Galát 4
4
Bufilí bá baan bá Gɔdányá
1Buanda yambaná ká nuɔ́b nyá ká, mɔ́nɔmbɔ mábá umányɛ udɛgɔmɔ ká úgád bigínd bá sié, udigúdúmbanɛn na giɔ́l ta anyɛ́ unyá ká unyɛ ogíndigínd. 2Gɛsɛgɛl uganúbá umányɛ anaány, band béndenyé manda mág ganɔna wɔ́, bónd béndenyi bisíg-síg bág guám agá gɛsɛgɛl ɛgɛ́ sié máasɔ́mb. 3Basuá sɔ́n dɛnyɛ nɔ́. Gigúl ɛgɛ́ dɛmáabá dɛmányɛ bábayɔ, dɛmábá biɔ́l bá biád bá bíliíndié bá gus egue. 4Gigúl Gɔdányá máasɔ́mb máal na gueg, uwadɔ́m Mɔɔn wága egegus agá duna dá agánd, uwebíbién, uwagɔmaan agá bisele bá Beyúdɛn, 5ká úsiáŋɔ́n ebe bányá biɔ́l bá bisele; ká údiíyi basuá bem baan bá Gɔdányá. 6Buanda búdíyenyé ká nunyɛ meliŋítas baan bá Gɔdányá, nyɛ́ ká umadɔ́m Ɛsámb yá Mefúny yá Mɔɔn waga agás gá ɛdɛm. Ɛ́yɛ́ yɔ́yɔnɔ́ ekelu magɔ́gɔ́n ká: Ába! gúgúnyá ká: Babá! 7Nudɛbá sɔ́n gɔg biɔ́l, nuganyɛ nɛ́nuán baan bág. Anyɛ́ nunyá baan bág gɔg a, uganúfá buanda gidigid ubú umáanúdánɛ́n.
Ɛŋágɛ́nɛ́n sá Pólo
8Nsua nudɛmalɛnsaan Gɔdányá, numabá biɔ́l bá bagɔdánya bányá bimfólóló. 9Nɛ́nuán gɔg, anyɛ́ nuganyá gúlɛnsaan Gɔdányá, yɔ́yɛd ká Gɔdányá ganyá gúnúlɛ́nsana, nanyá nunyá guand guond na gélem gá gúládaan sɔ́n bimfólóló bá manda ká nuánd guɛ́yɛ́n mɔ́ biɔ́l e? 10Nugúgɔ́lɔɔn mɔɔ́s mómodió, nugɔ́lɔɔn iyól síndodió, na bigúl na duɔŋ dúndodió giant gá buanda. 11Nguákɛ́nan ká buól inyá guala gán góbúsió ká búdɛ́guá agá madɛ́ga.
12Buam, nganyɛ anyɛ banuá nudiábáná Beyúdɛn! Kányɛ inúbísógólonyó nɛ́nuán ká numbɛ́fuág, nudɛbá gɛsan nam. 13Nugúlɛnsaan nɔ́ bese na bese ká gunúma gúmáal ká nsɛ́nuɔ́yɛ́dɛ́n Ndág ya Nsɔ́m gá gisiósio. 14Gunúma gám menúsésídényí giod, ta anaány nudimoŋomb ta gunsɛ́gɛ́n. Unuɔngɔ́l anyɛ ɛngɛlɛs ya Gɔdányá, gúmén anyɛ Yésu Kilíse muát. 15Numabá agá ɛbal gigúl igiány! Giág gɔ́g gínyá guala e? Gágual ká ngúlɛnsaan bese na bese ká, núbiánán giás, gesí numɔbísɔ́gúnɔ́ eŋís numfá! 16Nganyɛ ɔmbɛ́lɛmbɛ́l wanɔ gágual ká ngúnuɔ́yɔɔn meliŋítas e? 17Band abaány bénúnéŋené, bánúbɛ́gɔ́dɛ́nan, bányɛ na biád bá ɛmbɛ́dágɛ́dɛn. Báguámba gɔɔ́gɔ ká bádiádɔ́n namɛ na nanɔ, nuɔ́bɔnɛn bɔ́. 18Búnyɛ́ bese nɔ́ ká band biéŋeen gá buanda búnyá bese ímábá búnyɛ́ agá nŋili ya bese bigúl bim, ta mbá ta ndɛbá. 19Baan bám, aya anyɛ́ inyaá, nguánd guɔ́bɛ́gɔɔn gán góbusió anyɛ agánd uganyá wegubién. Ngɔ́bɛ́gɔn anaány guám anyɛ́ nuganúbɛ́fuág Kilíse. 20Ngúbíléne ká, gesí nɛ́nuán inyɛ agán gá masiá ká nlɛ́ns nanyá inyá inuɔ́yɔɔn manda amaány, gágual ká ndɛgɔ́lɛnsan nanyá inyá ká yaál nanɔ!
Alad ándɛ
21Nguɔ́yɔ ká o, banuá nubílénené ká bisele núbianan, ɔ́nuŋɔyɛ́dɛ́n ɔ́gɔ nugúsɔ́ŋɔ́na buóny biɔ́yɔnɔ́. 22Saá búnyɛ́ buɔ́ŋɔ́n ká Ábalaháma mabiánán baan bándɛ e, uwebién ewe na Agála giɔ́l gág, omodió na agány waga wá gigiŋ ɔfɛ́n ká Salá e? 23Mɔɔn wa giɔ́l gág mebíbién anyɛ́ baan gányá bébíbiéne. Mɔɔn ɔwɔ́ uméebién na agány waga, mabá mɔɔn Gɔdányá máadánɛ́n wɔ́. 24Bagánd ebe bem gúdídíyenyi alad ándɛ. Nóbusió gúlenin agá nɔgɔnd bábɛ́laná ká Sinayí. Baan gidigid bóloninó gá nɛ́ nyɛ biɔ́l: Nɛ́nɛ́ nɛ́nyá giɔ́l Agála. 25Wád Agála nyɛ anyɛ nɔgɔnd bábɛ́laná ká Sinayí unyá agá gus gá Alabí. Agála nyɛ sɔ́n anyɛ tísɔn wá Yelúsalɛm wa nɛ́nuán unyá giɔ́l na band bányá kɔ́. 26Yelúsalɛm wa muana udiábáná giɔ́l, ɔwɔ́ unyá inyódió wasɔ. 27Gágual ká búnyɛ́ buɔ́ŋɔ́n ká:
Yayábá aŋuá gɛwáda gá agánd, aŋuá amáal edibién;
ágaán duwéwé, aŋuá amáal ɔdiɔ́bɛ́g, aŋuá amáal adɛlɛ́nsɛ meyú má nubiényé;
ɛɛ́ŋɛ, agánd ɔwɔ́ béméen, ugabia baan giod
gɔdɔ́mb agánd unyá egiŋen.
28Belimen, gá ɛgán giáy, nunyɛ baan béméebíbién agá ndán ya Gɔdányá, gɔɔ́gɔ anyɛ Isáka. 29Agá gɛsɛgɛl igiány, mɔɔn uméebíbién anyɛ́ baan ganyá bébíbiéne mesésényí sɔ́gɔ́ uméebíbién anyɛ́ Ɛsámb yá Mefúny mɔ́ɔyɛ́d. Búgúbiála nɔ́ sɔ́n ta ínen eye. 30Búnyɛ́ buɔ́ŋɔ́n agá Musámb má Imbɔbɔnɔ gɔg ká: Kɔ́ŋɛ́d giɔ́l igiány na mɔɔn waga, góbusió ká, mɔɔn wá giɔ́l dɛgúbianan ká ugád bigind bá sié, mɔɔn wa agánd udiábáná giɔ́l ubiananá ká ugád bɛ́. 31Buam, dɛdɛbá baan bá giɔ́l, dɛnyɛ baan bá agánd udiábáná giɔl.
ទើបបានជ្រើសរើសហើយ៖
Galát 4: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល