Galát 6
6
1Buam, búmánɛ́g ká mɔnd saguɛn agá gifondi, banuá ɔbɔ́ Ɛsámb yá Mefúny éndenyé, ónuondí wɔ́ na ginɔ́g gá ɔdɛm agá nŋili ya bese. Nubínyáŋanyaŋ banuá sɔ́n ká nɔdɛguɛ́n agá yɔɔ́bɛ́dɛn. 2Énudúgúnénín agá meyú; númála anaány, nugúfuógonyi bisele bá Kilíse. 3Mɔnd mɔ́bígɔ́lɔɔn giant gá buanda, ɔwɔ́ e udɛbá ta buanda, ugúbínéŋe ɔwɔ́ muát. 4Nsɛ́ mɔnd gidigid biánɔna; úmaán ká uguála bese, nsɛ́ búlɔ́b bág. Udigúbianan ká úgédenyi gusɔ́d gág na gusɔ́d gá sɔ́gɔ́. 5Sig mɔnd a gabɛ́dɔ́gɛn gɛnɔ́ gág. 6Mɔnd ɔwɔ́ béfúnyifunyé Ndág ya Nsɔ́m gúbianan ká waal wéŋin mɔnd ufúnyifunyé wɔ́ niaf nímoóm ná manda ɔmɔ́ ubiananá. 7Nudibínéŋ, bédigúfénen Gɔdányá, gágual ká, buanda ubú mɔnd nyɛmaná búbú wogonó. 8Mɔnd mála manda másɛ́maná wɔ́, mégesúgúdenyi guɔ́n wɔ́. Úmála gɔg ɔmɔ́ másɛ́maná Ɛsámb yá Mefúny, ígaal ká woóg gusɔ́d gá kandɛ nɛmanɛ́ná. 9Anyɛ́ búnyá anaány, búnyɛ́ bese ká dɛdɛdɔmbɔ guala bese, gá giág ká mbány ya gɛsɛgɛl gesiege diógo bɛ́nɔ́g bá manda dímáal didibiá masɔ́lɔ́gɔgɔ. 10Buád buanda, anyɛ́ dɛmányá na gɛsɛgɛl, nsɛ́ diálá bese gá band gidigid, dɔ́mbá dɔ́mba gá belimen bás agá guádáb.
Gubiés gá gusúgúdenyi na imbígélid
11Inyɔ́ŋ sá biantá isiány nuánaná, yaŋuá muát na ɔmbɔ́g wám imɔ́nunuɔ́ŋɛ́n. 12Band bánúgúdaná ká núbiánsa nyɛ band bámbaná gúbídíyenyi, báguala anaány gɔɔ́gɔ gágual ká band disésényi bɔ́ anyɛ́ bésésenyé bɔsɔ́gɔ́ bɔ́yɔnɔ́ Ndág ya Nsɔ́m ya nigú ná Kilíse agá bɔdɛ́d bá gɛsanda. 13Band abaány bábiánsaná, bɔ́bɔ́ muát bódífuógónyí bisele, báguámba ká gesí numábiánsá bábád gubɛ́kánya ká nunyɛ ekelu nɔbɔ. 14Gá igám giáy, ambíkanyɛ wám nyɛ gɔɔ́gɔ agá bɔdɛ́d bá gɛsanda gá Ɔgúnɔ́ wásɔ Yésu Kilíse. Nigú nág agá bɔdɛ́d bá gɛsanda iniány, nɛ́nɛ́ niálaná ká ɛ́lɛ́ŋa manda má gus anyɛ mányɛ meguén, mɔ́mɔ́ sɔ́n málɛ́nŋa anyɛ inyɛ eguén. 15Buád buanda, gubiáns ɔ́gɔ́ ká kandɛ gubiánsa diábá na mfí; gɛŋɛ́lɛŋɔ́siɔ gá gusɔ́d, gɛ́gɛ́ gínyá na mfí. 16Band bem bándaná anyɛ́ inúfúnyifunyé, ta band bá Gɔdányá, nsɛ́ gufuog na bese wá Gɔdányá bá nɔbɔ.
17Gudúm nɛ́nuán, gɔb nobusió, mɔnd diánd gunsésidenyi, góbúsió ká binin ebie inyá na bɛ́, bígúdíyenyi ká nguɔ́bɔnɛ́n Yésu. 18Belimen, nsɛ́ gɛfɔn gá Ɔgúnɔ́ wasɔ Yésu Kilíse bá nanɔ anaány.
ទើបបានជ្រើសរើសហើយ៖
Galát 6: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល