Markus 16
16
Zhinha Yesu a bəza a jiɓ
(Mat 28.1-8; Luk 24.1-12; Yhw 20.1-10)
1Tiɗa ndə, vah ta nəp Yahuda aagi a pew tə, Mariyama Magdala abə Mariyama mana Yakuba, abə Salume aa tasəkəmha ꞌurdi aara, aska a nda a bəzə ata zlikusəm Yesu. 2Biŋ biŋ tə, vah dəmas, tsaw aa nda a ma jiɓ, tiɗa pish a kambirha. 3Aa kazlap a walaŋ ta, aagi iŋgaya: «Ma kaapələmaŋkwa mabaleleŋ ma ndza a ma jiɓ vaye?» aagiy. 4Ama, sar aagi la ya, mabaleleŋ tapələmaya, avəli bay ŋkəɗaŋ ana mabaleleŋ watsa. 5Tsaw aa nda a jiɓ, aa gəra mbə dərlaŋ minja a kandza ata guva zəm, abə rəkuts ma peɗek ata zlikusəm, ŋzliŋ tadzata bəza. 6Ama i təmta iŋgaya: «Huni ɗal ŋzliŋ səku! Huni gas Yesu ndə Nasaratu, ndə aa dar ka ata mpi ma gəzlaŋgarak. A ɗi akas, tagarha tə a wəzəm a jiɓ, huni taŋzə la ndə aa wan ka a heɗe. 7Anawatsə, huni nda, huni ghalatana ma watsə a Piyer abə magəli tə ndiɓi aagi: a aɗa mpər aha huni a Galili, huni agəra a tsutsa andza ndə a zlapahuni ka.» 8Wali watsa aagi tsaw aa nda ta a bəza a ma jiɓ abə shi, aa kanaana, ŋkwaɓ ta tadzəvəɗ tə, aa taghalanə ana ala kwa akas, ara ndə ŋzliŋ a kadzata.
Yesu taghal ha tə a Mariyama Magdala
(Mat 28.9-10; Yhw 20.11-18)
9[A kwaf vah dəmas ndə Yesu a ndaa tə a bəza a jiɓ, a diw a ghalanə ha tə mpər a Mariyama Magdala ndə a va a gam miɗ ma gamak ŋshiliɗ a ha tə. 10Tsaw a nda a ghalatana səkən ndə a gəra a magəli Yesu aagi, tiɗa ataa aŋta, aa ata mci, aa kahan. 11Ama, ndə aa zlima: «Yesu ndza tə abə nja, sa tagərazə,» iy. Aa taji ma təs. 12Azha a diwzha tə, Yesu taghalatana ha tə a magəli tə aagi gbak, tiɗa ata təf ta nda a damə abə mbaɗ zlikusəm minja. 13Zhin aa zhinha a ghalatana a ndiɓi aagi, ama aa taji ma ta səku wəruk.]
Ghalha ha Yesu a magəli tə ma wam aha ŋtaɗ aagi
14[Mbara azha, tiɗa ndə aa kazəm wəda, kərəɗ a kərəɗaktana a magəli ma wam aha ŋtaguleŋ aagi, ghal a ghalatana ha tə, dəba a agulakata ara dezlima ta, ndə aa ŋkula ɗal awa, a həji ma gəra aagi ndə a zhinha tə a bəza a jiɓ. 15Azha, zlap a zlapatana, iŋgaya: «Huni nda a ŋge a manahayak tiwtiw, huni ɗafatana Ma wiyə ma təwah a həji aagi tiwtiw, kwa a vatəy. 16Ala ma aɗal awa a ɗal batem, a aɗa reh. Ama, ala ma ŋkula ji a ɗal awa, guma a heɗe, a adzaw tə. 17Tsakwa ana shiŋ səkən ma kaalah həji ma ɗal awa aagi. Abə zləm naka, aagi agam miɗ ma gamak aagi, aagi azlap ma wiyə, 18aagi aɗa kula a mbəla sheshuk abə ra, kwa menjivek tadza həji, a kaɗalatana səkən minja akas, aagi atsa ra a ha həji dawər aagi, aagi aɗa reh.»]
Yesu ta tə a wəzlaf
(Luk 24.50-53; Zlh 1.9-11)
19A diwzha ndə Bay Madagal Yesu a zlapatana bəza, tsaa kanda tə a wəzəm a wəzlaf, ka a ndza tə ka abəra Bizlaf ata guva zəm tə. 20Magəli tə aagi tsaa kanda ta a ɗaf Ma wiyə ma təwah a ŋge a manahayak tiwtiw. Bay Madagal taɗal zlən abə təmta, tavəlatana ɓərɓər a wəzaha a ma ndə aa kaghalə abə tsaɓan ndə aa kaɗal aagi.
ទើបបានជ្រើសរើសហើយ៖
Markus 16: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល