Luka 1
1
Mar tə Ɗerewel tə Luka
1Waa Teyawfilus,
Hedi iyi mbeh səku i kətəl za ley wuzlel məsəkəŋ mə taŋ tə əŋ faŋw tini#1:1 Kəzəɗ tə Mələɓ iyi 1:1-3.. 2I wuzlel ma ta mənaŋ hedi iyi i mə gizenini, i mə gər tə abə nje tata məsəkəŋ mə taŋ mar tə əŋ mar ta, i kəmbaɗ za əŋ hedi mə ɗal kəzəɗ tə ma tə Bizlaf iyi. 3Məŋgəvday a ɗek, sa bahayim, sa kəɗəp hedi iyi za məndiwiŋ, a məsəkəŋ mataŋ iyi tə əŋ mar tə kəzəɗ tə Yesu. Sa bahayim kəŋgəmaka za ley wuzleleh abə ziber ta əŋ hwa, waa Teyawfilus, hedi səndawl. 4Sa wuzleleh wa amba hwa səŋ ma ta, hwa mə zlim wa məndiwiŋ.
Mələɓ tə Bizlaf a giz mbuwaha tə Yahwana mə ɗal batem
5Əŋ va Hirudus mbiŋ bay tə əŋ hayak tə Yahudiya, hedi məzəwindi mə ɗal kukus əŋ Bizlaf aka, miya ŋga Zakariya, mbə əŋ faŋw tə hedi mə ɗal kukus əŋ Bizlaf iyi, i mə ɗafaŋta ma Abiya. Wala ŋga, miya ŋga Elizabet, ar mambuwaha tə əŋ ntaŋw tə Haruna, hedi səndawl tə a talaŋ hedi iyi i mə ɗal kukus əŋ Bizlaf. 6Tata bək tata hedi sə delele iyi a ma tə Bizlaf, i kəziber ma matak iyi abə ma majaw tə Bay Bayta Bizlaf iyi fuk abə kataf ta. 7Ama i kəlim mbu halla, məŋgəvday Elizabet ndəle, tata bək tata məsəra iyi.
8Əŋ pis məzəwindi aka, Zakariya a kəɗal kəzəɗ ŋga tə hedi mə ɗal kukus iyi a ma tə Bizlaf, məŋgəvday kəzəɗ ta, nah pis mba seh, a talaŋ tata. 9Mənaŋ kukus tata tə hedi mə ɗal kukus əŋ Bizlaf iyi i mə ɗal hwayhway, i may Zakariya abə ley ɗal kurwu amba ley təɗ əŋ biŋ kə ɗal kukus əŋ Bizlaf Bay Bayta, amba ley kəɗaw dam mə njif səntaŋ a namba. 10Əŋ hala a kəkəɗaw dam mə njif səntaŋ sey, hedi makwas iyi i kəɗal mbuh a palah. 11Ɓa, mələɓ tə Bay Bayta Bizlaf a gizeŋ wucum əŋ Zakariya, mə geri kəɗi kəv tə ndəra zəma tə lay kə məsaw məsəkəŋ, a namba, a kəkəɗaw dam mə njif səntaŋ. 12Əŋ Zakariya mə limʉ seh, kələndəŋ za mbeh səku, kəwuzlaɗaŋ talaŋ za. 13Ama mələɓ tə Bizlaf ta, a zlapaŋgu, a zla: «Zakariya, hwa mba i ləndəŋ səku, məŋgəvday Bizlaf kəzlim ɗal mbuh təkwa za, Elizabet, wala təkwa, a mbuwaha mbu muwul za, hwa nda i ɗafaŋ ma Yahwana. 14Hwa səsəm za mbeh səku, hedi iyi mbeh səku i səsəm za a mbuwaha ŋga. 15Məŋgəvday a nda i mbaɗ əŋ hedi səndawl mə ɗal kəzəɗ tə Bay Bayta Bizlaf, a sa mavu halla, kwa məsəkəŋ mə huw hedi halla#1:15 Maŋgəɗ iyi 6:3.. Mimiɗ sə Kweɗek kəgwaɗaŋ nəf za mar tə dəməs mama ŋga. 16A ziŋgehe hedi tə Israyila iyi mbeh səku za əŋ kelek Bay Bayta Bizlaf tata. 17A nda i ndaha a ma tə Bay Bayta, abə Mimiɗ liŋ abə fagay mənaŋ Eliya, hedi mə giz ma abə miya tə Bizlaf, ley zlaraŋta ndəra tə baba iyi abə wuziyi tata iyi. A nda i ziŋgehe hedi mə waŋ talaŋ səku iyi əŋ hedi sə delele tə abə burŋguzl iyi. A nda i ɗiy hedi iyi lawlaw əŋ Bay Bayta.»
18Ama Zakariya, a zlapaŋ əŋ mələɓ tə Bizlaf sey, a zla: «Sa nda i səŋ məsəkəŋ ta, a ɗal za məndiwiŋ seh, a mey? Məŋgəvday mənjawa sa məsəra, wala na bahayim məsəra wala.» 19Mələɓ tə Bizlaf a ziŋgeŋ zlap, a zla: «Sa seh, sa Gabəriyel, sa mə geri a ma tə Bizlaf ley ɗalaŋ kəzəɗ. Kələɓaka za ley zlapah abə ley gizeh labara səntaŋ lawayaŋ wa. 20Ama hwa kəkuw ma na mə nda i ɗal ta halla, məŋgəvday a ɗek, hwa mbaɗ za əŋ ɓəɓa, hwa gula i zlap halla ba ha əŋ hala tə məsəkəŋ iyi ta i mə nda i ɗal mənaŋ Bizlaf mə mba.»
21Əŋ hala ta mba, hedi makwas iyi i kəgəbar Zakariya, i kəhar za məŋgəvday kənjaha za təday əŋ biŋ kə ɗal kukus əŋ Bizlaf ta. 22Əŋ mbiŋ mə təɗaha a palah seh a gula i zlapaŋta səku ba, hedi iyi ta i kəsəŋ za Bizlaf kəgizeŋ məsəkəŋ za əŋ biŋ ta. A gula i zlap səku ba, a zlapaŋta abə ndəra dap.
23Əŋ kəzəɗ tə Zakariya cukwaɗ əŋ biŋ tə Bizlaf seh, a nda ŋga əŋ wuta. 24Abə dawaŋ ta kʉsit, Elizabet, wala ŋga, a ɗal dəməs. Kəɗal ntəra juɓum mə ɓehi a ge a ge. A wulək əŋ talaŋ ŋga, a zla: 25«Ehe, məsəkəŋ Bay Bayta Bizlaf mə ɗalaku, əŋ hala mbiŋ mə wulək a sa ley baŋgaka hawa tə ndəle na a ma tə hedi iyi fuk.»
Mələɓ tə Bizlaf a giz mbuwaha tə Yesu
26Əŋ Elizabet mbə abə dəməs ntəra ŋkuh, Bizlaf a ləɓaha mələɓ ŋga Gabəriyel əŋ berne i mə ɗafaŋ ma Nasaratu əŋ hayak tə Galili. 27A ləɓahaw seh, əŋ kelek hazləma dalay ncew tə Yusufa, hedi tə əŋ ntaŋw tə bay Dawuda. Miya tə hazləma dalay ta Mariyama. 28Mələɓ tə Bizlaf a təɗaha əŋ kelek ŋga, ɓa, a zlapaŋgu, a zla: «Səsəm, Bay Bayta Bizlaf kəvəlah səntaŋ ŋga za, mbə abə hwa.» 29Ma ta, kəwuzlaɗaŋ talaŋ za əŋ Mariyama mbeh səku. A wulək əŋ nəf ŋga, a zla: «Mbele ta, a mba i zlap seh, viŋgey?» 30Mələɓ tə Bizlaf, a zlapaŋgu izey, a zla: «Mariyama, hwa mba i ləndəŋ səku, məŋgəvday hwa kəlim səntaŋ tə Bizlaf za. 31Ehe, hwa ɗal dəməs za, hwa nda i mbuwaha mbu muwul, hwa nda i vəlaŋ miya Yesu#1:31 Matta 1:21.. 32A mbaɗ za əŋ hedi bayta, i ɗafaŋ ma za Mbu tə Bizlaf tə wuzlaf. Bay Bayta Bizlaf a nda i vəlaŋ bay tə dide tə dide ŋga Dawuda. 33A nda i sla a talaŋ hedi tə Israyila iyi kwa a pipi a pipi, bay ŋga a kənda i cukwaɗ halla.»
34Mariyama a zlapaŋ əŋ mələɓ tə Bizlaf ta, a zla: «Məsəkəŋ ta, a nda i ɗal seh, viŋgey? Məŋgəvday sa kəsəŋ muwul səku səlak.»
35Mələɓ tə Bizlaf a ziŋgeŋ zlap əŋ Mariyama, a zla: «Mimiɗ sə Kweɗek a bəreŋgehe za a hwa, fagay tə Bizlaf tə wuzlaf a dəpah za abə ŋgiseŋ ŋga. Məŋgəvday a ɗek, mbu hwa mə nda i mbuwaha wa, a nda i nja kweɗek kweɗek, i nda i ɗafaŋ ma Mbu tə Bizlaf. 36Ehe, Elizabet, vəŋ təkwa, mbə abə dəməs, kwa mbiŋ məsəra wala seh, a nda i mbuwaha mbu muwul. Mbiŋ seh, hedi iyi i mə zlap tə a ɗek mbiŋ ndəle sey, ama mənjawa, mbə abə dəməs ntəra ŋkuh, 37məŋgəvday məsəkəŋ mə dayaŋ fagay əŋ Bizlaf seh halla.»
38Abə dawaŋ ta izey, Mariyama, a zlapaŋgu, a zla: «Sa seh, sa hedi mə ɗalaŋ kəzəɗ tə Bay Bayta Bizlaf. Məsəkəŋ ta mə ɗalaku mənaŋ hwa mə zlap.» Ɓa, mələɓ tə Bizlaf a nda ŋga, a yaku.
Mariyama a nda i gəraha Elizabet
39Əŋ waŋ iyi ta mba, Mariyama a gar, a nda viyu əŋ berne tə wuzum tə əŋ hayak tə Yahudiya. 40A təɗ əŋ ge Zakariya, ɓa, a ɗalaŋ mbele əŋ Elizabet. 41Əŋ hala Elizabet mə zlim mbele tə Mariyama seh, ɓa, mbu a huɓəl a dəməs ŋga. Mbehmbeh mba, Mimiɗ sə Kweɗek kəgwaɗaŋ nəf tə Elizabet za, 42ɓa, a zlap abə fagay, a zla: «Pir ma tə Bizlaf mbə a hwa day wala iyi fuk, ndəra Bay tə Bizlaf mbə a mbu tə dəməs təkwa wa bahayim! 43Sa seh, sa yim viyey, ha mama tə Bay Bayta na, a ndaha əŋ ge na wa? 44Məŋgəvday əŋ sa mə zlim mbele təkwa wa, mbu kəhuɓəl za a dəməs na abə səsəm. 45Hwa mə nji lawlaw məŋgəvday hwa kəkuw ma Bay Bayta Bizlaf mə zlapah za, a talaŋ məsəkəŋ mə nda i ɗal ta, məndiwiŋ.»
Mariyama a həmən Bizlaf
46Abə dawaŋ ta izey, Mariyama a zlap, a zla:
«Sa kəhəmən Bay Bayta Bizlaf na abə nəf na ntaɗ.
47Nəf na a kəsəsəm mbeh səku,
məŋgəvday Bizlaf, mbiŋ hedi mə reheke!
48Məŋgəvday kəkuw ley gər hedi mekedek mə ɗal kəzəɗ ŋga za.
Ayaw, mar mənjawa, hedi mə nda i mbuwaha tə jemere iyi,
i nda i zlap a talaŋ na, i zla:
Sa seh, sa hedi manja lawlaw,
49i nda i zlap mənaŋ wa
məŋgəvday Bizlaf, hedi tə abə fagay kəɗalaka məsəkəŋ səndawl za.
Mbiŋ seh, Bizlaf sə Kweɗek.
50A ɗalaŋta səntaŋ za,
əŋ hedi tə jemere iyi ha tə jemere iyi, mə waŋgaŋ talaŋ iyi.
51Kəgizehe fagay ŋga za fuk ley ɗal kəzəɗ səndawl,
kəwʉweɗ hedi mə hav talaŋ iyi za.
52Kəbəreŋ bay iyi za a lay kə nja tata iyi,
kəkaf hedi mə waŋ talaŋ iyi za əŋ wuzlaf.
53Kəgwaɗ hedi mətis mə ja iyi za abə məsəkəŋ səntaŋ,
hedi tə abə məsəkəŋ iyi, kəziŋta za ndəra misiŋ.
54Kəndaha za ley tər Israyila iyi, hedi mə ɗalaŋ kəzəɗ ŋga iyi,
kəsəŋ kenek za abə ley gizeŋta səntaŋ ŋga,
55əŋ Ibrahima abə hedi mambuwaha tə əŋ ntaŋw ŋga iyi kwa a pipi a pipi,
mənaŋ mbiŋ mə zlapaŋta əŋ dide tə dide takwa iyi.»
56Mariyama a nja abə Elizabet a ɗal mbeh kwata ntəra maakaɗ. Abə dawaŋ ta, ɓa, a ziŋgehe ŋga əŋ wuta.
Mbuwaha tə Yahwana mə ɗal batem
57Pis tə Elizabet kəhwasaha za ley mbuwaha. A mbuwaha mbu muwul. 58Məslige ŋga iyi abə vəŋ ŋga iyi i zlim Bay Bayta Bizlaf kəɗalaŋ məsəkəŋ səntaŋ za mbeh səku seh, ɓa, i səsəm abə mbiŋ. 59Əŋ waŋ jamaakaɗ ley mbuwaha ŋga, i ndaha ley zla viɗe tə mbu sey. Hedi iyi fuk i mba i ɗiyaŋ miya Zakariya, mənaŋ tə baba ŋga. 60Ama mama ŋga, a zla: «Mənaŋ mba səku, miya ŋga seh, Yahwana.» 61I zlapaŋgu, i zla: «Miya mənaŋ wa əŋ ntaŋw təkwa halla.»
62Abə dawaŋ ta izey, i ɗəp Zakariya, baba tə mbu, abə ndəra, amba ley səŋ a nda i ɗiyaŋ miya əŋ mbu ta seh mey. 63Zakariya a ɗəpta amba i mə vəlaŋ kwambum kə wuzlel. Abə dawaŋ ta, a wuzlelʉ: «Miya ŋga seh, Yahwana.» Hedi iyi fuk i har. 64Mbehmbeh mba, ma tə Zakariya abə ganaɗ ŋga, a mar ley zlap, ɓa, a həmən Bizlaf abə fagay. 65Abə dawaŋ ta izey, məslige iyi fuk i kələndəŋ za mbeh səku. Ha hedi tə wuzum tə əŋ hayak tə Yahudiya iyi fuk i kəzlap a talaŋ məsəkəŋ mataŋ iyi ta. 66Hedi mə zlim ma iyi ta fuk i kəwulək a ɗek baha, ɓa, i ɗəp talaŋ tata, i zla: «Mbu ta, a mba i mbaɗ seh əŋ mey?» Məndiwiŋ, fagay tə Bay Bayta Bizlaf mbə abə mbiŋ.
Zakariya a giz ma tə a talaŋ kəzəɗ səntaŋ Bizlaf mə ɗal
67Zakariya, baba tə mbu sey, Mimiɗ sə Kweɗek kəgwaɗaŋ nəf za, amba a mar ley zlap mənaŋ hedi mə giz ma abə miya tə Bizlaf, a zla:
68«Mazukwa i həmən Bay Bayta Bizlaf, Bizlaf tə Israyila iyi,
məŋgəvday kəndaha za ley jəɗ hedi ŋga iyi, amba a rehta.
69Kəgaranakwa hedi tə abə fagay ley rehenakwa za,
hedi tə əŋ ntaŋw tə bay Dawuda, Dawuda, hedi mə ɗalaŋ kəzəɗ ŋga.
70Mənaŋ mbiŋ mə giz ma mar zlezle kəɗi ma tə hedi mə giz ma tə abə miya ŋga mamay iyi,
71kəzlap za hedi mə nda i rehenakwa a ndəra məsəgər takwa iyi
liŋ a ndəra hedi mə mba i gəranakwa a nje səku iyi fuk.
72Kəgizeŋta səntaŋ ŋga za əŋ dide tə dide takwa iyi,
kəsəŋ kenek za a jaw ma ŋga sə kweɗek,
73məŋgəvday Bizlaf mə meɗeŋ əŋ dide tə dide takwa Ibrahima, a zlapaŋgu, a zla:
74a rehenakwa za a ndəra məsəgər takwa iyi,
amba nakwa iyi ɗalaŋ kəzəɗ mə tak ləndəŋ.
75Amba nakwa iyi mbaɗ əŋ hedi mamay iyi, əŋ hedi sə delele iyi a ma ŋga,
ha əŋ hala tə nja takwa fuk.
76Hwa bahayim, mbu mekedek, i ɗafah ma za hedi mə giz ma abə miya tə Bizlaf tə wuzlaf,
məŋgəvday hwa nda i nda a ma tə Bay Bayta Bizlaf ley ɗiyaŋ kataf ŋga.
77Ley gizeŋta əŋ hedi ŋga iyi, a rehta za,
abə ley baŋgaŋta hem tata iyi.
78Bizlaf takwa səntaŋ ŋga mbeh səku,
məŋgəvday səŋ nje həhər ŋga, kələɓaha waɗ tə wuzlaf za mənaŋ pis a talaŋ takwa.
79Amba ley waɗaŋta nje əŋ hedi manja tə əŋ ləvəŋ iyi abə tə əŋ ŋgiseŋ tə məc iyi, baha,
amba a gizenakwa kataf əŋ zahay#1:79 Esaya 9:1; 59:8..»
80Mbu sey, a kəgəl, burŋguzl ŋga a kəbuw, taŋ a nda ŋga əŋ təp damu, nja a nja ŋga ka a namba, ha əŋ mbiŋ mə mar ley gizehe wucum ŋga a ma tə hedi tə əŋ Israyila iyi.
ទើបបានជ្រើសរើសហើយ៖
Luka 1: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
