Lúkasa 1
1
Nidúmin
1Aguá Tiofílo anyɛ́ band giod nyá gubɛ́mágaan guɔ́ŋɔ́ manda gidigid mómóobífuógídónyí agá gadágadá wasɔ, 2gɔɔ́gɔ́ anyɛ́ band bámáanaán bɔ́ agá gudúmín mɔ́ɔdiɔ́yɔɔ́n, abábia bugaga báguɛ́y band banyá na buol bégúdúmbenyi moóny má Gɔdányá. 3Buád buanda yaŋuá sɔ́n inyá gudímílile nidúmín ná bú bese na bese. Ɔgúnɔ́gɔ́n Tiofílo, mmáan bú bese ká nguɔ́ŋɛ́n mbaŋ nubala iyaány anyɛ́ imáabɛ́dɔ́mbaán, 4ká ábád gulɛns ká gufúnyifunyi ugú ányá abián nyɛ meliŋítas.
Gudɔ gá nubiényé ná Sáŋa Bapitísit
5Agá gɛsɛgɛl ɛgɛ́ Elódo máabá ofuŋ wá gɛdɔŋ gá giéns gá gus gá Yudé, aságɔsag wa Gɔdányá ɔfɛ́n ká Sakaliása mabá mɔnd wa ɔlɔŋ wá bɔgɔ́gɔ bá Ábia. Agány waga ɔfɛ́n ká Ilísabɛda mabá wa nigúl ná Álɔŋɔ ɔgɔ́gɔ. 6Bɔ́bɔ́ bem bándɛ, mabá bese agá eŋís yá Gɔdányá, bófuógonyi bisele na ɛŋɔyɔ sá Ɔgúnɔ́ bese na bese. 7Bádimabianan mɔɔn gágual ká Ilísabɛda mabá gɛwád, bámabá bágányɛ sɔ́n bilunu.
8Buɔ́s bá nɛgua nág ná buol agá ɔnyɛb wá Gɔdányá agá uwág ɔlɔŋ iniásiám; 9abál ɛ́fɛdáfɛda Kɔɔ́kɔ anyɛ́ gɛsɔ gɔ́b gá bɔgɔ́gɔ máabá, iyágɔɔn wɔ́ ká wébegésényí bulɔ agá idúl yá Ɔgúnɔ́. 10Umábá uwɔ́ uguány ubegesenyi bulɔ, giŋi gá béedéb bísógólonyi agá ɔɔnd. 11Ɛ́ngɛlɛs ya Ɔgúnɔ́ iyámɛ́n Sakaliása umáabá ndényé ɔmbɔ́g ɔnɛ́m wá nɛfuɛn bulɔ. 12Sakaliása máal wánaan wɔ́, manɔŋ mág amásɔ́mbɛ́g, uwabia buwa. 13Ɛ́ngɛlɛs iyaány iyaág wɔ́ makánya, iganyɛ gág ká: «Adɛbiá buwa Sakaliása, gágual ká Gɔdányá mɔ́b mbisogol yɔ́w. Agány wɔ́w gegúbiénin mɔɔn, álɔ́g wɔ́ ká Sáŋa. 14Búgabá gianta gá bɛdɔdɛn na gubalaga, giod gá band sɔ́n gɔ́bɔɔn bese na gubíbién gág. 15Ugabá gianta ogóbusió bá Ɔgúnɔ́; udegabúwá ta ninama ná magɛ́b ta nímoom, ugabá ofuógón na Ɛsámb yá Mefúny umányɛ agá duna dá inyódió. 16Ugaal ká giod gá baan bá Ísalayɛ́la ónd aga Ɔgúnɔ́ Gɔdányá wɔbɔ. 17Ugakɛn agá eŋís yá Gɔdányá anyɛ ɔsɔ́mɔsɔm waga. Na bielínyélínyé na bugaga ubú Elí máabianán, ká úsilada baan na besié bámáadɔ́gán, wál ká ebe bádiáláná Gɔdányá ɛŋɔbɛnɔ bianan mbɛ́dágɛ́dɛ́n yá busi, wónd waál ká band bɛ́dábɔ́n gá gúgóli Ɔgúnɔ́.» 18Sakaliása ganyɛ gá ɛngɛlɛs iyaány ká: «Giág gígenúŋlinsi ká búnyɛ́ meliŋítas e? Gágual ká diganyɛ bilunu nam na agány wám.» 19Ɛ́ngɛlɛs guondinyi wɔ́ ká: «Nnyɛ Gábiliyɛ́la, nnyɛ ndényé agá busió bá Gɔdányá gá gualaan wɔ́ buol. Úgɔndɔ́m ká nsɛ́guɔyɛ́dɛ́n ndág ya nsɔ́m. 20Anyɛ́ eménuén guádáb ká gugál gám nyɛ meliŋítas, lɛnsɛ ká agabá gɛndɛgálɛ́diá guám anyɛ́ manda amaány mem ganúbiál agá gɛsɛgɛl ɛgɛ́ uméedényígínyí.» 21Band mebídényí Sakaliása béméŋemeŋ guɔlɔ́b gág agá idúl yá Gɔdányá. 22Umáal wámana, uwedúm gugála na ɛmbɔ́g, nŋili yá gufuun niíd ká úgálɛ́d dɛmand gubá, uwal gulɔb anaány. Abálɛns ká umaán buanda uguány agá idúl yá Gɔdányá. 23Gigúl gág gá buol máal gímáman, uweguúg agagá. 24Agá gélem ány, agány waga Ilísabɛda uwɔgɔ́l niim, uwɔlɔb na nɛ́ agá gians iyól ɛ́taán, ubiɔ́yɔɔn ká: 25«Ɔgúnɔ́ máŋál gɛnɔ́g gá buanda, ɛ́nɛ́ anyɛ́ umánuán bese nɛ́nuán ká wúŋéli buanda búnyá gubá búmfánan ɔduɔ́ gɔnɔ́ agá eŋís yá band.»
Gudɔ gá nubiényé ná Yésu
26Niim ná Ilísabɛda máal nɛ́gányɛ iyóol ɛ́tɛ́ndád, Gɔdányá uwadɔ́m ɛngɛlɛs Gabiliyɛ́la agá tísɔn wa Násalɛd unyá agá giéns gá gus gá Galilé, 27aga ɔmbúlɔ#1.27 Ɔmbúlɔ uwány mabá umány udɛlɛnsɛ anɔ́mandɔ anyɛ Maliá, umáabá uganyɛ giɔŋɛnɔ gá mɔnd anyɛ Yɔ́sɛba, wa nigúl ná Défide. 28Ɛngɛlɛs iyabɛ́sɛdɛnɛn Maliá, iganyɛ gág ká: «Imégubígélídi, yayábá, Ɔgúnɔ́ Gɔdányá unyá nɔw máguál bese, ádiígusɛgɛmanan na wɔ́.» 29Agá gugál uguány, manɔŋ mág amásɔ́mbɛ́g, uwedúm gubiófoon buanda ubú mbígélíd iyaány ámbaná guɔyɛd. 30Uganyɛ gág ká: «Maliá adɛbiá buwa, góbusió ká amaán bese agá eŋís yá Gɔdányá. 31Lɛnsɛ ká ɔgɔgɔ́l niim, ébién mɔɔn anɔ́mandɔ, álɔ́g wɔ́ ká, Yésu. 32Ugabá gianta gá mɔnd, bágabɛ́laan wɔ́ ká mɔɔn wá Gɔdányá, Gɔdányá unyá ayáyá ugumuana, Ɔgúnɔ́ Gɔdányá geéŋin wɔ́ bufuŋ bá Défide sié Ɔgúnɔ waga; 33Ugabá ofuŋ wá baan bá Ísalayɛ́la na bánamana, bufuŋ bág núbá kand nɛmanɛ́ná.» 34Maliá ganyɛ gág ká: «Búgabɛ́dɔ́mbaan nanyá anyɛ́ mmányaná ndɛlɛnsɛ anɔ́mandɔ e?» 35Uwondinyi wɔ́ ká: «Ɛsámb yá Mefúny geguselin, bugaga bá Gɔdányá unyá ayáyá ugumuana gagubɔgɛn. Buád buanda ewe ugenúbíbién ganúbá begubeg. Bágabɛ́laan wɔ́ ká mɔɔn wá Gɔdányá. 36Ɛ́nɛ́, sémbiénye wɔw Ilísabɛda ɔwɔ́ bányá gɔbɛ́laan ká gɛwád ganyɛ sɔ́n na niim nigányá iyól ɛ́tɛndád, ta anyɛ́ uganyá gilunu, 37gágual ká buanda dɛgúyágaan Gɔdányá.» 38Maliá ganyɛ gɔg ká: «Nnyɛ eŋél buol wa Ɔgúnɔ́, nsɛ́ buanda gidigid bɛ́dɔ́mbaan gám góbusió anyɛ́ ɔmɔ́núŋɔyɔɔ́n!» Ɛ́ngɛlɛs iyaány iyadɔ́md.
Maliá maáb gá guɔyɔ́l Ilísabɛda
39Agá gigúl igiány, Maliá gɔb fiaŋ fiaŋ agá tísɔn wa giéns gá gus gá Yudé unyá agá dɔgɔnd. 40Umáal wámana, uwebíŋín agá gians gá Sakalíása, uwebígélídi Ilísabɛda. 41Anyɛ́ umɔ́ɔb mbígélíd yá Maliá, mɔɔn uwedúm gubiéyen giod agág gá dúna, Ilísabɛda owofuóg na Ɛsámb yá Mefúny. 42Uwánsɛ́d magɔ́gɔ́n uganyɛ ká: «Ehé sémbiény, gɛfɔn gɔ́w gúdɔ́mban gá bagánd bem, mɔɔn wá duna dɔ́w nyɛ sɔ́n afɔnan. 43Nnyɛ muát ányá ká inyódió Ɔgúnɔ́ wám oól agamia e? 44Gágual ká mmaál na guɔ́b mbígélíd yɔ́w, mɔɔn mébiéyídín na bɛdɔdɛn agám gá duna. 45Bese bá nɔ́w anyɛ́ ányá guádáb buóny ubú Ɔgúnɔ́ nyá guguɔyɛdɛn, bugobífuógidonyi!»
Asag wá Maliá
46Maliá ganyɛ gɔg ká:
«Nuɔ́l nám, ɔyɔ́ budúme bá Ɔgúnɔ́
47Gɔdányá wunsódonyó gúmfuógonyi ɔdɛm na bɛdɔdɛn
48Gágual ká úgunbɛ́dágɛd yaŋuá eŋél buol waga ubísélenyé.
Ooo, gubanyɛg nɛ́nuán, gɔb na busió, band bá dɔgɔnd gidigid gɔyɔ bese wám,
49góbusió ká Gɔdányá unyá ɛsámb, na bugaga bum, úguŋal bianta bá manda.
50Band bɔ́gɔ́lɔnɔ́ wɔ́ anyɛ gianta gá buanda, uguánan bɔ́ gɔsɔ́g bigúl bim.
51Úgudíye bugaga bág agá bianta bá manda unyá guala, uwesélémendenyi band bébíbúlígenyé;
52uwélenyi befuŋ ɔgɔ́b gá eluku yá bufuŋ, uwond uwebúlígenyi ebe bébísélenyé
53uwéŋeen band bánɔ́maná nsana bɔnɛ́m, uwegúgi ɛnɔ́m ɛmbɔ́g gɔdɔ.
54Uwedúgúne Ísalayɛ́la nigúl nág niálanɛná wɔ́ buol, udibiélíbiéli guánan nɛ́ gɔsɔ́g,
55anaány gúnyá aga Ábalaháma, na nɔgɔgɔ nág na bánamana gɔ́ɔgɔ anyɛ́ umɔ́ɔyɔɔ́n besié ɔgúnɔ́ bás.»
56Maliá uwedúmbi buanda bá iyól ɛ́dadɔ aga Ilísabɛda, uwabád guond agagá.
Nubiényé na buensi bá Sáŋa Batísit
57Gigúl gá Ilísabɛda gubién igiésiege, tuu mɔɔn anɔ́mandɔ. 58Begúligul na band bá niíd nág ná gians ɔbɔ́b ká usebién, ebésibíbúlídényí naga gá gúyayaba gá gianta gá bese ɔwɔ́ Ɔgúnɔ́ mánuál wɔ́. 59Budúg bá gányɛ́manyɛ bág bénúbiényé máal búmásiama, oboól gá buensi#1.59 Buensi aga band bá Ísalayɛl nyɛ bulinsi búdíyenyé ká mɔnd wa Ísalayɛ́la mɛ́y mɔnd wɔ́ giɔ́b gɔ́b bá mɔ́nɔmbɔ na mbɛ́dágɛ́dɛ́n yá gɔlɔg wɔ́ ká Sakalíasa anyɛ sié. 60Inyódió gugɔ́l gugal uganyɛ gɔg ká: «Ágó, ɔfɛ́n wág nyɛ ká Sáŋa.» 61Obóndinyi wɔ́ ká: «Mɔnd dɛbá ɔgɔ́w gá niíd ná gians unyá na ɔfɛ́n uwaány.» 62Ebédúm gugála gá sié na ɛmbɔ́g ká bálɛ́ns ɔfɛ́n ɔwɔ́ wambaná gɔlɔg. 63Sié guófún ɔkɔk. Uwɔ́ŋ ká: «Ɔfɛ́n wág ká Sáŋa.» Ubuékémi band gidigid. 64Kɔ́ nɔ kɔ́, Gɔdányá uwal ká Sakalíasa ánd gudúm gugála, uwegúmenyi Gɔdányá ekelu magɔ́gɔ́n. 65Buwá ubuádɛgɛn gɔg begúligul bág, buóny ubuédúm gubiɔ́yɔ agá giéns gá gus gá Yudé gínyá agá dɔgɔnd. 66Band gidigid bɔ́mɔ́ɔbɔɔ́n bú, abábɛ́dɛ́gan bú ɔgɔ́b gá ɛdɛm, ebédúm guméŋemeŋ bóbiófon ká: «Mɔ́nɔmbɔ ewe gɛɛ́y giag e?» Ugúbianan bugaga bá Gɔdányá meliŋítas.
Asag wá Sakalíasa
67Ɛsámb yá Mefúny iyófuóg sié waga Sakalíasa, uwedúm gugála anyɛ ibús, uganyɛ ká:
68«Nukany bá na Ɔgúnɔ́ Gɔdányá wá Ísalayɛ́la gágual ká úgudɛ́bɛ́nyɛkɛnɛn basuá band bág, uwadiáŋɔ́n,
69uwond uwadɛ́fá gɛgaga gá osód agá nigúl ná Défide, eŋél buol waga.
70Búbú umɔ́ɔyɛ́d agá eŋíd yá musámb má mubús mág má nsua ká:
71ugadídɔ́mɛ́n osód uganúdiáŋɔn aga bambɛ́lɛmbɛ́l bás, na agá bugaga bá band bádɛ́fɛ́maná.
72Uwaán besié bás gɔsɔ́g
uwond uwabɛ́dágɛd ɛsámb yág yá nɛ́lad
73na sié wásɔ Ábalaháma anyɛ́ umáabɛ́liɛ́n wɔ́, uganyɛ gá ká:
74Ugadiáŋɔ́n aga babɛmlɛ́mbɛ́l bás, ká díbúlígenyi wɔ́ na buol dialaná wɔ́, ta gubia buwa ná mɔnd
75ká, anyɛ́ dɛgɔnúsɔ́dɔn dɛbá gág góbusió musámb na besi bá band medug más má gusɔ́d mem.
76Aŋuá mɔɔn wám, bágagɔ́bɛ́laan ká ibús yá Gɔdányá unyá ayáyá ugumuana,
gágual ká agasɔŋɔn ogóbúsió bá Ɔgúnɔ́ ká ádábɔ́nɛn wɔ́ nŋili yaga,
77ónd édílínsi basuá band bág ká ugoól úsidísódí,
gágual ká úgudɛ́nɛnɛn bɛfal bás;
78gágual ká Gɔdányá wasɔ guánanɛn gɔsɔ́g, ta bɔ́guɔyɔ, ɔwɔ́ nɔ́ bese:
ugadɛ́dɔ́mɛ́n osód, osód uwaány nyɛ anyɛ guanyɔg gá Mɔ́nɔmbɔ.
79Ugoól ká úsiséegényí ebe bányá agá mbíne bɔbɔŋɔ́n na nigú níbítiólitiolió bɔ́,
ká wal ká dígɔ́l nŋili yá bumben.»
80Mɔ́nɔmbɔ magɔmaán, bɔbɔnd bág gɔ́nɛ́naan. Umɔlɔbɔ́n agá biɔ́sɔ́gɔliɔ́ gutɔ guám anyɛ́ uméebídíyé agá eŋís yá band Bísalayɛ́l.
ទើបបានជ្រើសរើសហើយ៖
Lúkasa 1: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
