Markus 15
15
Yesu atama Pilatu
(Mat 27.1-2; 11.14; Luk 23.1-5; Yhw 18.28-38)
1Biŋ biŋ tə, magulakwakw maɗal kwakus aagi, həji magulakwakw aagi abə masərək ma ma garagar aagi abə magulakwakw ma zla guma ataa Yahuda aagi, tiwtiw aa tadzam ta ka a zlap ma ta. Dzaw aa dzaw aka, aa tsaa kanda ta abə sha, leŋ aa daazə, pa aa vəlanə a Pilatu. 2Pilatu ɗiw a ɗiwzə, iŋgaya: «Hwa ana bay ataa Yahuda aagi vəw?» Yesu, zhin a zhinanə, iŋgaya «Hwa tə, hwa ana ma zlap,» iy. 3Magulakwakw maɗal kwakus aagi, dəba aagi akarakənə ma ata səkən aagi dagala. 4Pilatu ɗiw a ɗiwzə zhana, iŋgaya: «Hwa kazhin zlap wəra? Hwa kagəra ma ndə aa katək ata hwa ma tiwtiw watsə wəra?» 5Ama, kwa Yesus a kazhinanə akas, hak Pilatu a ghərəŋ tə a heɗe.
Guma tazlaya ata Yesu a dza aka a mci
(Mat 27.15-26; Luk 23.13-25; Yhw 18.39; 19.16)
6Kala ndə gwaygwaya Paska a kaɗal, Pilatu a kapəlha mava ma ndza a jak ta sa yaka ndə həji aagi kamayə ŋtaɗ. 7Ma vah watsa, ala minja zləm tə Barabas a jak ta sa yaka abə həji tə ndiɓi aagi. Aa tadza ala aka, tiɗa ndə aa həɗəw ta abə mamar hayak. 8Ŋgaɓa həji aagi taa ta ara Pilatu, aa zlapanə aska a ɗalatana səkən ndə a kaɗalatana pal. 9Pilatu dəba a aɗiwzata, iŋgaya: «Huni may ci, sa pəlahuni bay Yahuda aagi aka vəw?» 10Ara ndə a kasən ci, magulakwakw maɗal kwakus aagi daanə Yesu a mshiɗ. 11Ama magulakwakw maɗal kwakus aagi tsa kaŋtsuk həji aagi aska a zlapanə a Pilatu, a pəlazatana Barabas. 12Pilatu ɗiw a ɗiwzə həji aagi zhana, iŋgaya: «Sa aɗalzə abə ala ndə huni kayə “bay Yahuda aagi” avaŋga?» 13Aa zhinanə abə dza wəla, aagi iŋgaya: «Dar ka ata mpi ma gəzlaŋgarak!» aagiy. 14Pilatu ɗiw a ɗiwzata: «Səkən ma gamak ndə a ɗal veme?» iy. Ama zhana, dəba aagi adza wəla abə ɓərɓər tə, aagi iŋgaya: «Dar ka ata mpi ma gəzlaŋgarak!» aagiy. 15Ndə Pilatu a ɗiw a vəlatana ɓas a ŋgaɓa həji aagi, pəl a pəlatana Barabas aka. Azha, zlap a zlapatana a aagi a gəzl Yesu, pa a vəlatana a suji aagi, aska aagi adar ka ata mpi ma gəzlaŋgarak.
Suji aagi aa kaɓas ata Yesu
(Mat 27.27-31; Yhw 19.2-3)
16Suji aagi, jaɓ aa jaɓ Yesu aka, a gi ataa ala ma dagal ma ndza aha hayak. Ata la zla guma, dəba aagi aya ndəɓ suji ndiɓi aagi tiwtiw. 17Səɗ aa səɗanə rəkuts ma ghəm, ma ɗa rəkuts bay, pa aa tsanə daŋgay ma dza abə jigiɗ ka a ha. 18A diwzha tə, dəba aagi azlapzanə, aagi iŋgaya: «Aŋkwa, bay Yahuda aagi!» 19Dəba aagi adza a ha abə ŋkem, aa kaŋtif majignek a heɗe, aa tsa kagəliɓ a mahubəm tə, aa kaŋtiŋ ha a hayak a hawanə. 20Ndə aa kəɗaŋ ɓas ta bəza, səɗ aa səɗanə rəkuts ma ghəm a bəza, zhin aa zhinanə rəkuts tə aagi ka. A diwzha tə leŋ aa daazə aha bəza, aska a nda darə ata mpi ma gəzlaŋgarak.
Dar Yesu ata mpi ma gəzlaŋgarak
(Mat 27.32-44; Luk 23.26-43; Yhw 19.17-27)
21Ndə aa kanda ata təf, lima aa lima ta abə ala ndə Sirene, zləm tə Simun, cina Alekzandire abə Rufus, a ndaa aka a damə a la. Suji aagi tak aa takə bəza a tiw mpi ma gəzlaŋgarak ataa Yesu abə ɓərɓər. 22Jaɓ aa jaɓ Yesu ata la ndə aa kayə «Gwalgwata», a may a ghal ci, «La kirŋgisl taba ha.» 23Aa kamay a sanə mavə ma kavaɗa ka abə səkən ma ɗa mir, ama, Yesu a kajis.
24Azha, dar aa dar ka ata mpi ma gəzlaŋgarak, ɓizh aagi rəkuts tə bəza, aa fak njil, aska aagi agəra ala ma kaaji rəkuts watsa. 25A ɗa a kwaf ata ler dzaŋfaɗ abə aa dar ka ata mpi ma gəzlaŋgarak. 26Aa taŋtir ka a wəzəm ata ha tə, ata mpi ma kəslampalah, aska a ghal ma ndə aa dzə ka a heɗe, aagi iŋgaya: «A ɗa bay Yahuda aagi,» aagiy. 27Suji aagi tadar həji badaway ndiɓi aagi ka gbak abəra ata mpi ma gəzlaŋgarak, ŋtaɗ ata guva zəm, minja ata guva gula. 28[Ikwa abə a ɗal andza ndə ma Bizlaf a ghala ka a ɗerewal tə, iŋgaya: «Tatsaya a taba həji ma gəy ma aagi.»]
29Həji ma kapew gwara a tsutsa aagi ya, aa kakpaslakpasla ha, aa karə, aagi iŋgaya: «Ya! Hwa ma kaɗiw a ghurəm jak kwakus Bizlaf aka, ata wan mahkaɗ, taꞌunaya zhana, 30hwa, reh ha kwa bəza abə ha kwa yəm, tadukha ha kwa a bəza ata mpi ma gəzlaŋgarak azha!» 31Andza sha, magulakwakw maɗal kwakus aagi abə masərək ma ma garagar aagi, aa kaɓas ata Yesu, aa kazlap a walaŋ, aagi iŋgaya: «Tarehha həji ndiɓi aagi ci, reh ha tə takum vəw! 32Andza ala watsə a ɗa Kərist, ma ɗa Bay Isərayila aagi, matadukha ha tə a bəza ata mpi ma gəzlaŋgarak, a həji a ɗalanə awa aska ma tə.» Həji ma ndza ata mpi ma gəzlaŋgarak abəra aagi, aa karə yəm.
Mci Yesu
(Mat 27.45-56; Luk 23.44-49; Yhw 19.28-30)
33Tiɗa pish ɗawarwar, ləvaŋ a ɗal ata manahayak tiwtiw a gwar a ler mahkaɗ a ŋtsəɓahw. 34Ata ler mahkaɗ, Yesu dəba adza wəla abə ɓərɓər tə, iŋgaya: «Eli, Eli, lama sabaktani?» A may a ghal ci: «Bizlaf naka, Bizlaf naka, hwa mbaslaka ka ara veme?» 35A taba ta, həji ma ndza a tsutsa aagi, ndiɓi aagi, aa kazlima, aagi iŋgaya: «Huni taŋzə, tsa kaya Iliya!» 36Ala minja a taba ta, a vasəha a shi, caɗ a caɗ patak aka ata ŋkem, tsaɓ a tsaɓ ka a mavə ma məsməs, pa, a vəlanə a Yesu aska a sheɓi. Iŋgaya: «Kwagwa, həji kaagəra ndə Iliya a kaandaha, a kaatadukhazə a bəza ata mpi ma gəzlaŋgarak!» 37Ama Yesu dəba adza wəla abə ɓərɓər tə, mca a mca tə.
38Gidiwri ma ndza ata bəra la a jak kwakus Bizlaf, ɓizh a ɓizh tə gbak, a ŋhwak ka a wəzəm a ha tə, a cap a nduŋ. 39Madagal ma ndza aha suji aagi ma kahəbəra Yesu, ndə a gəra mci tə azha, iŋgaya: «Mbə Bizlaf ana ala watsə ŋter,» iy.
40Wali ndiɓi aagi a tsutsa yəm, aa kasarazə ata gədək tə. A taba ta: Mariyama ndə Magdala, Mariyama, mana Yakuba ma feŋ, abə Yuses, abə Salume. 41Aa tasəbarha Yesu, aa taɗalanə zlən tiɗa ndə a Galili, vərəm ana wali ndiɓi aagi ma səbarata a nda a Wərusalima.
Kah Yesu
(Mat 27.45-56; Luk 23.44-49; Yhw 19.28-30)
42A ɗa ŋtsəɓahw tiw, azha ndə a ɗa, vah ta sla kusəm aska vah ta nəp Yahuda aagi. 43Yusufu ma ndza a hayak Arimatiya taa tə, ala madagal ndə həji kahawanə, ala ndə sləf a heɗe a taba həji ma ndza ata la zla guma ma dagal aagi. A kateh ndaha la ndza bay Bizlaf yəm. Sakw i ꞌunəf aka, tsaw a nda ara Pilatu aska a ɗiwha zlikusəm Yesu. 44Ŋgak, Pilatu a ghərəŋ tə ndə a zlima Yesu tamca tə kahkah. Daŋ a yaha madagal ma ndza aha suji aagi, ɗiw a ɗiwzə, iŋgaya: «A mca amcana tə vəw?» iy. 45Ndə madagal suji aagi, a ghalanə ma ma ndza a heɗe bəza, pa a vəlanə təf a Yusufu, a ji zlikusəm Yesu. 46Yusufu səkəm a səkəmha rəkuts ta kah mci, taduk a tadukha zlikusəm Yesu a bəza a wəzəm ata mpi ma gəzlaŋgarak. Paɗ a paɗ ka a rəkuts watsa, pa a tsə ka a jiɓ ma ra ata dehweɗ. Zhana, tuŋgul a tuŋgulha mabaleleŋ, tsak i ma jiɓ aka. 47Mariyama ndə Magdala, abə Mariyama mana Yuses, aa kasarə abə aa kah Yesu.
ទើបបានជ្រើសរើសហើយ៖
Markus 15: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល