Málákuse 15
15
Yésu agá Piláta, ngɔ́monɔ wa Balomɛ́ŋ
(Mat 27.1-2,11-26; Lúk 23.1-5,13-25; Sáŋ 18.28-40; 19.4-16)
1Na gigund bála, bɔgɔ́gɔ abál gilumen na bagɔn bá Beyúdɛn na befúnyifúny bisele, na Sanedelɛ́ŋ gidigid#15.1 Sanedelɛŋ nyɛ idúl ɛyɛgɔn agasuá., ɔbɔ́yɛd ká bágɔ́d Yésu, báb naga aga Piláta. 2Anyɛ́ bámáab guáma, Piláta guófún wɔ́ ká: «Anyɛ Ofuŋ wá Beyúdɛn e?» Yésu guondinyi ká: «Ɔguɔ́yɔ.» 3Bɔgɔ́gɔ abásɔ́mbaan Yésu ɛduá sá moóny giod. 4Piláta guand guófún Yésu ká: «Odiguóndinonyi e, saá ɔguɔ́bɔn biád bá manda gidigid ɛbɛ́ bɔ́yɔnɔ́ bɛ́gɔ́bɛ́lɛ́ŋana e?» 5Ɔwɔ́ ta guás gɔg, ubuál ká Piláta dúm guméŋeméŋ. 6Sig budɔ́mbɔ bá Pásíka, Piláta mabá wémi gɛmbɔg ɛgɛ́ giŋi gá band ófonó. 7Mɔnd ɔfɛ́n ká Balábasa mabá agá gians gá mbíne, ɔlɔŋ na bɛmbuánsɛl bɛ́mɔ́ɔn mɔnd gigúl ɛgɛ́ béméenúsényí ngɔ́mɔnɔ#15.7 Ngɔ́mɔnɔ aya mabá bá Lomɛ́ŋ.. 8Giŋi gá band igiány igiébúlígi agá Piláta gá guɔyɛ́dɛ́n wɔ́ ká waál ubú uganyá wala gigúl igiány. 9Uwondinyi bɔ́ ká: «Nuguámba ká ínúnɛnɛn ofuŋ wá Beyúdɛn e?» 10Gágual ká umáanaán bese na bese ká bɔgɔ́gɔ meliŋín Yésu, buád buanda bámándɛ́n wɔ́ ɛdɔg. 11Bɔgɔ́gɔ abáb gá gúligenyi giŋi gá band ká Piláta émí Balábasa. 12Piláta guand guófún bɔ́ gɔg ká: «Yaál nanyá gɔg na ewe nubɛ́laná ká ofuŋ wá Beyúdɛn e?» 13Obóndinyi magɔ́gɔ́n ká: «Sánd wɔ́ agá kolós!» 14Uganyɛ gɔ́b ká: «Giág gá bɔbɛ unyá gual e?» Abáb nobusió na guánsa gɔdɔ́mb anaány bɔ́yɔ ká: «Sánd wɔ́ agá kolos!» 15Piláta mambá ká giŋi gá band ɔ́bɛ́n wɔ́ bese, buád buanda uméemí Balábasa. Agá gélem ány, uganyɛ ká bégíde Yésu na dusue, ɛ́ŋ guéŋin wɔ́ gá musia ká muásánd wɔ́ agá kolós.
Ndanyá ya insánd
(Mat 27.27-31; Sáŋ 19.2-3)
16Musia guban wɔ́ nagadá wa nuyá ná Piláta umáabá ngɔ́mɔnɔ , umuábɛ́lɛ́gɛn bɔsɔ́g musia gidigid múmáabá agá nuyá unuány. 17Umuág Yésu gɛla gibólodod#15.17 Nɛnama ná gɛla inyány bámáag Yésu mabá góbusió bá befuŋ., umuánɔg ndaniá ya nsánd, umuág wɔ́ agá ɔduɔ́. 18Umɔ́b gá gúbígélígeli wɔ́ muɔ́yɔ ká: «Mbígélíd ofuŋ wá Beyúdɛn!» 19Bɔ́gɔ́dɔɔn wɔ́ nubal agá ɔduɔ́, bétúnen wɔ́ bité, Bégúnsen wɔ́ enú egegus anyɛ bégúfínenyi wɔ́. 20Bámáal na guala wɔ́ anaány, ebéli wɔ́ gɛla ɛgɛ́ bámáag wɔ́, obóndi wɔ́ gɛla gág. Abábád guámán wɔ́ ká básánd wɔ́ agá kolós.
Gɛsanda gá Yésu
(Mat 27.33-44; Lúk 23.36-43; Sáŋ 19.16-24)
21Mɔnd ɔfɛ́n ká Simune wa Silɛ́n, sié wa Alɛkɛsándɛlɛ nɔ́b ná Lufuse. Umóosiódoón gá mesíg, uwandɛn ány, musia ganyɛ gág ká ta ebíléne ta edibíléné, bɛ́dɔ́gɛ́n kolos wa Yésu. 22Abában wɔ́ kɔɔ́m bábɛ́laná ká Gɔlɔgɔ́ta anaány gúnyá kɔɔ́m gá ginkólóŋ kóloŋ gá ɔduɔ́. 23Abaál béŋin wɔ́ magɛ́b bulényibulényi na bulɔ#15.23 Bémebulényi manda amány ká Yésu diɔ́bɔ́n masa má imféŋ, kɔɔ́kɔ anyɛ́ bágányɛ bál na mɔnd gɛsɛgɛl bámbaná gusal wɔ́., uween. 24Agá gélem ány, abásand#15.24 Nɛnama enié Balomɛ́ŋ máabá básánda band: Bámáabá bákɛn guɔ́ntɔn wɔ́ imfɔ́ŋɔ agá kolos umány agá gus. Agá gélem ány, bábád guedugi gɛ́ na duoli bébíŋínyi agá ɔmbɛ́l. wɔ́ agá kolós, abaál ɛfɛdafɛda yá guafa bɛla bág ká bálɛ́ns gɛdam ɛgɛ́ sig mɔnd a gagúnúbia. 25Gá bɛsɛgɛl biányímanyɛ nomo bámáasand wɔ́ agá kolós. 26Inyɔ́ŋ síméedíyényí ɔduɔ́ wá buóny wá nigú nág mabá siɔ́ŋɔ́n agá giéns gá ɔkɔ́k bámáafaŋɛ́g ugumuana wa ɔduɔ́ wág, símabá siɔ́yɔ ká: «Ofuŋ wá Beyúdɛn ewe». 27Bámasánd wɔ́ agá kolós ɔlɔŋ na bɛmbuánsɛl biándɛ, omoom ɔmbɔ́g wa ɔnɛ́m, ondodió ɔmbɔ́g wa adád. [ 28...]#15.28 Búnyɛ buɔ́ŋɔ́n agá imbɔbɔnɔ símodió ká: Anány búmáabiál kɔɔ́kɔ anyɛ́ búnyá buɔ́ŋɔ́n agá mbɔbɔnɔ: «Bámabana wɔ́ agá ɔlɔŋɔ wá bɛmbuánsɛl». 29Band bámáabá bádɔ́mbaan agá nŋili molókónyí ɛduá, básɛ́ga wɔ́, bɔ́yɔ ká: «Ɛŋɛ́, guádié, aŋuá agad ɔnyɛb ond afuág wɔ́ gá medug mádadɔ#15.29 Giág Yésu ganyá wala gúmén umáabá wala gá giayɛ gɛ́lɛ́ŋaná onyɛbɛ., 30bísódí aŋuá muát ésél agá kolós.» 31Bɔgɔ́gɔ na befúnyifúny bisele sɔ́n masɛgá Yésu bɔ́biɔ́yɔɔn ká: «Úgusódonyi band bóndodi, ɔwɔ́ gɔgɔ oo! 32Aŋuá ɔyɔnɔ́ ká anyɛ́ Kilíse, ofuŋ wá Ísalayɛ́l, sél nɛ́nuán agá kolós, dián, dɛ́bád guádáb!» Ebe bámáabá basandán agá bokolós ɔlɔŋɔ naga, masɛgá wɔ́ sɔ́n.
Nigú ná Yésu
(Mat 27.45-56; Lúk 23.44-49; Sáŋ 19.28-30)
33Gá tólóf, mbíne iyagua agá kɔɔ́m agány gidigid, guám bɛsɛgɛl bɛ́dadɔ bá ɛŋand buɔ́siɔ́. 34Gá bɛsɛgɛl bɛ́dadɔ ibiány, Yésu uwánsɛ́d magɔ́gɔ́n ká: «Eloyí Eloyí, lama sabakatání#15.34 Eloyi Eloyi lama sakabatani nyɛ nualamayɛ́ŋ gugál umáabá ugála. Bámabá bábɛ́dága ká ibús Isayi umáabá ubɛ́lan.?» Anaány gúnyá: «Gɔdányá wám, Gɔdányá wám, amámbɛ́yɛ́bɛ́d gágiág e?» 35Gɛdam gá band gɛ́máabá kɔ́ ganyɛ ká: «Ɔ́nuɔ́bɔ́, uganyá gúbɛ́laan Elí!» 36Sɔ́gɔ́ ondodió gɔb na ɔdɛ́d, gueyubu giyugu agá magɛ́b mányá guáb, uwafaŋɛg gɛ́ agá nɔbal, gudóŋinyi Yésu ká úbúwá, uganyɛ ká: «Enubídí dián ɔ́gɔ Elí#15.36 Elí aya nyɛ ibús yá Gɔdányá. gegúsemí wɔ́ ány.» 37Yésu guág nugogó magɔ́gɔ́n, uwáfɛ́gɛn ambak. 38Gianta gá sanda gímáabá giádɔ́ná ɔnyɛb wá Gɔdányá biéns biándɛ igiédúmbi gusalɛ́g gudúm gɛmuaná, guám gɛmbádá#15.38 Sanda uwány mabá uwe legen band ká bádɛ́baan kɔɔ́m gámáabá gisele. Asiá ɔgɔn ɔ wa befuís bɛbiág umáabá ubíŋen kɔ́ gɛsɛgɛl gímom gá yɔŋ ká wɔ́ŋɛ́n Gɔdányá gɛnɛnɛna góbusió bá bɛfal bá band bá Isalayɛ́l.. 39Ɔgɔ́n wá musia umáabá ogóbusió bá Yésu máal ná guán nɛnama ɛnɛ́ umáafɛ́gɛ́n ambak, uganyɛ ká: «Meliŋítas, mɔnd ewe águbá mɔɔn wá Gɔdányá.» 40Bagánd sɔ́n mabá enéné bálɛ́ŋa. Ɔgɔ́b gá ɔlɔŋ, Maliá wa gɛdɔŋ gá Magadala, Salúma, na Maliá inyódió Sáka wa siɔdɛd, ɔwɔ́ sɔ́n inyódió Yosé, 41bámáabá báládaán Yésu, bálaan wɔ́ masɔ́m gigúl umáabá agá giéns gá gus bábɛ́laná ká Galilé. Giod gá bagánd gímodió sɔ́n gímeébúlígí nág Yelúsalɛm mabá ány.
Munyon
(Mat 27.57-61; Lúk 23.50-56; 19.38-42)
42Niɔ́b máal nɛ́gányɛ kɔ́, ká nŋɔ́guɔ́ gabá buɔ́s bégúdúkid bá Beyúdɛn, 43Yɔ́sɛba wa gidɔŋ gá Alimaté uwasiám, umabá gigúmín gá mɔnd agá ɔlɔŋ wá band bá sanedelɛ́ŋ. Ɔwɔ́ sɔ́n umebídeényí guúl gá Bufuŋ bá Gɔdányá. Uwabiág makányá, uwɔb agá Piláta, uwonófún gɛlɔŋ gá Yésu#15.43 Yɔ́sɛba máab guófún Pilata gɛlɔŋ ɔ gá Yésu gágual ká umalɛnsán ká Beyúdɛn dɛmabianan bugaga bogúnyó gɛlɔŋ ɔ dúmbadúmba buɔ́s bɔ́b bégúdúkid.. 44Piláta meméŋeméŋ ká Yésu mégú fiaŋ fiaŋ. Ɔwɔ́ gubɛ́lɛ́gɛn ɔgɔ́n wa musia ká wófún wɔ́ ɔ́gɔ Yésu segú feké. 45Mɔnd uwaány máal úmóndinyi wɔ́, uwéŋín Yɔ́sɛba bugaga bɔ́gúgɔ́l gɛlɔŋ gá Yésu. 46Yɔ́sɛba guɔ́nd ndɔ́mb, uweseli Yésu agá kolós, uwemúŋe wɔ́ agá ndɔ́mb iyaány, uwononyó wɔ́ agá gɛbɛl ɛgɛ́ bámáaduánán agá gɛgɔns, ebéfuug nibíŋínín na gianta gá nɛdany. 47Maliá wa gɛdɔŋ gá Magadala, na Maliá inyódió Yosé mobísónónyi kɔɔ́m ɔgɔ́ bómoónyó Yésu.
ទើបបានជ្រើសរើសហើយ៖
Málákuse 15: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល