Rawma iyi 7
7
Pəl tə hedi tə Almasihu tə əŋ ma majaw
1Zliŋmana iyi, heni kəsəŋ məndiwiŋ məsəkəŋ sa mə mba i zlapaheni, məŋgəvday heni hedi mə səŋ ma majaw iyi. Ma majaw abə mazla a talaŋ hedi seh, əŋ mbiŋ mbə abə nje ndagwa. 2Mənaŋ wala tə abə muwul seh, ma majaw kəjawza za abə muwul ŋga əŋ mbiŋ mbə abə nje. Ama əŋgah muwul kəməc za seh, wala ta, kəpəl ŋga za abə ma majaw mə jawu tə abə muwul ŋga ta. 3Əŋgah wala ta, mbə abə muwul par mar muwul ŋga mbə abə nje ndagwa seh, i nda i ɗiy wala ta, mənaŋ wala mə ɓət wucum sifteleh a palah. Ama əŋgah muwul ŋga kəməc za seh, ma majaw tə muwul ŋga ta kəpəlza za, a gula i ɓət muwul par, mbamba seh, kwa kəɓət wucum sifteleh a palah halla. 4Mənaŋ mba bahayim əŋ heni, zliŋmana iyi. Məŋgəvday ma majaw seh, heni kəməc za, əŋ heni mə jemi abə Almasihu. Mənaŋ wa izey, mənjawa heni hedi tə hedi par, mənaŋ zlap ta seh, heni hedi tə hedi mə garaha tə əŋ faŋw tə hedi ma məc iyi, amba nakwa iyi ɗalaŋ kəzəɗ mə ŋgəmaŋ əŋ Bizlaf. 5Məŋgəvday əŋ nakwa iyi kəziber wulək tə wucum takwa seh, ma majaw mə garaha mba məsəkəŋ madawar ta seh, a kəɗal kəzəɗ əŋ wucum takwa fuk, mənaŋ wa, nakwa iyi kəɗal məsəkəŋ mə deɓ hedi əŋ məc. 6Ama mənjawa, nakwa mə pili cuza mar tə əŋ ma majaw, məŋgəvday nakwa kəwuɗak cuza abə məsəkəŋ mə məlanakwa əŋ daŋgay. Nakwa iyi gula i ɗalaŋ kəzəɗ əŋ Bizlaf mənaŋ məsəkəŋ lawayaŋ, kəɗi əŋ Mimiɗ ŋga, ama mənaŋ sə zlezle səku, abə ley waŋgaŋ talaŋ əŋ ma majaw tə Musa.
Kəzəɗ tə hem abə tə ma majaw
7Nakwa iyi nda i cukwaɗ zlap ta seh, viŋgey? Ma majaw seh, ar hem vaw? Məndiwiŋ ta seh, mənaŋ mba səku! Ama sa səŋ hem seh, kəɗi a ma majaw. Mənaŋ wa, əŋgah ma majaw kəzlap: «Hwa mba i ɗal ceɗem səku», halla seh, sa səŋ ceɗem halla. 8Ama hem kəlim kataf za kəɗi a ma matak ley mbuwaha ceɗem madawar iyi par par əŋ sa. Məŋgəvday əŋgah ma majaw halla seh, hem kəmbaɗ za əŋ məsəkəŋ maməc. 9Zlezle seh, ma majaw halla, sa mbə abə nje. Ama əŋ ma matak mə ndaha seh, hem kəlim fagay za ley nja. 10Sa seh, sa kəməc za: Ma matak mə nda i deɓeke mədəŋcur wa seh, a kədeɓeke əŋ məc. 11Məŋgəvday hem kəlim kataf za, kəbimeke za kəɗi a ma matak abə kəɗi a mbiŋ, kəjaka za.
12Mənaŋ wa, ma majaw abə talaŋ ŋga seh, kʉkweɗek. Ma matak bahayim, kʉkweɗek, delele, ləlaw diya. 13Ma matak səntaŋ sey, kəmbaɗ za ley dahaka məc wa seh, viŋgey? Məndiwiŋ ta seh, mənaŋ mba səku! Ar hem mə daha məsəkəŋ ta. Kətəɗaha zlap məndiwiŋ maɗal tə hem za: Kəɗal kəzəɗ za abə məsəkəŋ səntaŋ ley dahaka məc. Ehe, ar mənaŋ wa, hem kəlim kataf za kəɗi a ma matak ley gizehe fagay ŋga fuk.
Jəm tə əŋ wulək
14Məndiwiŋ ta seh, nakwa iyi kəsəŋ ma majaw seh, a ndaha a ndəra Mimiɗ tə Bizlaf. Ama sa seh, sa hedi hulawf, meber mənaŋ məva əŋ hem. 15Sa kəsəŋ məsəkəŋ sa mə ɗal səku: Məŋgəvday sa kəɗal məsəkəŋ sa mə mba i ɗal səku, ama sa kəɗal məsəkəŋ sa mə mba səku! 16Əŋgah sa kəɗal məsəkəŋ sa mə mba səku, mbamba seh, sa kəsəŋ ma majaw, ar məsəkəŋ səntaŋ. 17Ar sa mə ɗal məsəkəŋ mənaŋ wa səku, ama ar hem manja tə əŋ sa.
18Məŋgəvday sa kəsəŋ məsəkəŋ səntaŋ əŋ wucum na seh halla, mənaŋ zlap ta seh, sa hedi hulawf. Məndiwiŋ ta seh, mba kə ɗal məsəkəŋ səntaŋ əŋ wulək na aka, ama sa gula i ɗalu səku. 19Məŋgəvday məsəkəŋ səntaŋ sa mə mba i ɗalu seh, sa kəɗalu səku, ama sa kəɗal seh, sey məsəkəŋ madawar məsəkəŋ sa mə mba i ɗalu səku! 20Əŋgah sa kəɗal məsəkəŋ sa mə mba səku, mbamba seh, ar sa mə wulək ley ɗal mənaŋ mba səku, ama ar hem manja tə əŋ sa.
21Ehe, mənaŋ wa, sa mə lim ma majaw wa: Sa, hedi mə mba i ɗal məsəkəŋ səntaŋ, məsəkəŋ sa mə gula i ɗal seh, sey məsəkəŋ madawar dap! 22Əŋ nəf na seh, sa kəsəsəm a ma majaw tə Bizlaf. 23Ama sa lim əŋ wucum na ma majaw par a kəjəm abə ma majaw tə Bizlaf sa mə mba tə əŋ səŋ məsəkəŋ na. A kəmbaɗaka əŋ məva tə ma majaw tə hem tə əŋ wucum na. 24Kay, sa seh, sa hedi tə abə haŋ tə əŋ nje! Mə nda i reheke əŋ tuwah tə wucum mə deɓeke əŋ məc wa seh, viyey? 25Ama mazukwa i ɗalaŋ sʉse əŋ Bizlaf, kəɗi əŋ Yesu Almasihu Bay Bayta takwa!
Mənaŋ wa, sa mbə əŋ kəzəɗ tə ma majaw tə Bizlaf kəɗi əŋ səŋ məsəkəŋ na, ama əŋ hulawf tə wucum na tə hedi dəgənak seh, sa kəwaŋgaŋ talaŋ əŋ ma majaw tə hem.
ទើបបានជ្រើសរើសហើយ៖
Rawma iyi 7: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
