Lúkasa 2
2
Nubiényé ná Yésu
1Agá gɛsɛgɛl igiány, ofuŋ uwɔgɔn Ogúside uwéŋin ekelu ká nɛban ná band biál agá bɛdɔŋ bág gidigid. 2Nɛban nóbusió iniány mabiálá gigúl ɛgɛ́ Kilinúse máabá ngɔ́mɔnɔ wa giéns gá gus gá Silí. 3Sig mɔnd a mabá wɔb gá guabɛ́bán agá gɛdɔŋ gá besié; 4anaány sɔ́n Yɔ́sɛba máadɔ́g gá gɔb agá tísɔn wa Násalɛd unyá agá giéns gá gus gá Galilé gá gúbúlígi Bétɛlɛhɛ́m tísɔn wa Défide. Ɔwɔ́ waád wɔ́bɔnɛnɔ́ giéns gá gus gá Yudé; umáal anaány gágual ká umabá wa niíd ná gians ná Défide, sié ɔgúnɔ́ waga, 5ká wábɛ́bán kɔ́ naga na Maliá giɔŋenɔ gág gímáabá gíganyɛ na niim. 6Bámáal bányɛ anaány, nubiényé unuádɛgɛn wɔ́; 7uwebién mɔɔn anɔ́mandɔ wág wobusió, uwemúŋe wɔ́ na bɛla, uwebídíginyi wɔ́ agá nɛnyɛ́n ná manyam gágual ká giás dɛmand gubá kɔ́ gɔ́b góbusió agá gians gá benyi. 8Agá giéns gá gus giád, begiíg bidug mabá budiádány bébídenyi manyam mɔ́b na budug. 9Ɛngɛlɛs ya Ɔgúnɔ́ iyámɛ́n bɔ́. Gise gá Ɔgúnɔ́ gíségiminené giod, igiábɔ́gɛn bɔ́, abábia gianta gá buwa. 10Uganyɛ gɔ́b ká: «Nudɛbiá buwa, gágual ká iménúlín na ginɔ́g gá nsɔ́m gíganúbá gianta gá bɛdɔdɛn gá band gidigid, gínyɛ ká: 11Ínen agá tísɔn wa Défide, béménúbiénín osód; Ɔgúnɔ́ Kilíse wɔ́. 12Nugagúlɛns wɔ́ nɛnama enie: nugɔgúfuɔg giendiny gá mɔɔn gimúŋén na bɛla ɛmbɛ́diá agá nɛnyɛ́n ná manyam.» 13Kɔ́ nɔ kɔ́, giŋi gá ɛngɛlɛs bá Gɔdányá bányá ugumuana igiásɛbɛ́lád sɔ́gɔ́ wɔbɔ umɔ́ɔsiɔ́yɔ́ nsɔ́m, ebédúm gugúmenyi Gɔdányá ɔlɔŋ bɔ́yɔ ká: 14«Nugúm bá aga Gɔdányá ugumuana, gufuog bá egegus aga ebe ɔbɔ́ ubílénené giod.» 15Bɛɛ́ngɛlɛs máal na guadɔg bómónd ugumuaná, bebíg bidug ɔbɔ́biɔ́yɛdɛn bɔ́bɔ́ na bɔ́bɔ́ ka: «Nsɛ́ dɛɛ́b nɛ́nuán Bɛ́tɛlɛhɛ́m dián buanda búságubiál kɔ́, ubú Ɔgúnɔ́ seégudílínsi.» 16Abáb fiaŋ fiaŋ, ɔbɔ́fuɔgɛn Maliá na Yɔ́sɛba na giendiny gá mɔɔn, gɛ́gɛ́ mbɛ́diá agá nɛnyɛ́n ná manyam. 17Bámáal na guán mɔɔn, abáb gá guɔyɔ buóny ubú bɔ́mɔ́ɔsiɔ́yɛ́dɛ́n bɔ́ góbusió bá mɔɔn uwaány. 18Band bem bɔ́mɔ́ɔbɛ́dɔ́lɛ́gɔɔ́n bɔ́ meméŋeméŋ buóny ubú bɔ́mɔ́ɔyɔ́. 19Maliá gɔg, uwɔ́ umabá ubɛ́dɛ́gan manda mámáabiálá gidigid agá ɔduɔ́ wamba nɛsɔ́ŋɔ́nɛ́n na mɔ́. 20Gúnyɛ́ nɔ́, bebíg bidug obónd, boól bɔ́dɔ́ŋɔ́ ɛsag, bégúmenyi budúmé bá Gɔdányá gá buanda gidigid ubú bɔ́mɔ́ɔb obónd abaán gɔ́ɔgɔ anyɛ́ ɛngɛlɛs mɔ́ɔyɔɔ́n bɔ́. 21Medúg mányɛ́manyɛ máal mámádɔ́mbɔ, gɛsɛgɛl gá buensi igiésiege; abálɔg wɔ́ ɔfɛ́n ká Yésu, gɔɔ́gɔ anyɛ́ ɛngɛlɛs ya Gɔdányá máabɛ́lɛ́gɛ́n wɔ́ umány udisaŋa.
Gudíye gá Yésu agá ɔnyɛb
22Gɛsɛgɛl gá gɛsɔgɔna máal gɛ́máadɔ́mbɔ, gɔ́ɔgɔ anyɛ́ gisele gá Moyíso ɔ́yɔnɔ́#2.22 Alɛ́ŋɛ́d Lef 12.2-6, abában mɔɔ́nɔmbɔ Yelúsalɛm agá ɔnyɛb gá guedíyé wɔ́ gá Ɔgúnɔ́. 23Gágual ká búnyɛ buɔ́ŋɔ́n agá gisele gá Ɔgúnɔ́ ká: mɔɔn anɔ́mandɔ wobusió gidigid gúbianan ká ubá anyáŋɔ́nán gá busió bá Ɔgúnɔ́. 24Agá giád gisele gímoom, bebíeny bág mabiánán sɔ́n ká baál gisiég gá gufá, béŋin munúg muándɛ, ɔ́gɔ ká bɛndɔmbuɔ́ bá anama yá munug múmodió muándɛ.
25Mɔnd ɔfɛ́n ká Símiyono mabá Yelúsalɛm. Umabá osi wa mɔnd, udíne Gɔdányá, umebídényí osód wa Ísalayɛ́la, Ɛsámb yá Mefúny mabá naga, 26ímabá ímámán guɔyɛdɛn wɔ́ ká, udigégú kand ká umaán Kilíse Ɔgúnɔ́ máadɔ́m. 27Iyál ká wɔ́b agá ɔnyɛb. Bebiény bá Yésu máal na gusiám ká básiál gisiég gɔ́ɔgɔ anyɛ́ gisele ɔ́yɔnɔ́ gá giáy gá Yésu, 28Símiyono uwɔgɔ́l wɔ́ agág gá ɛmbɔ́g, uwafɔn Gɔdányá uganyɛ ká:
29«Ɔgúnɔ́, nɛ́nuán omófuógídónyí ndán yɔw, agany wagutɛɛ́n eŋél buol wɔ́w úgú agá gufuog,
30gágual ká eŋís yám maán osód wúleniné ɔgɔwɔ,
31amadɔ́n wɔ́ gá bilugu gidigid bá gus:
32unyɛ gise gígenúgúlinsi ogóbusió bá bilugu bá gus, ugaal ká Ísalayɛ́la gúme.»
33Moóny ɔmɔ́ Símiyono mɔ́ɔyɔ́ góbusió bá giendiny gá mɔɔn, mekéményí na sié na inyódió. 34Símiyono uwafɔn bɔ́, uganyɛ gá Maliá inyódió ká: «Lɛnsɛ ká mɔ́nɔ́mbɔ ewe eguúl gá gɛgua, ɔ́gɔ ká gá giedugie gá giod gá band bá Ísalayɛ́la. Ugabá bulinsi bá Gɔdányá, ta anaány, band geen wɔ́. 35Anaány uganúdambɔna ɛmbɛ́dágɛ́dɛ́n sínyá siɔsɛ́gɔ́n agá ɛdɛm sá giod gá band. Agá igɔ́w giáy aŋuá Maliá, guɔ́bɛ́g gɔ́w gabá anɛ bésegudúm yɔ́nɔnɔ agá ɔdɛm.» 36Agánd omodió sɔ́n mabá ány, ɔfɛ́n ká Ána, umabá ibús yá Gɔdányá. Umabá mɔɔn wá Fanuɛla wa nigúl ná Asɛ́la. Umabá uganyɛ gilunu, umɔsɔ́d na ɔnɛ́m waga duɔŋ dútíndád nomo, 37uwɔlɔb gisi, uwɔsɔ́dɔɔn guám duɔŋ etín éní na duɔŋ dúní, uwɔlɔbɔɔn agá ɔnyɛb, walaan Gɔdányá buol na budug anyɛ na buɔ́s, wala gubílég gá manyaán, ubísógólonyi. 38Uwasiámɛ́nɛ́n agá gɛsɛgɛl giád, uwɔb gá guéŋen Gɔdányá giod gá bese. Uwɔyɔ buóny bá mɔ́nɔmbɔ na manda mábɛ́lɛ́ŋaná wɔ́ gá ebe gidigid bámáabá bébídenyi ká Gɔdányá dúgún Yelúsalɛm.
39Bebiény bá Yésu máal bómófuógidonyi nŋɔyɛdɔ ya gisele gá Ɔgúnɔ́, obónd Galilé agá tísɔn wa Násalɛd.
Gɔgɔm gá Yésu
40Mɔ́nɔmbɔ magɔmaán, wond ugúnínaan. Umabá ófuógón na nsiŋi, Gɔdányá fɔ́na wɔ́. 41Sigi yɔŋ, bebiény bá Yésu mabá bábaan Yelúsalɛm gá budɔ́mb bá Pásika#2.41 Pásaka ayana nyɛ budɔmb bá guám agá buɔ́l, alɛ́ŋɛ́d ɛsod 12.21-27. 42Yésu máal uganyɛ na duɔŋ duát na duándɛ, uwɔb nɔbɔ ɔlɔŋ gɔɔ́gɔ anyɛ́ gɛsɔ gɔ́b gá budɔ́mb máabá. 43Budɔ́mb máal ná guman, ebégúgeen ɔgɔbɔ́, mɔ́nɔmbɔ Yésu uwesién Yelúsalɛm, bɔbɔ́ ta gulɛns. 44Abándɛd ngúme ya buɔ́s bádián wɔ́, bábɛ́dága ká Yésu nyɛ ɔlɔŋ na bɔsɔ́gɔ́ bámáabá sɔ́n gá budɔ́mb ubuány, abábád gudúm guamba wɔ́ agá gadágadá wa besié bág bómodió na begúl bɔ́b. 45Bádián wɔ́, obónd Yelúsalɛm gá guúl guámbá wɔ́. 46Buɔ́s bá gádadɔ bá niamba, ɛ́ɛŋ guɔfuɔ́gɛ́n wɔ́ ilukié agá ɔnyɛb wá Gɔdányá, gadágadá wa bóŋ bisele, ubɛ́dɔ́lɛgɔn bɔ́ wond woófoon bɔ́ iŋófuny. 47Nsiŋi yaga na biondíny bág máal ká band gidigid bɔ́mɔ́ɔbɛ́dɔ́lɛ́gɔɔ́n wɔ́ méŋemeŋ. 48Bámáal na guɔfuɔ́gɛ́n wɔ́, abáb gá guméŋemeŋ. Inyódió ganyɛ gág ká: «Mɔɔn, kasɛ́ gusɔ́d uguány e? Nam na tiɔ́ dɛgúguamba na ɛŋágɛ́nɛ́n gidigid.» 49Uwondinyi bɔ́ ká: «Nugúŋamba góbusió bá giág e? Nudigúlɛnsan ká nŋúbianan ká mbábá agá gians gá Baba e?» 50Bɔ́bɔ́ ta gusɔ́ŋɔ́n buóny umɔ́ɔyɔɔ́n bɔ́. 51Ta anaány uweguúg ɔlɔŋ nɔbɔ Násalɛd. Umáal bɔ́ nŋɔ́bɛnɔ, inyódió mabɛ́dɛ́gán manda amaány mem agá ɔdɛm. 52Ndényé na nsiŋi na nɔgɔm ná Yésu mɔbiɔ́yɛ́kɔ́nɛ́n, Gɔdányá na band mɔ́ɔbɔɔ́n bese naga.
ទើបបានជ្រើសរើសហើយ៖
Lúkasa 2: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
