Markus 16
16
Garaha tə Yesu əŋ faŋw tə hedi maməc iyi kəgizehe za əŋ wala iyi
(Matta 28:1-8; Luka 24:1-12; Yahwana 20:1-10)
1Abə dawaŋ tə pis kə yip seh, Mariyama tə Magdala, Mariyama mama tə Yakuba abə Salawme, i səkəmaha ɓurdi ley nda i wʉceŋ a wucum tə Yesu. 2Abə kafa vət tə luma gamtak, əŋ pis a kətəɗaha, wala iyi sey i nda əŋ meɗek jiɓ. 3I kəzlap əŋ faŋw tata, i zla: «Mə nda i guduŋgulanakwa beler səndawl tə a meɗek jiɓ wa seh viyey?» 4Ama əŋ tata i gər nje seh, i lim beler sə bayta sey mə guduŋguli cuza. 5I təɗ əŋ talaŋ jiɓ ta, i lim gula mə nji a namba kəɗi ndəra zəma, abə rukut sə kweɗek a wucum. I kələndəŋ za. 6Ama a zlapaŋta, a zla: «Hi mba i ləndəŋ səku. Heni kəpələk Yesu lə Nasaratu, i mə daru tə a mpay mazlaŋgal sey. Kəgaraha ŋga cuza əŋ faŋw tə hedi maməc iyi. Mbə a nawa halla ba. Ehe, lay i mə ɗiyu tə ɗəməŋ. 7Mənjawa, hi nda i zlapaŋta əŋ gula ŋga iyi abə Piyer bahayim: “Yesu cu ŋga məpər a heni əŋ Galili, a namba hi limza za mənaŋ mbiŋ mə zlapaheni.”» 8Wala iyi i təɗaha, i hiy tata, i kənəna məŋgəvday talaŋ tata kəwuzlaɗ za, i kəgiz ma ta əŋ kwa viyey seh halla məŋgəvday i kələndəŋ za mbeh səku.
Yesu a gizeŋ wucum əŋ Mariyama tə Magdala
(Matta 28:9-10, 18-20; Luka 24:13-53; Yahwana 20:11-23; Kəzəɗ tə Mələɓ iyi 1:6-11)
[9Abə dawaŋ tə Yesu mə garaha əŋ faŋw tə hedi maməc iyi abə kafa vət tə luma gamtak, a gizeŋ wucum məpər ndagwa seh əŋ Mariyama tə Magdala, wala mbiŋ mə gamaŋ mimiɗ madawar iyi dʉsəlʉɗ tə əŋ talaŋ ŋga sey. 10Wala ta, a nda i gizeŋta məsəkəŋ ta əŋ hedi mə pik tə abə Yesu iyi. Hedi iyi ta i mbə a lay məce, i kəhuhur. 11I zlim Mariyama a kəzlap, a zla: «Yesu mbə abə nje, sa kəlimza za!» Ama i kəkuw ma mbiŋ mə zlapaŋta seh halla.
Yesu a gizeŋ wucum əŋ gula ŋga iyi bək
(Luka 24:13-35)
12Abə dawaŋ tə məsəkəŋ mə taŋ ta, Yesu a gizeŋ wucum əŋ gula ŋga iyi bək abə wucum ntaŋw par, əŋ tata i mbə a kataf ley nda əŋ wuta tə damu. 13Gula iyi sey, i ziŋgehe, i gizeŋta əŋ gula dakayta iyi, ama tata bahayim i kəkuw ma ta halla.
Yesu a gizeŋ wucum əŋ gula ŋga iyi wam a meɗek ntaɗ
(Matta 28:16-20; Luka 24:36-49; Yahwana 20:19-23; Kəzəɗ tə Mələɓ iyi 1:6-8)
14Abə dawaŋ ta, Yesu a gizeŋta wucum əŋ gula ŋga iyi wam a meɗek ntaɗ, əŋ tata i kəzəm wuda. A gwazlakta məŋgəvday kuw ma tata halla, a gwazlakta baha məŋgəvday nəf tata tawytawy, i kəkuw ma tə hedi iyi i mə limʉ, abə dawaŋ tə mbiŋ mə garaha əŋ faŋw tə hedi maməc iyi wa seh halla. 15Abə dawaŋ ta, a zlapaŋta, a zla: «Hi nda əŋ məŋhayak fuk ley giz Labara Səntaŋ Lawayaŋ əŋ kwa viyey fuk. 16Kwa viyey mə kuw ma, a lim batem za, a reh za. Kwa viyey kəkuw ma halla, Bizlaf a mbəzlaŋ ma za a talaŋ. 17Ehe, mazla iyi wa, hedi makuw ma iyi i mə nda i ɗal: Abə miya na, i nda i gam mimiɗ madawar iyi, i nda i zlap abə ma lawayaŋ iyi. 18Kwa i məl zʉzʉk abə ndəra, kwa i sa mənjivek mə ja hedi, məsəkəŋ mə nda i ɗalaŋta seh halla. I nda i ɗiyaŋta ndəra a talaŋ hedi mə dal iyi, i mbəl za.»
Ziŋ tə Yesu əŋ kelek Bizlaf
(Luka 24:50-53; Kəzəɗ tə Mələɓ iyi 1:9-11)
19Abə dawaŋ tə Yesu Bay Bayta kəgizeŋta məsəkəŋ iyi wa kwata əŋ gula ŋga iyi seh, ɓa, Bizlaf a kafu əŋ wuzlaf, a nja əŋ ndəra zəma tə Bizlaf. 20Gula ŋga iyi bahayim, i nda tata əŋ lay iyi par par fuk ley giz Labara Səntaŋ Lawayaŋ. Yesu Bay Bayta mbə abə tata, a kəvəlaŋta fagay ley ɗal mazla iyi, amba hedi iyi i mə kuw ma tata i mə zlap.]
ទើបបានជ្រើសរើសហើយ៖
Markus 16: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល