ntsɛɛpɔŋ. Yânéré kɛ́ʼɛ́ ŋgâ, mbəb yɔ́b pú zhʉye wɔ́b ké mbɛ́ɛ́ ndaʼ pwó Ntsɛɛpɔŋ. Ntsʉʼmbé məŋgʉ́yé wɛ́ a zɔ́ʼndáá nɛ́, yé tsɛ́ɛ́ no pɛɛ meno mvé, ntaʼá njʉ́ a mbǔ pwó ndwɔ́ yé nɛ́. 35Mə tsɔ́ yɔŋ no ŋkyé wúŋ, mbé pé nɛ́ pé ŋgâ mə mvɛrɛ́ wě síŋ puŋ pó. Mə nzɔŋɔ nɛ́ pe ŋgâ puŋ zhyɛ́ no yɛ́ a tsyɛ nɛ́, kɛ́ʼɛ́ ŋgâ puŋɛ Ntsɛɛpɔŋ nzwə́ré mbé taʼ ye, puŋ pó faʼ pwó ye ne taʼ ndzɔʼ.
36A pɛ́ɛ́ yɛ́ ŋɔŋ tsuwɛ́ ŋgʉyé ye, ndzɔʼ ye tsé fǐ, a pɔ́ɔ́ ŋgâ tɛɛmbɛ a sháŋa nɛ́, a ke ŋgyɛ́ no yɛ́ kpaŋató yé tsɔ́ pwó yé nɛ́: á ndzɔʼɔ́ ŋgʉyé ye! A zhyɛ́ cyó no kəpɔŋ pó. 37Ntsʉʼmbé, a sɛ́ɛ́ ŋɔŋ ndzó ndzɔʼ yé ne ŋkʉyěne mé, kii a pó nziʼɛ ŋɔŋ nzíʼɛ́ wé, pe ne tó ye yé yáŋme, ŋgâ a ŋguʼɔ́ ŋgʉyé yé wɛ́ a tsuwɛ́ nɛ́, mbǒ a no sʉ́ʼʉ. 38Mbénéré, ŋɔŋ wɛ́ a zɔ́ʼ ŋgʉyé yé wɛ́ a tsuwɛ́ nɛ́, zhyɛ́ no sʉ́ʼʉ. Wɛ́ a zɔ́ʼ nɛ́ pó, pó ncʉyǐ ŋgyɛ́ ndáá no sʉ́ʼʉ.
39Ŋkhoʼyɛ́ ŋumbzí kɛ kɛrɛ mvé nɛ́, ŋgʉyé yé kembé nzwə́réme pé mbəb yé. Ntsʉʼmbé, a pɛ́ɛ́ yɛ́ ndwɔ́ ye wéré pfó nɛ́, mbǒ tɛɛmbɛ a zɔ́ʼ ŋɔŋ wɛ́ a kʉyě nɛ́. Ndaʼ ŋgâ ŋɔŋ wéré ke mbɛ́ɛ́ ŋukristo. 40Mbɛ néré ne máá njʉ́, a pɛɛ yɛ́ a tsó kɛ́ʼɛ́ nɛ́, mbǒ a mbɛ sʉ́ʼʉ kaʼatɛ. Mə mkpaŋ ŋgâ ŋ ŋkɔʼɔtómbəb ya, mə ke ntséʼé ya Zhʉye Mboʼmvé.
ទើបបានជ្រើសរើសហើយ៖
1 Korɛŋto 7: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល