Lúkasa 13
13
Búguófon gunúgi gusɔ́d fiaŋ
1Agá gigúl giád igiány, band oboól ká bɔ́siɔyɛ́dɛ́n Yésu nanyá Piláta mɔ́ɔyɛ́d ká bɔɔ́n band bá giéns gá gus gá Galilé gɛsɛgɛl bámáabá bɔ́ɔnɔ manyam bámáabiág Gɔdányá na mɔ́. 2Uganyɛ gɔ́b ká: «Nugúbɛ́dága ká band bá Galilé abaány memény gubá bafalafal gudɔ́mb band bá Galilé bómodió ká bɔɔ́n bɔ́ e? 3Ágó, ngúnuɔ́yɔn gɔg ká númáal nudinúgí gusɔ́d gán, banuá gidigid nugafɔ́f gɔɔ́gɔ anyɛ bɔ́bɔ́.
4«Nudibiélídi ká nɛmám ná nuyá ná Silowé maguɛ́n band bunyo na bádadɔ inyágula bɔ́, nugúbɛ́dága ká bémemény gubá na gɛgua gudɔ́mb band bómodió bá Yelúsalɛm e? 5Ágó, ngúnuɔ́yɔn gɔg ká númáal nudinúgí gusɔ́d gán, nugafɔ́f gɔɔ́gɔ anyɛ bɔ́bɔ́.»
Nsab ya gindiómó gá figiyé
6Agá gélem ány, Yésu uwand gudúmín bɔ́ nsab eye, uganyɛ ká: «Mɔnd mabiánán agág gá gisién bɔgɔ́nɛd bábɛ́laná ká figiyé. Uwɔb ká wágás bɛsamɔ bá bɔ́, uwɔ́ ta gufuɔg buanda. 7Uganyɛ gá eŋél buol waga ká: “Duɔŋ dúdadɔ edue yílené gá gugás bɛsamɔ agá bufigiyé ebúné, ndɛfuɔ́g ta buanda. Sɔ́mb bɔ́, gágual ká búdigúŋalan ta buanda ány.” 8Eŋél buol uwaány guondinyi gɔg ká: “Ɔgɔ́n wám, ánd gubílímbid bú gá yɔŋ eye, ngegilineen bú na nsaán, na bigud bá giind. 9Efide yoŋ yílené, búnyɛ bóguóm bɛsamɔ. Búmén búdióm, ány anyɛ bágúsɔ́mb bú.”»
Giéŋugie gá gióŋ gá agánd buɔ́s bá sabát
10Yésu mefúnyifúnyí buɔ́s búmodió ɔgɔ́b gá gians gá mbísógól gímodi. 11Agánd omodió giád gá gíliíndié móondí wɔ́ gióŋ búgányɛ duɔŋ bunyo na dúdadɔ mabá kɔ́. Umabá gubábá, gubába nŋudié, udɛbɛ́bɔ́nɔ́ná bese. 12Anyɛ́ Yésu máan wɔ́, uwabɛ́lɛ́gɛn wɔ́, uganyɛ gág ká: «Agánd, buóŋ bɔ́w mámana.» 13Uwadál wɔ́ ɛmbɔ́g, kɔ́ na kɔ́, uwabɛ́bɔ́nɔ́n bese, uwabanyɛg gugúmenyi Gɔdányá. 14Ɔgɔ́n wa gians gá mbísógól igiány uwɔɔ́b ilób ta bɔ́guɔyɔ gágual ká Yésu méŋúgí mɔnd buɔ́s bá sábát. Uganyɛ gá giŋi gá band ká: «Digúbianan medug mátíndád gá guala buol, énuúlén gɔ́g gá medug amaány ká bénuéŋúgenyi, sá buɔ́s bá sábát!» 15Ɔgúnɔ́ ganyɛ ká: «Band bándaná bɛgɔnd bá nŋɔs ebe, nuguámba guɔyɛd ká sig mɔnd a agán gá ɔlɔŋ digúsuŋune búlúke bág gúmén gɛkabɛlɛ gág agá nɛnyɛɛ́n manyam ká wébúnsí bú buɔ́s bá sábát e? 16Agánd ewe gɔg unyá wa nigúl ná Ábalaháma, úgubá agá iŋoli sá Sátan búgányɛ duɔŋ bunyo na dúdadɔ. Búdɛmásɛgɛmanan ká bésúdún wɔ́ agá iŋoli isiány buɔ́s bá sábát e?» 17Agá gugál uguány, bambɛ́lɛmbɛ́l bág gidigid abábia ɔduɔ́ gɔnɔ́ ta bɔguɔyɔ. Giŋi gá band gidigid gímáabá kɔ́ igiábanyɛg guɔ́bɔn bese na méŋeméŋe wa manda umáabá wala.
Nsab ya ansamɔ wá mutálad na wá ginudúgin
(Mat 13.31-33; Mál 4.30-32)
18Uganyɛ sɔ́n ká: «Bufuŋ bá Gɔdányá gúbɛ́fuáganan giág óo, inyɛ bégúgedi bú na giág óo? 19Búnyɛ anyɛ ansásamɔ siɔdɛd mɔnd mɔ́ɔgɔ́l uwagɔ́n agág gá gisién. Anyɛ́ úmáabasá, uwágɔm, uwɛɛ́y bɔdɛ́d, munoni má muana umuásiala aŋana yá mɔ́ agá bɛgas bá bú.» 20Uwand guɔyɛd ká: «Inyɛ bégúgedi Bufuŋ bá Gɔdányá na giág óo? 21Búnyɛ anyɛ ginudúgin agánd gɔ́lɔnɔ́ udɔ́bɔ agá bokílo nitín na bátán bá okuŋ, nɛnama nɛ́nyá gidɔ́b gidigid fɔdɔga.»
Ányá ugenúbíŋín agá Bufuŋ bá Gɔdányá?
22Yésu uwɔbaan agá bɔtísɔn, na bidɔŋ, ufúnyifunyi, wuúl wúbaán buáy bá Yelúsalɛm.
(Mat 7.13-14)
23Kányɛ mɔnd móofún wɔ́ ká: «Ɔgúnɔ́, búnyá aya ká kɔɔ́kɔ band siɔdɛd bɔ́gɔnúsɔ́d e?» Uganyɛ gɔ́b gɔg ká: 24«Ánubɛ́gɛ́ndɛn ká núbíŋinin agá niíd nínyá nisɔ́ndíŋɔ́nɔn, gágual ká nguelumenyi ká, giod gá band gamagaan gubíŋínin gá nɛ́, bádiámɛ́nɛ́n.»
(Mat 25.10-12)
25«Anyɛ́ muát nuyá ganuádɔ́g, úfɛ́l niíd ná gians na ngoŋ, banuá núlɔbɛn agá ɔɔnd, nuond gá gúkileen niíd ná gians, nuɔyɔ ká: “Muát nuyá, difuúnín.” Únuondinyi ká: “ndigunúlɛ́nsaan, nuguúlenin naány é.”»
(Mat 7.22-23)
26«Kányɛ nuganuánd guondinyi wɔ́ ká: “Dɛmanyánán idiond idiabúwánan ɔgɔ́w gá eŋís, eyefúnyifunyi agá bɔkɔɔ́m bás”; 27ugand gunuɔ́yɛdɛn ká: “Ndɛgɔ́lɛnsan kɔɔ́m núleniné, énuŋélíkínyí agá eŋís, banuá gidigid nualaná manda amabɛ́#13.27 Alɛ́ŋɛ́d Ɛsag 6.9.”»
(Mat 8.12)
28«Ány oŋóny na gubɛ́bánda bikeléd ganúba, anyɛ́ nuganuán na Ábalaháma, na Isáka, na Yákɔba na mubús má Gɔdányá gidigid sɔ́n agá Bufuŋ bá Gɔdányá, banuá agá ɔɔnd. 29Band gólonín giáy buɔ́s ádɔ́gáná, na giáy buɔ́s ábɛ́dɛ́máná, gɛmbádá na gɛmuaná gá ɔnyɔ́ agá bufuŋ bá Gɔdányá. 30Anaány gɔg band bányá bégúsúgúdenyi ganúbá bá busió, bá busió bá bégúsúgúdenyi.»
Yésu gúbianan ká úgú Yelósalɛm
(Mat 23.37-39)
31Agá gɛsɛgɛl giád, gɛdám gá bafalisiɛ́ŋ abábɛ́nyɛ́kɛnɛn Yésu, bágányɛ gág ká: «Dɔ́mbɔ, áb ayáyá na aya, gágual ká Elódo guámba guguɔ́n.» 32Uganyɛ ká: «Gɔ́nuɔyɛ́dɛ́n nubóg unuány ká: Ngúkɔ́ŋa biád bá bíliíndié yond yéŋúgenyinyi ínen, ta nŋɔ́guɔ́, buɔ́s bá gádadɔ, mmán ubú mbiananá ká yaál. 33Búguófon ká yɛ́baan na busió na ɔŋɛnd wám ínen na nŋɔ́guɔ́, na buɔ́s búládaná, gágual ká búdiguófon ká ibús gú búmaál búdiál Yelúsalɛm.
34«Banuá band bá Yelúsalɛm, banuá band bá Yelúsalɛm, nuguɔ́nɔ mubús má Gɔdányá, nuond nuɔ́nɔ na adány band Gɔdányá núdɔ́manɛná! Nsaman guamba nŋili ya gual ká nnúgɔ́sɛ́gan agám gá masiá anyɛ́ nkɔ́ gɔ́sɛ́gananá baan bá nkɔ́ agág gá bɛbabɔ, ta anaány, unuen! 35Ooo, Gɔdányá ganúbɛ́yɛ́bɛd. Ngúnuɔ́yɔɔn ká: Nudɛgand guŋán gutɔ guám buɔ́s nugɔnuɔ́yɛd ká: Gɛfɔn bá na ewe wúlené agá ɔfɛ́n wá Ɔgúnɔ́!»
ទើបបានជ្រើសរើសហើយ៖
Lúkasa 13: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
