Lúkasa 14
14
Yésu méŋúgí mɔnd umáanúmá
1Buɔ́s bá Sábát búmodió, Yésu mabá agá gians gá ofuŋ wa Bafalisiɛ́ŋ omodió gá ɔnyɔ́. Ɔbɔ́gɔ́l gɛsɛgɛl gá gúlɛ́ŋa wɔ́. 2Mɔnd mabá kɔ́ uwɔ́ nuɔ́l máabá óbó óbó ná gunúma. Umabá agá busió bá Yésu. 3Yésu uwɔgɔ́l gúgal, uganyɛ gá bóŋ bisele na Bafalisiɛ́ŋ ká: «Bisele bás gúdɛ́fanan bugaga ɔ́gɔ ká bígúdílégen ká diéŋúgenyi band buɔ́s bá Sábát e?» 4Ebélúŋ pɔ́ɔɔ, Yésu gɔg gugɔ́l mɔnd umánúma, uwéŋúgi mɔnd uwaány, uganyɛ gág ká úgúg agagá. 5Uganyɛ gɔ́b sɔ́n ká: «Mɔnd mábianan mɔɔn waga ɔ́gɔ ká búlúke búmánúguá agá nuúy nagadá, udɛgaguámbɛd nŋili yá gual ká úsɔ́mɔn bú ta búbá buɔ́s bá Sábát e?» 6Ubuáyág bɔ́ guondinyi.
Eyíd niluku ná gusúgúdenyi
7Yésu uwɔyɛdɛn band bámáabɛ́lɛ́gɛ́n bɔ́ gá ɔnyɔ́ nsab eye anyɛ́ umáanaán bɔ́ béye bɛnɔg bá eluku: 8Uganyɛ ká «Mɔnd mágubɛ́lɛ́gɛn gá ɔnyɔ́ adɛɛ́b guelukúmín agá niluku ná busió, emény básabɛ́lɛ́gɛn sɔ́gɔ́ omodió ugudúmbaná. 9Búnyɛ báguánɛ́g ká mɔnd uságunúbɛ́lan ta aŋuá, ta sɔ́gɔ́ uwaány, ɔ́yɛd ká: “Adɔ́g agá niluku iniány”, na ɔduɔ́ gɔnɔ́ gidigid, elukúmín agá niluku ná gusúgúdenyi. 10Búnyɛ ká, gɛsɛgɛl báságugubɛ́lɛ́gɛn gá ɔnyɔ́, ɛmbɛ́ gelukúmín agá niluku ná gusúgúdenyi, nɛnama nɛ́nyɛ ká mɔnd uságugubɛ́lɛ́gɛn gá ɔnyɔ́ guɔyɛdɛn ká: “Ogúl e, óló aya agá busió agá niluku ná bese”. Anaány, búgabá gianta gá nugúm gɔ́w ogóbúsió bá ebe bányá ilukié gá ɔnyɔ́ nɔw. 11Gágual ká, mɔnd gidigid ubíbúlígenyé, bégeseli wɔ́, ubísélenyé bégebúlígi wɔ́.»
12Yésu ganyɛ gá mɔnd umáabɛ́lɛ́gɛ́n wɔ́ gá ɔnyɔ́ ká: «Gɛsɛgɛl amánubɛ́lɛ́gɛ́n band gá ɔnyɔ́, adɛbɛ́lɛ́gɛ́n ta begúl bɔ́w, ta belimén bɔ́w, ta nɔgɔ́g nɔ́w, ta begúligul bɔ́w bányá ɛnɔ́m sá band. Gágual ká bɔ́bɔ́ sɔ́n bányɛ bágúgubɛ́lɛ́gɛn, bóguondinyi manda eméŋín bɔ́. 13Gɛsɛgɛl afɛnaná band gá budɔ́mb, bɛ́lán basɔ́gasɔga, binsúgule, bigónd, 14agabá bese gágual ká bádɛ́bá bógúguondinyi ubú eméeŋén bɔ́. Gɔdányá goguondinyi gigúl ebe bányá besi ganuányɔg aga ebeguén.»
Nsab ya gianta gá ɔnyɔ́
15Band bámáanyánán ɔlɔŋ na Yésu mɔbɛ́dɔ́lɛ́gɔɔ́n buóny umɔ́ɔyɔ́. Omoom ɔgɔ́b gá ɔlɔŋ ganyɛ gág ká: «Bese na ewe uganúbá gá ɔnyɔ́ agá Bufuŋ bá Gɔdányá.» 16Yésu ganyɛ gág ká: «Mɔnd madánaán ɔnyɔ́, uwabɛ́laan band giod. 17Gigúl gá ɔnyɔ́ máal ná guege, uwadɔ́m eŋél buol wág ká wɔ́yɛ́dɛ́n band ɔbɔ́ umábɛ́laán ká: “Énúul nɛ́nuán gágual ká buanda gidigid ganyɛ búdábɔ́nán.”
18«Bɔ́bɔ́ bem ebeén gɔb, sig mɔnd a uwɔyɛd gá giág úménuén gɔb. Wobusió ganyɛ ká: “Nguɔ́nd gisién gám, ngúbianan ká yɛɛ́b guán gɛ́, ɔyɛ́dɛ́n muát nuyá ká sígól wúntɛ́nɛn.” 19Omodió ganyɛ ká: “Nguɔ́ndɔ mélúke mát, gám gɔb egue yámág mɔ́, ɔyɛ́dɛ́n muát nuyá ká sígól wúntɛ́nɛn.” 20Ondodí ganyɛ sɔ́n ká: “Ngugiŋe, buád buanda ndiábáná béguúl.” 21Eŋél buol uwaány uwond aga muát nuyá, uwɔnɔyɔ́n wɔ́ iŋondíny isiány. Muát nuyá uwaány guɔ́b ilób, uganyɛ gá eŋél buol wág ká: “Ɛmbɛ́ fiaŋ agá bɔkɔɔ́m band bɛgɔ́saná, na agá bɛbala bá tísɔn, óŋólónin basɔ́gasɔga, binsúgule, bebúdebude, na bigónd.” 22Gigúl máal gímáadɔ́mb, eŋél buol uwuúl uganyɛ ká: “Mása, imáal anyɛ́ ɔsɔ́guɔyɛd, eluku mányɛ gɔg.” 23Muát nuyá ganyɛ gɔg gá eŋél buol ká: “Mbá agá iŋili na agá mesíg, ádɛgaan band na bugaga ká bóloon bésibíŋén nɛnama nɛ́nyá ká gians gám fuóg. 24Ngúnuɔ́yɔn gɔg ká ta mɔnd agá band abaány imáakɛ́n gubɛ́laan gá ɔnyɔ́, dɛganyá manyán mám.”»
Buanda buófonó gual ká ába ɔfɔ́nɔfɔ́n wá Yésu
25Bianta bá biŋi bá band máandá ɔlɔŋ na Yésu. Uwabɛ́guagalɛd uganyɛ gɔ́b ká: 26«Ewe wúlené agamia dɛbá bágubá ɔfɔ́nɔfɔ́n wám úmáal udimbíléné giod gɔdɔ́mb sié na inyódió, gɔdɔ́mb agány, gɔdɔ́mb baan na belimen, gɔdɔ́mb belimen abagánd ta ɔ́gɔ ká gɔdɔ́mb gusɔ́d gág gá bɛ́muát. 27Ewe wuŋládaná, gúbianan ká úbɛ́dábɔ́n ká úgú, kand nɔ́, udɛbá bágubá ɔfɔ́nɔfɔ́n wám#14.27 Búnyɛ buɔyɛ́dɔn ká: «Úbɛ́dɔ́gan ɛgɔnɔ yág sig buɔ́siɔ́, wúŋlád».
28«Mɔnd agán gá ɔlɔŋ mámba ká úfuág gians gínyá guya, uguákɛnan gulukumen, wanɔn gɛdam gá muonyi giófonó ká waán ímábá gíguégen gá gúman buol. 29Kand nɔ́, úmádágɛ́n udiyibi gɛfuág, band gidigid báganuánan bú, gɔnɔ wɔ́, 30bɔ́yɔ ká: “Mɔnd ewe águbanyɛg gɛfuág, igiáyág wɔ́ guyib!”
31«Na nɔ sɔ́n, ofuŋ únyá na musia dɔgɔn duát mámba ká wɔ́b gá guenuésényí sɔ́g ofuŋ unyá na musia dɔgɔn nitín, uguákɛnan gulukumeen ká waán ɔ́gɔ unyɛ báguámɛ́nɛn. 32Úmaán ká udɛbá báguámɛ́nɛn, udɔ́mɛ́n ofuŋ uwaány basɔ́mɔ́sɔm gigúl umányá ayáyá ká baál bumben.» 33Yésu guɔ́yɛ́kɛnɛn ká: «ta mɔnd agán gá ɔlɔŋ dɛbá bágubá ɔfɔ́nɔfɔ́n wám úmáal udɛbɛ́yɛ́bɛ́d manda gidigid ɔmɔ́ ubiananá.»
Nɛgɔb ná lɛm lɛm
34«Nɛgɔb nyɛ́ bese, nímésiíl lɛm lɛm, giág gínyá bóguondi gɔsɛm gá nɛ́. 35Igiány gigúl, nídíbá bese ta egegus, ta agá giind; bóguódo nɛ́ agá ɔɔnd. Ɔ́nubɛdɔ́lɛ́gɛ́n bese, ɔ́gɔ nunyɛ na idú sá gɔ́b, nuɔ́b.»
ទើបបានជ្រើសរើសហើយ៖
Lúkasa 14: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
