Rawma iyi 6
6
Baŋ betem seh, ar ley məc abə ley nja əŋ Almasihu
1Nakwa iyi nda i zlap əŋ cukwaɗ tə zlap wa seh, viŋgey? Nakwa iyi ziber ley nja əŋ hem amba səntaŋ tə Bizlaf mə fəfəl mbeh səku vaw? 2Məndiwiŋ ta seh, mənaŋ mba səku! Nakwa iyi kətaŋgaha za kəɗi a məc mə wuɗakanakwa tə abə hem: nakwa iyi nda i nja əŋ hem baha seh, viŋgey? 3Heni kəsəŋ nakwa fuk mabaŋ batem iyi, nakwa mə jemi abə Yesu Almasihu, nakwa mbə əŋ məc ŋga baha. 4Mənaŋ wa, kəɗi əŋ batem seh, i kəpəsanakwa za abə mbiŋ amba nakwa iyi jam əŋ məc ŋga, mənaŋ Almasihu mə garaha tə əŋ faŋw tə hedi maməc iyi abə fagay səndawl tə Baba, amba nakwa bahayim, nakwa mə nji əŋ nja lawayaŋ.
5Məŋgəvday əŋgah nakwa mə jemi abə mbiŋ kəɗi a məc mənaŋ tə təŋga seh, nakwa iyi mbaɗ za əŋ hedi majam iyi tə abə mbiŋ kəɗi əŋ garaha tə hedi əŋ faŋw tə hedi maməc iyi mənaŋ mbiŋ bahayim. 6Mazukwa i səŋ lawlaw mənaŋ wa, nja takwa tə əŋ nja tə hedi dəgənak sə zlezle seh, kəməc za abə Almasihu a mpay mazlaŋgal, amba jam takwa tə abə hem mə rəsl, nakwa iyi mba i nja əŋ məva tə hem səku ba. 7Məŋgəvday hedi kəməc za abə Almasihu seh, a kəmbaɗ ŋga za əŋ hedi sə delele, a kənda ŋga za guduk abə hem. 8Əŋgah nakwa kəməc za abə Almasihu seh, nakwa kəkuw ma za, nakwa iyi nda i nja abə mbiŋ bahayim. 9Nakwa iyi kəsəŋ lawlaw, mar zlezle Almasihu mə garaha tə əŋ faŋw tə hedi maməc iyi seh, a kənda i məc halla ba: məc abə mazla a talaŋ ŋga aka səku ba. 10Almasihu kəməc za kə ŋgas ntaɗ, məc ŋga ta, kəwuɗakza za guduk abə hem. Ama mənjawa, mbə abə nje, mə nji məŋgəvday Bizlaf. 11Mənaŋ mba, heni bahayim, sey hi wulək mənaŋ wa: heni kəməc za hedi mawuɗak iyi fuk tə abə hem, ama heni mə jemi abə Yesu Almasihu, heni mə nji abə nje məŋgəvday Bizlaf.
12Hem mə mba i sla a wucum təheni maməc mba, amba ley takaheni wula ley waŋgaŋ talaŋ əŋ mba məsəkəŋ madawar iyi tə zli wucum mba səku. 13Hi mba i ɗiy ndəra təheni iyi abə ŋgas təheni iyi ley ɗalaŋ kəzəɗ əŋ hem mənaŋ məsəkəŋ kə ɗal məsəkəŋ madawar səku ba. Ama, hi vəl talaŋ təheni əŋ Bizlaf, mənaŋ hedi mə garaha tə əŋ faŋw tə hedi maməc iyi ley nja abə nje, hi vəl talaŋ təheni fuk əŋ kəzəɗ tə Bizlaf mənaŋ məsəkəŋ kə ɗal kəzəɗ sə delele. 14Məŋgəvday hem a kənda i ɗal mazla ŋga a talaŋ təheni seh, aka səku ba, məŋgəvday heni kəwaŋgaŋ talaŋ əŋ ma majaw səku ba, ama heni kəwaŋgaŋ talaŋ əŋ səntaŋ tə Bizlaf.
Əŋ kəzəɗ tə zlap sə delele
15Ar ma majaw mə sla a talaŋ takwa səku, ama ar səntaŋ tə Bizlaf mə sla a talaŋ takwa. Əŋgah mənaŋ mba seh, nakwa iyi ziber ley ɗal hem vaw? Məndiwiŋ ta seh, mənaŋ mba səku! 16Heni kəsəŋgu lawlaw: Əŋgah heni kəɗalaŋ kəzəɗ tə hedi amba ley waŋgaŋ talaŋ seh, heni kəmbaɗ za əŋ məva iyi tə bay heni mə waŋgaŋ talaŋ wa. Ar seh, hem mə deɓ hedi əŋ məc#6:16 Yahwana 8:34., ar waŋ talaŋ əŋ Bizlaf mə deɓ hedi əŋ nja mənaŋ Bizlaf mə mba. 17Ama mazukwa i ɗalaŋ sʉse əŋ Bizlaf! Heni hedi manja zlezle tə əŋ məva tə hem iyi, mənjawa, heni kəwaŋ talaŋ abə nəf təheni ntaɗ əŋ sərək heni mə lim. 18Heni mə pili cuza mar tə əŋ hem, heni mbə əŋ kəzəɗ sə delele. 19Sa zlap abə wulək tə hedi dəganak wa seh, amba ley zlap məŋgəvday hulawf təheni tə hedi dəganak. Zlezle seh, heni fuk, heni mə nji mənaŋ məva iyi əŋ kəzəɗ tə abə ndəra dəlay abə tə məsəkəŋ madawar mə daha mbuw ma a talaŋ Bizlaf. Mənaŋ mba baha, mənjawa, heni ɗiy talaŋ təheni fuk mənaŋ məva iyi əŋ kəzəɗ tə məsəkəŋ sə delele amba ley nja məŋgəvday Bizlaf.
20Əŋ heni mbə əŋ məva tə hem seh, ley ɗal məsəkəŋ sə delele seh, kəgəraheni halla. 21Heni gər muwurɓay tə kəzəɗ heni mə lim, mənjawa, hawa kəɗalaheni halla vaw? Kəzəɗ iyi ta seh i kədeɓ hedi əŋ məc. 22Ama mənjawa, heni mə pili cuza mar tə əŋ hem, heni mbə əŋ kəzəɗ tə Bizlaf. Məsəkəŋ səntaŋ heni ɗal seh, ar nja təheni səntaŋ mə ŋgəmaŋ əŋ Bizlaf, mə deɓ hedi əŋ mədəŋcur mə cukwaɗ səku. 23Məŋgəvday muwurɓay tə kəzəɗ tə hem seh, ar məc. Ama məsəkəŋ Bizlaf mə vəl tə haya seh, ar mədəŋcur mə cukwaɗ səku əŋ jam talaŋ tə abə Yesu Almasihu Bay Bayta takwa.
ទើបបានជ្រើសរើសហើយ៖
Rawma iyi 6: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
