Luka Təɗ
Təɗ
Mənaŋ wa, Matta, Luka i giz Labara Səntaŋ Lawayaŋ tata seh ntaɗ mənaŋ tə Markus:
– Ndaha tə Yahwana mə ɗal batem seh, mənaŋ hedi mə giz məsəkəŋ tə a talaŋ Yesu (fasuwal 3:1-20), mə ziber ta seh, batem abə təl ma əŋ Yesu (fasuwal 3:21–4:13).
– Nja tə Yesu tə əŋ faŋw tə hedi iyi tə əŋ Galili, a namba a kəgiz zlap tə Bizlaf, a kəmbəl hedi mə dal iyi (fasuwal 4:14–9:50).
– Pik tə Yesu, mə deɓʉ mar tə əŋ Galili ha əŋ Urusalima (fasuwal 9:51–19:28). Ama a nawa seh, Luka kədaha məsəkəŋ iyi mbeh səku əŋ ŋgalaw tə Markus, mənaŋ ma marərək tə lə Samariya səntaŋ, tə hedi tə abə məsəkəŋ mə tak burŋguzl, tə mbu makuɗəp i mə limehew abə ŋgalaw iyi mənaŋ tə ley nda əŋ ge Marta abə Mariyama.
– Kəzəɗ tə Yesu əŋ Urusalima (fasuwal 19:29–21:38).
– Abə ley ɓət wulək tə a talaŋ məsəkəŋ səndawl iyi (zləŋ takwaŋ maɗ ma iyi abə məc tə Yesu), (fasuwal 22–23).
– Ɗerewel ta a kəcukwaɗ abə waŋ tə gugway tə Paska (fasuwal 24), a namba, a kəgiz mətər ndaha tə Yesu mə garaha tə əŋ faŋw tə hedi maməc iyi əŋ gula ŋga iyi əŋ Emmayus, abə dawaŋ ta, ɓa, a zlap a talaŋ tap ŋga wuzlaf.
Ama, par par abə tə Markus seh, abə dawaŋ ta təɗ tə əŋ ɗerewel ŋga mbiŋ mə giz, a kəgiz mənaŋ viŋgey əŋ mbiŋ mə ɗalu (fasuwal 1:1-4), Luka a mar ley wuzlel Labara Səntaŋ Lawayaŋ ŋga seh, kəɗi təɗ tə əŋ ɗerewel mə zlap tə a talaŋ ndaha tə Yesu abə tə Yahwana mə ɗal batem (fasuwal 1–2). Ar a nawa, i nda i jeŋgʉ mənaŋ ŋgalaw tə giz ma iyi əŋ Mariyama tə a talaŋ mbuwaha tə Yahwana mə ɗal batem, tə a talaŋ mbuwaha tə Yesu abə dar malakw tə njʉwiŋ iyi, mənaŋ dərif tə Mariyama (Mə huɓəl hedi wa), tə Zakariya, tə Simeyaŋw. Əŋ təɗ tə ɗerewel ta wa seh, Luka kəgiz ɗal sedewe ŋga cuza: ndaha tə Yesu mənaŋ Bizlaf, ntaŋw ŋga tə Israyila iyi, ziŋgehe ŋga mə gizehe əŋ hedi iyi fuk. Luka, a ɗəməŋ seh a kəgiz bahayim mba wucum ŋga Bizlaf mə ɗalaŋta əŋ hedi mekedek iyi (mənaŋ hedi mə waŋ talaŋ iyi, hedi magam iyi, wala iyi, məstakwaŋ iyi abə muluk iyi), kəzəɗ səndawl tə Mimiɗ tə Bizlaf, mənaŋ səsəm ŋga sə mbeh səku, tə dərif iyi abə tə ɗal mbuh mə ziber Labara Səntaŋ Lawayaŋ wa.
Luka seh, pay lə Gərek a talaŋ Labara Səntaŋ Lawayaŋ sə nfaɗ iyi wa. Abə ley zlapaŋta əŋ hedi mə jeŋge ma iyi ta, i kəgizeŋta kukus tə Israyila dakayta iyi seh halla, a kəgiz əŋ wulək ŋga ley mbaɗ əŋ hedi sə delele, ley giz məsəkəŋ iyi tata i mə səŋ səku. Əŋ hedi mənjawa iyi wa seh, kwa wulək par a ɗek halla, Labara Səntaŋ Lawayaŋ seh abə tuwah halla. Abə ley ziber ŋgalaw wa a meɗek a meɗek seh, hedi mə jeŋge ma ta seh, a səŋ hedi mə nda i reh hedi iyi fuk za.
ទើបបានជ្រើសរើសហើយ៖
Luka Təɗ: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល