Galát 5
5
Nudiand guond gá buɔ́l
1Gá meliŋítas Kilíse madíaŋɔ́n ká dɛdiánd gubá biɔ́l bá bisele. Énudímbímíd, nudɛbɛ́nɛɛ́n ká nuánd guond gá buɔ́l. 2Yaŋuá Pólo, ngúnuɔ́yɔɔn ká númábiánsa, anaány gúnyá ká Kilíse dɛbá ta buanda gán góbúsió. 3Ngúbaan nobusió na guɔyɔɔn band gidigid báládaná buensi ká bágúbianan ká bófuógi bisele gidigid. 4Banuá nuɔyɔnɔ́ ká Gɔdányá gonuóndi besi agág gá eŋís gágual ká nugúfuógonyi bisele, nuganyɛ babiádɔ́nán na Kilíse, numáyɛ́n bese wá Gɔdányá. 5Gá igás giáy diguóndonyi ɛdɛm agá Gɔdányá, ɔwɔ́ ugonúdióndi besi agág gá eŋís; gágual ká dɛguádábaan. Búbú dibídenyé agá bugaga bá Ɛsámb yá Mefúny. 6Búnyá ká, mɔnd gidigid uganyá agá Yésu Kilíse, ta ubá aŋansan, ɔ́gɔ ká kand guansa, búdɛ́bá giant gá buanda, gɔɔ́gɔ guádáb guánɛ́ganɛ́gá agá ɛlɛ́ga, gúgɔ́ gúnyá gianta gá buanda.
7Numabanyɛ́g na guádáb bese, giág gínyá gunúlég ká núbɛ́lád meliŋítas e? 8Manda bányá gunuɔ́yɛdɛn ká nuála digúlenin aga Gɔdányá umáanɔ́bɛ́lɛ́gɛ́n. 9Saá nugúlɛnsaan nsab yɔyɔnɔ́ ká Giád gá gufúnyifunyi, ta gíbá siɔdɛd gúnenenyi giɔ́b gidigid a#5.9 «Mɔɔn wa ginudúgin gúfudugenyi gidɔ́b.» Nsab iyán inyá iŋɔ́ŋɔ́n agá Musamb má Mbɔbɔnɔ? 10Gágual ká anyɛ́ dɛnyá baladán na Ɔgúnɔ́, buád buanda ndiákɛ́náná ká nugalád nŋili imodió. Ngúlɛnsan sɔ́n ká mɔnd unúbueŋenyé, ta ubá ányá, Gɔdányá gesésidenyi wɔ́. 11Gá ugám buam, ndigúfúnyifunyi ká nuál gubiáns ká Gɔdányá bád gunuán besi agág gá eŋís. Búbá anaány, gési band dɛguánd gunsésenyi, gési Ndág ya Nsɔ́m ya nigú ná Kilíse agá bɔdɛ́d bá gɛsanda diguánd gusésenyi ta mɔnd. 12Nsɛ́ band abaány bénúbueŋenyé ábaan nobusió na gubiánsa, bébiélenyi muát musam.
Na imeku na gíliíndié
13Banuá belimen bám, Gɔdányá menuémí gá buɔ́l bá bisele. Anɛ́ nuganyá anaány, nudɛbɛ́dágɛ́d ká nugala anyɛ́ nubílénené; nunyá ká núbílénenin nuónd nudúgúnenin banuá na banuá. 14Gá giág ká ɔduɔ́ wá buóny wá bisele nyɛ táŋ ómoom, ɔ́wɔ́ únyá ká: Bíléné sɔ́g mɔnd a anyɛ́ ebíbílénené aŋuá muát. 15Oó, númédúm gunúmanɛn, nubɛ́láfa banuá na banuá anyɛ manyam má ɛyɔ́m; ánubɛ́nyáŋanyáŋ, Nugegídenin. 16Nguɔ́yɔ ká o: Ánutɛ́n Ɛsámb yá Mefúny ínuéndenyi, anaány nudɛgand guala gúbílén gá imeku. 17Góbusió ká gubílén gá mɔnd dɛbá buanda búmoom na gubílén gá Ɛsámb yá Mefúny, gá Ɛsámb yá Mefúny sɔ́n dɛbá buanda búmoóm na gá mɔnd. Idény inkim guádɔ́ganan, buád buanda nudiábáná bágual buanda nubílénené. 18Númábɛ́nɛn gɔg ká Ɛsámb yá Mefúny nuéndenyi, nudɛgand gubá biɔ́l bá bisele. 19Dɛgɔ́lɛnsan manda nuɔ́l ná mɔnd bílénené, mɔ́mɔ́ mányá: Guanda musɔm, gubidɔ́bɔ, bugendi, 20gugúmenyi bagɔdányá bómodió, ndémb, gufɛmanɛn, gusáŋa, yág, ilób na anama yá dusalasala gidigid; 21gubísésenyi manda má band, gubálan magɛ́b, gigoŋ, na manda giod móndodió mábɛ́fuágananá amaány. Imóndídónyí gunúbiés ká: Band bálaná nɛnama ná manda anyɛ amaány, bédigebíŋín agá bufuŋ bá Gɔdányá. 22Manda eme móloninó agá Ɛsámb yá Mefúny: ɛlɛ́ga, bɛdɔdɛn, gufuog gá ɔdɛm, guɔ́mínɔn, bese, gudúgunenin na gubá mɔnd wa meliŋítas, 23kand ɔyɔ́gɔ́, gumán ɔdɛm. Bisele digúsáŋɔ́na manda anyɛ amaány. 24Band bɔ́bɔnɛnɔ́ Yésu Kilíse, mabɛ́yɛ́bɛ́d biád bá manda ɔmɔ́ bébílénené guala, bunyɛ anyɛ bámadɔ́ŋ mɔ́ agá bɔdɛ́d bá gɛsanda. 25Anyɛ́ búnyá ká Ɛsámb yá Mefúny gúdiéŋen gusɔ́d, nsɛ́ dɛ́nɛn yɛ́ yéndenyi gusɔ́d gás.
Bisele bá Kilíse
26Didibíbúlígényí, dɛdɛbɛ́ŋánɛ́n, didialánɛ́n yaág.
ទើបបានជ្រើសរើសហើយ៖
Galát 5: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល