Málákuse 16
16
Guám agá gɛbɛl
(Mat 28.1-8; Lúk 24.1-11; Sáŋ 20.1)
1Buɔ́s bá gudúkid bá Beyúdɛn máal búmádɔ́mb, Maliá wa gɛdɔŋ gá Magadála, Maliá inyódió Sáka, na Salúma, ɔbɔ́nd megud má ɔlɔ́f gá guefuénén gɛlɔŋ gá Yésu. 2Tú na budúdúg bá sɔ́ndiɔ, anyɛ́ ɔɔ́ny máabá, úgányá guámaan, abáb agá gɛbɛl. 3Bɔ́mɔbiɔ́yɔ́n bɔ́bɔ́ na bɔ́bɔ́ ká: «Ányá ugegúnúdídíŋílídinyi nɛdány nɛnyá agá nibíŋínín ná gɛbɛl e?» 4Bédugi eŋísi, abaán ká gɛnɔ́m gá nɛdany gɛ́máabá agá nibíŋínín ná gɛbɛl ganyɛ nidíŋílídényi agá buáy. 5Ebébíŋín, abaán gɛndɔmbuɔ́ gá mɔnd gilukúménén buáy bɔ́b bá ɔmbɔ́g wa ɔnɛ́m na kaba fúuum agá nuɔ́l, gianta gá buwa igiádɛgɛn bɔ́. 6Uganyɛ gɔ́b gɔg ká: «Nudɛbiá buwa, saá Yésu wa Násalɛd ɔwɔ́ bámáasanda agá kolós nuanbaná e? Usanyɔg, udɛbá and aya; ánuán, aya bámáabɛ́dɛ́gɛ́n wɔ́. 7Ánɔ́b nɛ́nuán,#16.7 Digúbɛ́dága ká giɔmfɔ gá mɔnd gimáabá agá gɛbɛl ɛ, búmabá ɔsɔ́mɔsɔmɔ wa Gɔdányá. gɔ́nuɔ́yɛ́dɛ́n bafɔ́nɔfɔ́n bág, na Piéle ká: “Usasɔŋɔn agá giéns gá gus bábɛ́laná ká Galilé, uguány nuganuán wɔ́, gɔɔ́gɔ anyɛ́ umɔ́ɔnuɔ́yɔɔ́n.”» 8Abaám, ɔbɔ́bínɔ ayáyá na gɛbɛl, gágual ká bámatáatán bónd béméŋeméŋ. Bádɛmaás ta mɔnd gágual ká buwa mabá nɔbɔ#16.8 Imbɔbɔnɔ sá busió busió gúdíyenyi ká, ayana Ndág ya Nsɔ́m guɔ́ŋ gá Málákuse mananá..
Gubídíye gá Yésu
9Na budúdúg bá sɔ́ndiɔ, anyɛ́ Yésu máabá umámán guanyɔg aga ebeguén, uwakɛn guámɛ́n Maliá wa Magadalá, Maliá waád umáabiánán biád bá bíliíndié bɛtɛ́ndád nomo ɛbɛ́ Yésu máakɔ́ŋɛ́d. 10Uwɔb uwɔnɔyɛ́dɛ́n band ɔbɔ́ bámáabá ɔlɔŋ na Yésu. Bámabá gɔsɔ́g, bónd bábáŋa. 11Bámáal na guɔ́b wɔ́ wɔyɔ ká unyɛ ɔgɔ́sɛ, unyɛ aŋánán wɔ́, bɔ́bɔ́ ta guádáb. 12Agá gélem ány, uwebídíye gá bafɔ́nɔfɔ́n bág bándɛ, bámabaán agá bisién. Bádɛmalɛns wɔ́ gágual ká umabá ulɛ́ŋanɛn sáŋál. 13Anyɛ́ bámáalɛ́ns wɔ́, obósiondo, ɔbɔ́siɔyɔɔ́n bɔsɔ́gɔ́, ta abaány, bádɛmáadáb gɔɔ́gɔ anyɛ́ bémeén guádáb nsua. 14Agá gélem ány uwesúgúdenyi gubídíyé gá bát na omoom gɛsɛgɛl bámáanyánán. Uwagálaan bɔ́ gá kand guádába wɔbɔ, na gulal gá ɛdɛm sɔ́b, anyɛ́ bémén bádiádáb niɔy ná band bámáanaán wɔ́ uganyɛ aŋanyɔ́gan aga ebeguén. 15Uganyɛ gɔ́b ká: «Ánɔbaán kɔɔ́m gidigid gá gus núdúmbenyi band Ndág ya Nsɔ́m. 16Ewe uganuádáb Ndág ya Nsɔ́m, wond ubídu, ugabá agá gusɔ́d gá medug mem. Ewe ugenuén udiondí ɔdɛm wág agamia, unyɛ na gɛgua, ugabá agá guɔ́bɛ́g gá medug mem. 17Bisey ebie bíganuánɛ́gaan aga band báganuádáb Ndág ya Nsɔ́m: Bégeémenyi biád bá bíliíndié na bugaga nganúfá bɔ́, bagagála bɛŋɔ́lɔŋɔ́siɔ bá gugál ɛbɛ́ bámáal bádɛ́fɔ́nɔfɔ́n, 18bagadɛgaan inyɔ́k na ɛmbɔ́g sɔ́b#16.18 Nugédi enue guamba guɔyɛd ká, ta buánɛ́g ká gɛsɛgɛl ɛgɛ́ bádɛganá inyɔ́kɛ gidigid, inyɔ́kɛ isiány dá bɔ́, Gɔdányá gal ká buanda diál bɔ́., ta buánɛ́g ká bámábúwá ɛlɔ́g, ta buanda dɛgaal bɔ́, bágadálaan ɛmbɔ́g gá band bánɔ́maná, band abaány éŋúgeen.»
Yésu móndo agá masiá má Gɔdányá
19Umáal ná gugálɛ́dɛn bɔ́ anaány, Gɔdányá uwebúlígi wɔ́ ugumuana; uwenelukúmín agág gá ɔmbɔ́g wa ɔnɛ́m#16.19 Yésu diɔ́bɔnɔ́ ká Gɔdányá mebúlígi wɔ́ ugumuana dɛguámba guɔyɛd ká anyɛ́ umábɔ́lɛ́gána bafɔ́nɔfɔ́n ság dɛmánaan wɔ́, sɛ́mánán wɔ́ anyɛ́ umáabá ubúlígenyi bese na bese.. 20Bafɔ́nɔfɔ́n abaáb gá guúl bédúmbényí Ndág ya Nsɔ́m kɔɔ́m gidigid. Ɔgúnɔ́ mabá udúgúne bɔ́ gá buol ubuány, udíyenyi agá bisey ɛbɛ́ bámáabá bála agá bugaga umáadánɛ́n bɔ́, ká gudúmbenyi gɔ́b gá Ndág ya Nsɔ́m nyɛ meliŋítas.
ទើបបានជ្រើសរើសហើយ៖
Málákuse 16: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល